Премиерот Христијан Мицкоски очекува брзата пруга на Коридорот 10 да почне да се гради на почетокот на следната година.

Тој рече дека веќе има необврзувачка индикативна понуда за потенцијален финансиер кој ќе треба да се потврди со потпишување на договор, но пред тоа треба да се заврши процедурата за подготовката на физибилити- студијата и студијата за влијанието врз животната средина.

– Продолжуваме со реализација на проектот „Брза пруга“ на Коридорот 10. Физибилити-студијата е веќе при крај и студијата за влијанието врз животната средина е исто така при крај, законско времетраење е 270 дена и очекувам летово, јуни – јули, да бидат затворени овие прашања затоа што ќе биде потребна и ревизија на овие студии. Откога ќе биде завршено сето тоа, ќе влеземе во процес на потпишување договор за потенцијален финансиер. Министерството за финансии веќе објави повик – имаме необврзувачка индикативна понуда од потенцијален понудувач и, се разбира, треба да ги потврдат условите што ги дадоа тогаш и ако биде сè како што треба, очекувам на почетокот на следната година да почне реализацијата – рече Мицкоски  по присуството на панихидата во црквата „Св. Спас“ во Скопје по повод 123 години од смртта на Гоце Делчев.

Тој рече и дека продолжуваат и планираните активности за изградба и модернизација на железничкиот  Коридор 8, каде што очекува заокружување на предвидените проекти за пругата до Бугарија и за модернизацијата на пругата од Скопје до Кичево.

Тој информира дека за пругата кон Бугарија се очекува тендер за избор на изведувач за третата делница и потсети дека веќе е пробиен последниот тунел од втората делница и оти првата делница е веќе во функција.

-Преговараме со ЕК и веќе се обезбедени пари во рамките на планот за раст за модернизација на пругата од Скопје до Кичево. Овој проект се реализира со несмалена динамика и очекувам комплетно од Кичево до границата со Бугарија да биде заокружен најдоцна до 2029 година – изјави Мицкоски.

The post НА ПОЧЕТОКОТ НА СЛЕДНАТА ГОДИНА ЌЕ ПОЧНЕ ДА СЕ РЕАЛИЗИРА БРЗАТА ПРУГА Мицкоски очекува железничкото поврзување со Бугарија да биде готово во 2029 година appeared first on plusinfo.mk.

Изградбата на втората фаза на пругата од Бељаковце до Крива Паланка на источниот дел од Коридорот 8 се реализира со засилена динамика, објави директорот на ЈП Железници Инфраструктура, Синиша Ивановски.

„Градежни активности на изградбата на пругата кон Бугарија. Секција 2, од Бељаковце кон Крива Паланка. Должина 34 километри. Прогрес 35%. Бележиме зголемен интензитет на градежните активности“, објави Ивановски на својот профил на Фејсбук.

Министерството за транспорт соопшти дека е објавен јавниот повик за надзор за третата делница од Крива Паланка до границата со Бугарија. Следниот месец се очекува да се распише и меѓународниот јавен повик за избор на изведувач за делницата Крива Паланка-граница.

„Со ова Владата ја покажува јасната стратегија за изградба на железничкиот Коридор 8, како стратешко економски и безбедносен коридор со посебно значење за Македонија и регионот“, соопшти Министерството за транспорт.

The post 🎥 ИНТЕНЗИВНО СЕ ГРАДИ ПРУГАТА КОН БУГАРИЈА Се оформува делницата од Бељаковце до Крива Паланка appeared first on plusinfo.mk.

До 2030 година, Бугарија и Македонија ќе го завршат железничкото поврзување. Тоа било истакнато на состанокот во бугарското Министерство за транспорт и врски меѓу вршителот на должноста министер за транспорт и врски Корман Исмаилов и македонската амбасадорка во Софија Агнеза Руси Поповска, соопшти прес-центарот на бугарското Министерство за транспорт.

По ратификацијата на Договорот за изградба на прекуграничниот железнички тунел, од страна на парламентите на двете држави, следната фаза е формирање на Заеднички комитет, предводен од замениците на министрите за транспорт, кој ќе ја координира подготовката, изградбата и идното работење на објектот, пренесува БТА.

Според соопштението, министерката Исмаилов го нагласила забрзаното темпо со кое бугарската страна работи на модернизацијата на железничката линија Софија – Перник – Радомир – Ѓуешево. Амбасадорката Руси Поповска, пак, потенцирала дека соработката меѓу институциите на двете земји е важен предуслов за непречено спроведување на проектот.

Договорот за прекуграничниот железнички тунел, беше потпишан на 6 ноември 2025 година во Ѓуешево. Следуваше ратификација во македонското Собрание во декември лани, а  месецов и во бугарското Собрание.

Првата од трите делници на македонска територија за железничкото поврзување со Бугарија, Куманово-Бељаковце е пуштена, а на втората Бељаковце-Крива Паланка, во должина од 34 километри, завршени се над 30% од работите и неодамна беше пробиен и последниот тунел.

За третата делница, од Крива Паланка до бугарската граница, во септември лани со одлука на Владата се ефектуираше Договорот за грант за техничка поддршка во висина од 3,7 милиони евра од Европската инвестициска банка, за изработка на нова проектна документација, како и подготовка на тендерската постапка за избор на изведувач. Третата делница е во должина од 23,4 километри со планирани 22 тунели, од кои и меѓуграничниот, како и 52 моста.

Бугарската Национална компанија за железничка инфраструктура веќе објави тендер за проектирање и изградба нова железничка траса од Ѓуешево до границата со државава во должина од 2,4 километри, единствената делница што недостасува од железничкиот Коридор 8 на бугарска територија, како и за модернизација на 17 –  километарската делница од Перник до Радомир.

The post СО ВОЗ ОД СКОПЈЕ ДО СОФИЈА ВО 2030 ГОДИНА Македонија треба да пробие уште 22 тунела и да изгради 52 моста appeared first on plusinfo.mk.

Ако се оди како што треба на двете страни, во 2031, 2032 година треба да може да се патува со воз од Скопје до Бургас, најави денеска вицепремиерот и министер за транспорт Александар Николоски.

Тој во одговор на новинарско прашање на промотивен настан на Орце Ѓорѓиевски, кандидатот на ВМРО-ДПМНЕ за градоначалник на Град Скопје на претстојните Локални избори, потврди дека на 4 ноември, кога ќе завршат сите ограничувања заради изборите, ќе се потпише договорот за заедничка изградба на прекуграничниот тунел на пругата кон Бугарија, како што е договорено во јуни годинава.

-Во јуни имавме средба со вицепремиерот и министер за транспорт Гроздан Караџов во Истанбул, една корисна конструктивна средба каде што првпат по речиси година дена, седнавме да ги разгледаме реалните проблеми коишто се од инженерски, а не од политички карактер. Имајќи предвид дека средбата беше таква, стручна за теми коишто не се поврзани со политика, затоа што градење пруга не е политика најдовме многу брзо решение – рече Николоски.

Како што прецизира, договорено е Македонија да ја изгради третата фаза од железницата кон Бугарија.

-Бугарија си ги презеде своите обврски, а тоа е да инвестира 1,5 милијарди евра во изградба, реконструкција и надградба на пругата која што оди од Софија преку Перник до Ѓуешево и да го изгради делот од Ѓуешево до границата. За делот од Ѓуешево до границата веќе има тендери и она што останува тунелот којшто претходно, за жал, беше проектиран до пола, сега ќе се проектира целосно и за таа работа секако треба да се потпише меѓудржавен договор. По завршувањето на изборите, кога ќе завршат овие ограничувања истиот ќе го потпишеме – рече Николоски.

Ние, додаде, на седница на Влада исто така одобривме да се работат корекциите во делот на третата фаза и одиме по договорот, и се надевам дека ќе го реализираме, и дека за неколку години ќе имаме железничко поврзување помеѓу Скопје-Софија и пристаништето во Бургас.

-Ако се оди како што треба на двете страни, 2031, 2032 година треба да може да се патува со воз од Скопје до Бургас – реле Николоски.

The post СО ВОЗ ОД СКОПЈЕ ДО БУРГАС ЌЕ СЕ ПАТУВА ВО 2031 ГОДИНА Во ноември ќе се официјализира договорот за изградба на тунелот Деве Баир – Ѓуешево appeared first on plusinfo.mk.

Македонија е природна крстосница на двата коридора и затоа мораме да ги искористиме предностите. Имаме огромна шанса, но мораме да имаме и заложба од другите земји кои се на двата коридора, 8 и 10, за заеднички да ги унапредиме, истакна синоќа вицепремиерот и министер за транспорт, Александар Николоски во гостување на  ТВ 21.

– До границата со Бугарија води експресен пат кој околу Нова година ќе го пуштиме во сообраќај и граѓаните за околу 1 час и 20 минути ќе се стигнува до границата. Започнавме реконструкција на граничниот премин Деве Баир, но од другата страна на границата ништо не се работи, за да може квалитетно да се поврземе – потенцираше министерот Николоски.

Тој го посочи примерот со граничниот премин Клепало кој од македонска страна е изграден пред десетина години. Овој премин не е ставен во функција затоа што бугарската страна досега нема инвестирано во инфраструктурата.

– Ако имаме автопатско поврзување кон Бугарија, а тие немаат, тогаш која е поентата ние да градиме автопати? Сега ја забрзуваме постапката за Охрид-Кичево, забрзуваме и со Гостивар-Букојчани, што значи дека ќе имаме автопат и на запад. Добра вест е што Албанија гради, што значи дека ние автопатски ќе се поврземе со две пристаништа, Драч и Валона, додека од бугарска страна не се гради ништо. Истото е и со пругата. Мораме да имаме заедничи проект бидејќи пругата не води никаде. Тие јавно истакнаа дека немаат проект за пругата и дека до 2026 година ќе го направат проектот, а ќе им требаат уште најмалку четири години да ја изградат. Јас не сакам да оставам позади мене незавршен проект па генерациите после мене да решаваат проблеми. Дополнително на Бугарите ќе им треба повеќе време бидејќи тие треба да ја реконструираат и целата пруга од Ѓуешево до Софија – истакна министерот Николоски.

Тој потенцираше дека потребно е да се ревидира проектот за третата фаза, а потоа да се прилагоди цената и да се обезбеди договор со Бугарија, со кој ќе дадат гаранции дека пругата ќе ја изградат до границата.

Во врска со Коридор 10, вицепремиерот Николовски исткана дека приоритет за следната година е реконструкција на пругата на Коридорот 10 и амбициозниот проект за изградба на брза пруга, исто така, на Коридорот 10.

The post АВТОПАТСКИ ЌЕ СЕ ПОВРЗЕМЕ СО АЛБАНИЈА, БУГАРИЈА НЕ ГРAДИ НИШТО За два месеци ќе биде пуштен експресниот пат до Деве Баир appeared first on plusinfo.mk.

– Треба да има таква средба. Добро е и за Бугарија да има средба, оти и за нив е добро да се поврземе. Во врска со повиците за моја оставка, јас му одговорив на Бојко Борисов, кажав што имам. Стојам зад секој збор што сум го кажал на тема односи помеѓу Македонија и Бугарија. За жал, 20 политичари на крајот од своите кариери и историчари кои не можат да направат никаква друга кариера освен на Македонија, ги уништуваат односите помеѓу два блиски народа како македонскиот и бугарскиот народ, што е трагедија за Бугарија – рече Николоски.

Тој додаде дека не сака, како што прават бугарските политичари и историчари, да кажува кој треба да ја води Бугарија.

– Но, можам да кажам дека е тажно тоа што го прават во односите меѓу Македонија и Бугарија. Подалечни не сме биле никогаш, што зборува многу за негативната енергија во нашите односи. Изградбата на пругата е сосема друга тема и доколку на другата страна има минимум одговорни луѓе, а сметам дека има, затоа што има повеќе од тие 20 луѓе во политичката и научната елита, ќе најдеме заедничко решение за да се поврземе со железница – рече вицепремиерот Николоски.

The post НИКОГАШ НЕ СМЕ БИЛЕ ПОДАЛЕЧНИ СО БУГАРИЈА Како 20 политичари на залез на кариерите ги уништија односите меѓу двата народа? appeared first on plusinfo.mk.

Тој најави дека ќе разговара за ова со кредиторите во следниот период.

Главна причина за ваквото мислење Николоски вели дека е високата цена на чинење на делот од пругата од Коридорот 8 од Крива Паланка од границата со Бугарија и тешката изведба на овој дел од пругата.

– Овој дел од пругата кој е долг 24 километри минува низ Крива Паланка каде што треба да се рушат 20 куќи и да се остават без дом 20 семејства. Пругата минува и низ планински дел кој нема да дозволи движење на воз побрзо од 60 километри на час што е проблем во услови на брзи пруги. Но уште позагрижувачко е тоа што на потег од 24 километри треба да се градат 22 тунели за 4 години. Ова е нереална работа за 4 години да се изградат 22 тунела. Ниту една компанија не се нафаќа да го изгради овој дел од пругата. Дополнително пругата завршува во тунел кај нас бидејќи не се знае дали Бугарија ќе се поврзе токму на тој тунел со нејзиниот дел од пругата и дали има намера да ја гради – вели Николоски.

Тој смета дека за изградба на оваа пруга се потребни 560 милиони евра од кои повеќе од 350 милиони се кредити, што ја прави пругата поскапа и од изградба на брза пруга.

– Во услови на сиромашна држава се поставува прашање дали треба да се трошат толку пари за да се гради нешто што можеби нема да функционира, што значи ќе бидат фрлени пари за ништо, бидејќи километар ќе чини 24 милиони евра, а брза пруга се гради со 10 до 12 милиони евра километар. Затоа ние бараме со кредиторите на третиот дел од пругата кон Бугарија – ЕИН и ЕБОР да седнеме и да договориме пренамена на кредитот за рехабилитација на пругата од Коридорот 10 и да изградиме брза пруга на која ќе може возовите да се движат со 120 километри на час. Целата инвестиција ќе чини 220 милиони евра – рече Николоски.

Во однос со доизградба на пругата од Коридорот 8 Николоски рече дека мора да се седне и со Бугарија и да се види дали е подготвена да го реализира нејзиниот дел.

Николоски има забелешка на изведбата на пругата во вториот дел до Крива Паланка каде што рече дека турската компанија има многу слаба реализација на градба, за разлика од онаа на првиот дел од пругата каде што интензивно се работи.

Пругата од Коридорот 8 во прва и втора фаза ја градат австриската компанија „Штрабаг“ и турската компанија „Ѓулермак“.

Првата делница која ја гради фирмата „Штрабаг“ е во должина од 31 километар, чини 40,5 милиони евра, а треба да се изградат и три железнички станици и 6 стојалишта. Втората делница во должина од 34 километри од пругата кон Софија ја гради фирмата „Ѓулермак“ и таа опфаќа изградба и на две железнички станици и три стојалишта и ќе чини 155 милиони евра.

The post НАМЕСТО ЌОРСОКАК КОН БУГАРИЈА ДА ИЗГРАДИМЕ БРЗА ПРУГА КОН СОЛУН Николоски бара кредиторите да дозволат да се пренаменат парите appeared first on plusinfo.mk.

Колку време ќе се гради овој дел од пругата засега не се знае, но ако се суди според изградбата на пругата од Куманово до Крива Паланка во должина од 94 километри, која се гради веќе 30 години, може да се замисли колку ќе трае изградбата на овој, најтежок дел од пругата кон Бугарија.

За да биде комплетна пругата до средината на следната година треба да се заврши изградбата на делот од Куманово до Бељаковце и во 2025 година делот до Крива Паланка. Овие два дела чинат 200 милиони евра, а на нив работат австриската компанија „Штрабаг“ и турската компанија „Ѓулермак“ кои се обврзаа да ги почитуваат роковите за завршување на изградбата.

Целосната инвестиција, според сегашните пресметки, ќе чини 700 милиони евра, а беше најавено дека ќе биде завршена прво до 2025 година, па дека ќе се патува до Софија од 2027 година, а сега не се знае кога е крајниот рок.

Министерот за транспорт и врски Благој Бочварски деновиве во Крива Паланка изјави дека на пругата се работи интензивно, но не кажа до каде се завршени работите целосно и дали роковите ќе бидат пробиени.

– Во делот на железничката инфраструктура, активно ја градиме пругата од Куманово до Крива Паланка, каде што на првите две фази веќе работиме на терен. Тоа е инвестиција од повеќе од 200 милиони евра, а до крајот на годината очекувам да се распише и јавен повик за изградба и на третата фаза, од Крива Паланка до ГП Деве Баир, најтешката делница од оваа пруга, со што вкупната инвестиција на источниот крак од железничкиот Коридор 8 ќе надмине 700 милиони евра – рече Бочварски.

Покрај овој дел, железничкиот Коридор 8 треба да ја поврзе земјава и со Албанија. Доколку се комплетира железничката пруга, тоа ќе ги зголеми опциите на државите при транспорт на стоки и трговијата, а би влијаело и на бројот на туристи. Се предвидува дека  овој Коридор ќе го олесни транспортот на околу 500.000 тони товар и 500.000 патници годишно, придонесувајќи за подобра поврзаност, климатска отпорност и социоекономски развој на Северна Македонија и регионот.

За да бидат овие придобивки вистините треба да се изгради и транспортен јазол кој ќе ги спојува железниците од двата коридори и аеродромот во Скопје. Засега е најавено дека во рамки на кредитите за железничката инфраструктура се обезбедени 6,7 милиони евра за заеднички железнички премин на Табановце, со Република Србија. Кога, пак, ќе се гради поврзувањето со железницата со Албанија не се знае.

И додека се размислува за коридорот 8 пругите на Коридорот 10 попуштаат, а останатото железничко поврзување во земјава е ставено на ситен бај. Поради ваквата состојба компаниите се помалку имаат верба дека транспортот на стоките ќе стигне навреме до дестинациите и полека се откажуваат од изборот на железницата за опција за транспорт на стоките. Во третото тримесечје од годинава, според податоците на државниот завод за статистика железничкиот превоз на стоки е намален за 32%. Земјава со години нема меѓународен железнички превоз.

Експертите велат дека земјава треба да посвети поголемо внимание на железницата бидејќи Европската Унија издвојува високи суми за развој на овој превоз, кој е влезен во зелената агенда.

– Последните 10 години, ЕИБ го поддржа железничкиот сектор на глобално ниво со инвестиции од повеќе од 39 милијарди евра, помагајќи да се изградат или надградат речиси 2000 километри пруги и стотици станици. Во Западен Балкан, ЕИБ Глобално е водечки финансиер на стратешките железнички линии и давател на техничка и советодавна помош – велат тие.

Унијата, преку своите финансиски институции, даде грантови и ги одобри сите кредити кои земјава ги побара за изградба на пругите. Така е и за последниот дел за изградба на пругата кон Бугарија.

Министерството за финансии во соопштението за овој кредит соопшти дека 500 милиони евра повторно се обезбедени од европските институции

– Обезбедени се финансиски средства во износ од 175 милиони евра од ЕБОР и 175 милиони евра од ЕИБ. За реализација на овој проект се обезбедени и 149,2 милиони евра инвестициски грант од Инвестициската рамка за Западен Балкан – ВБИФ, како и грант од ИПА 2 во износ од 60,77 милиони евра. Проектот, исто така, има и ќе продолжи да има корист од техничката поддршка на ЕУ и ЕИБ, вклучително и преку програмата JASPERS за подготовка, тендерирање и имплементација – рекоа од Министерството.

На почетокот на градежните работи на пругата Куманово – Крива Паланка парите исто така беа обезбедени со кредити од овие институции или преку неповратни средства. За оваа делница се користат неповратни финансиски средства од 75 милиони евра од ЕУ преку Инвестициската рамка за Западен Балкан. Лани исто така беше соопштено дека за железничка делница од Крива Паланка до границата со Бугарија се обезбедени 149,2 милиони евра.

Со пари од Европската Унија и потпишани кредити се фалеа и претходните влади во изминатите 30 години, но пругата никако да се изгради. Покрај парите за изградба на овој проект, ЕУ во извештаите редовно не потсетува дека бавно ги реализираме преземените обврски околу реализацијата на проектот.

И додека ние не успеваме 30 години да реализираме железница од 94 километри, соседна Србија го реализира проект „брза пруга“ речиси на целата територија за овие години. Последната најава е дека ќе се гради и делот од Ниш до границата со Македонија, за што заеднички со нас ќе бара пари од Европската Унија.

The post 30 ГОДИНИ ГРАДИМЕ ПРУГА КОН БУГАРИЈА До кога Европа ќе ја финансира нашата неспособност? appeared first on plusinfo.mk.

– Во зима овде никој нема да може да излезе, нагорнината е голема. За сите ќе биде потешко, деца нема да можат да одат на училиште, нема тротоари, ограда, од двете страни. Прв снег да падне, автомобилите ќе завршат на пругата – вели Милорад Илиевски.

Неговиот сосед Стефан Кипријановски додава дека косината е голема и тоа ќе предизвика проблем за жителите.

– Утре пожарна нема да може да влезе, камиони со дрва не можат да влезат – вели Кипријановски.

Од Јавното претпријатие за железничка инфраструктура, Железници на РСМ велат дека заедно со изведувачот и надзорот излегле на терен, контактирале со локално население и ги ислушале нивните проблеми.

– На жителите по нивната поплака за стрмен пат им кажавме дека повторно ќе направиме преглед на документација за да утврдиме да не има направено некој пропуст. Изведувачот ќе изврши ново геодетско снимање на проблематичниот дел од патот и ќе бараме да предложат техничко решение за да може да го ублажиме проблемот и да излеземе во пресрет на населението. Ги замоливме да бидат малку трпеливи и да се заврши ревизијата и повторно да се сретнеме со населението. За безбедноста на населението изградивме надвозник, бидејќи патот директно се вкрстуваше со железничката пруга. Во рамките на експропријација и техничко решение се надеваме дека ќе најдеме заедничко решение. Со проектот е предвидена и оградата на мостот која ќе биде поставена на крајот кога ќе се завршат градежните работи – објаснуваат од јавното претпријатие.

The post КУМАНОВЦИ ЈА ЗАПРЕА ИЗГРАДБАТА НА ПРУГАТА КОН БУГАРИЈА Жителите протестираат револтирани од проектот appeared first on plusinfo.mk.

За утре е закажан нов почеток на продолжувањето на градбата на пругата, со учество на премиерите на двете држави.

Според она што го соопшти неодамна директорот на Железници инфраструктура, Хари Локвенец, изградбата на овој дел од пругата е доверена на компанијата „Штрабаг“, а на делот од Бељаковце до Крива Паланка на компанијата „Ѓуљермак“.

Договорот со „Штрабаг“, која треба да изгради 31 километар железница од Куманово до Бељаковце, тежи 40,5 милиони евра. На овој дел ќе бидат изградени и три железнички станици во Ново Куманово, Шупли Камен и во Бељаковце, како и шест стојалишта во Лопате, Перо Ччичо, Проевце, Клечовце и во Довезанце. Рокот за изградба е 24 месеци.

Договорот со „Ѓулермак“ вреди 155 милиони евра. „Ѓулермак“ треба да ја изгради втората делница од коридорот 8 од Бељаковце до Крива Паланка во должина од 34 километри. Рокот за изградба е 36 месеци. На овој потег ќе бидат изградени две железнички станици во Крива Паланка и Гиновце и три стојалишта во вториот дел на пругата.

Со „Штрабаг“ е потпишан и договор во вредност од 4,8 милиони евра за реконструкција на делот од пругата на коридорот 10 од Ногаевци до Неготино, во должина од 31 километри, со рок на градба од 6 месеци.

Колку пари се потребни да се изградат сите пруги?

Овие проекти се финансирани со кредит од Европската банка за обнова и развој(ЕБОР), но во вториот лот се користат средства од инструментот на ЕУ – Инвестициски фонд за Западен Балкан (ВБИФ), во висина од 68,5 милиони евра.

За третата делница на коридорот 8 од Крива Паланка до Деве Баир од ВБИФ е добиена потврда за доделување инвестициски грант во висина од 155 милиони евра.

Заедно со претходно обезбедените 61 милион евра од ИПА 2 програмата, за третата делница е добиен грант во вкупна вредност од 216 милиони евра, за проектот чија проектна вредност е 405 милиони евра.

За целосна изградба на пругите во земјава се потребни над 1 милијарда евра, од кои 350 милиони евра за источниот дел кон Бугарија и 550 милиони евра за западниот дел кон Албанија. Последните пресметки и потпишаните договори за источниот дел пораснаа на 590,5 милиони евра, а за делот кон Албанија ќе се знае износот кога ќе почне и градбата.

Досега само за правиот и вториот дел од оваа траса се земени кредити од ЕБОР во износ од 271,4 милиони евра и грант од 68,6 милиони евра од истата банка, како и 5,7 милион евра грант од инвестициската рамка на Западен Балкан за поддршка на подготовката и реализацијата на проектот за делот од Бељаковце до Крива Паланка. Или, вкупно, државава имаше на располагање 345,7 милиони евра да го заврши делот на пругата од Куманово до Крива Паланка. Дополнително ќе бидат потребни уште најмалку 140 милиони евра.

Плативме дури и казна поради договорен, а неповлечен заем од ЕБОР

За изградбата на источниот дел на железничкиот коридор, Македонија зеде неколку кредити од Европската банка за обнова и развој, а потписи на договорите ставија повеќе министри.

Зоран Ставревски, во 2012 година, кога официјално го најави големото железничко поврзување со Бугарија, рече дека ја затворил финансиската конструкција за рехабилитација на источниот дел од железничката пруга на коридорот 8 кон Бугарија. Тој потпиша кредит во износ од 46,4 милиони евра. Рокот на изградба на овој дел од пругата беше 2016 година.

На крајот на 2014 година, истиот министер најави дека за 8 до 9 месеци ќе почне вториот дел од пругата од Бељаковце – Крива Паланка во должина од 34 километри, за што потпиша договор за кредит од 145 милиони евра.

И Драган Тевдовски во 2018 година потпиша договор со ЕБОР за грант од 68,6 милиони евра, со кој се дополнија постојните заеми од ЕБРД за фаза 1 и фаза 2 од Проектот за рехабилитација и доизградба на железничката пруга од овој коридор. Со овој грант, беше соопштено, се кофинансира фаза 2, делницата помеѓу Бељаковце и Крива Паланка. За втората делница е обезбеден и грант во износ од 5,7 милион евра од инвестициската рамка на Западен Балкан за поддршка на подготовката и реализацијата на проектот.

Лани на ЕБОР ѝ беа платени 6,5 милиони евра казна во камати и трошоци за нереализирани средства поради договорен, а неповлечен заем за изградба на пругата Бељаковце – Крива Паланка.

Не мрднаа ни Груевски ни Заев

Пругата кон Бугарија почна да се гради во 1993 година. Активностите беа прекинати по неколку години. Процените се дека тогаш во ветер отишле околу 100 милиони евра.

Потоа владата на Никола Груевски ги продолжи активностите во 2014 година кога вети воз до Бељаковце до 2016 година, но ова и денес изгледа нереално.

Битката со тие 30 километри пруга ја продолжи и Владата предводена од Зоран Заев. Во март 2019 година Заев на Твитер напиша дека завршени се 70 отсто од работите на пругата до Бељаковце. Помпезно се најави и завршување на целата активност на 31 декември 2019 година.

Со колку „брзо“ темпо се движат работите покажува и лицитацијата за пуштање на целосната пруга и нејзиното одложување де во 2023, де во 2025, па се до 2027 година.

Во изминатите години македонски бугарски и албански премиери и министри како и директорите на железничките компании неколку пати најавуваат дека коридорот ќе се гради, а возот од Скопје ќе стигне во Софија.

Во 2014 година министрите за транспорт на земјава на Албанија и на Бугарија Миле Јанакиевски Едмонд Хаџинасто и Николина Ангелкова, соопштија дека ќе бараат пари од Европската комисија за доизградување на трансевропскиот коридор 8.

– Очекуваме дека железничката врска меѓу Скопје и Софија да биде готова до 2022 година. Првата етапа од железничката линија од Куманово до Бељаковце веќе се гради, а вториот дел до Крива Паланка треба да почне догодина. Третата фаза, до Ѓуешево до 2017 година – тогаш изјави Јанакиевски.

Директорот на Македонски железници – Инфраструктура Ирфан Асани и неговиот бугарски колега Милчо Ламбрев во 2016 година рекоа дека железничкото поврзување меѓу Македонија и Бугарија ќе се заврши најдоцна до 2020 година.

Последно ветување – возот ќе забревта во 2027 година?

Последни во редицата се директорите на „Македонски железници“, на бугарската „Железничка инфраструктура“ и на „Албански железници“, Хари Локвенец, Красимир Папукчиски и Ани Дирмиши кои рекоа дека со воз ќе се патува во 2027 година, а од Јадранско до Црно Море во 2030 година. Тие потпишаа трипартитен договор.

И овде не се зборува само за изгубени пари во инвестиции кои потоа пропаднале поради негрижа, туку и загубени пари поради неизградената железница и за плаќање на поскап транспорт.

The post МНОГУ ФРЛЕНИ ПАРИ И КУП ПРЕСЕЧЕНИ ЛЕНТИ, А ПРУГА НЕМА! Нов почеток на изградбата на железничката линија кон Бугарија appeared first on plusinfo.mk.