Над половина од ваучерите за инвертер клими веќе се подигнати, а процесот се одвива со засилена динамика низ цела држава, информираа од Министерството за енергетика, рударство и минерални суровини.

Од вкупно 4.070 доделени ваучери, во периодот од 18 до 25 март подигнати се 2.084, што претставува повеќе од 50 проценти од предвидените, покажуваат податоците добиени од меѓуопштинските центри за социјална работа.

„Процесот на подигнување на ваучерите се одвива непречено и со засилена динамика на терен. Дневната динамика покажува континуиран интерес и зголемена активност кај граѓаните во сите општини низ државата“, информираат од Министерството.

Оттаму посочуваат дека податоците потврдуваат ефикасна реализација без застои и во согласност со предвидената динамика.

Граѓаните кои се наоѓаат на објавениот список можат да ги подигнат ваучерите во меѓуопштинските центри за социјална работа во општината каде што живеат најдоцна до 17 април 2026 година. По подигнувањето, тие ќе може да се искористат кај компаниите со кои Министерството има склучено договори.

„Со ваучерот граѓаните добиваат можност за набавка и вградување на инвертер клима уред со моќност од 3,5 kW и најмалку енергетска класа А+, во вредност до 28.000 денари, без дополнителна доплата“, наведуваат од Министерството.

https://energy.gov.mk/mk-MK/odnosi-so-javnost/rezultati-i-spisoci

Ваучерите може да се искористат најдоцна до 15 октомври 2026 година, а мерката е дел од Програмата за заштита на ранливи потрошувачи на енергија.

„Продолжуваме со интензивна реализација на мерките за поддршка на ранливите категории граѓани, со цел намалување на трошоците за енергија и подобрување на енергетската ефикасност во домаќинствата“, додаваат од Министерството.

The post БЕЗ ДОПЛАТА ДО НОВА КЛИМА Над 50 проценти од ваучерите веќе подигнати appeared first on plusinfo.mk.

Државата обезбеди 2,7 милиони евра со кои ќе купи клима-уреди и ќе ги вгради во домовите на ранливите семејства.

„Владата предводена од ВМРО-ДПМНЕ покажува и докажува вистинска грижа за сите категории на граѓани, а таа грижа посебно се истакнува кај граѓаните од ранливите категории. Секој македонски граѓанин заслужува еднаков третман од државата и покомотни и достоинствени услови за живеење. Врз основа на Програмата за заштита на ранливи потрошувачи на енергија за 2025 година, објавен е оглас за поддршка на домаќинства кои спаѓаат во категоријата ранливи потрошувачи на енергија. Огласот предвидува субвенции за инвертер клима уреди за граѓани од ранливи категории, кој ќе трае 60 дена и за таа цел од Владата се обезбедени 170 милиони денари (2,7 милиони евра), соопшти ВМРО-ДПМНЕ.

Станува збор за клима уреди од класата А+ со инсталирана моќност од 3,5 киловати, кои ќе бидат вградени директно во домовите, се вели во соопштението.

„Нема веќе принцип „прв дојден-прв услужен“, клима уредите ќе се набавуваат преку јавна и транспарентна тендерска постапка и истите ќе се поделат според месечните приходи на домаќинствата, од најниските до највисоките, сè до исцрпување на средствата. Тоа е гаранција дека уредите ќе ги добијат оние на кои им се најнеопходни. На овој начин ќе се придонесеме семејствата од ранливите категории да имаат поголем комфор во својот дом како во летото, така и во зимата“, се вели во соопштението.

Од друга страна, се додава, со оваа мерка се интервенира и во делот на заштитата на животната средина, со намалување на загадувањето, посебно во периодот на грејната сезона кога граѓаните ги затоплуваат своите домови.

Освен субвенциите за инвертер клими, Владата обезбеди и финансиска поддршка за потрошена електрична енергија за ранливите категории, се вели во соопштението.

Огласот за овие субвенции го објави Министерството за енергетика на својата веб-страница.

Досега овие субвенции се доделуваа така што граѓаните кои купиле клима-уреди се јавуваа на конкурс.

The post ДРЖАВАТА ЌЕ КУПИ КЛИМИ ЗА 2,7 МИЛИОНИ ЕВРА И ЌЕ ГИ ВГРАДИ КАЈ РАНЛИВИТЕ ПОТРОШУВАЧИ Нема повеќе „прв дојден, прв услужен“ appeared first on plusinfo.mk.