Вонредните контроли на Агенцијата за храна и ветеринарство открија дека дел од млечните производи не одговараат на декларациите. Кај еден производ разликата била драстичн. Од промет се повлечени и 500 килограми производ со палмини масти, соопшти Агенцијата.

„Деведесет и една мостра од млеко и млечни производи и од сувомесни производи, од домашно производство и од увоз, зедоа официјалните ветеринари на Агенцијата за храна и ветеринарство (АХВ) во рамки на вонредните контроли кои имаа за цел утврдување, дали реално производите по својот квалитет соодветствуваат со означеното на декларациите.

Засега комплетирани се резултатите од тестираните примероци млеко и млечни производи земени од поголемите синџии на маркети во земјава. Се чека комплетирање и на резултатите за тестираните сувомеснатите производи, за што јавноста дополнително ќе биде известена.

Од земените и лабораториски анализирани 45 мостри од млеко и млечни производи, кај 10 оператори утврдено е дека анализираните примероци не одговараат  на одредбите од Правилникот за квалитет на земјоделските производи, односно, со тестирањата констатирано е дека во производите има помал процент на млечни масти од декларираното. Кај еден оператор со храна, со лабораториско тестирање на мостра од одземените 22 килограми ситно сирење, утврдено е дека биле декларирани 20 проценти млечна маст, а производот содржел само 1 процент, за што му е изречена  парична казна од 3.500 евра во денарска противвредност.

За измама на потрошувачите, уште на осум оператори (производители и увозници) кај кои се утврдени отстапки од ваков вид, односно разлика во декларираниот и реалниот процент на млечна маст во контролираните млечни производи, изречени им се казни по 1.050 евра во денарска противвредност.

Кај друг оператор со храна, со тестирањата констатирано е дека во производството на млечен производ користел растителни (палмини) масти, за што му е изречена парична казна од 1.300 евра во денарска противвредност. Спорниот млечен производ во вкупна тежина од 500 килограми од овој оператор се повлечени од промет и нештетно уништени на депонија.

Кај оваа категорија оператори со храна, засилените инспекциските контроли од страна на Агенцијата за храна и ветеринарство ќе продолжат и во наредниот период“, се вели во соопштението.

The post ВО ДЕКЛАРАЦИИТЕ ЕДНО, ВО СИРЕЊЕТО ДРУГО Инспекторите казнија 10 оператори со млечни производи appeared first on plusinfo.mk.

Се вршат контроли и надзори кај извозникот, откупувачите и индивидуалните земјоделски производители по нотификациите од RASFF системот и официјалното известување од Хрватска за утврдено присуство на пестицидот метомил во свежа црвена пиперка увезена од Македонија, информира Државниот инспекторат за земјоделство (ДИЗ).

Станува збор за пратка од околу 15.000 килограм пипер. Извозникот не е производител, пиперот го купил од други правни субјекти кои вршат откуп од индивидуалните производители.

– Извозникот има извршено повеќе лабораториски анализи за присуство на пестициди во црвена пиперка од почетокот на берба на годинашната реколта при извоз и продажба, и тоа во акредитирани лаборатории во земјата и во други држави и до овој момент нема добиено резултати за зголемено количество на резидуи од фитофармацевтски производи или присуство на недозволени фитофармацевтски производи – информира инспекторатот.

Според официјалното известување добиено од Хрватска, во земениот примерок е утврдено присуство на активна материја метомил во количина од 0,049 mg/kg – ppm. Пратката со свежа црвена пиперка e извезена на 09.09.2025 година, а по извршената контрола на граничниот премин при влез во Хрватска не е запрена и дозволен и е влез во Хрватска. Примерокот за анализа е земен на 23.09.2025 година од малопродажната мрежа, а информацијата од RASFF системот е добиена на 03.10.2025.

– Пиперките не се вратени во Македонија, но немаме информација за постапувањето на хрватските инспекциски служби – дали пиперките се повлечени од продажба или се уништени – потенцираат од Инспекторатот.

Оттаму напоменуваат и дека согласно овластувањата од Законот за Фитофармација, државните фитосанитарни инспектори вршат редовни и вонредни надзори во делот на увозот, дистрибуцијата и употребата на фитофармацевтските средства, односно надзорот се врши при увоз, на граничните премини, во складиштата и во земјоделските аптеки, како и кај крајните корисници – индивидуалните земјоделски производители.

-Фитофармацевтски производи кои содржат активна материја метомил се забранети за увоз, продажба и употреба, а доколку се затекнат вакви производи кај спомнатите субјекти, се преземаат соодветни санкции. Исто така се вршат контроли и кај индивидуалните производители за видот на фитофармацевтските производи кои ги користат, како и за начинот на апликација, за што секој производител согласно законските прописи е должен да води соодветна евиденција – објаснуваат од ДЗИ.

Контролите кои се во тек се вршат заедно со Агенцијата за храна и ветеринарство. По завршувањето на инспекцискиот надзор, ќе ДЗИ, како што подвлекува, ќе има повеќе информации.

ЗАБРАНЕТ ПЕСТИЦИД ОТКРИЕН ВО МАКЕДОНСКИ ПИПЕР ВО ХРВАТСКА Во високи дози од пестицидот може да ги оштетат црниот дроб и бубрезите

The post КОЈ ГО ПОДМЕТНАЛ ПИПЕРОТ СО ЗАБРАНЕТ ПЕСТИЦИД КОЈ ЗАВРШИ ВО ХРВАТСКА? Извозникот тврди дека се било по правила, инспекторите ги чешлаат и откупувачите и производителите appeared first on plusinfo.mk.

„Тојота“ ја подигна температурата во автомобилската индустрија со најавата за сосема нова солид-стејт батерија, која, според компанијата, ќе овозможи досег до 1200 километри со само едно полнење и враќање на полната енергија за околу 10 минути. Ова, ако стане реалност, би било историски пресврт – нешто што производителите на електрични возила со години го посакуваат, а купувачите го очекуваат со нетрпение.

 „Тојота“ има амбициозен партнер

Веста, која веќе се пренесува како „бомбастична“, доаѓа во момент кога глобалниот пазар на електрични возила бележи и раст и отпор. Голем досег и драматично скратено време на полнење се ветувања што звучат како совршена формула, но индустријата добро знае дека помеѓу лабораторија и салон за продажба има долг и тежок пат.

Во реализацијата на овој план, „Тојота“ не е сама. Јапонската компанија „Идемицу Косан“ веќе ја гради индустриската подлога за производство на клучниот материјал, литиум-сулфид, кој се користи во солид-електролитите. Погонот ќе биде изграден во Чиба, Јапонија и се очекува да почне со работа до јуни 2027 година. Со капацитет за материјали доволни за 50 до 60 илјади батерии годишно и инвестиција од над 140 милиони долари, ова е чекор што покажува дека визијата на „Тојота“ има сериозна логистичка поддршка.

„Идемицу“ планира и пилот-постројка уште до крајот на фискалната 2025 година, со цел да го намали трошокот на производството до ниво споредливо со класичните литиум-јон батерии. Ако тоа се оствари, комерцијализацијата би можела да стане реалност многу побрзо отколку што скептиците предвидуваат.

„Светиот грал“ во светот на електромобилноста

Солид-стејт батериите одамна се сметаат за „светиот грал” во светот на електромобилноста. Тие носат поголема енергетска густина, што значи подолг досег, далеку побрзо полнење и значително поголема безбедност, бидејќи нема течности кои можат да предизвикаат пожар. Покрај тоа, долговечноста на овие батерии е поголема – повеќе циклуси на полнење без значителна загуба на капацитет.

Но, колку и да звучи примамливо, масовното производство и ценовната одржливост се и понатаму најголемите предизвици. Како што предупредуваат дел од експертите, автомобилската индустрија веќе има горко искуство со технологии кои на хартија изгледале револуционерно, но во пракса се соочиле со непремостливи проблеми во производството.

Дали и ова ќе остане само на бомбастични наслови?

На интернет-форумите посветени на автомобилизмот, реакциите се мешани. „Тојота никогаш не покажа прототип. Ова е стопроцентна магла“, вели еден коментатор. Друг е уште поироничен: „Нема значење колку се добри батериите ако чини два милиони долари да се стави во автомобил“. Овие забелешки ја одразуваат растечката скепса – дека ваквите најави честопати остануваат само во насловите, без јасна траекторија кон пазарот.

„Тојота“, од своја страна, инсистира дека не станува збор за празни зборови. Компанијата вложува години во развој на солид-стејт технологијата и тврди дека моменталната фаза на тестирање е клучен чекор пред првите возила да излезат на патиштата.

И покрај тоа, набљудувачите потсетуваат дека ова не е прв пат „Тојота“,  а и други производители – да ветуваат „револуција за четири до пет години“. Овие рокови, речиси магично, постојано се поместуваат, оставајќи впечаток дека големата промена секогаш е зад аголот, но никогаш пред нас.

Ништо без функционални прототипи

Тука се поставува и прашањето на транспарентноста. Ако „Тојота“ навистина е блиску до решението, велат аналитичарите, тогаш треба да покаже функционални прототипи, детални спецификации и резултати од реални тестови. Без тоа, ветувањата ќе продолжат да бидат сфаќани како маркетинг, а не како најава на вистинска технолошка промена.

Во моментот, приказната за батеријата од 1200 километри и полнење за десет минути останува меѓу надеж и реалност. Инфраструктурната поддршка почнува да се оформува, а визијата на „Тојота“ е јасна. Но, од лабораторија до улица – патот е долг, а секој чекор е под будното око на индустријата и на јавноста.

Доколку успее, оваа технологија ќе значи пресвртница во начинот на кој гледаме на електричните возила – и ќе ги натера и најголемите скептици да поверуваат дека иднината конечно пристигнала.

The post „ТЕСЛА“ И КИНЕЗИТЕ НА КОЛЕНА ПРЕД „ТОЈОТА“? Нема појако од електрично возило со досег од 1200 километри и батерија што се полни за 10 минути appeared first on plusinfo.mk.

Домашниот пазар за снабдување со електрична енергија се соочува со значајни предизвици и нови можности. Како дел од „PPC Group“, водечка енергетска компанија во Југоисточна Европа, ЕДС е подготвен да зачекори во нова ера на раст и иновации.

Компанијата неодамна го назначи Александар Сарџовски за главен извршен директор, чие визионерство и стручност ќе бидат клучни за креирање на идните стратешки насоки.

Со богато искуство во корпоративно раководење и менаџмент, Сарџовски е поставен да ја води компанијата кон нови успеси, со фокус на подобрување на услугите, дигитализација, енергетска ефикасност и поддршка на клиентите.

– Мојата визија за ЕДС е да продолжиме да растеме како компанија која поставува нови стандарди во снабдувањето со електрична енергија. Како дел од „PPC Group“, имаме сила и ресурси да развиваме иновативни решенија и конкурентни пакети за снабдување кои ќе ги задоволат потребите и на големите компании и на малите и средни претпријатија. Нашата цел е да им помогнеме на клиентите да ја оптимизираат својата потрошувачка на струја и да заштедат, преку понуди што нудат флексибилност, сигурност и одржливост – истакнува новиот главен извршен директор на ЕДС.

Под новото раководство, ЕДС ќе продолжи со стратешка експанзија, модернизација на услугите и унапредување на односите со клиентите. Компанијата веќе подготвува нова понуда на пакети за снабдување со електрична енергија, креирани според различни пазарни сегменти и прилагодени на потрошувачката на компаниите.

Како дел од „PPC Group“, ЕДС ја зацврстува својата позиција како еден од водечките снабдувачи со електрична енергија, подготвен да одговори на современите барања и да биде двигател на позитивни промени во енергетскиот сектор.

„PPC Group“ е водечки електроенергетски оператор во Југоисточна Европа, присутен покрај во Грција, Романија и Северна Македонија. Со вкупен инсталиран капацитет од 12.3GW, „PPC“ произведува приближно 21TWh електрична енергија годишно. Групацијата опслужува 8,8 милиони клиенти во Грција и Романија, испорачувајќи околу 32TWh електрична енергија, управувајќи со регулирана актива во вредност од 4,9 милијарди евра.

The post САРЏОВСКИ НА ЧЕЛО НА ЕДС Компанијата подготвена за нова ера на раст и иновации на енергетскиот пазар appeared first on plusinfo.mk.

Вашингтон е најголемиот извор на воена помош за Украина од ескалацијата на нејзиниот конфликт со Русија на почетокот на 2022 година, вклучително и преку испорака на оружје и опрема и финансиска поддршка. Дел од финансиската помош е искористена за плаќање на американските производители на оружје да набават ново оружје за украинската армија или да го заменат старото претходно обезбедено.

Во интервју Костенко изјави: „според моите информации, оружјето што излегуваше на продажба престанало. Оние компании кои беа подготвени да го пренесат ова оружје сега чекаат бидејќи нема одлука од Вашингтон“.

Тој тврди дека суспензијата е поврзана со новото зближување меѓу Вашингтон и Москва, кои ги одржаа своите први директни преговори на високо ниво во последните три години во Саудиска Арабија оваа недела. Според Костенко, фактот што Украина не била поканета на разговорите предизвика неизвесност кај американските производители на оружје за испораките на Киев.

Костенко рече дека Украина се обидува да го реши проблемот и понудила директно да го плати оружјето наместо да смета на нивната испорака како дел од американската помош. Неговите забелешки беа потврдени од колегата пратеник Алексеј Гончаренко во објава на Телеграм во петокот.

„САД ја замрзнаа продажбата на оружје за Украина. Вчерашната изјава на Роман Костенко е апсолутно точна“, напиша Гончаренко, додавајќи дека „американските компании ми го потврдија тоа“.

Ниту Вашингтон, ниту американските производители на оружје не ја коментираа оваа „пауза“ во пратките. Украинската пратеничка Александра Устинова, која служи како советник на министерот за одбрана, ги отфрли тврдењата во објава на Фејсбук, наведувајќи дека „САД НЕ престанале да ѝ продаваат оружје на Украина“ и ги советувала колегите пратеници да не „долеваат масло на огнот“ искажувајќи непотврдени информации.

Забелешките доаѓаат во време на растечка расправија меѓу американскиот претседател Доналд Трамп и украинскиот лидер Володимир Зеленски. Во објавата на платформа „Truth Social“ во средата, американскиот лидер го обвини Зеленски за лошо управување со конфликтот со Русија и злоупотреба на американската финансиска помош. Трамп претходно се закани дека ќе ја прекине помошта за Украина и инсистираше на тоа дека Киев мора да му исплати на Вашингтон за финансирањето што го добил, за кое американскиот лидер тврдеше дека е „повеќе од 300 милијарди долари“. Тој за возврат побара од Украина „еквивалент на ретки земји во вредност од 500 милијарди долари“.

Зеленски го обвини американскиот лидер дека „живее во простор за дезинформација“, наводно создаден од Русија. Тој го отфрли предлогот за ретки земји во Украина, велејќи минатата недела дека тоа не е „во интерес на суверена Украина“. Зеленски претходно ги отфрли проценките на Трамп за помошта обезбедена од Вашингтон, инсистирајќи дека Украина не добила ниту половина од таа сума.

The post САД ЈА ЗАМРЗНА ПРОДАЖБАТА НА ОРУЖЈЕ НА КИЕВ Украинските власти и американските производители го чекаат Вашингтон appeared first on plusinfo.mk.

ССК бара владата и институциите да ги прошират контролите на цените и во регулацијата да ги вклучат и добавувачите и увозниците, да се прошират регулаторните мерки со цел да се спречат добавувачите од манипулации со цените, а потрошувачите  да знаат кој ги поставува цените.

Оттаму информираат дека на состанок на претставниците на малопродажните синџири и локалните клучни партнери е договорено да не се примаат нови ценовници, минимум до крајот на првиот квартал оваа година.

Сојузот на стопански комори тврди дека супермаркетите не се одговорни за зголемувањето на цените, а дека главната ценовна моќ е во рацете на добавувачите и на производителите, кои уживаат значително повисоки профити, додека супермаркетите работат со минимални маржи. ССК се повикува на сопствена анализа на состојбата.

– На прашањето кој ги контролира цените одговорот може да се види во профитната маржа. Супермаркетите работат со просечна профитна маржа од само 0,83%, а производителите и дистрибутерите во просек остваруваат 4,32%. Некои добавувачи имаат профитни маржи над 13%, додека супермаркетите остануваат под 3%. Анализата покажа екстреми во профитните маржи. Некои производители имаат профитни маржи кои се далеку над оние на супермаркетите – наведуваат од Сојузот на стопански комори.

Од Сојузот на стопански комори велат дека супермаркетите се соочуваат со најголема јавна критика за цените, иако заработуваат значително помалку по производ од добавувачите.

– На листата 15 најголеми добавувачи се покажува дека овие компании генерираат големи профити, но вработуваат многу малку луѓе. Тие сочинуваат 11,8% од вкупниот приход на производителите, но 21,3% од нивниот вкупен профит. Ова покажува дека високо профитабилните компании со мал број вработени имаат значително поголема моќ врз пазарот отколку супермаркетите, наведуваат од ССК.

– Супермаркетите вработуваат значително повеќе луѓе отколку производителите, што ја покажува нивната важност за економијата. Дури и најпрофитабилниот супермаркет не е ни блиску до профитабилноста на водечките производители. Некои супермаркети дури и работат со загуба – велат од ССК.

Оттаму велат дека споредбата на бројот на вработени во супермаркетите е важен фактор за вработеноста во државата, додека производителите генерираат високи профити со значително помалку работници.

Од ССК тврдат дека маркетите никогаш не ги зголемуваат цените самостојно.

– Промена на цените се случува поради промените на цените на производителите или добавувачите и токму поради ова маркетите се под постојан притисок да се прифатат новите ценовници. Доколку тоа не се направи, не се испорачуваат производите. Од ова произлегува притисокот врз маркетите и од потрошувачите или за цените или за недостиг на производи. Само во јануари до маркетите се пристигнати ценовници од над 40 добавувачи и производители во 92 категории и поткатегории производи – велат од ССК.

Оттаму додаваат и дека профитната маржа кај маркетите од година во година опаѓа, за разлика од другата страна каде се зголемува.

– Во исто време, меѓународните добавувачи одржуваат значително поголем профит од супермаркетите. Тие вршат силно влијание врз пазарните цени, ограничувајќи ја способноста на домашните трговци на мало да ги приспособат цените надолу. Бројките ја покажуваат вистината, супермаркетите не се причината за зголемените цени. Додека трговците работат со минимални профити, добавувачите продолжуваат да остваруваат значителни маржи без да ги намалат цените – велат од Сојузот на стопанските комори.

The post ЦЕНИТЕ ГИ ДИКТИРААТ ДОБАВУВАЧИТЕ И ПРОИЗВОДИТЕЛИТЕ КОИ ИМААТ СЀ ПОГОЛЕМИ ПРОФИТИ Маркетите се први на удар, а никој не ги контролира цените на производите пред да влезат во продавница appeared first on plusinfo.mk.

Заменик-министерот за економија и труд, Марјан Ристески, заедно со директорот на Државниот пазарен инспекторат, Влатко Стојаноски, одржаа состанок со претставници на производителите, дистрибутерите и трговците кои учествуваа во акцијата „Новогодишна кошница“.

Оваа акција, спроведена од 15 декември 2024 до 15 јануари 2025 година, имаше за цел да ги намали цените на прехранбените производи и пијалоци за време на празниците.

Според податоците од Министерството за економија и труд, во акцијата учествуваа 96 производители и дистрибутери, како и 51 маркет со вкупно 762 продажни места. На веб-страницата „Моја кошница“, креирана за оваа иницијатива, беа објавени 1.178 производи со намалени цени.

На состанокот, заменик-министерот Ристески им се заблагодари на сите учесници кои придонесоа за успешноста на оваа акција, потенцирајќи ја важноста од задржување на постоечките цени.

– Очекуваме производителите, дистрибутерите и маркетите да покажат социјална одговорност и да се воздржат од покачување на цените на прехранбените производи. Ова не само што ќе ја заштити куповната моќ на граѓаните, туку и ќе испрати порака за заедничка посветеност кон иднината на нашето општество – изјави Ристески.

Од Министерството предупредија дека ќе бидат преземени соодветни мерки доколку дојде до зголемување на цените на основните производи.

„Државниот пазарен инспекторат останува на терен за да ја следи состојбата и ќе ги искористиме сите механизми за заштита на стандардот на граѓаните“, додадоа од Министерството.

Акцијата „Новогодишна кошница“, иницирана од приватниот сектор, беше оценета како значајна за зачувување на економската стабилност и спречување на понатамошен раст на инфлацијата.

Директорот на Државниот пазарен инспекторат, Влатко Стојаноски, истакна дека подготвеноста на бизнисите да соработуваат и да избегнат ценовни покачувања ќе помогне за зајакнување на довербата меѓу сите чинители во општеството, особено потрошувачите.

– Вашата посветеност ќе има директно влијание врз економската стабилност и ќе испрати јасен сигнал за одговорност во овие предизвикувачки времиња – изјави Стојаноски.

Во наредните недели се очекува Министерството да објави анализи за ефектите од оваа акција врз економијата.

The post „НОВОГОДИШНАТА КОШНИЦА“ ГО СПАСИ БУЏЕТОТ НА ГРАЃАНИТЕ Министерството со апел да не се покачуваат цените бидејќи ќе има мерки appeared first on plusinfo.mk.

Со почетокот на годинава, почна примената на казните за неправилностите при спроведувањето на Законот за нефер трговски практики кој е во функција, според директива на ЕУ од 28 септември. Процесот до крајот на 2024 година се следеше со мониторинг, сега се на сила паричните казни.

– Мониторингот за примената на законот заврши до Нова година. До Нова година се дооформи и Комисијата за конкуренција (КЗК) која го имплементира Законот и во практиката. Комисијата ќе ги проверува сите договори склучени помеѓу производителите, добавувачите и трговците и онаму каде ќе бидат утврдени неправилности казните се 20.000 евра – вели Ристески.

Со законот се опфатени 2.546 производи по тарифен број, а претходно се утврдени 26 нефер трговски практики. Ристески нагласува дека контролата ќе биде строга.

– Комисијата ќе може да влезе во фирмите, да ги проверува договорите по дојава. Сето тоа што ќе биде констатирано како неправилност, ќе биде казнето. Казната е висока, 20.000 евра – објаснува Ристески.

Целта на Законот, кој треба да биде пример и за другите земји од Западен Балкан, е да се регулира односот помеѓу добавувачите и трговците. Заменик-министерот посочува дека ефектите на подолг рок е стабилизација на цените на производите.

– Рабатот е ограничен на 10 проценти во текот на годината. Сето тоа ќе создаде еден ред во сета таа работа со трговските практики каде рабатите биле големи, и до 35-40 проценти. Очекуваме на подолг рок да имаме стабилизирање на цените на производите, во интерес на крајните купувачи, односно граѓаните. Овој Закон е од голем интерес и важност, бидејќи првпат се спроведува во Македонија и е по директива од Европската Унија и треба да биде пример и за другите држави на Западен Балкан – порача Ристески.

The post КАЗНИТЕ ЌЕ БИДАТ ДО 20.000 ЕВРА Производителите, добавувачите и трговците нека му ја мислат дали ќе ги „пумпаат“ цените appeared first on plusinfo.mk.

– Се знае дека кошничката е при крај, ќе има повеќе стотина производи, сигурно повеќе од претходната „есенската кошничка“ и мислам дека ќе бидат задоволни граѓаните од производите мои ќе бидат понудени во таа кошничка. Ќе има значителни намалувања коишто ќе бидат позитивна мерка во однос на заштита на стандардот на граѓаните, задржување на стабилност на цените, стабилен процент на инфлацијата којашто засега е на задоволително ниво – рече заменик министерот.

Вакви мерки владата ќе спроведува и во иднина, дополни Ристески, особено околу празниците, кога е евидентирана најголема потрошувачка. Во оваа кошничка како што соопшти ќе бидат опфатени традиционални производи, храна и пијалаци за празниците, пред и после Нова година. Кошничката е направена со претходна детална поопсежна анализа во која учествувале стопанските комори, синдикатите, организација на заштита на потрошувачите.

– И да најавам дека оваа кошничка ќе биде многу поразлична од претходните во начинот на определување на производите – кажа заменик министерот.

Одговарајќи на новинарски прашања, тој посочи дека во наредниот период, по кошничката во зависност од условите ќе се разгледуваат решенија за подобрување на животниот стандард на граѓаните. Мерките кои ќе се предложат ќе бидат во насока на стабилизација на цените и подобрување на животниот стандард. Влијание ќе има и општествената одговорност на фирмите, маркетите, увозниците, производителите …

– Ако ги прашате економските експерти ќе ви кажат дека не е добро да се преземаат мерки и директно да се мешаме во бизнисот, во понудата и побарувачката на пазарот. Меѓутоа кога во услови во државата имаме стабилна и ниска инфалција во услови кога претходно имаме намалување на енергенсите, намалување на транспортните трошоци и дел од суровините, бевме сведоци дека во претходните период и години имавме драстично зголемување на цените на производите. Со тоа, бевме предизвикани да направиме вакви мерки во кои беа и овие кошнички коишто беа спроведени во претходниот период и што ќе ги има во наредниот период и како што кажав на почетокот дел од нашата иницијатива за продуцирање вакви мерки е пред сè подобрување на животниот стандард, стабилизација на цените на производите и стабилизација на инфлацијата. Ќе видиме како ќе се движат цените во наредниот период, да видиме колку ќе покажат општествена одговорност, самите фирми, производители, добавувачи, увозници, маркети, од сето тоа ќе зависат и идните мерки или носење идни законски решенија, предложени од министерството за економија, донесени од владата – рече Ристески.

Претходно, беше донесена есенска потрошувачка кошничка која траеше до 31 октомври. Со неа беа опфатени околу 70 производи на кои им беа ограничени профитните маржи.

The post ЗА ПРАЗНИЦИТЕ СТОТИЦИ ПРОИЗВОДИ ПО СУПЕР ЦЕНИ Кошничката ќе ве изненади со невидени намалувања appeared first on plusinfo.mk.

Ако се подготвувате за правење ајвар оваа есен, важно е да пресметате колку ќе ве чини оваа слатка операција и дали навистина е исплатливо да го правите сами, или да го купите готов. Пиперката ајварка е поскапа од лани, а малите производители кои ги продаваат своите производи на пазарите веќе најавија зголемени цени.

Оние што ќе се обидат да заштедат можат да ја почекаат и владината „есенска кошничка“, каде цените би требало да бидат пониски со планирана маржа до 10%. Но, ова нема да го реши главниот проблем – цените на пиперките варираат од град до град, а во Скопје цената се движи од 45 до 60 денари по килограм, додека во Охрид и Битола достигнува и до 70 денари.

Домашниот е и поевтин и повкусен

Калина, домаќинка од Ѓорче Петров, вели дека оваа година нема да прави 30 килограми ајвар како порано, туку ќе се задоволи со помала количина.

– Годинава цената на пиперката е повисока, па и ајварот ќе биде поскап. Ќе си го правиме сами дома, па ќе биде поевтин од тој во продавница. Ќе направам помалку, ама без ајвар не може да мине зимата – вели таа со насмевка.

Според пресметките, ако го правите ајварот дома, ќе ве чини од 110 до 160 денари по тегла, зависно од цената на пиперката и на другите состојки. Основниот рецепт содржи пиперки, модри патлиџани, масло, сол и шеќер. Ако ајварот се прави само од пиперки, тогаш за 1 тегла се потребни 4 килограми пиперка.

Ајварот благ, цените се’ полути

Но, некои луѓе се одлучуваат да го купуваат готовиот ајвар. Млад Скопјанец со кого разговаравме на Зеленото пазарче, ни кажа:

– Се’ помалку имам време за подготовка на ајвар, ама сакам домашен вкус. Секогаш го купувам од жени кои го прават по старите рецепти, затоа што е неспоредливо со оној од маркетите. Малку е поскап, ама вреди секој денар!

Цените на домашниот ајвар на пазарите се движат од 350 до 400 денари за тегла, а малите производители ги корегираат цените според трошоците за пиперките, гасот, дрвото или струјата што ја користат при подготовката. Во маркетите пак, цените варираат од 139 до 273 денари за помали теглички, додека поголемите тегли чинат од 215 до 409 денари.

Поскапеа и суровините и царините, не може ајварот да биде џабе

Виктор Петков од компанијата „Випро“ објаснува дека порастот на цената на суровините и високите царини на увозената пиперка придонесуваат за зголемувањето на цените.

– Цената на пиперката годинава скокна и до 60 центи по килограм, а ние како производители се соочуваме со 50% царина на увозната суровина. Тоа, заедно со зголемените трошоци за работна рака и струја, не ни оневозможува да ги задржиме старите цени на ајварот – вели тој.

Ќе дојде време ајварката да ја нема ни за лек

Поради високите температури, родот на пиперката годинава е намален за околу 40%, но годинава имаше зголемени површини под оваа култура, па ќе има доволни количини за преработувачите. Се проценува дека во струмичкиот регион се произведени 30.000 до 35.000 тони пипер. Годишно во земјава се произведуваат над 50.000 тони ајварка. Најголем дел завршува на домашниот пазар, но се извезува во Хрватска, Полска, Германија, Романија…

Земјоделците велат дека и со оваа откупна цена на пиперката, веќе нема кој да ја произведува, бидејќи се засили бранот на иселување на младите земјоделци, поради политиките во земјоделството кои се непроменети со години.

The post АЈВАРОТ ГОДИНАВА ПОСКАП, АМА ВРЕДИ СЕКОЈ ДЕНАР Есапот не ни чини, ама нема да ни го расипе меракот appeared first on plusinfo.mk.