Руските сили ги интензивираат нападите со балистички ракети врз украинските градови како подготовка за нова пролетно-летна офанзива, изјави заменик-шефот на украинската воена разузнавачка служба, Вадим Скибицки, за британскиот весник „Фајненшл Тајмс“ (The Financial Times).

– Москва произведува околу 60 ракети „Искандер“ месечно и го прошири капацитетот на својот систем за лансирање, додека на Украина ѝ недостасуваат доволно напредни системи за воздушна одбрана, како што е американскиот систем „Патриот“, за да ја покрие целата земја – рече Скибицки.

Според него, интензивирањето на руските ракетни и беспилотни напади е дел од поширок напор за уништување на критичната инфраструктура и подготовка за нова копнена офанзива на југоистокот на Украина.

Затоа, Русија ги користи своите стратешки резерви за да додаде 20.000 нови војници на своите сили распоредени во земјата, додаде Скибицки.

Со околу 680.000 војници кои моментално се на терен, Русија има за цел да го освои целиот регион Донбас до септември, додаде тој.

The post РУСИЈА ПОДГОТВУВА НОВА ОФАНЗИВА ЗА ЦЕЛОСНА ОКУПАЦИЈА НА ДОНБАС На украинската одбрана очајно ѝ недостигаат одбранбени ракети appeared first on plusinfo.mk.

Украина се соочува со критичен недостиг на противвоздушни ракети „Патриот“, изјави украинскиот претседател Володимир Зеленски. Во исто време, потпретседателот на САД, Џеј Ди Венс, го нарече прекинувањето на помошта за Киев едно од „најгордите“ достигнувања на администрацијата на Трамп, објави „Еуроњуз“.

За време на посетата на Германија, Зеленски вчера за националниот радиодифузер ЗДФ изјави дека ситуацијата со ракетите „Патриот“ е алармантна.

– Недостигот е толку лош што не може да биде полош – рече тој.

Зеленски, исто така, призна дека војната на Блискиот Исток влијае на Украина бидејќи ги намалува шансите на Киев да добие воена помош.

Ракетите „Патриот“, кои се произведуваат исклучиво во САД, се клучни за Украина. Во оваа фаза од војната, тие претставуваат убедливо најдобрата одбрана што Украина ја има од руските балистички ракети.

Затоа, Киев се обидува да развие сопствена домашна антибалистичка воздушна одбрана. Украинскиот производител на оружје „Фајер Поинт“ неодамна објави дека работи на свој систем, со цел да биде во функција до следната година. Компанијата бара соработка со европски партнери во областите на радарската техника, насочувањето и комуникациите.

Зборувајќи на трибина во Атина, Џорџија, американскиот потпретседател Џ.Д. Венс рече дека е горд што Вашингтон го прекинал финансирањето за Украина.

– Очигледно, тоа е едно од нештата на кои сум најгорд во оваа администрација. Ѝ кажавме на Европа дека ако сака да купи оружје, може, но САД повеќе не купуваат оружје и не го испраќаат во Украина – рече Венс.

Вториот човек во Белата куќа е меѓу најгласните критичари на помошта за Украина во рамките на администрацијата на Трамп.

The post УКРАИНА ОСТАНУВА БЕЗ РАКЕТИ „ПАТРИОТ“ Џеј Ди Венс е „горд“ што САД ја прекинале испораката appeared first on plusinfo.mk.

И покрај најавеното примирје меѓу Иран и Соединетите Американски Држави, во текот на ноќта и утринава се пријавени нови напади во повеќе земји на Блискиот Исток.

Американски медиуми, повикувајќи се на израелски официјален претставник, наведуваат дека Израел продолжил со напади врз Иран уште од утринските часови, објави Би-Би-Си. Ова доаѓа и покрај потврдите од Белата куќа и од Пакистан, кој посредувал во договорот, дека е постигнат прекин на огнот.

Експлозии биле пријавени и во Ерусалим, каде новинарите на BBC известиле дека „слушнале и почувствувале повеќе детонации“, по што биле издадени предупредувања до населението.

Во меѓувреме, сирени за тревога се огласиле и во Бахреин, а Министерството за внатрешни работи ги повикало граѓаните да се упатат кон засолништа.

Министерството за одбрана на Катар соопштило дека се пресретнати ракети насочени кон цели во земјата.

Истовремено, властите во Обединети Арапски Емирати информирале за ракетни напади и беспилотни летала што доаѓале од правец на Иран.

Во Саудиска Арабија, службите за цивилна заштита издале најмалку две предупредувања во рок од два часа. Според локалните извештаи од Ријад, по првото предупредување било соопштено дека ситуацијата е под контрола.

The post НОВА ЕСКАЛАЦИЈА И ПОКРАЈ ДОГОВОРОТ Ракети и сирени во повеќе земји appeared first on plusinfo.mk.

Генералниот директор на Светската здравствена организација (СЗО), Тедрос Аданом Гебрејесус, денеска изрази загриженост во врска со нападите на САД и Израел врз нуклеарните постројки во Иран по нападот во близина на нуклеарната централа Бушер.

Гебрејесус предупреди на платформата „X“ дека ваквите напади би можеле да предизвикаат нуклеарна катастрофа со здравствени последици што би „уништиле генерации“.

„Со секој ден што овој конфликт ескалира, влоговите и заканите стануваат сè поголеми“, рече Тедрос.

Меѓународната агенција за атомска енергија (МААЕ) соопшти дека ракета паднала во близина на нуклеарната централа Бушер вчера, при што загинал еден вработен.

Бушер е единствената оперативна нуклеарна централа во Иран.

The post РИЗИКУВАТЕ НУКЛЕАРНА КАТАСТРОФА КОЈА ЌЕ УНИШТИ ГЕНЕРАЦИИ! Светската здравствена организација повикува на разум appeared first on plusinfo.mk.

Соединетите Американски Држави трошат огромни количини прецизни крстосувачки ракети во војната против Иран, што предизвикува загриженост дека резервите се намалуваат побрзо од очекуваното. Според извештаи на американски медиуми, во првите четири недели од конфликтот биле истрелани повеќе од 850 „томахавк“ ракети – оружје што важи за клучно бидејќи овозможува удари од голема далечина без ризик за пилотите.

Следната фаза од американската воена кампања против Иран ќе потроши речиси цел арсенал на „невидливите“ крстосувачки ракети од типот „ЈАССМ-ЕР“, кои итно се повлекуваат од залихите наменети за други региони, пренесува Блумберг.

Пред војната САД располагаа со 2.300 ракети „ЈАССМ-ЕР“, а моментална состојба, според преместките на Блумберг, е дека останале околу 425 оперативни ракети. Експертите предупредуваат дека со користење на овие далекуметни ракети (со дострел над 960 километри), САД го намалуваат ризикот за своите пилоти, но истовремено ги трошат ресурсите наменети за потенцијален судир со противници како Кина. Обновата на овие залихи, со сегашното темпо на производство, би траела со години.

Покрај „ЈАССМ-ЕР“, американските сили истрелаа и стотици крстосувачки ракети „Томахавк“. Иако голем дел од иранската противвоздушна одбрана е уништен, Иран сепак успеа да собори американски авиони Ф-15Е и А-10, што укажува на тоа дека небото над Иран сè уште не е целосно безбедно. Ова темпо на користење алармирало дел од претставниците во Пентагон, кои предупредуваат дека залихите се „загрижувачки ниски“, особено ако се има предвид дека годишното производство е ограничено. Исто така проблем претставуваат и тешкотиите во набавката на ретки земјени метали, кои се неопходни при производството на овие ракети.

Ракетите „томахавк“ можат да погодат цели на оддалеченост од над 1.000 километри и се едно од главните средства во американските напади врз иранските воени цели, но токму нивната масовна употреба отвора прашања за одржливоста на арсеналот во подолг конфликт.

Од Белата куќа уверуваат дека САД располагаат со доволно муниција за тековните операции, но воено-индустрискиот сектор веќе се соочува со притисок да го забрза производството на нови ракети за да се надоместат потрошените резерви.

Иако Пентагон планира драстично зголемување на производството на овие пресретнувачи до 2030 година, моменталните капацитети се недоволни поради интензитетот на конфликтот на Блискиот Исток и брзото трошење на залихите.

The post НА САД ИМ СЕ ТРОШАТ ЗАЛИХИТЕ НА КРСТОСУВАЧКИ РАКЕТИ Притисокот врз производителите е голем appeared first on plusinfo.mk.

Балистичка ракета лансирана од Иран навлегла во турскиот воздушен простор, но била пресретната од НАТО системите за воздушно-ракетна одбрана распоредени во источниот дел на Средоземното Море, соопшти денеска Министерство за одбрана на Турција.

Министерството потенцира дека Турција ќе преземе „сите неопходни мерки одлучно и без двоумење“ против секоја закана насочена кон нејзината територија и воздушен простор.

Овој инцидент е четврти од почетокот на американско-израелскиот конфликт со Иран. Претходно, три ирански ракети беа пресретнати на 4, 9 и 13 март над турските региони Хатај и Газиантеп, како и над источниот дел на Средоземното Море. Турција за секој од овие случаи упати протест до Техеран, кој пак ги негираше лансирањата и предложи формирање заедничка истрага.

Според експерти, овие инциденти ја зголемуваат тензијата во регионот и укажуваат на ризик од ескалација на конфликтот, особено поради близината на турската територија до зоните на активни воени операции.

НАТО, преку своите системи за воздушна и ракетна одбрана, досега успеа да ги неутрализира сите закани, што ја потврдува готовноста на Алијансата да ги заштити своите членки и регионалната стабилност.

Турските власти апелираат на внимателност и продолжуваат со зголемено надгледување на воздушниот простор.

The post ИРАНСКА РАКЕТА ПРЕСРЕТНАТА НАД ТУРЦИЈА Системите на НАТО го неутрализираа нападот appeared first on plusinfo.mk.

Германскиот министер за одбрана Борис Писториус изјави дека Европа е безбедна од потенцијалниот дострел на иранските ракети, нагласувајќи дека континентот е заштитен преку системот на колективна одбрана на НАТО.

За време на посетата на австралиска касарна во близина на Бризбејн, Писториус рече дека Европа е „безбедна, особено затоа што Германија не се брани сама во воздушната одбрана, туку во рамки на силите на НАТО“.

Тој се осврна и на распоредувањето на системот за воздушна одбрана „Ероу 3“ (Arrow 3), набавен од Израел, кој наскоро треба да стане оперативен.

– Тоа е огромен чекор напред. Се сеќавам на критиките кога го набавивме – се тврдеше дека нема ракети што треба да се пресретнуваат – изјави Писториус.

Системот „Ероу 3“ е наменет за уништување непријателски ракети на височина од над 100 километри – способност што германските вооружени сили (Бундесвер) досега ја немаа. Воздушната база Шеневалде/Холцдорф, на границата меѓу германските покраини Саксонија-Анхалт и Бранденбург, е првата од трите планирани локации за распоредување на системот.

Писториус истакна дека дострелот на иранските балистички ракети е одамна познат.

– Секако, теоретски тие можат да стигнат до Европа. Но, тоа го знаевме и претходно. Прашањето е со какви боеви глави и со каква прецизност. Затоа се потпираме на заедничката одбранбена способност на НАТО – додаде тој.

Министерот наведе и дека ракети за американскиот систем „Патриот“ наскоро ќе почнат да се произведуваат во Германија, од страна на компанијата МБДА (MBDA).

The post НАТО МОЖЕ ДА ЈА ОДБРАНИ ЕВРОПА ОД ИРАНСКИTE РАКЕТИ Германија набавила израелски „Стрели“, а ќе произведува американски „Патриоти“ appeared first on plusinfo.mk.

Израелската војска соопшти дека во текот на ноќта извршила напади врз објекти за производство на балистички ракети и системи за противвоздушна одбрана во Иран.

Според соопштението, во Техеран биле погодени инфраструктура и објекти за производство на оружје, при што приоритет на нападите биле капацитетите за балистички ракети.

Во западниот дел на Иран, израелските сили погодиле и лансирни системи и складишта за балистички ракети кои, како што се наведува во соопштението што го пренесуваат израелските медиуми, „претставуваат закана за државата Израел“.

The post ИЗРАЕЛ ГИ РАКЕТИРА ИРАНСКИТЕ ФАБРИКИ ЗА РАКЕТИ Експлозии во Техеран appeared first on plusinfo.mk.

Иранската армија ќе ги води преговорите со САД, изјави портпаролот на Комитетот за национална безбедност и надворешна политика на иранскиот парламент, Ибрахим Резаи.

„Секој разговор со ѓаволот е стратешка грешка. Ракетите нека преговараат со американскиот претседател Доналд Трамп“, напиша Резаи на социјалната мрежа „Икс“.

Тој ги повика САД да признаат пораз во конфликтот со Иран.

„Во оваа битка, Америка треба да се предаде и да го признае поразот. Овојпат Трамп ќе биде понижен, и тоа целосно“, истакна Резаи.

Вашингтон претходно соопшти за продуктивни разговори со Иран. Иранското Министерство за надворешни работи негира дијалог, но посочи дека Техеран примил пораки преку посредници со изразена желба на Вашингтон да се започне дијалог за завршување на конфликтот.

Според информации објавени во медиумите, САД предложиле план од 15 точки, но Иран сè уште не ги има потврдено таквите информации.

The post „НАШИТЕ РАКЕТИ ЌЕ ПРЕГОВАРААТ СО ТРАМП“ Иран со одговор до американскиот претседател appeared first on plusinfo.mk.

Блискиот Исток се соочува со нова, жестока ескалација на конфликтот откако Иран во текот на ноќта и утрово истрела бранови ракети кон Израел, погодувајќи цели во Тел Авив и во јужните и северните делови на земјата, додека истовремено пристигнуваат противречни информации за наводни преговори меѓу Вашингтон и Техеран за поштедување на енергетската инфраструктура.

Сирените за воздушна опасност се огласија во Тел Авив и централниот дел на Израел по детекцијата на масовни лансирања од Иран. Според израелската служба за итна помош „Маген Давид Адом“, најмалку шест лица се полесно повредени во центарот на Тел Авив, каде се регистрирани четири места на удар. Снимките од теренот покажуваат тешко оштетени згради со разнесени фасади, запалени автомобили и густ црн чад. Полицијата соопшти дека специјални тимови работат на отстранување на неексплодирани проектили, додека Израелските одбранбени сили (ИДФ) веќе упатија дополнителни трупи на југот на земјата за санирање на штетите во неколку подрачја. Напади се регистрирани и во северниот дел на Израел, каде се оштетени станбени објекти, но засега нема извештаи за жртви.

Паралелно со иранските напади, ИДФ ги продолжи операциите во Либан. Во напад југоисточно од Бејрут, во градот Бшамун кој се наоѓа надвор од традиционалните упоришта на Хезболах, загинаа две лица, а петмина се повредени. Ударите врз јужните предградија на либанската престолнина траеја во текот на целата ноќ.

На дипломатски план владее конфузија по изјавата на американскиот претседател Доналд Трамп дека ги одложил нападите врз иранските електрани за пет дена поради „продуктивни разговори“ со Техеран. Трамп постави ултиматум до Иран целосно да ја отвори стратешката Ормуска теснина во овој рок. Сепак, официјален Техеран, вклучително и претседателот на парламентот Мохамад Багер Калибаф и претставници на Револуционарната гарда, ги отфрлија овие тврдења како „лажни вести“ и обид за манипулација со пазарите. Дипломатски извори наведуваат дека евентуалните контакти се ограничени само на посредници од Египет и Пакистан.

Иако Трамп зборува за привремено затишје, американски официјални претставници појаснуваат дека тоа се однесува исклучиво на енергетските објекти. Операцијата „Епски гнев“ продолжува во полн ек, а воените цели, морнарицата и капацитетите за балистички ракети на Иран остануваат легитимна мета. Иранската агенција „Фарс“ веќе извести дека, и покрај најавеното одложување, биле погодени два енергетски објекти – станица за преработка на гас во Исфахан и гасовод кај електраната во пристанишниот град Хорамшар, при што е предизвикана делумна штета.

Регионалните последици од конфликтот се проширија и врз земјите од Заливот. Кувајтската војска соопшти дека нејзините системи за противвоздушна одбрана пресретнале ирански ракети, при што падот на остатоци предизвикал прекин на седум далеководи. Сирени се огласуваа и во Бахреин, додека Саудиска Арабија потврди дека пресретнала и уништила повеќе дронови во својот воздушен простор.

Израелскиот премиер Бенјамин Нетанјаху порача дека воените операции против Иран и неговите сојузници продолжуваат со несмалено темпо.

Глобалните пазари на нафта реагираа со нов скок на цените поради страв од долготрајни нарушувања во снабдувањето преку Ормуската теснина.

Од почетокот на овој конфликт кон крајот на февруари, досега се евидентирани повеќе од 2.000 жртви, а меѓународните напори за деескалација остануваат без конкретен резултат.

The post ТЕЛ АВИВ ПОД ОГАН, ИРАН НЕГИРА ДЕКА СЕ ВОДАТ ПРЕГОВОРИ Ескалација на конфликтот на Блискиот Исток appeared first on plusinfo.mk.