Поранешниот српски министер за економија Раде Баста е уапсен под сомнение дека го оштетил јавното претпријатие „Белградски електрани“ за стотици илјади евра додека бил негов директор. Апсењето го наредило Вишото јавно обвинителство во Белград, објави РТС.

Според сомневањата на обвинителството, Баста доделувал пари како донации на различни спортски клубови без оправдана причина. Меѓу нив имало помали фудбалски и кошаркарски клубови, како и еден коњички клуб.

Припадници на Службата за борба против корупцијата ја спроведуваат акцијата, а истовремено вршат претреси на просториите поврзани со случајот. Неофицијално, полицијата приведува и неколку други луѓе кои се поврзуваат со Баста.

Баста беше министер за економија од октомври 2022 до 2023 година, кога Владата го разреши од функцијата, откако тој побара Владата да се изјасни за воведување санкции против Русија поради нејзината агресија врз Украина.

Тој беше министер како кадар на партијата Обединета Србија, која исто така побара негово разрешување од сите партиски и јавни функции на кои го предложила, поради неговите ставови за санкциите против Русија. По разрешувањето, Баста формираше ново политичко движење „Европски пат“.

The post ВО БЕЛГРАД УАПСЕН ПОРАНЕШЕН МИНИСТЕР ЗА ЕКОНОМИЈА Се сомничи за проневера на стотици илјади евра од „Белградски електрани“ appeared first on plusinfo.mk.