Сопствениците на напуштени куќи во селата и на викендички кои ретко ги користат треба да направат противпожарни пресеки околу објектите, широки околу десетина метри, во зависност од околната вегетација. Ова го апелираше раководителот на Главниот штаб за управување со кризи и директор на Дирекцијата за заштита и спасување (ДЗС), Стојанче Ангелов.

Според Ангелов, во борбата со пожарите, кои во иднина би можеле да се појавуваат сè почесто поради глобалното затоплување и сушите, особено внимание треба да се посвети на превенцијата.

Тој посочи дека превентивните мерки значително помагаат, но не се единственото решение.

– Со години наназад го упатувам овој апел: исчистете ги вашите дворови. Исчистете ја околината на вашите викендички и куќи. Само така ќе бидете сигурни дека пожарот нема да ги запали доколку стигне до вашата куќа или викендичка – рече Ангелов на прес-конференција.

Директорот на ДЗС апелираше и до претставниците на локалната власт, при појава на пожар, веднаш превентивно да ги обезбедат селата и осамените објекти.

– Иако сметате дека пожарот е далеку, ова важи и таму каде што нема пожар, бидејќи не знаете кога ќе се случи тоа. Ако не оваа година, ќе се случи наредната година. Најдете трактор, најдете булдожер и изорајте околу нив. Така ќе ни помогнете нам – порача Ангелов.

Тој посочи дека пожарникарите и останатите служби во Мариовско во моментов значителен дел од ресурсите ги трошат на заштита на објекти кои се наоѓаат во опасност.

– Ние во Мариовско ги трошиме ресурсите штитејќи четири манастири и неколку пчеларници. Вчера спасивме возило коешто некој го оставил, го заклучил и побегнал. Ние спасивме возило од неколку илјади евра, но направивме значително поголеми трошоци – изјави Ангелов.

Тој ги демантираше наводите дека во мариовското село Чаниште изгореле голем број куќи. Според него, станува збор за „неколку, можеби десетина стари и напуштени куќи“.

Покрај напуштените селски куќи, обраснати со густа вегетација, како честа причина за пожарите Ангелов го посочи и намерното потпалување.

Според него, пожарите се предизвикуваат и од небрежност, но има и случаи со сомневања за криминални мотиви, меѓу кои и намерно палење шума за подоцна дрвната маса да се продава или сече по пониска цена.

Ангелов посочи дека тешко се обезбедуваат докази за намерно предизвикување пожари бидејќи сторителите често ги уништуваат трагите заедно со пожарот.

– Имаме пожари и од одмазднички мотиви. На повеќе места сме сигурни дека поради одмазда се палат шуми. Таков е случајот во Македонски Брод, каде што имавме лице во притвор, кое откако беше пуштено по неколку дена, повторно запали пожар. Барем такви се сомневањата – рече Ангелов.

Тој објасни дека сомневањата се поврзани со одмазда поради претходни акции во кои биле одземани украдени дрва.

– Се одмаздуваат затоа што претходно шумската полиција, односно Национални шуми, одзеле одредена количина украдени дрва. Ние ова нема да го смениме. Сите овие мотиви ќе останат и понатаму. Но, може да дејствуваме врз добрите граѓани коишто ненамерно предизвикуваат штета – истакна Ангелов.

Тој додаде дека токму затоа се изработени и неколку видеа со кои граѓаните треба да се предупредат за опасноста од невнимателно однесување во природа.

– Граѓаните не се свесни дека една искра е доволна за катастрофа. Кога зборувам за граѓаните, мислам на еден од илјада, а можеби и еден од десет илјади, затоа што безмалку сите граѓани се исклучително педантни и внимателни. Но, доволно е еден несовесен граѓанин на неколку илјади луѓе да направи катастрофа – рече Ангелов.

Ангелов посочи дека службите прифаќаат помош од доброволци во гаснењето на пожарите, но нагласи дека тие треба да бидат соодветно обучени и, по можност, да бидат од локалното население бидејќи добро го познаваат теренот.

– На располагање имаме уште одреден број доброволни пожарникари, а ги имаме и припадниците на македонската Армија и полиција кои, во случај на тешка ситуација, се подготвени да скокнат во помош – рече Ангелов.

Во текот на вчерашниот ден биле регистрирани 35 пожари на отворен простор, додека денеска, до 13 часот, според информациите на Центарот за управување со кризи, биле регистрирани 12 пожари, од кои четири се изгаснати, а осум се активни.

Според Ангелов, бројот на пожарите во текот на денот се очекува значително да се зголеми.

– Бројот на пожари денеска ќе биде најмалку 25, затоа што периодот меѓу 12 и 16 часот е катастрофален период кога се појавуваат голем број пожари – предупреди Ангелов.

Како најголем предизвик тој го посочи пожарот во Мариовско, по што следуваат пожарот во Студеничани, во реонот на Моране, Вртекица и Рамни Габер, како и пожарот во атарот на селото Драгов Дол, кој е особено сложен поради тешкиот терен.

Активни пожари има и во атарот на кичевското село Тајмиште, во месноста Дарда, во атарот на велешкото село Караслари, како и во кумановските села Кучкарево и Градиште.

Ангелов информираше и за нови пожари кои избувнале на територијата на општина Крушево, во селата Белушино и Јакреново, како и во селото Никуштак во општина Липково, каде што постои опасност огнот да навлезе во борова шума.

– Карактеристично е тоа што овде секоја година имаме безброј подметнати пожари. На територијата на општина Липково, како по традиција, криминалци подметнуваат пожари. Овие пожари не се случајни, особено во овој регион – рече Ангелов.

The post АНГЕЛОВ ПРЕДУПРЕДУВА ДЕКА ПОЖАРИТЕ ЌЕ БИДАТ СÈ ПОЧЕСТИ Бара да се чисти околу куќите и викендичките appeared first on plusinfo.mk.