Програмата Dance Tech на фестивалот Танц Фест 2026 почнува утре 21 април во 20 часот, во Младинскиот културен центар.

РЕСЕТИРАЈ! „Ѕверови и демони“, во изведба на Си Жил Жобен (Studio44MocapLab) од Женева, Швајцарија, во кореографија на Жил Жобен, добитник на Гран при-наградата за швајцарски танц за 2015 година, е хибридна танцова претстава која го истражува односот помеѓу човечкото тело и дигиталниот свет, користејќи motion capture технологија за да создаде реално време дигитални аватари на сцената.

Танчерите се движат истовремено во физички и виртуелен простор, каде нивните движења се трансформираат во дигитални суштества — ѕверови и демони — кои постојат паралелно со нив. Овој процес создава нов вид на сценски јазик, каде што границите помеѓу реалноста и симулацијата се бришат.

Претставата поставува прашања за иднината на телото, идентитетот и перформансот во дигитална ера, истражувајќи како технологијата го менува начинот на кој се движиме, комуницираме и се перципираме.

Со визуелно атрактивен и динамичен пристап, РЕСЕТ е достапна и за помлада публика и може да ја гледаат и деца, нудејќи им уникатно искуство на спојот помеѓу уметноста и технологијата.

Танц Фест 2026 е посветен на иновативност и нови хоризонти и при што Dancetech го проширува форматот на програмата, воедно, таа е рамка за процес, за истражување и за размена. Фестивалот се реализира со поддршка од Министерството за култура и туризам и Општина Битола.

Претставата е дел од DanceTech програмската линија на Танц Фест 2026, која се фокусира на пресекот помеѓу танцот и новите технологии, вклучувајќи motion capture, VR, AI и дигитални перформативни практики. Во рамки на оваа програма ќе се одржи и специјална работилница со уметниците и авторите на проектот, наменета за танчери, кореографи и креативци кои сакаат да научат повеќе за примената на новите технологии во современиот танц и перформанс. Оваа програмска линија има за цел да отвори нови перспективи и да поттикне дијалог помеѓу уметноста и технологијата, создавајќи простор за експериментирање, учење и идни соработки.

Жил Жобен е меѓународно признат кореограф од Швајцарија, познат по својата иновативна работа на пресекот помеѓу танцот и технологијата. Неговите проекти често вклучуваат виртуелна реалност, motion capture и дигитални медиуми. Со своето студио во Женева, тој развива нови форми на кореографија кои ја прошируваат традиционалната сцена и создаваат нови начини на доживување на танцот. Неговите дела се презентирани на водечки меѓународни фестивали и институции, поставувајќи го како еден од пионерите во областа на dance & technology.

The post УНИКАТНА ПРЕТСТАВА НА ШВАЈЦАРСКИ КОРЕОГРАФ ВО МКЦ Почнува програмата Dance Tech на фестивалот Танц фест appeared first on plusinfo.mk.

Нема кратење во Програмата за директни плаќања. Во изминатите години, вклучително и за време на претходната власт, Програмата што се носела изнесувала околу 100 милиони евра. Никогаш при нејзиното донесување не изнесувала 140 милиони евра – истакна министерот за земјоделство, шумарство и водостопанство, Цветан Трипуновски, во емисијата „Аргумент плус” на ТВ 24.

Тој појасни дека Програмата за 2018 година изнесувала околу 100 милиони евра, за 2019 година била во сличен износ, во 2020 година изнесувала околу 70 милиони евра, а во 2021 година околу 60 милиони евра.

– Во 2024 година, кога сегашната Влада ја презеде одговорноста, беше наследена Програма донесена од претходната власт во износ од околу 98 милиони евра. Со ребаланс на Буџетот, износот беше зголемен на околу 115 милиони евра, а во декември беа обезбедени дополнителни средства, со што вкупната вредност достигна околу 137 милиони евра – посочи министерот

Тој додаде дека најголем дел од средствата од Програмата за 2024 година биле наменети за исплата на заостанати обврски кон земјоделците.

– Сегашната Програма од околу 98 милиони евра не значи кратење на средствата. Дополнителните средства во 2024 година беа обезбедени со цел да се исплатат наследените долгови од претходната власт – нагласи министерот Трипуновски.

Министерот потенцираше дека и во текот на годината, преку ребаланс на Буџетот, се обезбедуваат дополнителни средства за Програмата за директни плаќања, во насока на континуирана и навремена поддршка на земјоделците.

– Во Програмата за 2026 година воведовме посебна мерка, која во моментов е во фаза на доработка, со цел да бидат поддржани сите мали капацитети, истата е насловена како Мерка за директни плаќања на мали земјоделски стопанства – истакна министерот Трипуновски.

– Да појаснам, земјоделец кој имал 2 декари лозов насад и ги пријавил минатата година, а со новите измени минималниот праг е 0,5 хектари, преку оваа нова мерка ќе добие транзициски период. Во наредните една до максимум три години ќе продолжиме да ги поддржуваме истите два декари, со цел земјоделецот да има време да одлучи дали ќе ги зголеми своите капацитети на 0,5 хектари или ќе одлучи да не ги проширува, по што нема да остварува право на субвенции – нагласи министерот.

Транзицискиот период ќе изнесува од една до три години, во зависност од секторот, бидејќи временската рамка е различна за различни производствени гранки.

– Никој во овој период нема да остане без финансиска поддршка. Обезбедуваме фер и постепена транзиција, со цел малите земјоделци да се прилагодат на новите услови – потенцираше министерот Трипуновски.

The post ЗЕМЈОДЕЛЦИТЕ НЕМА ДА ОСТАНAT БЕЗ ДИРЕКТНА ПОДДРШКА Трипуновски вели дека нема намалување на Програмата appeared first on plusinfo.mk.

Во организација на Здружението „Бадникови поворки“ денеска ќе се одржи Бадниковата манифестација во повеќе од 80 градови и населени места низ Македонија, како и меѓу македонската дијаспора во Словенија, Италија, Австрија, Франција и Соединетите Американски Држави.

Централната Бадникова поворка во Скопје ќе обедини учесници од речиси сите скопски општини, заедно со нивните градоначалници, кои и оваа година активно ќе учествуваат во организацијата на настанот.

Градоначалниците и општинските тимови во претпладневните часови ќе ги пречекаат и даруваат коледарчињата во своите општини. Потоа, со организиран превоз, децата и нивните семејства ќе се упатат кон централната манифестација во Скопје.

Формирањето на поворката ќе започне пред Музејот на Град Скопје од 11:30 до 12:00 часот, каде што на сите деца кои немаат ѕвездичка бесплатно ќе им биде подарена Божикна ѕвезда, а сите учесници ќе добијат и уметнички магнет со божикна порака – симболичен спомен од Бадникови поворки 2026.

За дечињата од Општина Кисела Вода собирот е закажан во 11:15 часот кај локацијата „Рампа“ во Кисела Вода, каде најмладите ќе бидат пречекани со божикни ѕвездички. По собирот, учесниците заедно ќе продолжат кон Музејот на Град Скопје, каде во 12:00 часот ќе се приклучат на поворката исполнета со детска песна.

Точно во 12:00 часот, поворката пеејќи ја песната „Вечниот Бог“ ќе тргне по улицата „Македонија“ и ќе пристигне на плоштадот „Македонија“, пред сцената кај Божикната пештера.

По пристигнувањето на поворката на плоштадот „Македонија“, ќе следува „Божикната авантура“ – голема музичко-сценска изведба во живо, со повеќе од 40 музичари, пејачи, актери и учесници од „Златно славејче“. Мјузиклот е реализиран под уметничко раководство на Владо Дојчиноски, со драматургија на Билјана Крајчевска, и преку музика и сценска приказна ја пренесува пораката за Рождеството Христово.

Традиционално, во претпладневните часови, групи деца и млади од Бадниковите поворки ќе остварат празнични посети кај претседателката на државата Гордана Силјановска-Давкова, архиепископот Охридски и Македонски г.г. Стефан, градоначалникот на Град Скопје Орце Ѓорѓиевски, споделувајќи ја радосната вест за Христовото Рождество.

Здружението „Бадникови поворки“ ги поканува сите граѓани, семејства и деца да се приклучат на Бадниковите поворки 2026, без потреба од претходно пријавување.

Веќе 16 години, Бадниковите поворки претставуваат симбол на светлина, заедништво и достоинствено празнување на Бадник во земјава и пошироко.

Манифестацијата е поддржана од Министерството за култура и од Град Скопје.

The post ПОВОРКИ ЌЕ ИМА ВО ПОВЕЌЕ ОД 80 МЕСТА, ЌЕ ЗАСВЕТАТ БОЖИЌНИТЕ ЅВЕЗДИ На пладне „Вечниот бог“ ќе зазвучи на улица Македонија appeared first on plusinfo.mk.

Градоначалникот на Град Скопје Орце Ѓорѓиевски преку објава на својот фејсбук профил утре ги покани скопјани на плоштадот „Македонија“ на, како што вели, незаборавен дочек на Новата 2026 година, ноќ која повторно ќе го сплоти градот и порачува дека со домашни изведувачи, омилени на публиката, создале „програма што ги поврзува сите генерации“.

„Програмата започнува во 19:45 часот со моќниот вокал на Миле Кузмановски, а продолжува со Огнен Здравковски. Следуваат Дина Јашари, легендарните Куку Леле и неповторливата Тамара Тодевска. Кулминацијата ја носат милениците на младата публика Пајак, Лара и Два Бона, додека магичниот момент на пречекот на Новата година ќе го одбележи настапот на Каролина Гочева“, напиша Ѓорѓиевски на Фејсбук.

Почитувани скопјани, се вели во неговата објава, доста беше мрак. Време е за заедништво и за радост. Време е повторно да покажеме дека Скопје знае да слави, знае да обединува и знае да биде лидер во културните настани.

„Со домашни изведувачи, омилени на публиката, создадовме програма што ги поврзува сите генерации. Ова е наш подарок за градот убав – за повторно да живее, да пулсира и да сонува. Ве поканувам сите, драги скопјани, да ни се придружите и заедно да ја пречекаме 2026 година со насмевки, музика и незаборавни мигови. Сите сте добредојдени да бидете дел од оваа новогодишна приказна, исполнета со позитивна енергија и врвна забава. Се гледаме!, се нагласува во статусот на Ѓорѓиевски на Фејсбук.

The post ВРЕМЕ Е ЗА ЗАЕДНИШТВО И ЗА РАДОСТ Градоначалникот Орце Ѓорѓиевски ги покани граѓаните на прослава на скопскиот плоштад appeared first on plusinfo.mk.

Градоначалникот на Скопје Орце Ѓорѓиевски со обајва на Фејсбук ги покани скопјани, особено најмладите, да дојдат вечер во 18 часот на отворањето на новогодишната програма, која ќе трае се до новогодишната ноќ, со разни забавни настани, музички настапи и забава за сите генераци.

„Нашиот град е најубав тогаш кога свети од радост, насмевки и празнична магија. А сите ние – и младите и возрасните ја заслужуваме таа топлина што ја носат Новогодишните и Божиќните празници. Затоа, со огромна радост ве поканувам заедно да го означиме почетокот на едно ново празнично поглавје исполнето со забава, музика, многу подароци и вашите омилени херои кои ќе ги израдуваат најмалите. Во 18 часот, на плоштадот „Македонија“, заедно со вас ќе го осветлиме градот и после неколку години ќе ја почувствуваме првата искра на празничниот дух, напиша градоначалникот на својот фејсбук профил, а воедно објави и видео спот за промоција на новогодишната програма.

Според неговата објава, од утре до 31 декември секој ден ќе има настани и забави за сите генерации, а дочекот на Новата година ќе биде спектакуларен и незаборавен.

„На 15 декември, во 18 часот, на плоштадот „Македонија“, заедно со вас ќе го осветлиме градот и после неколку години ќе ја почувствуваме првата искра на празничниот дух. Веќе од наредниот ден, па сѐ до самата Нова година, ќе следуваат секојдневни настани и забави за сите генерации. А дочекот, ви ветуваме, ќе биде спектакуларен и незаборавен!“ – пишува градоначалникот.

Ѓорѓиевски најави дека денеска на прес-конференција ќе информира за новогодишното украсување и новогодишната програма и настаните на Град Скопје.

The post 🎥 ЃОРЃИЕВСКИ ГИ КАНИ СКОПЈАНИ НА ОТВОРАЊЕ НА НОВОГОДИШНАТА ПРОГРАМА Ветува спектакуларен новогодишен дочек appeared first on plusinfo.mk.

Мерката за самовработување бележи рекорден интерес, со повеќе од 6.000 поднесени апликации, што е доказ дека граѓаните маат желба, знаење и самодоверба да изградат сопствен бизнис – изјави премиерот Христијан Мицкоски денеска на прес-конференција во Владата.
– Денеска е важен ден и важен чекор за сите што сакаат да ја преземат иднината во свои раце – рече премиерот, додавајќи дека самовработувањето е една од „најуспешните и најатрактивните програми“ во рамки на Оперативниот план.
Според бројките што ги презентираше Мицкоски, досега се издадени 2.916 ваучери за изработка на бизнис-план, а оценети се 2.681 апликации – од кои 1.140 се на млади до 29 години, 912 на лица над 29, и 629 на правни субјекти регистрирани како ДОО. Во тек е процесот за 2.545 нови договори за грант, по што следува дводневната обука за претприемачките вештини.
Од вкупниот број апликации, 3.296 ги поднеле млади до 29 години, што премиерот го оцени како „посебно охрабрувачки“.
Мицкоски истакна дека финансиската поддршка годинава е зголемена и изнесува 7.000 евра за лица над 29 години, или 14.000 евра за здружување во ДОО. За млади до 29 години таа изнесува 10.000 евра, или 20.000 евра ако се здружат во ДОО.
– Овие средства значат нови работилници, ИТ-стартапи и мали производствени бизниси – рече премиерот.
Мерката за самовработување е дел од Оперативниот план за 2025 година вреден над 2,5 милијарди денари (40 милиони евра) – рекордно ниво на поддршка што ќе опфати 16.507 лица. Поради големиот интерес, Владата, Министерството за економија и труд и Агенцијата за вработување предложиле прераспределба на уште 300 милиони денари, а преку ребаланс обезбедени се дополнителни 161 милион денари, со цел, како што рече Мицкоски, „никој потенцијален претприемач да не остане без шанса“.
Премиерот оцени дека самовработувањето е клучен инструмент во борбата против невработеноста.

– Оваа мерка е истовремено и силен инструмент во нашата стратешка борба против невработеноста. Наместо пасивни мерки и чекање на пригодни околности, ние ја менуваме филозофијата – од држава што само обезбедува социјална поддршка, во држава што создава можности и охрабрува личен напредок – истакна Мицкоски.
Според него, мерката отвора работни места и во средини каде нема големи фабрики, ги активира младите и ги зајакнува жените претприемачи.

– Денеска не потпишуваме само договори — денеска потпишуваме нова енергија во економијата – рече Мицкоски, додавајќи: „Државата стои зад секој чекор што го прават претприемачите.“

The post МЛАДИТЕ СЕ СВЕСТУВААТ, НЕ ЧЕКААТ СОЦИЈАЛНА ПОМОШ, ОТВОРААТ БИЗНИСИ Рекорден интерес за грантовите за самовработување, повеќе од 6.000 апликации appeared first on plusinfo.mk.

Шуто Оризари нема да биде повеќе запоставена општина, а проблемите како нефункционалноста на комунална хигиена и јавниот превоз ќе се надминат – изјави денеска Орце Ѓорѓиевски, кандидат за градоначалник на Град Скопје од ВМРО-ДПМНЕ, кој денеска ја посети оваа општина.

Тој рече дека Шуто Оризари ќе добие нов културен дом „Есма Реџепова”, како и голем стадион на барање на младите од општината. Ѓорѓиевски истакна дека очекува голема поддршка од централната власт.

– Сакам да им честитам на сите овде во Шуто Оризари. Никогаш немало ваков чин на заедништво овде и сите да се обединети на една страна, како што тоа се случува денес. Убеден сум дека после ова ќе следи силна победа во Шуто Оризари за мене како кандидат за градоначалник на Град Скопје, но и за Ерџан како локален градоначалник овде, кој што за прв пат во историјата ќе биде избран, а е од редовите на ВМРО-ДПМНЕ и коалицијата – рече Ѓорѓиевски.

Според него, во општината недостасуваат најпрво основни хумани услови за живот, а граѓаните на Шуто Оризари како што вели тој, долго време се третирани како граѓани од втор ред. Ѓорѓиевски истакна дека како иден градоначалник на Град Скопје ќе работи на рамномерен развој во секоја населба и секое населено место.

– Граѓаните од Шуто Оризари се третирани долго време како граѓани од втор ред. Мојот концепт е Скопје еднакво за сите граѓани. Тоа подразбира рамномерен развој во секоја населба, во секое населено место, да сите имаат еднакви услови за живот. Дополнително, овде во програмата имаме ветено на барање на жителите културен дом, „Есма Реџепова”, место каде што младите ќе можат да се дружат да креираат, но и повозрасните да го поминуваат своето време – истакна Ѓорѓиевски.

Ѓорѓиевски вети дека дивата депонија во Шуто Оризари ќе биде исчистена, а ќе се работи на решение со нефункционалноста на комуналната хигиена, како и на јавниот превоз во градот.

– За брзо време по преземањето на власта во Град Скопје, ќе ги надминеме и како што побараа младите овде, а тоа беше најголем нивни интерес, во Шуто Оризари ќе градиме еден голем стадион. Очекувам силна поддршка од централната власт, но има и проекти кои што ќе ги реализираме заедно со локалната самоуправа овде, со меѓуопштинска соработка – рече Ѓорѓиевски.

Тој нагласи дека во оваа општина инфраструктурата се наоѓа во лоша состојба, и истакна дека ќе треба да се интервенира преку локалната самоуправа, а очекува силна поддршка од централната власт.

The post НОВ СТАДИОН И КУЛТУРЕН ДОМ „ЕСМА РЕЏЕПОВА“ Орце Ѓорѓиевски ги претстави проектите за Шуто Оризари appeared first on plusinfo.mk.

Денеска решив малку бесцелно да талкам низ Скопјево. Седнав во мојот болид и возев по вообичаените рути. Без задача да пазарам нешто, без обврска да се сретнам со некого, без конкретна идеја како да го „отепам” денот…

Свратив на Матка. Чепкавме нешто со комшијата по дворот. Испив едно кафе и после гледав како се борат сонцето и облаците. Како во втор изборен круг. И тоа беше сè.

Попатно го затекнав градот како и вчера. Малку потивок претпладнето (сабота е), троа подзачистен, ама сè уште валкан. Ме пречекаа и билбордите на сите кандидати за градски татковци и мајки – и оние што победија и оние што изгубија – и после ми текна на сите идеи и ветувања што ги слушнавме, за тоа како луѓето од билбордите од Скопјево ќе направат подобар и поубав град.

Се насмеав во себе, онака кисело…

И се прашав, колку гласови би добил јас, на пример, кога би се натпреварувал и кога во кампањата на моите сограѓани би им рекол – дами и господо, другарки и другари, мене Скопје ми е убаво.

Може да биде подобро место за живеење. Тоа да.

Може да биде почисто. Веројатно и ќе биде.

Може да се изградат и нови булевари и улици.

И многу, многу паркови.

И триста други чуда можат да се случат …

Сакам да кажам, можеби навистина Скопје може да биде поубаво. Не спорам. Само, мене и ова Скопје ми е убаво.

Поубаво ми е од кој било друг град што сум го посетил. И од кој било друг град што допрва ќе го потсетам…

Од Париз, на пример.

Ете, во Париз сум бил два пати. Сум ги посетил и Ајфеловата кула, музејот Лувр, Монмартр, сум го гледал градот на светлината од покривот на кулата на Монпарнас… Првиот пат бев воодушевен. И вториот пат ми беше убаво, гледајќи ги луѓето кои се воодушевуваат. Ама јас веќе немав на што да се воодушевувам. Ако дојде ред по трет пат да го посетам Париз, ни јас ќе ги видам Ајфеловата кула и Лувр, а ни тие мене…

И ако треба да избирам во кој град би сакал да живеам до крајот на животот – Скопје или Париз – без размислување го избирам мојот град. Да, сосе ѓубрево во контејнерите, сосе “хаосот” и “бетонизацијата”, со сите негови маани.

Зашто јас Скопје си го сакам и вакво.

Го сакам бе секакво.

Безусловно го сакам.

А што би променил јас, да сум случајно градоначалник на Скопје?

Што е првата работа што би ја сторил за мојот град?

Пааа… Во првите 72 часа од мојот мандат би направил што повеќе жители на овој град да го сакаат. Не да го засакаат, туку веднаш да почнат да го сакаат. Ако веќе живеат тука – јадат, пијат, прдат, се сексаат, фрлаат ѓубре, возат автомобили, свират, пцујат – редно и научат да го сакаат Скопје. Безусловно. И без одлагање.

Би вовел приемен испит по љубов кон Скопје. Молим лепо.

А сите што го хејтаат моето Скопје, би ги замолил да си најдат поубав град за живеење. Да живееш во град што постојано го хејташ и на кој постојано му наоѓаш маани, е исто како да живееш со жена или со маж што ги мразиш и не ги поднесуваш. Каква смисла има тоа?

Е сега… Знам дека тоа што јас би сакал да го сторам во првите 72 часа е невозможна мисија. И дека никој не би гласал за мене кога би ветил такво нешто. И кога би испечатил една програма во која би ги набројал сите нешта поради кои овој град мене ми е убав и не би го менувал за кој било друг град во светот.

Тоа би било антипрограма. Би ме сметале за улав. Што можеби и не би било далеку од вистината. Како што Скопје го сметаат за ужасен град. Што исто така може да биде и вистина.

Арно ама…

Јас упорно тврдам дека на Скопје најмногу му недостасуваат скопјани што го сакаат. И вакво какво што е. Без такви скопјани, Скопје никогаш нема да биде поубаво.

Што мене, да бидам искрен, воопшто и не ме загрижува. Тоа, дали ќе биде или нема да биде поубаво…

Ионака премногу убавина што не ја заслужуваме ни е веќе дадена.

The post Мене Скопје ми е убаво и вакво какво што е appeared first on plusinfo.mk.

„Актуелниот градоначалник на Центар, Горан Герасимовски за овие избори нуди речиси идентична програма како таа од пред четири години. Единствената разлика е што на оваа програма го нема името на Зоран Заев“.

Вака порача кандидатот за градоначалник на Центар од Движењето ЗНАМ, Мирослав Лабудовиќ, на изборното соочување на МРТ, неколку часа пред почетокот на изборниот молк.

– Ништо од оваа програма не е реализирано – ниту градинка во Маџир Маало и во Клинички центар, ниту паркинг во Дебар Маало, ниту чиста општина, ниту зелена агенда, и сега им ја нудите граѓаните истата програма. Герасимовски се фали дека има најмногу вработени хигиеничари, а да ги прашате центарци што мислат за тоа прво што ќе ви речат е решете ја хигиената – рече Лабудовиќ.

Одговарајќи на тврдењето на актуелниот градоначалник дека постојано е на велосипед и ја врти општината, за разлика од некои други кандидати кои користат службени возила, Лабудовиќ го повика Герасимовски да одговори дали е точно дека вози велосипед што чини над 10 илјади евра, поточно 9.400 британски фунти.

Во врска со урбанизацијата, кандидатот на ЗНАМ, кој е поддржан и од ВМРО ДПМНЕ, рече дека во на општината ѝ се случува бетонизација и урбан хаос на штета на граѓаните. Покажа и фотографии од објекти во кои нема ниту едно засадено дрво, ниту сантиметар зеленило.

– Се случува вистински хаос – во Буњаковец на помалку од еден квадртен километар во моментов има над 25 згради во градба. Дополнително, кај комплексот Треска имало непринципиелна парцелизација на земјиштето за формално да се каже дека не е продадено ништо од државното земјиште, ама со правилото 30/70 за дооформување на парцелите им се удоволило на инвеститорите – посочи Лабудовиќ.

Тој најави целосна ревизија на сите урбанистички планови, а не само на три колку што за четири години променил Герасимовски.

Лабудовиќ ги претстави клучните проекти во неговата програма, меѓу кои се Центар хаб – младински и културен центар, како креативно собиралиште на младите, и Здравствен хаб, преку кој Центар ќе биде прва општина што ќе води грижа за здравјето на своите граѓани.

Најави и изградба на катна гаража во Буњаковец, нов плоштад Феникс веднаш до новата општинска зграда, каде ќе има и подземен паркинг простор за 300 возила, како и нови квадрати зеленило, поголема безбедност за учениците и субвенции за селекција и рециклирање на отпад.

The post „НИШТО ОД ПРОГРАМАТА НА ГЕРАСИМОВСКИ НЕ Е РЕАЛИЗИРАНО“ Лабудовиќ вели дека кандидатот на СДСМ ја нуди истата стара програма appeared first on plusinfo.mk.

Носителката на советичката листа на Движењето ЗНАМ – За наша Македонија Ивана Ѓорѓиевска на денешната прес конференција направи збирна оценка на изборната кампања пред првиот круг на локалните избори в недела.

– Во изминатите три недели, заедно со нашиот тим од Движењето ЗНАМ – прошетавме низ сите делови на општина Куманово. Се сретнавме со граѓаните, разговаравме со нив ги слушавме нивните проблеми, предлози и идеи. Со задоволство можам да го споделам денеска е – дека кумановци ја прифаќаат нашата програма, се согласуваат со тоа како ние планираме да работиме во наредниот мандат. И, она што најсилно го почувствувавме е љубовта кон градот и желбата за контиуитет што носи реални резултати, а не празни ветувања – нагласи Ѓорѓиевска.

Оваа кампања, рече таа, ја водевме чесно, транспарентно и достоинствено со проекти, со визија и со дела кои зборуваат наместо нас. Она што го имаме сработено досега, рече Ѓорѓиевска, е нашиот најголем капитал е показател дека ние исполнуваме. Не ветувавме невозможни работи, туку конкретни решенија кои веќе се реализираат или се подготвени да почнат.

– Со таквите проекти дефинитивно го правиме Куманово – модерен град со нови улици и булевари, нови плоштади, повеќе паркинг места, со поголеми зелени површини – паркови, дрвореди и зелени појаси, со нови сообраќајни решенија, депонии, со поголема водоводна, канализациска и гасоводна инфраструктура. И, општина со нови инвестиции, новоотворени работни места и перспектива за младите. Веруваме во континуитет, стабилност и вистински развој. Куманово има потенцијал, има луѓе со идеи, со енергија и со желба да напредуваат.

Нашата цел е едноставна да го задржиме тој напредок, да ја продолжиме изградбата на современ, зелен и уреден град, каде што секој човек ќе има достоинствен живот – рече носителката на советничката листа на Движењето ЗНАМ за Куманово.

Ѓорѓиевска ги покани кумановци вечерва да присуствуваат на завршниот митинг на Движењето ЗНАМ во Домот на културата „Трајко Прокопиев“, а в недела да излезат масовно на гласачките места.

The post ПОНУДИВМЕ ВИЗИЈА, ПРОЕКТИ И ДЕЛА Движењето ЗНАМ задоволно од предизборната кампања appeared first on plusinfo.mk.