„Трудовиот и Пазарниот инспекторат немаат доволно капацитети, но тоа не треба да биде оправдување. Секоја институција во рамки на своите надлежности треба да постапува максимално и да ги казнува оние што не го почитуваат законот, особено кога станува збор за безбедноста и здравјето на работниците“.

Вака денеска изјави денеска заменик-министерот за економија, Марјан Ристески, одговорајќи на новинарско прашање зошто се дозволува фирми да профитираат на сметка на здравјето на работниците – работници да работат на скелиња кога температурите се над 40 степени или да се случуваат свлечишта како во центарот на Скопје.

Според Ристески, Инспекторатот за труд совесно ја работи работата, колку што има можности и капацитети.

– Тоа е проблем што се провлекува со години, со децении наназад. Трудовиот инспекторат совесно ја работи работата, онолку колку што има можности и капацитети. Една од препораките на Европската Унија е зголемување на капацитетите на инспекторатите – и Трудовиот и Пазарниот инспекторат, кои се под наша надлежност. Се надевам дека ефикасноста во иднина ќе биде уште поголема и ќе има поредовни контроли и поредовни казни. Треба малку повеќе да работи и совеста, а онаму каде што нема да работи совеста, ќе бидат употребени сите казнени мерки предвидени со законот и ќе бидат максимално, најригорозно казнети тие што нема да го применуваат законот онака како што треба, барем во однос на заштитата и безбедноста на здравјето на работниците – истакна Ристески.

Досега, дополни, се изречени казни.

– Треба секоја институција во рамки на своите надлежности да постапува максимално, капацитети нема доволно, но тоа не треба да биде оправдување. Треба максимално да се работи и да се казнуваат оние што прават прекршоци во делот на безбедноста и здравјето на луѓето. Инспекторатот казнува, но немам информација колку казни се досега конкретно изречени – нагласи заменик-министерот Ристески.

The post ФАЛАТ ИНСПЕКТОРИ, НО МОРА ДА СЕ КАЗНУВА Ристески бара почести контроли на безбедноста на работниците appeared first on plusinfo.mk.

Сојуз на синдикатите на Македонија (ССМ) и годинава ќе организира протест на 1 Мај, Меѓународен ден на трудот, кој ќе почне во 11 часот пред ССМ, ќе продолжи пред Собранието, потоа кај Стопанската комора и ќе заврши пред Владата.

Ова денеска го најави претседателот на ССМ, Слободан Трендафилов, кој повика работниците масовно да излезат на протестот на кој, како што рече, ќе ги истакнат барањата за зголемувањето на минималната плата и подобри работни услови.

– Повеќе од 260.000 работници во Македонија, според податоци на Управата за јавни приходи, живеат со примања под 600 евра односно толку колку што работниците бараат да изнесува минималната плата во Македонија. Тоа е 50% од работната сила во Македонија која прима плата под 600 евра. Овие работници да не не среќаваат на улица и да ни се жалат, да не ни праќаат пораки и да ни се жалат, туку да застанат со нас рамо до рамо и да покажат дека се незадоволни од висината на нивната плата – рече Трендафилов.

Со усогласувањето на минималната плата за 1.667 денари во месец март годинава, посочи тој, и зголемувањето на вредноста на синдикалната минимална кошница за 3.304 денари од почетокот на годината покажува дека на едно семејство доколку двајцата работници се на минималец им недостигаат средства за основните прехранбени трошоци за живот.

Трендафилов рече дека тоа е поразителен податок за сите кои креираат политика, за сите работодавачи во Македонија и сите чинители во општеството.

– Покрај тоа што голем број грански синдикати успеаја да извојуваат победа во борбата за зголемување на платите на нивните колеги и колешки, голем број потпишаа колективни договори на ниво на работодавач во јавниот и во приватниот сектор, можноста за укинување на еден колективен договор, како колективниот договор за култура кој по инцијатива е пред Уставниот суд, може да предизвика домино ефект за укинување на сите колективни договори во кои се предвидува начин на пресметка на плата, предупреди Трендафилов.

Според него, последниот случај со загубата на животот на еден работник и неколку други повредени треба да го разбуди алармот кај сите особено кај инспекциските служби и кај оние кои треба да овозможат поголем број инспектори и инспекциски надзори за да се спречат вакви немили настани.

Додаде дека 1 Мај е ден кога работниците и синдикатите насекаде во светот излегуваат на протести, денот кога работниците треба да бидат најгласни и да излезат на улица рамо да рамо и да покажат дека, како што вели, неправдата која ја толерираат цела година можат јасно и гласно да ја искажат и да и се спротивстават заедно со синдикатите.

The post И ОД ПРВОМАЈСКИОТ ПРОТЕСТ ССМ ЌЕ БАРА ПОВИСОКА МИНИМАЛНА ПЛАТА Трендафилов вели дека 260.000 работници примаат плата под 600 евра appeared first on plusinfo.mk.