Просечна плата од околу 7.000 евра месечно и огромна побарувачка за работници – ова е реалноста во една од најразвиените европски економии, која сè повеќе привлекува странска работна сила.

Во последните години, Швајцарија станува магнет за луѓе кои бараат подобар животен стандард, пред сè поради високите примања и стабилниот пазар на труд. Интересот дополнително расте затоа што работни позиции може да се најдат релативно брзо во повеќе сектори.

Според податоците објавени од „Business Insider“, просечната годишна бруто плата за полно работно време изнесува околу 78.000 швајцарски франци, односно приближно 83.000 евра. Во одредени сектори како финансии, ИТ, инженерство и медицина, примањата се уште повисоки и достигнуваат од 90.000 до 140.000 евра годишно.

Во моментов, најголема побарувачка има во здравството, угостителството, хотелиерството, градежништвото, транспортот и логистиката. Особено се бараат ИТ-специјалисти, медицински сестри и квалификувани работници, а во многу случаи вработувањето е можно речиси веднаш.

Каде се највисоките плати?

Највисоките примања се концентрирани во поголемите економски центри како Цирих, Женева и Базел, каде се наоѓаат бројни меѓународни компании, финансиски институции и организации. Овие градови важат за едни од најплатените во светот.

Бидејќи локалната работна сила не ги задоволува потребите, компаниите во голема мера се потпираат на странски кадар. Се проценува дека секоја трета компанија има недостиг од работници, додека кај големите компании тој број е уште поголем. Токму затоа се нудат конкурентни услови и можности за брзо вработување.

– Најважно е доброто образование. Ако сте спремни да работите, можете да заработите добро за живот – вели Матијас Остерман, кој таму живее повеќе од три децении.

Услови за работа и трошоци

Работната недела најчесто се движи меѓу 38,5 и 42,5 часа, а правилата за работно време и празници строго се почитуваат.

Сепак, високите плати одат рака под рака со високи трошоци за живот. Киријата, здравственото осигурување и секојдневните трошоци се значително повисоки отколку во многу други европски земји, но односот меѓу приходите и трошоците останува поволен.

За илустрација, билет за кино чини околу 20 франци, оброк во ресторан околу 25 франци, а месечна членарина за теретана околу 85 франци. Киријата за двособен стан во централните делови на поголемите градови започнува од околу 1.000 до 2.000 франци.

Покрај финансиските услови, оваа земја нуди високо ниво на безбедност, стабилна економија и квалитетен живот, што ја прави атрактивна и за семејства и за луѓе кои бараат долгорочна кариера во странство.

The post ПЛАТА ОД 7.000 ЕВРА МЕСЕЧНО? СЕ БАРААТ РАБОТНИЦИ ВЕДНАШ! Работни места има во повеќе сектори appeared first on plusinfo.mk.

Управа за јавни приходи соопшти дека нема нови даночни обврски за студентите кои работеле во странство, ниту пак се воведува двојно оданочување на веќе оданочени приходи.

Реакцијата доаѓа по медиумски написи дека студентите се „на удар“ и дека им се бара плаќање данок за сезонска работа во Германија во последните пет години. Од УЈП велат дека станува збор за редовна примена на законските правила и информирање на граѓаните.

„УЈП не наметнува нови обврски, ниту бара исполнување на обврски кои не се законски регулирани. Активностите се насочени кон воспоставување ред во оданочувањето и еднаква примена на законските правила за сите даночни обврзници“, соопштија од Управата.

Од институцијата додаваат дека целта не е санкционирање, туку поттикнување на доброволно пријавување на приходите.

„Со овие активности никој не е ‘на удар’, туку станува збор за мерки насочени кон подигање на свеста за законските обврски и обезбедување поддршка за нивно правилно и навремено исполнување“, наведуваат од УЈП.

Во соопштението се нагласува дека не може да има двојно оданочување, бидејќи меѓународните договори прецизно утврдуваат каде се плаќа данокот. Сепак, секој резидент на Македонија има обврска да го пријави доходот остварен во странство.

„Секое физичко лице – македонски даночен резидент има обврска да го пријави доходот остварен во земјата и во странство, согласно Законот за данокот на личен доход“, појаснуваат од УЈП.

Од Управата посочуваат дека студентите кои работеле во Германија пократко од 183 дена се сметаат за даночни резиденти на Македонија и имаат обврска да го пријават доходот преку системот за е-даночни услуги. Данокот, според важечките прописи и договорот за избегнување двојно оданочување меѓу двете земји, се плаќа во Македонија.

УЈП информира дека до граѓаните биле испратени и персонализирани известувања со цел навремено да бидат информирани за законските рокови, нагласувајќи дека целта е транспарентност и правилна примена на правилата.

The post НЕМА НОВИ ДАНОЦИ ЗА СТУДЕНТИТЕ Демант од УЈП за обврските од работа во Германија appeared first on plusinfo.mk.

Лицата кои работеле во странство нема да платат данок доколку докажат дека компанијата преку која што биле ангажирани платила данок во земјата каде што биле ангажирани, објасни денеска премиерот Христијан Мицкоски на новинарско прашање во врска со известувањата на УЈП за плаќање данок на лица кои работеле во странство.

– Сакам неколку работи да појаснам. Не станува збор за ретроактивен данок. Ова е закон кој што го донела претходната Влада на СДСМ и ДУИ, а УЈП бидејќи законскиот рок пред да застарат тие решенија на крајот на минатата година мораше да се обрати до лицата, како и сите граѓани во земјата, така и тие да го платат данокот којшто треба да го платат во државата. Ако тоа не го направеше УЈП тогаш ќе дојдеше некоја Влада после нас или можеби оваа Влада и ќе бараше кривична одговорност за УЈП односно за директорката дека го оштетила Буџетот. УЈП само поднесе известување до лицата дека треба во одреден рок да си ја подмират таа обврска. Имавме состанок кај мене во кабинетот, разговаравме со лица кои биле на различни делови во светот и донесовме заклучок тие да докажат дека фирмите коишто нив ги ангажирале платиле данок во земјата или земјите каде што биле ангажирани. И на тој начин УЈП нема да го наплати тој данок – рече Мицкоски.

Тој денеска заедно со министерот за транспорт Александар Николоски, заменик амбасадорката на САД Никол Варнс, и директорот на ЈП за државни патишта Коце Трајановски беа во увид на работите на автопатот Гостивар – Букојчани.

The post ТИЕ ШТО РАБОТЕЛЕ ВО СТРАНСТВО ТРЕБА ДА ДОКАЖАТ ДЕКА ЗА НИВНИОТ АНГАЖМАН Е ПЛАТЕН ДАНОК Мицкоски појасни и зошто УЈП бара од лица да платат данок appeared first on plusinfo.mk.

Данокот за приходите остварени во странство не е нова обврска и не станува збор за ретроактивно оданочување, порача директорката на Управата за јавни приходи, Елена Петрова, по средбата со стопанствениците во Сојузот на стопански комори на Македонија.

Петрова објасни дека обврската за пријавување и оданочување на ваквите приходи постои уште од 2020 година, но призна дека дел од граѓаните денес се соочуваат со сериозни проблеми – особено при обезбедување документи за веќе платен данок во странство.

– Свесни сме дека некои граѓани тешко доаѓаат до потврди од странските институции, па затоа УЈП ќе им излезе во пресрет – истакна Петрова, додавајќи дека ќе се прифаќаат различни видови докази, а паралелно ќе се воспостави и административна соработка со даночните власти во други држави.

Најмногу случаи има кај граѓаните кои работеле во Авганистан и во Ирак. Од околу 1.100 лица, документи досега доставиле приближно 200, додека за останатите УЈП побарала податоци и листи од компаниите преку кои биле ангажирани, со цел службено да ги провери информациите.

Дополнителни проверки ќе се вршат и за македонските државјани кои биле дел од мировни мисии, каде што, како што беше посочено, данокот бил платен преку Министерството за одбрана.

Петрова најави дека аконтациските решенија за 2020 година ќе бидат заменети со конечни, а процесот на корекции привремено ќе мирува сè додека не се обезбедат сите потребни податоци.

The post НЕМА РЕТРОАКТИВЕН ДАНОК ЗА РАБОТЕЊЕТО ВО СТРАНСТВО Од УЈП уверуваат дека ќе им се излезе во пресрет на граѓаните appeared first on plusinfo.mk.

Директорката на Управата за јавни приходи Елена Петрова вели дека на граѓаните кои платиле данок на доход во странство, а на кои сега им е дојдено даночно решение и од УЈП, имаат уште време да ги приложат доказите до канцелариите на УЈП.

Петрова тврди дека не може да се изврши двојно оданочување, а доколку има случаи во кои граѓаните веќе го платиле данокот на доход во странство, а сега постапиле и по решението од УЈП, ќе бидат разгледани сите докази и ќе се изврши оданочување само на едно место.

– За оние кои платиле во странство и сега платиле во земјава, ќе бидат земени предвид сите докази. Зависно од меѓународниот договор – доколку со земјата имаме склучено меѓународен договор, каде треба да се плати данокот, а каде да се изврши поврат или доколку е возможно, платениот данок во странство да се прифати како даночен кредит, а за уплатата која е извршена овде да се изврши враќање или да се прифати за друг долг за следна година – појасни Петрова на денешната прес-конференција.

Таа вели дека како институција се свесни за реакциите на граѓаните, но додава дека морале да го почитуваат законот и да ги достават решенијата во законскиот рок, односно пет години по истекот на годината кога доходот е остварен.

– Верувам дека одредени граѓани не стигнале да ги завршат активностите во однос на собирањето и доставувањето на доказите и тоа е разбирливо бидејќи се работи за пет години наназад, меѓутоа нашиот рок за завршување на постапката беше до 31 декември и тоа е законскиот рок. Имајќи предвид дека граѓаните мора да обезбедат докази за работа што се случила пред пет години, а доказите ги обезбедуваат од странски земји, ќе им овозможиме да го сторат тоа. Ги повикувам сите да ги достават доказите, ќе ги разгледаме и што може да се прифати, ќе прифатиме – рече Петрова.

Според Петрова, оваа активност на УЈП не била брза и изненадувачка, туку опсежна активност во која биле собрани податоците од банките, била направена  опсежна анализа и околу 11.000 граѓани персонално биле повикани да го подмират данокот на доход.

За протестите на овие граѓани и за нивните најави дека ќе поднесат тужби пред Управниот суд, директорката на УЈП вели дека тоа се легитимни права на граѓаните.

– Тоа ниту можеме, ниту сакаме да ги спречиме граѓаните да поведат управен спор доколку имаат докази за тоа. Сепак, повикани се и кај нас да ги достават доказите за да видиме дали имаат платен данок во странство – рече Петрова.

Министерката за финансии Гордана Димитриеска-Кочоска, напомена дека не се работи за законска измена и дека граѓаните треба да ги знаат нивните обврски кон државата.

– Ние досега не сменивме ниту еден закон. Даночните обврзници треба да ги знаат законите и да ги почитуваат. Кога станува збор за потврдите за остварување на доход во странство, секој од нас треба да знае дека кога го остварува доходот во странство, во исто време треба да обезбеди и потврда во годината во која го остварил со цел да го поднесе до Управата за јавни приходи односно во месецот. Што значи дека ова не е нова давачка која ние ја сменивме во Собранието. Станува збор за почитување на законите – нагласи Димитриеска-Кочоска.

Од 11.000 граѓани, утврден е данок за 6.600 граѓани за 2020 година. За останатите е коснтатирано дека доходот не подлежи на одданочување. Од овие 6.600 граѓани, 2.200 граѓани самите го имаат поднесено и платено данокот, а за 4.400 граѓани донесени се решенија по службена должност. Вкупно утврдениот данок е околу три милиони евра за 2020 година.

Најавите од УЈП се дека ќе се проверуваат и останатите години.

The post УЈП ЌЕ ГИ ЧЕШЛА И ДРУГИТЕ ГОДИНИ ЗА НЕПЛАТЕН ДАНОК НА ДОХОД ОД СТРАНСТВО Продолжен е рокот за докажување дека данокот е платен во друга земја appeared first on plusinfo.mk.

Притоа извршила градежни работи во вкупна вредност од 100,19 милиони денари, што е за 16,2% во споредба со истиот период од претходната година.

Вредноста на договорената работа, пак изнесувала 199,73 милиони денари што е за 4,4% повеќе во однос на истиот период лани.

The post ЗА 16,2% Е ЗГОЛЕМЕНА ВРЕДНОСТА НА ИЗВРШЕНИТЕ ГРАДЕЖНИ РАБОТИ ВО СТРАНСТВО Каде работат нашите градежници? appeared first on plusinfo.mk.

Во овој период, домашната градежната оператива во странство извршила градежни работи во вкупна вредност од 49.822.000 денари, што е за 16,4% повеќе од истиот период лани.

Во првиот квартал годинава македонските градежници работеле во Германија, Црна Гора, Бугарија, БиХ и Албанија. 

The post РАСТ ОД 10,8% НА ДОГОВОРЕНИТЕ РАБОТИ НА ГРАДЕЖНИЦИТЕ ВО СТРАНСТВО Работеле во Германија, Црна Гора, Бугарија, БиХ и во Албанија appeared first on plusinfo.mk.

Почна потрагата по сезонци од земјава. Огласи од Хрватска, од Грција, Црна Гора, Словенија па и од Словачка и други земји за вработување келнери, готвачи, помошници во кујна, собари, шанкери, рецепционери, но и возачи и трговски работници се само дел од понудата која може да се најде на страниците на агенциите за вработување или на Фејсбук-групите кои се отворени за огласи за вработување во овие земји. И годинава се нуди работа на бродови како едно од најдоходовните вработувања за нашите граѓани во изминатиот период.

Се нудат плати повисоки од овдешните, и тие изнесуваат од 1.100 евра, па нагоре за ангажмани од 6 месеци во кои понудите за сезонците се со дозвола за работа, сместување, со или без платени оброци, и со или без платени прекувремени часови, празници и недела или слободни денови во неделата и месецот.

Од агенциите кои легално вработуваат сезонски работници во странство велат дека главно треба да се внимава дали работодавачот има корпоративен менаџмент или е мал сопственик на фирма, ресторан или хотел, но оние кои сакаат да заработат во лето, а да одмараат во зима, велат дека не е важно дали ќе работат прекувремени неплатени часови или без одмор, туку главно им е колку ќе заработат.

– Ме интересира Хрватска, и тоа приморјето. Таму даваат и највисоки плати. Ако си во мало ресторанче работиш 14 часа дневно и добиваш висока плата, но ако работиш во познатите хотели тогаш треба да имаш соодветна квалификација за местото што се бара и познавање на англиски јазик. Таму потешко се вработува и се даваат пониски плати, но се плаќаат прекувремените часови, а има и одмор – вели Александра К. од Скопје, која лани работела 6 месеци во ресторан во Задар, Хрватска.

Друг заинтересиран за сезонска работа во Хрватска, кој лани имал лошо искуство, вели дека е подобро да се оди во Хрватска преку лиценцирани агенции, а не да се бара работа сам или преку луѓе кои организираат вработување.

– Лани работев во еден ресторан во Риека, кај некој познат на мој роднина. Ми се нудеше плата од 1.400 евра за работа 14 часа дневно како келнер. Но, што се случи? Тие 14 часа станаа 16 часа, со 2 часа пауза дневно и без слободен ден во неделата. Оваа плата од сегашна перспектива сметам дека е мала – вели тој.

Милан Џинлев од агенцијата „Приорити солушнс“ која обезбедува сезонска работа во Хрватска и во други земји, вели дека секој кој сака да работи како сезонски работник во странство, а не сака да биде експлоатиран, треба да се вработи преку лиценцирана агенција, која соработува со компании со корпоративен менаџмент.

– Така сезонскиот работник е безбеден дека тоа што ќе му се понуди ќе го добие. Навистина, платите се пониски и во просек се нешто повисоки од 1.100 евра, зависно од работодавачот, но за возврат работникот добива неделни слободни денови, месечен одмор, платени прекувремени часови и празнични денови и недели. Се работи дневно по 8 часови. Во Хрватска за празник се плаќа 100% дневница, а работа во недела 50%. Прекувремените часови се плаќаат зависно од работодавачот од 15% до 30% за секој час. Дел од работодавците дури им исплаќаат и „божиќнина“– појаснува тој.

Но, додава тој, секој кој сака да работи преку лиценцирана агенција ќе мора да ги исполни и условите кои ги бараат работодавачите.

– На прво место е стручната подготовка и искуството, како и познавањето на англиски јазик, бидејќи во хотелите на Јадранот во Хрватска англискиот е задолжителен за сите вработени. Затоа секој апликант прво го проверуваме ние како агенција, па потоа со него прави анкета работодавецот и ако е избран, започнува постапката за негово вработување. Во Хрватска се бара кандидатот да нема криминално досие. По завршување на постапката работникот добива картичка за престој која му е земна за личната карта. На ваков начин се одбегнува и манипулацијата со работниците кои во Хрватска доаѓаат од странство – вели Џинлев.

Тој очекува оваа сезона во Хрватска да испрати од 100 до 150 сезонски работници од земјава.

– Има интерес од хрватските хотелиери кои редовно работат со нас, но дел од работодавачите од Хрватска и самите се претставуваат во земјава, а такви презентации прави и Стопанската комора на Хрватска. Тие не вработуваат, но повикуваат работници да одат во Хрватска, што во основа е проблематично бидејќи на заинтересираните не им се дава некоја сигурност, туку им се кажува кои професии се барани во сезоната. Така голем број граѓани се обидуваат сами да најдат работа без да се консултираат со агенциите кои се лиценцирани за тоа и потоа имаат проблеми – вели тој.

Како сезонско вработување кое трае најмалку 3 месеци и годинава го има работењето на бродови и јахти. Овие вработувања главно одат преку лиценцирани агенции, но и на црно. Според понудата, најниска плата на работните позиции на бродовите, зависно од компанијата, е 2.700 евра. Но, оние кои работеле на брод, велат дека зависи од позицијата, но сепак почетната плата е околу 1.200 евра, а за да се стигне до плата повисока од 2.000 евра, потребна е минимум една година.

The post НА БРОД ИЛИ ВО ХОТЕЛ, ВО СТРАНСТВО ДОБРО СЕ ЗАРАБОТУВА Почна потрагата по сезонски работници во земјава appeared first on plusinfo.mk.

Не стивнува интересот за вработување во странство. За да се стигне до посакуваната земја се користат сите опции кои се на располагање, но од агенциите кои посредуваат за работа во странство велат дека секој што сака да стигне на легален начин и со гаранции, мора да поседува знаење и искуство за да ја добие позицијата за која е квалификуван и да биде сигурен дека може да смета да остане подолго на работа. Дополнително, многу е важно и познавањето на јазикот на земјата во која се оди.

Зоран Кочовски од агенцијата „Коузон“ вели дека моментално е актуелно заминувањето на цели семејства во странство, што главно се одвива надвор од нивното посредување.

– Вакви информации добиваме од луѓето кои преку нас заминале да работат во странство кои сигнализираат дека вo соседството веќе стигнеле и цели семејства од земјава. Но ние како агенции немаме информација колкав е бројот на вакви семејства кои се преселиле во одделни држави бидејќи вработувањето преку нас оди само по работни позиции за кои се добиваат и соодветните привилегии кај работодавачите – појаснува тој.

Од агенциите велат дека во странство заминуваат луѓе од сите категории на образование и обученост какви што се бараат во европските земји во кои има простор за вработување.

– На нашите огласи и селекција имаме најразлични категории работници кои аплицираат за работа надвор од земјава. Има и такви кои велат дека можат да работат сѐ, но тоа не е доволно да бидат селектирани и да го добијат работното место, бидејќи позициите бараат образование, квалитет на работа, искуство и познавање на јазик. Оваа категорија работници не може да добие работа во странство преку нас, бидејќи ние нудиме работни места со одредени гаранции познавања и критериуми. За нас е важно да понудиме работници кои одговараат на барањата на работодавачот за да не се случат проблеми подоцна и затоа правиме строги селекции во понудата. Да се задржи веќе добиеното работно место работникот треба да покаже успешност за да не биде вратен. Повратните информации говорат дека нашите работници главно се успешни во работата, продуктивни се и ги почитуваат правилата – вели тој.

Милан Џинлев од агенцијата за посредување при вработување во странство „Приорити“ која најчесто врши вработување на сезонци вели дека младите од земјава стануваат сѐ попребирливи при изборот на сезонска работа. За нив веќе не е интересно да работат во хотели, туку се обидуваат на најразлични начини да се оспособат за работа на поплатени работни позиции.

– За младите веќе не е интересно да работат како угостителски работници во регионот каде што изминатиот период имаше голем интерес. Тие сфатија дека со повисока подготовка, односно со неколкумесечен курс за ИТ и добри перформанси во работењето можат да најдат работа која е поплатена од она што годинава го нудат угостителите во регионот. Тоа е причина што се намалува бројот на млади до 25 години кои сакаат да работат како сезонци во оваа дејност – вели Џинлев.

Една од причините за послабиот интерес на младите за сезонска работа, годинава е и тоа што дел од хотелиерите од Хрватска понудија пониски плати и покрај тоа што нудат сместување и храна.

– Годинава дел од хотелиерите поради кризата понудија плати од кои нема да се заработи како порано. Дел од понудите кои одеа преку нас веќе ги одбивме бидејќи сметаме дека плата под 1.000 евра е неисплатлива за сезонците од земјава. Тие главно одат да заработат за остатокот од годината. Дел се семејни луѓе. Сепак, тоа не значи дека нема интерес за сезонски вработувања во оваа земја. Веќе испративме работници во хотел во Дубровник каде што понудија одлични услови. Но, факт е дека младите веќе не се гледаат во овој сектор и кај нас за да можат да се регрутираат работници и во странство, па главно нашите клиенти се работници кои биле во Хрватска и неколку години наназад, а сакаат да заминат и годинава – додава Џинлев.

Тој очекува агенцијата да го оствари планираниот број на вработувања во Хрватска, но главно со работници кои веќе биле на работа во некои од хрватските хотели.

Кризата со млади угостителски работници во земјава, вели тој, се одразува и во сезонското вработување на вакви работници во Дубаи и во Катар каде што главно се бара млада работна рака која се обучува за да остане подолг период таму.

– Ние од земјава немаме таква понуда, па главно работниците ги обезбедуваме преку нашите подружници во Албанија и во Србија. Познато е дека угостителството поради туризмот во Албанија бележи пораст и тамошните работници повеќе се интересираат за есенско-зимските сезонски вработувања во Дубаи и во Катар. Така, тамошните угостителски работници го пополнуваат празниот простор од годината да заработат плус пари во Дубаи и во Катар. Тие летото работат во албанските хотели, а од есен до наредната сезона, 6 месеци се во Дубаи и во Катар – вели Џинлев.

Од она што може да се види од огласените работни места во странство, во нашите агенции за вработување се бараат работници од земјава за најразлични позиции, почнувајќи од угостители за работа во хотели и на бродови, возачи на товарни и такси возачи, заварувачи, но и медицински сестри, стоматолози и ИТ работници. Огласи има од регионот, но и од прекуокеанските земји Канада и САД.

Колкав е бројот на пријавени на ваквите огласи е непознато бидејќи на овие огласи се аплицира директно кај работодавачот во странство.

– На платформата објавуваме огласи на работодавачи од странство, но според обликот и податоците кои ги имаме на нашата страница за што наплаќаме. На огласот се аплицира директно кај работодавачот, но за да ве контактира тој мора да имате поставено биографија и податоци на нашата страна. Сепак, ние немаме информација колкав број  наши граѓани аплицирале на овие огласи – велат од агенцијата „Вработување“ којашто објавува и вакви огласи.

Агенциите велат дека голем дел од луѓето кои заминуваат во странство тоа го прават нелегално, преку луѓе кои заработуваат на нивна сметка. Сето тоа прави да нема точна бројка на луѓе кои ја напуштаат земјава поради работа.

The post ХРВАТСКА ГОДИНАВА ПОНУДИЛА ПОНИСКИ ПЛАТИ ЗА СЕЗОНЦИТЕ Младите веќе си бараат поплатена и постабилна работа во странство appeared first on plusinfo.mk.

Моментално во Агенцијата за вработување се огласени 8.468 испразнети работни позиции, а голем број огласи има и во приватните агенции за посредување при вработување. Бројката на слободни работни места со месеци не е симната под 6.000. Агенцијата исто така бележи пад на бројот на баратели на работа, истовремено и кај активните и пасивните невработени.

Никој не може со сигурност да каже каде завршуваат младите по школувањето, било да е средно или високо. На крајот на мај, според податоците на  Агенцијата за вработување, регистрирани се 120.174 активни баратели на работа, што е за околу 2.300 помалку отколку во април. Споредено со мај лани, бројот на невработени кои активно бараат работа се стопил за повеќе од 23 .000. Кај пасивните баратели на работа бројот е помал за 800 лица.

Меѓу занимањата кои моментално најмногу се бараат најмногу според податоците на  Агенцијата за вработување, се и  хигиеничарите. По нив следат општите работници, продавачите, келнерите, возачите на камиони, шанкерите, готвачите… Се бараат и програмери и градежни и машински инженери.

Бизнисмени се жалат дека со месеци не можат да најдат работници, а дел од работните позиции остануваат отворени.

– Барам работници за работа во хотел, но многу е тешко да се обезбедат, бидејќи скоро никој не се јавува. Имаме отворен оглас со месеци за одделни позиции, но навистина никој не се јавува. Но, затоа пак, како што следам огласите на странските хотелиери, многу брзо се пополнуваат нивните равботни места, иако тамошните работодавачи не им даваат сигурност дека ќе го исполнат ветеното – вели раководител на хотел.

Во агенциите кои посредуваат при сезонско вработување во странство велат дека и кај нив, поради последната криза и променетите услови за примање работници во странство, огласите не се пополнуваат брзо.

– Ако до пред две години на секој оглас имавме една недела за доволно апликации, сега се потребни најмалку две недели. На ова влијаат високата инфлација, непроменетите плати кај побарувачите на работници во странство и зголемените режиски трошоци на работниците. Па, секој што сака да аплицира прво ќе размисли дали му се исплати да плаќа високи режиски трошоци, а да добие иста плата како порано, за одреден период колку што ќе работи во странство. Во Германија, на пример, сега веќе се бара работникот самиот да изнајми стан, а таму кириите се мошне високи, па заработката може да отиде за кирија и за други режиски трошоци. Значи, на работниците им е потребен подолг период да размислат дали им е добра опција одењето на сезонска работа во странство, но бројките не се мали – вели Милан Џинглев од агенцијата Приорити солуции за вработување, која посредува при сезонски вработувања во странство.

Тој вели дека има доволен број невработени во земјава за да се пополнат испразнетите места и да се задоволат потребите на бизнисите, но сугерира домашните работодавачи да се преиспитаат во однос на вложувањето во работниците, пред да се жалат дека невработените не сакаат да аплицираат за позициите што ги нудат.

– Кај нас аплицираат само студенти и работници без ангажман, значи има невработени во земјава кои можат да се јават на отворените огласи. А зошто не се јавуваат и тоа е веќе познати. За нив позициите се непрофитабилни и демотивирачки. Сепак, мислам декае дојдено време кога не треба  само да имаш желба да отвориш бизнис, туку треба да се размислува поинаку за работниците и плаќањето на нивниот ангажман. Тоа го знаат сите бизнисмени, но најчесто кратат на вложувањата за работниците – вели Џинлев.

Ангел Димитров од Организацијата на работодавачи вели дека со години во преработувачката индустрија, земјоделието, градежништвото и во угостителската дејност има недостиг од стручен кадар, а од неодамна и трговијата се соочува со истиот проблем. Причините, според него, се во тоа што младите не сакаат да работат за она што не се образувале и најчесто се надеваат дека работата во странство ќе им биде подобар избор.

– Во текстилот веќе нема млади луѓе, а се помалку ги има и во другите сектори, па дури и во трговијата. И тие што учат нешто од овие струки, не сакаат да работат во оваа индустрија, бидејќи е трудоинтензивна и малку платена. Нивните планови најчесто се одење во странство, но таму, за разлика од кај нас, не бараат работа според образованието, туку работат сè што ќе им се понуди. Па така, имате возач во Германија со високо образование, а овде таков човек никогаш не прифаќа да биде работник. И тоа тешко ќе се промени – вели Димитров.

Според него, земјава е зафатена со трендот на иселување на младите за подобар живот, кој веќе е познат во сите земји кои биле аспиранти или се вклучиле во ЕУ.

– Таков беше трендот на сите земји. Еве, сега Романија и Бугарија се празнат, но во земјите кои ја развија високотехнолошката индустрија. Полска и Чешка веќе бележат запирање на иселувањето кај младите. Иста состојба ќе нè следи и нас. Значи, треба да се затвори трудоинтензивна индустрија и да се отворат висококвалификувани работни позиции во понапредната индустрија. Но,  додека трае тој процес, ќе ни се иселат младите – додава тој.

Решение на проблемот Димитров гледа во реформа на образовниот процес, кој сега издава фиктивни дипломи, кои во практиката не значат ништо.

– Потребно е да се изгради соодветен однос кон претприемништвото, кое нуди вложувања и отворање работни места. И тоа треба да се прави од најраните возрасти на децата во училиште и да се надмине состојбата во која сме сега кога се бараат ученици за да им се удоволи на големиот број професори, да можат да останат на работа. Затоа имаме паралелки со 10 ученици, а 15 професори кои им предаваат и слично. На факултетите се даваат фиктивни дипломи кои не значат ништо во процесот на работа. Сето тоа не оди на добро во земјата – вели Димитров.

Ниските плати, според синдикатите, се повод дел од работниците да напуштат работни места и да одат во странство. Само од јавниот сектор во последните години, според синдикатот на УПОЗ, 5.000 административци ги напуштиле работните места, а дел од нив заминале во странство. Трендот е актуелен и во угостителството и во трговијата, но и во земјоделството.

И опозициските партии велат дека младите се иселуваат од земјава за да најдат поплатени работни места. Дел од нив наведуваат и дека егзодусот на младите се гледа и во издадените работни и други визи на земјите кои најмногу бараат работници од Балканот.

The post РАБОТА ИМА, АМА РАБОТНИЦИ НЕМА Наместо да се жалат, газдите да ги одврзат ќесињата appeared first on plusinfo.mk.