Наглите промени на времето – од ненадејно затоплување до нагло заладување – не се само непријатност, туку и сериозен ризик за здравјето. Она што некогаш се сметало за „бапски приказни“, денес е потврдено и од науката: метеоропатијата е реална состојба која го погодува секој трет човек и може да има опасни последици.

Во последниве години речиси и да нема човек кој не ги почувствувал екстремните временски осцилации. Во еден ден преминуваме од кратки ракави во зимска јакна, а таквите нагли промени претставуваат вистински шок за организмот. Овој негативен одговор на телото се нарекува метеоропатија – состојба позната уште од времето на Хипократ, која денес зафаќа околу 35 проценти од светската популација.

Симптомите, како главоболка, болки во зглобовите и нагли промени во расположението, често се јавуваат 24 до 48 часа пред временската промена. Додека здравите луѓе понекогаш едвај ги забележуваат, кај хронично болните тие можат да бидат тригер за сериозни, па и животозагрозувачки состојби.

Најголем удар врз срцето и крвните садови

Најголем товар за време на временските турбуленции поднесува кардиоваскуларниот систем. Токму затоа, најризична група се срцевите болни и лицата со висок крвен притисок.

Истражувањата покажуваат дека наглото заладување е особено опасно. Студија спроведена во централна Германија утврдила дека пад на температурата од само 2,9 степени Целзиусови во рок од 24 часа го зголемува ризикот од исхемичен мозочен удар за 11 проценти, а кај луѓето со претходен ризик – дури за 30 проценти. Причината е што студот ги стеснува крвните садови, го зголемува крвниот притисок и ја згуснува крвта, што може да доведе до создавање згрутчувања на крвта (тромбови).

Од друга страна, ни наглото покачување на температурата не е безопасно. Американска студија на Универзитетот во Мичиген покажала дека секое зголемување на температурната разлика од пет степени го зголемува ризикот од инфаркт за околу пет проценти.

Болки во зглобови, главоболки и замор

Освен што го погодуваат срцето и мозокот, временските промени предизвикуваат и добро познати болки во коските и зглобовите. Многу луѓе тврдат дека можат да го „осетат“ дождот во старите повреди или лузни. Објаснувањето лежи во промените на атмосферскиот притисок, кои влијаат врз притисокот во зглобовите.

Сличен механизам стои и зад главоболките. Падот на атмосферскиот притисок доведува до ширење на крвните садови во мозокот, а нивното повторно стегање создава пулсирачка болка, најчесто во слепоочниците или тилот, понекогаш проследена со вртоглавица и мачнина.

Постојаното прилагодување на организмот го исцрпува и нервниот систем, што резултира со несоница или прекумерна поспаност, намалена концентрација и забавени реакции.

Влијание и врз психата

Временските промени не влијаат само физички, туку и психички. Раздразливост, анксиозност, апатија, па дури и депресивни епизоди, често се јавуваат при нагли временски осцилации. Оваа состојба, позната како метеонеуроза, се јавува кога телото постојано се обидува да се прилагоди на новите услови, држејќи го организмот во состојба на „зголемена готовност“.

Кој е најранлив и како да се заштитиме?

Иако секој може да ги почувствува последиците, најосетливи се жените во средни години, постарите лица и децата. Најзагрозени сепак се хронично болните – се проценува дека дури 70 проценти од лицата со кардиоваскуларни заболувања страдаат од метеоропатија.

Бидејќи не можеме да влијаеме на времето, решението е во зајакнување на организмот. Лекарите препорачуваат:

• најмалку 7–8 часа сон
• доволен внес на течности, особено вода
• избегнување алкохол и кофеин
• лесна исхрана богата со витамини и омега-3 масни киселини (риба, јаткасти плодови)
• редовна умерена физичка активност и престој на свеж воздух

Како брза помош при симптоми, може да помогнат и едноставни методи: следење на биометеоролошката прогноза, масажа на слепоочниците со етерично масло од нане, чаеви од маточина или камилица, како и самомасажа за подобрување на циркулацијата.

На долг рок, најдобра заштита е постепено „калење“ на организмот – на пример, туширање со наизменично топла и ладна вода, што ја подобрува способноста на крвните садови да се адаптираат на температурни шокови.

Иако временските промени не можеме да ги контролираме, можеме да го подготвиме телото подобро да се справи со нив.

The post ВРЕМЕТО БУКВАЛНО НЀ УБИВА! Наглиот скок на температурите го зголемува ризикот од инфаркт, а заладувањето води кон мозочен удар appeared first on plusinfo.mk.

Во текот на денешниот ден во Македонија ќе имаме краткотрајна промена на времето проследена со зголемување на облачноста која на повеќе места кај нас ќе донесе послаби врнежи од дожд, а на повисоките планини (над 1500/1600 метри надморска височина) ќе провејува снег. Особено во Повардарието повремено ќе дува засилен ветер претежно од северозападен правец.

Целата прогноза на Славчо Попоски може да ја прочитате на следниот ЛИНК.

The post КРАТКОТРАЈНА ПРОМЕНА НА ВРЕМЕТО Ќе врне и ќе дува ветер appeared first on plusinfo.mk.

Во вторник и в среда Македонија ќе биде зафатена од голем влажен воздушен бран од запад и истиот ќе биде поврзан со циклонски систем со центар над Џенова. Во ваква ситуација кај нас ќе дојде до голема промена на времето која ќе предизвика обилни врнежи од дожд со појава на грмежи.

Повеќе за метеопрогнозата на Славчо Попоски на следниот ЛИНК.

The post НОВА ПРОМЕНА НА ВРЕМЕТО Од вторник обилни врнежи и грмежи appeared first on plusinfo.mk.

Во недела, 26 октомври, во 03:00 часот завршува летното, а почнува зимското сметање на времето. Стрелките на часовникот ќе се поместат еден час наназад, односно времето во 03:00 часот ќе се смета како 02:00 часот.

Одлуката за промена на сметањето на времето во земјава, како што посочуваат од Министерството за енергетика, рударство и минерални суровини, е донесена врз основа на годишната практика за регулирање на сметањето на времето и има за цел усогласување со европската регулатива во оваа област.

Зимското сметање на времето почнува секој последен викенд во октомври и трае до последниот викенд во март следната година, кога повторно настапува летното сметање на времето.

Освен кај нас, зимското сметање на времето го применуваат и поголем дел од државите на европскиот континент, освен Исланд, Русија и Белорусија. Европскиот парламент на 4 март 2019 година изгласа да биде укинато сезонското поместување на времето од 2021 година, но Советот на ЕУ сè уште нема донесено конечна одлука.

Сезонското менување на времето, освен во Европа, се применува и во повеќето земји од Северна и Централна Америка, како и во повеќе други држави во светот. Времето не се менува во Јапонија, Кина, Јужна Кореја, ниту во земјите од африканскиот континент.

The post ПОДОЛГО ЌЕ СПИЕМЕ НОЌТА МЕЃУ САБОТА И НЕДЕЛА Викендов се менува часовникот, стрелките ќе се вратат еден час наназад appeared first on plusinfo.mk.

На некои луѓе не им е потребна временска прогноза за да знаат дека доаѓа промена на времето. Тие ја чувствуваат „во коските“, во главата, во промената на расположението… Луѓето кои реагираат на промените на временските услови обично се нарекуваат метеоропати, а во последниве години нивните проблеми се сфаќаат посериозно.

Истражувачите истакнуваат дека проблемите не се предизвикани од самите временски услови, туку нивната промена. Пред сѐ, ненадејните промени во атмосферскиот притисок, влажноста или температурата, што можат да ја намалат заситеноста на крвта со кислород, а истовремено да предизвикаат хормонални флуктуации и кардиоваскуларен стрес.

Како што наведува „Вашингтон пост“, студиите објавени во списанијата „Brain Research Bulletin“ и „PLoSOne“ покажале дека падот на притисокот го активира автономниот нервен систем и ја зголемува чувствителноста на болка кај луѓето со хронични заболувања. Ова, пак, може да доведе до анксиозност и нарушувања на спиењето.

Иако медицината сè уште не ја признава метеоропатијата како формална дијагноза, постојат сè повеќе докази дека таа постои.

Студиите покажале дека атмосферската нестабилност може да влијае на нивото на хормони, начинот на кој телото ја обработува болката, што може да ги објасни нападите на мигрена, вкочанетоста на зглобовите и заморот кога времето се менува.

Тим од Центарот за главоболка и болки на Универзитетот во Синсинати открил дека молњата во радиус од 25 милји го зголемува ризикот од мигрена за 31 процент. Исто така, зголемувањето и намалувањето на густината на воздухот може да предизвика мигрена и главоболки од напнатост.

Јапонска студија од 2023 година открила дека падовите на притисокот, скоковите на влажноста и дождот се поврзани со зголемени главоболки.

Дополнително, студија објавена во списанието Annals of Medicine ги поврзала временските промени со зголемена болка предизвикана од остеоартритис.

Списание за физиологија објавило научен труд што укажува дека големата надморска височина може да го промени протокот на крв во мозокот, а истото е забележано при доаѓањето на невреме.

Дали можеме да си помогнеме?

Метеоропатите се справуваат со своите симптоми на различни начини. Сепак, постојат техники што можат да им помогнат да ги ублажат симптомите.

Водете дневник – следењето на симптомите поврзани со временските услови може да помогне во предвидувањето кога симптомите ќе се влошат.

Земајте додатоци во исхраната – треба да се консултирате со вашиот лекар пред да земете какви било додатоци во исхраната, но додатоците како што се магнезиумот и витаминот Б2 можат да помогнат во намалувањето на фреквенцијата на мигрената.

Не заборавајте да се движите – лесната активност помага во одржувањето на циркулацијата и подвижноста на зглобовите.

Медитирајте – медитацијата и вежбите за дишење помагаат во регулирањето на нервниот систем, но и во лекувањето на хроничната болка.

Бидете проактивни – кога ќе почувствувате дека вашите симптоми се влошуваат, реагирајте – посветете повеќе време на спиење, намалете го стресот (колку што е можно повеќе) и поминете повеќе време во природа и релаксација.

Користете носливи уреди – паметните часовници и фитнес алките можат да помогнат во следењето на промените во вашата физичка состојба и поврзувањете со атмосферските промени. Колку повеќе информации добивате, толку полесно ќе ви биде да ги препознаете најраните знаци и да ги ублажите болката и непријатноста.

The post КОГА ВАШЕТО ТЕЛО Е КАКО МЕТЕОРОЛОГ… Дали ја чувствувате промената на времето во главата или во коските? appeared first on plusinfo.mk.

Освен промената на времето на одржување на ревијалната трка, сѐ друго останува исто. Учесниците ќе стартуваат од Порта Македонија, а целта е кај фонтаната во Градски парк каде што ќе има освежување и грицки за сите учесници, голема забава и богата лотарија.

Регистрацијата за овој настан е отворена до сабота и се одвива преку следниот линк.

The post ДОЖДОТ ГО СМЕНИ ТЕРМИНОТ НА ТРКАТА „Вози право, вози здраво“ ќе почне од 11 часот appeared first on plusinfo.mk.