Караванот „Собрание за граѓаните“ ќе посети 12 градови низ земјата, додека завршниот настан ќе се одржи во Скопје. Проектот се реализира во рамки на „Програмата за парламентарна поддршка“ која што е финансирана од Швајцарската агенција за развој и соработка (СДЦ) преку Швајцарската Амбасада.

– Овој караван е еден поинаков начин за приближување на начинот на функционирање на законодавниот дом и на самите пратеници на Собранието на Република Северна Македонија до граѓаните чиј што легитимитет и го уживаат во собраниските клупи. Ова е дополнителна можност за тие граѓани да се запознаат со избраните пратеници од нивните изборни единици во градовите во кои живеат и работат – истакна претседателот на Собранието, Талат Џафери.

Активностите почнаа на 25 октомври, во Штип и продолжуваат според следниот распоред: Кавадарци (26.10), Гевгелија (27.10), Струмица (28.10), Радовиш (31.10), Кочани (1.11), Велес (2.11), Прилеп (3.11), Битола (4.11), Охрид (7.11), Дебар (8.11) и Гостивар (9.11). Караванот ќе биде заокружен со завршен настан којшто е закажан за 12 ноември (сабота), во паркот Жена-борец, од 11 часот.

– Граѓаните можат да учествуваат во демократијата во Република Северна Македонија не само со гласањето на изборите, туку и преку споделување идеи и прашања што ги загрижуваат со нивните избрани претставници. Законодавните и надзорните улоги на Собранието се посилни кога се слуша гласот на граѓаните и нивните ставови се застапени од страна на пратениците во Собранието – истакна Роберт Скот Хејзлет, тим-лидер на „Програмата за парламентарна поддршка“.

Во текот на караванот, граѓаните ќе имаат можност да се стекнат со знаења на теми како историја на парламентаризмот, процесот на донесување закони, мандат и имунитет на пратениците, односи со другите институции на власта, организација и функционирање, парламентарни избори, како и политичка контрола и надзор над Владата од страна на Собранието. На секоја од локациите каде што ќе се одржува караванот ќе бидат присутни и пратениците од соодветната општина, при што граѓаните ќе имаат можност со нив да воспостават директен контакт и да разменат мислења.

Кампањата „Собрание за граѓаните“ се реализира во рамки на „Програмата за парламентарна поддршка“, 10-годишен проект поддржан од Швајцарската агенција за развој и соработка (СДЦ) преку Швајцарска Амбасада во Република Северна Македонија. „Програмата за парламентарна поддршка“ се спроведува од Националниот демократски институт (НДИ), Институт за демократија „Социетас Цивилис“ – Скопје (ИДСЦС) и Центарот за управување со промени (ЦУП).

„Програмата за парламентарна поддршка“ е 10-годишен проект што ќе ги поддржи напорите за независност на Собранието на Северна Македонија преку градење консензус, структурни реформи и зајакнување капацитети. Проектот ќе го поддржи институционалниот развој на Собранието, неговите законодавни и надзорни улоги и неговата институционална транспарентност и отчетност. Вкупната цел на проектот е да му помогне на Собранието во стекнување институционален кредибилитет и доверба во јавноста со зачувување на интересите и потребите на граѓаните и со поконсензусно ориентирана и инклузивна дебата и донесување одлуки. Проектот се спроведува од Националниот демократски институт, Центарот за управување со промени и Институтот за демократија „Социетас Цивилис-Скопје“ со институционално партнерство од Швајцарското федерално собрание, Европскиот парламент, естонскиот „Риигикогу“, германскиот Бундестаг и граѓанската организација со седиште во Латвија, „МанаБалсс.лв“.

The post ПАРЛАМЕНТАРНИОТ КАРАВАН ЌЕ ПРОШЕТА НИЗ 12 ГРАДОВИ Граѓаните ќе се запознаат со работата на Собранието appeared first on plusinfo.mk.