Премиерот Христијан Мицкоски во одговор на новинарско прашање дали очекува надминување на проблемост со транспортерите идната недела на закажаниот состанок во Брисел со министрите од шесте земји од Западен Балкан, рече дека е важно што имало заедничка дипломатска офанзива со земјите од регионот и оти проблемот е препознаен од страна на ЕУ.

– Овој проблеми со транспортерите е еден од многуте наследени проблеми од порано. Важно е дека имавме дипломатска офанзива, здружена со земјите од регионот. Важно е дека е препознаен проблемот. Важно е дека има неколку можни решенија и очекувам да се катализира решение со кое ќе се надмине овој проблем. Но тука не застануваат проблемите, следно се квотите за челикот, така што проблеми има континуирано, тие се тука и ќе се решаваат – рече Мицкоски во изјава за медиумите по промоцијата на програмските приоритети на програмата „Еразмус+“ за 2026 на Економскиот факултет при УКИМ.

Тој повтори дека мора да се надмине проблемот со транспортерите и уверен е дека решението се наѕира и очекува следниот месец работата да биде завршена.

Во однос на изјавата на вицепремиерот и министерот за транспорт Александар Николоски дека ако не се реши проблемот со транспортерите ќе има колапс на економијата, Мицкоски рече дека неговата изјава била повеќе во насока дека поради блокада на граничните премини, ќе нема трговска размена меѓу земјите.

– Тоа повеќе ќе имплицира и кон нашиот јужен сосед. Вие знаете и во Хрватска владата реагира, и министерството таму исто така реагира. Повеќе беше кажано во таа насока по што тоа беше пречекано од страна на опозицијата на нож, веднаш беше спинувано. Инаку, граѓаните и бизнисот да не се грижат, успеавме да обезбедиме на меѓународниот пазар доволно средства да ги вратиме долговите на претходната влада и со остатокот да имаме доволно средства за развој и македонската економија повторно да биде една од првите во регионот и во првите пет во Европа, така што економијата продолжува да расте и јас очекувам, покрај рекордите што ги имавме во втората половина на 2024 или 2025 година, тој тренд да продлжи и во 2026 година – рече Мицкоски.

Во вторник, 3 февруари, ќе се одржи состанок на министрите од сите земји од Западен Балкан со претставници на Европската комисија за проблемот на превозниците од регионот во шенген-зоната. Новата визна стратегија на ЕУ, што ја презентира ЕК, како што беше најавено, ќе им помогне на превозниците од Западен Балкан бидејќи „ЕУ сака да овозможи пофлексибилни правила за прекуграничните работници“.

Возачите на камиони од Северна Македонија, Србија, Црна Гора и Босна и Херцеговина почнаа да ги блокираат граничните премини во понеделникот, 26 јануари, сметајќи дека новиот систем за контрола на влез и излез (ЕЕС) во шенген-зоната дискриминира превозници од ЕУ.

The post ИМА НЕКОЛКУ РЕШЕНИЈА ЗА ПРОБЛЕМОТ СО ТРАНСПОРТЕРИТЕ Мицкоски задоволен што заедничката акција вроди плод appeared first on plusinfo.mk.