Македонскиот ракомет слави голем успех на Светското училишно првенство што се одржа во Скопје – машката кадетска репрезентација го освои златниот медал, додека женската селекција се закити со сребро.

Машката репрезентација на Македонија во финалето ја совлада селекцијата на Израел со 38:32 и заслужено се искачи на највисокото место на пиедесталот. Избраниците на селекторот Горан Кузманоски одиграа сигурен натпревар, имаа контрола врз резултатот од самиот почеток и на полувреме водеа со 20:14.

Во второто полувреме противникот успеа да ја намали разликата на два гола, но македонските ракометари не дозволија пресврт и со мирна завршница го потврдија триумфот.

Женската кадетска репрезентација, пак, стигна до сребрениот медал, откако во финалето беше поразена од Хрватска со 28:26.

Македонските ракометарки имаа одличен старт и поведоа со 5:1, но противничките брзо се вратија и до средината на првото полувреме направија пресврт (8:6). Нашиот тим успеа да израмни на 11:11, но на паузата Хрватска имаше предност од 15:12.

Во вториот дел ривалките се одлепија на пет гола разлика (19:14), а иако македонските ракометарки во финишот се доближија на 24:25, немаа сили за целосен пресврт.

Со овој резултат, Македонија го заокружува настапот на првенството со два освоени медали – злато и сребро, што претставува значаен успех за младинскиот ракомет.

The post МАКЕДОНИЈА СО ЗЛАТО И СРЕБРО НА СВЕТСКОТО ПРВЕНСТВО Кадетите шампиони, ракометарките вицешампионки appeared first on plusinfo.mk.

Ракометарите на Вардар 1961 обезбедија пласман во плејофот на Лига Европа, откако вечерва на домашен терен ја совладаа Бенфика со 33-27 и ја забележаа третата победа во четвртиот натпревар во рамките на групата 3.

Со вечерашниот триумф „црвено-црните“ го обезбедија второто место во групата пред завршниот натпревар против Мелсунген на 10 март, на кој со евентуална победа или реми ќе завршат како првопласирани и ќе обезбедат директен пласман во четвртфиналето.

Силно мотивирани и помогнати од бучната публика во салата Јане Сандански, ракометарите на Вардар добро го отворија натпреварот и на средината од првото полувреме имаа предност од 10-6.

Бенфика до крајот на полувремето успеа да намали на гол негатива (14-15), но Вардар го одби налетот на португалскиот тим и со серија од 6-1 дојде до највисока предност од седум голови (27-20) во 48. минута.

Уследи серија на Бенфика од 4-1, но по тајм-аутот на тренерот Чупиќ „црвено-црните“ ги консолидираа редовите и со голот на Малус во завршниот напад дојдоа до победа од шест голови разлика, со која му се реваншираа на португалскиот тим за поразот од 40-35 во Лисабон.

Малус беше најефикасен во редовите на Вардар со девет голови, еден повеќе од Воркапиќ, додека Валах запиша шест одбрани, а Еспиња три интервенции на голот.

Пред завршното коло, Вардар е лидер во групата со шест бодови, колку што има и второпласираниот Мелсунген, додека Бенфика на третото и Кристијанштад на четвртото место имаат по четири бодови.

The post ВАРДАР ЈА СРУШИ БЕНФИКА ВО СКОПЈЕ „Црвено-црните“ чекорат кон четвртфинале appeared first on plusinfo.mk.