Напад извршен со беспилотно летало врз гасното наоѓалиште Хор Мор во северен Ирак предизвика пожар и прекин на производството на гас, поради што електроенергетскиот систем на Курдистанскиот регион остана без околу 70 до 80 проценти од дотогашното производство на електрична енергија.

Нападот се случил во неделата вечерта, а компанијата „Дана гас“, која управува со наоѓалиштето, потврди дека станува збор за напад со дрон. Пожарот е изгаснат, но производството сè уште не е обновено поради проценката на причинетата штета.

Според информациите на ирачкиот медиум „Шафак њуз“, безбедносен извор тврди дека дронот најверојатно бил лансиран од планинска област во близина на градот Туз Хурмату, во провинцијата Салах ад Дин, јужно од Киркук. Местото на лансирање, сепак, сè уште не е официјално потврдено.

Ирачките власти засега не соопштија кој стои зад нападот. „Рудав“ објави дека Телеграм-канали поврзани со вооружени групи блиски до Иран тврделе дека нападот бил извршен со самоубиствен дрон, но ниту една конкретна група официјално не презеде одговорност.

Портпаролот на Министерството за електрична енергија на Курдистанската регионална влада, Омид Ахмед, изјави дека по нападот бил прекинат дотокот на гас до електраните во Ербил, Сулејманија, Базијан, Чамчамал и Духок.

Од електроенергетската мрежа биле исклучени производствени капацитети од 2.500 до 2.800 мегавати. Властите најавија дека болниците, постројките за пречистување на водата и другите критични објекти ќе добиваат струја од хидроцентралите и електраните што работат на алтернативни горива.

Ирачкиот премиер Али ал Заиди нареди формирање заедничка истражна комисија со надлежните институции на Курдистанскиот регион, која треба да ги утврди околностите на нападот и одговорните за него. Според првичните проценки, нема жртви.

The post ДРОН ГО ЗАПАЛИ ГАСНОТО НАОЃАЛИШТЕ ХОР МОР ВО ИРАК Се истражува дали нападот го извршиле проиранските милиции appeared first on plusinfo.mk.