Египет започна еден од најголемите инфраструктурни проекти во својата историја. Вештачки канал долг 170 километри кој треба да донесе вода во западниот дел од земјата и да претвори илјадници квадратни километри пустина во обработливо земјиште. Сепак, експертите предупредуваат дека долгорочниот успех на проектот зависи од одржливоста на изворот на вода.

Проектот, официјално наречен „Нова Делта“, а многумина го нарекуваат „Нов Нил“ вреди околу 15 милијарди долари и има за цел да го зголеми земјоделското производство, да ја зајакне безбедноста на водата и храната и да ја намали зависноста на земјата од увоз.

„Нова Делта“ е комплексен систем на вештачки канали, пумпни станици и цевководи што испорачуваат вода до делови од западната египетска пустина.

Проектот се очекува да наводнува околу 9.000 квадратни километри земјиште, зголемувајќи ја обработливата земја во Египет за 15%.

Најголем инженерски предизвик беше испораката на вода до пустинските висорамнини. За таа цел, беа изградени 13 големи пумпни станици кои постепено ја креваат водата речиси 100 метри надморска височина и ја насочуваат преку вештачки канал кон земјоделските површини.

За да се намалат загубите поради испарување на високи температури, дел од водата се транспортира преку големи подземни цевководи.

Постројката Ел-Хамам, која се смета за најголема постројка за прочистување на вода во светот, игра клучна улога во проектот.

Нејзиниот капацитет е дури 7,5 милиони кубни метри вода дневно, а нејзина задача е да прочистува и подготвува вода за наводнување на нови земјоделски површини

Системот се потпира на два главни извори – прочистена вода од земјоделскиот систем за дренажа што се користи повторно, и подземни резерви на вода од длабоки пустински водоносни слоеви.

The post 📽️ ЕГИПЕТ ГРАДИ „НОВ НИЛ“ ДОЛГ 170 КИЛОМЕТРИ Проектот вреди 15 милијарди долари и претвора пустинска во обработлива земја appeared first on plusinfo.mk.

Договор меѓу ЈПДП и ЕБОР за грант средства за изградба на автопат Скопје-Блаце беше потпишан денеска во Владата. Премиерот Христијан Мицкоски истакна дека ова е проект кој со децении бил најавуван, а за него е големо задоволство што наскоро на целата територија на државата ќе се развиваат шест автопатски делници

– Покрај оваа, која треба да го оврзе главниот град со Блаце, тука се и делницата која треба да ги поврзе Тетово и Гостивар, Гостивар со Букојчани, го завршуваме делот од автопатото Кичево-Охрид, Прилеп-Битола и наскоро очекувам да биде завршена процедурата која треба да го поврзе Букојчани со Кичево. Заедно со оваа автопатска делница, очекувам овие шест автопатски делници во еден момент да се реализираат. Тоа ќе биде голема додадена вредност за македонската економија – појасни Мицкоски.

Токму економскиот развој, посочи премиерот, претставува еден од врвните приоритети на Владата.

– Градежништвото како еден од главните носители на економскиот развој во годините кои следат, очекувам да продолжи со несмалена динамика. Со април имаме исклучително висок степен на реализција на проекти, за речиси една третина подобро од минатата година истиот месец. Очекувам во таа насока да се децижат работите и во периодот кој следи – посочи Мицкоски.

Вицепремиерот и министер за транспорт, Александар Николоски истакна дека со вакви капитални проекти се развива државата.

– „Гранит“ предводи еден конзорциум кој ќе го гради овој автопат, домашните компании покажуваат дека може да работат и да изведуваат големи градежни проекти, нагласи Николоски.

Автопатот Скопје-Блаце е во вкупна должина од 12,5 километри, а од мај 2020 година на терен се одвиваат активности за првата фаза, во должина од 2,5 километри. Рокот за изградбата е четири години, но надлежните се надеваат дека проектот ќе го завршат поскоро.

Според проектот, трасата во вкупна должина од 12,5 километри, ќе содржи пет тунели, две галерии, 12 мостови и околу 40 други инфраструктурни објекти. За изградба на овој автопат преку ЕБОР се обезбедени 30,8 милиони евра грант и заем од 167,6 милиони евра.

Овој патен правец е дел од важниот регионален коридор што ја поврзува Македонија со Косово и понатаму со Црна Гора. Според Николоски, неговото завршување ќе овозможи побрз транспорт на патници и стока, како и подобар пристап на македонските компании до пристаништето Бар во Црна Гора, што ќе придонесе за развојот на трговијата и економијата.

Како што појасни директорот на Јавното претпријатие за државни патишта Коце Трајановски, веќе се избрани консултант и изведувач, а надзорот е во процес на евалуација.

– Денеска потпишуваме грант меѓу ЈПДП и ЕБОР, за грант кој е дел од рамката за инвестиции на ЕУ-Западен Балкан во висина од 30,8 милиони евра и заем од 167,6 милиони евра за изградба на автопатот Скопје – Блаце – рече Трајановски.

The post ПОТПИШАН ДОГОВОР ЗА ИЗГРАДБА НА АВТОПАТОТ СКОПЈЕ-БЛАЦЕ Од ЕБОР грант од 30,8 милиони евра appeared first on plusinfo.mk.

Речиси 9,5 милиони евра европски средства се изгубени поради неправилности во реализацијата на проектот „Рехабилитација и проширување на канализационата мрежа во Општина Кичево“, соопшти Управата за финансиска полиција.

Поради случајот, до Основното јавно обвинителство во Скопје е поднесена кривична пријава против странски државјанин со иницијали С.Г.О.Б., во својство на сопственик и управител на правно лице, како и против самото правно лице.

Според Финансиската полиција, постојат основи на сомнение за сторено кривично дело „Злоупотреба на постапката за јавен повик, доделување договор за јавна набавка или јавно-приватно партнерство“.

Истрагата покажала дека пријавениот бил должен да обезбеди важечка банкарска гаранција за проектот што се реализирал во рамки на ИПА II програмата на Европската Унија.

Според наводите на Финансиската полиција, тој не ја открил околноста дека азербејџанската банка „Муганбанк“, која ја издала гаранцијата, влегла во стечај, со што гаранцијата повеќе не била валидна.

Истовремено, како што се наведува во пријавата, биле ангажирани подизведувачи без претходно одобрение од Министерството за финансии и надзорниот орган, спротивно на договорните обврски.

Поради утврдените неправилности, договорот бил раскинат. Од Финансиската полиција велат дека со ваквите постапки била предизвикана штета на Буџетот на државата од 127,4 милиони денари.

Дополнително, Македонија останала без 9.474.132 евра од ИПА-фондовите на Европската Унија. Тоа значи дека средствата што биле предвидени преку европската програма сега ќе треба да се обезбедуваат од домашни извори.

Случајот е доставен до Обвинителството, кое треба да утврди дали ќе поведе понатамошна постапка против пријавените.

The post ГО КРИЕЛ СТЕЧАЈОТ НА СТРАНСКАТА БАНКА, ПРОЕКТОТ СЕ РАСПАДНАЛ Државата остана без 9,5 милиони евра од ИПА фодновите appeared first on plusinfo.mk.

Албанскиот премиер Еди Рама реагираше за ситуацијата во Звернец, кај Валона, каде што жителите на областа и претставниците на граѓанското општество протестираат против проектот за изградба на луксузен ресорт, кој се поврзува со Џаред Кушнер, зетот на американскиот претседател Доналд Трамп, наведувајќи дека самиот би се придружил на протестот доколку верувал во тврдењата што се ширеле за проектот.

На средба со парламентарната група на неговата Социјалистичка партија Рама ги негираше обвинувањата дека земјиштето се дава на странци или дека е нарушено заштитеното подрачје, опишувајќи ги овие наративи како невистинити и дезинформации.

– Ќе направев полошо од вас, ако ми кажеа дека таа земја ѝ припаѓа на државата и дека државата им ја дава на странци. Дури слушнав дека државата му ја дава таа земја на Израел за да ги донесе Палестинците во Звернец. Да ми кажеа дека таму влегле некои Руси, кои во соработка со албанските олигарси го срамнуваат заштитеното подрачје и ќе градат палати. Да ми кажаа дека тоа е заштитено подрачје и дека владата го отстранила од заштита за да им го даде на странци, кои ќе дојдат да го уништат биодиверзитетот на подрачјето. И уште многу други работи што ги кажаа, а во кои нема ни тронка вистина, велам и јас ќе постапев како вас, можеби и полошо, рече Рама – додавајќи дека земјиштето странскиот инвеститор го купил, не од државата, туку од приватни лица.

Рама изрази солидарност со јавното негодување и гнев поради сцената каде што, при обид на жителите да влезат во ограденото градилиште, тврдејќи дека нивните имоти биле неправедно одземени преку експропријација, еден од нив беше влечен од приватно обезбедување. Според него рамнодушноста на полицијата која требаше да го заштити, е неоправдана, поради што денеска веќе е сменет Началникот на Полицискот комесаријат во Валона.

Освен протестот во Звернец, протест синоќа се одржа во Тирана, прво пред зградата на МВР а протоа пред владата, на која учесниците носеа транспаренти „Албанија не е на продажба“, „Поништете го договорот“. Демонстрантите побараа и оставка од премиерот Еди Рама, обвинувајќи дека неговата влада го овозможила проектот со измена на Законот за заштитени подрачја, усвоена во парламентот во февруари 2024 година.

Фото: Принтскрин

Со таа измена, заштитените зони во Албанија биле отворени за развој на туристички комплекси со пет ѕвезди, но дел од познавачите на состојбите тврдат дека законската измена била направена специјално за проектот поврзан со Кушнер.

Проектот, за кој инвеститорот ветува дека ќе се одвива по строго законски процедури, се очекува да создаде повеќе од 10.000 работни места. Вредноста според медиуми се проценува на околу четири милијарди долари (3,43 милијарди евра), опфаќа приближно 250 хектари во рамките на мочуришниот и лагунскиот екосистем Нарта–Звернец.

Во јануари 2024 година, Кушнер и неговата сопруга Иванка Трамп, ја посетија Албанија за да го промовираат проектот за изградба на луксузен комплекс во земјата. Иванка Трамп под силно обезбедување го посети местото и пред неколку месеци.

The post РАМА ЖЕСТОКО ГО БРАНИ ЛУКСУЗНИОТ РЕСОРТ НА ЗЕТОТ НА ТРАМП КАЈ ВАЛОНА Подрачјето не е заштитено, земјиштето не е државно appeared first on plusinfo.mk.

По повеќе од една деценија чекање, започнува реконструкцијата на Универзална сала, најави министерот за култура и туризам Зоран Љутков. Објектот беше затворен 11 години, односно од 2015 година, поради административни пречки и одложувања.

Љутков информира дека постапката за избор на изведувач е успешно завршена, откако надлежната комисија ја одбила жалбата и го потврдила изборот на најповолна понуда.

– По долги години чекање и административни пречки, денес со гордост објавувам: започнува реконструкцијата и модернизацијата на Универзалната сала – еден од најзначајните културни симболи на Скопје и на Македонија – истакна министерот Љутков.

Според него, со ова се отстранува и последната правна пречка за почеток на градежните работи. Проектот ќе се реализира по принципот „клуч на рака“, а реконструкцијата е планирано да заврши до декември 2027 година.

– Со новиот лик на Универзална, Скопје ќе добие модерна, функционална и репрезентативна културна институција, која ќе биде домаќин на врвни театарски претстави, концерти, фестивали и големи културни настани – нагласи Љутков.

Министерот додаде дека проектот е дел од подготовките на Скопје за апликацијата за титулата Европска престолнина на културата 2028.

– Ова е инвестиција во иднината на македонската култура, инвестиција во нашите уметници, во нашата публика и во идните генерации – посочи министерот, додавајќи дека ќе продолжи со транспарентна реализација на капиталните проекти во културата.

The post ПОСЛЕ 11 ГОДИНИ СЕ ОТВОРА ПАТ ЗА УНИВЕРЗАЛНА Љутков најави старт на реконструкцијата appeared first on plusinfo.mk.

Почна изградбата на спортски игралишта во дворот на ОУ „Даме Груев“ во Битола, што е проект од вториот владин повик, преку Министерството за образование и наука.

Денеска локацијата ја посетија градоначалникот на Битола Тони Коњановски, претседателот на Советот Бојан Бојкоски и секретарот на општината Борче Димитровски, а од одговорните за проектот беа информирани со текот на работите.

Станува збор за отворени повеќенаменски игралишта во училишниот двор и тоа терени за ракомет, кошарка и одбојка со вкупна површина од 1.311 м2.

Проектот предвидува поставување и на тартан подлога со дебелина од 13 милиметри, а вкупната асфалтна површина ќе биде на 2.081 м2.

Околу терените ќе биде направена и пешачка патека во бехатон на површина од 294 м2, асфалтирање на пристапниот дел до игралиштата, паркинг простор, хортикултурно уредување и поставување на урбана опрема.

Вкупната сума на проектот е 15.507.414 денари.

Со овој проект, и ова училиште се приклучува кон другите основни училишта кои ќе имаат нови спортски терени, што е заложба на Општината.

The post ТЕРЕНИ ЗА РАКОМЕТ, ОДБОЈКА И ЗА КОШАРКА ВО ОУ „ДАМЕ ГРУЕВ“ ВО БИТОЛА Почна изградбата на спортски игралишта appeared first on plusinfo.mk.

Двата недовршени објекта кај Ректоратот на УКИМ, чија изградба е стопирана повеќе од десет години, ќе се доградуваат кога ќе биде избран проектант, а потоа и изведувач на градежните работи.

Од Министерството за образование и наука велат дека во петокот (30 јанаури) завршил рокот за аплицирање на тендерот за нови проекти за градба, кој МОН го објави на крајот од 2025 врз основа на стручната анализа за состојбата во која се сега недоградените објекти и согласно со потребите на нивните идни корисници.

Некои од тие потреби, како и стандардите за градење во меѓувреме, односно од 2013 кога почна изградбата, се сменети и затоа е одлучено, и наведено во тендерот, двата објекта да ги користи само Факултетот за информатички технологии и компјутерско инженерство (ФИНКИ) бидејќи само една зграда не ги задоволува потребите ниту на овој факултет ниту на Факултетот за физичко образование, спорт и здравје, за кој беше наменет другиот објект.

Од МОН за МИА соопштиле дека и за овој факултет се планира нова зграда на местото каде што тој се наоѓа.

Повикот за понуди за репроектирање на објектите беше објавен откога МОН ја доби анализата направена од стручно тело координирано од проф. д-р Горан Марковски од Градежниот факултет. Во работната група беа вклучени и други факултети на УКИМ: ФЕИТ, Машинскиот и Архитектонскиот факултет, како и Институтот за земјотресно инженерство и инженерска сеизмологија (ИЗИИС).

Во разговор за МИА професорот Марковски рече дека двата објекта, кои се простираат на вкупно 22.753 квадратни метри, ќе го задржат постојниот габарит и ќе немаат барокна фасада. Во нивната внатрешност ќе има прераспоредување на просториите, ќе има промени во инсталациите за греење, компјутерската инсталација итн.

– Двата објекта се подземно поврзани со паркиралиште, а ќе има и топла врска помеѓу нив бидејќи ќе бидат за еден факултет, откако се заклучи дека ќе добиеме две згради, но ниту едната ниту другата нема да ги задоволи потребите ни на двата факултета. Сега треба да се најде проектант, потоа да се најде изведувач и да ги доврши работите. Проектната задача е доста обемна од сите аспекти. Дадени им се одредени насоки на идните проектанти каде треба да се движат и во однос на архитектонскиот облик, но, се разбира, не премногу детаљно затоа што на проектантот треба да му се даде слобода – изјави профeсорот Марковски.

При истражувањето на состојбата на недоградените објекти, вели, се изненадиле од силна карбонизација во бетонот што потврдува дека има енормно загадување во тој дел од Скопје. Марковски појаснува дека карбонизација на бетонот на толку зачудувачки високо ниво е утврдена на некои места на објектите како последица на комбинацијата од влага и големо присуство на јаглерод диоксид и дека тој процес може да доведе до корозија на арматурата. Со новиот проект треба да се заштитат загрозените делови, а останатиот дел од конструкацијата, како што рече, е солиден и нема показатели на деградација.

– Бетонот е во принцип базна средина, со висок pH-фактор и затоа арматурата во него е заштитена од корозија. Но, овој процес ја намалува базичноста и арматурата може да биде изложена на забрзана корозија. Објектите стојат отворени и оставени на атмосферските влијанија – дожд, мраз, снег, внатре влегувала вода и стоела додека не испари итн. Тоа траело со години. Во арматурата засега не е почната корозијата, но добро е што ќе се преземаат активности за завршување на овие објекти. Ако така остане уште некое време, дополнително ќе треба да поскапи целата алтернатива. Сега има мерки кои се релативно евтини и лесно применливи за да може да се стопира тој процес. Од една страна, имаме недовршени работи, тоа се фрлени пари, што е и најголемата штета, а второто што го откривме во анализата е дека токму тој дел, крстосницата кај Ректоратот, е еден од најзагадените во Скопје. Ова е доказ дека таму навистина имаме енормно загадување со јаглерод диоксид бидејќи во толку кус период од десетина години имаме толку голема карбонизација навлезена во длабочината на бетонските елементи. Има и на мостовските конструкции, кои се изложени на надворешни влијанија, но тоа е процес кој треба да трае стотина години. А овде имаме за само десет години. И од научна гледна точка за нас тоа е интересен податок и потврда за тоа колку во Скопје е загаден воздухот – рече Марковски.

Динамиката со која ќе продолжи изградбата на објектите ќе зависи од расположивите средства во буџетот. Кога МОН, УКИМ, Градежниот факултет и Службата за општи и заеднички работи при Владата (СОЗР) лани во мај го потпишаа меморандумот за формирање на работната група за увид во физичката состојба на објектите, беше соопштено дека според договорите за реализација на проектите од пред десетина години, изградбата на ФИНКИ требало да чини 784 милиони денари, а градењето на Факултетот за физичко образование, спорт и здравје, требало да чини 432 милиони денари.

– Скапите работи допрва доаѓаат. Кога се почнуваат објекти и од која било причина остануваат недовршени, потоа секогаш има проблем од различни аспекти. Покрај тоа што фирмата изведувач заврши неславно, главната причина за многу години статус-кво беше политичка, за жал, како што и најчесто бива. На тие објекти и не им беше таму местото, надвор се од кампусот на УКИМ, таа локација е за парк. Почнаа да се градат без урбанистичка и архитектонска логика. Но, сега двете можности се или да се доградат или да се урнат. Тешко оди уривањето на вакви започнати објекти од повеќе причини. Веднаш ќе има реакции во јавноста дека се урива нешто што е изградено. Најдобро урбанистичко решение е нив да ги нема, меѓутоа кога веќе ги има треба да ги направиме така што ќе извлечеме максимум од нив. Заинтересираност и ангажман да се спаси она што е веќе направено и да се обезбеди квалитетен простор за ФИНКИ гледам и во Министерството за образование и наука, почнувајќи од министерката. Сакам да нагласам и дека од МОН немавме никакви ограничувања, услови или барања како тие би требало да изгледаат. Сè беше оставено на струката, имавме одврзани раце во поглед на тоа колку може максимално тие објекти да се усогласат со постојните во кампусот на УКИМ – посочи професорот од Градежниот факултет.

Стручната анализа за состојбата на двата објекта е направена бесплатно од работната група што тој ја кооридинираше затоа што, вели, чувствувале општествена одговорност и затоа што тоа е најмалку што можат да направат за наш факултет и за наши студенти. Работната група понатаму не е вклучена во процесот, но му стојат на располагање на МОН во следните фази од овој проект. Марковски смета дека новото проектирање ќе трае до есен и дека би било добро ако до крајот на оваа година МОН распише тендер за изведувач на градежните работи.

Градежниот и Архитектонскиот факултет почнаа да работат и на проектот на Македонски железници – Инфраструктура за чистење и целосно реновирање на Железничката станица-Скопје, што треба да почне да се реализира наредната година. Марковски за МИА вели дека идејата е да ѝ се врати некогашниот сјај на главната железничка станица, со тоа што ќе бидат вметнати модерни материјали и содржини, но ќе се задржи автентичноста.

Неговата порака е дека објектите кои се белег на главниот град мора да ја зачуваат суштината и, како што рече, да се има цивилизациски однос кон историското наследство и авторските дела.

The post ПО НОВ ПРОЕКТ ЌЕ СЕ ДОГРАДУВААТ ДВЕТЕ ЗГРАДИ КАЈ РЕКТОРАТОТ НА УКИМ Објектите е предвидено да ги користи Факултетот за информатички технологии appeared first on plusinfo.mk.

Почнати се градежните работи за Линија 1, односно т.н. градски воз, проект вреден 360 милиони денари, кој предвидува целосна реконструкција и надградба на постоечката железничка траса.

Како што информираше денеска премиерот Христијан Мицкоски, реализацијата на проектот ќе овозможи побезбеден, побрз и поефикасен железнички сообраќај.

Дополнително, премиерот нагласи дека изградбата на брзата пруга на Коридор 10 останува еден од стратешките приоритети на Владата.

– Преку Договорот за стратешко партнерство со Обединетото Кралство се обезбедени средства за капитални проекти со кои ја поставуваме железницата таму каде што ѝ е местото – како клучна врска меѓу Балканот и Европа. Ова не се изолирани проекти, туку системска обнова на железничкиот сектор, инвестиција во економијата, екологијата и европската иднина на државата. Железницата повторно ја враќаме на шините на развојот – со план, одговорност и јасна визија за модерна, поврзана и силна Македонија“, истакна Мицкоски пред потпишувањето на Договорот за заем со ЕБОР во вредност од 20,9 милиони евра, со кој е предвидена набавка на електрични локомотиви за ЖРСМ Транспорт.

Според премиерот, железницата мора повторно да стане двигател на извозот и логистиката, а не тесно грло за економијата.

– Посебно важен е еколошкиот аспект. Со фокусот на електрични локомотиви, се движиме кон нула емисија на загадувачки материи. Ова е директен придонес во борбата против аерозагадувањето, во заштитата на животната средина и во развојот на чист, модерен и одржлив транспорт. Во услови на енергетска транзиција, железничкиот транспорт станува клучен фактор за ефикасен, конкурентен и еколошки одржлив систем – подвлече Мицкоски.

На потпишувањето на Договорот со ЕБОР во Владата присуствуваа и вицепремиерот и министер за транспорт Александар Николоски, како и министерката за финансии Гордана Димитриеска-Кочоска.

The post ГРАДСКИОТ ВОЗ СТАНУВА РЕАЛНОСТ Почнати градежните работи, следи целосна модернизација appeared first on plusinfo.mk.

Граѓаните на Општина Бутел наскоро ќе добијат нов современ затворен базен, кој ќе се гради во дворот на ООУ „Св. Климент Охридски“ во населбата Бутел 1. Станува збор за втор ваков објект во општината, покрај веќе започнатата изградба на базенот во дворот на ООУ „Ацо Шопов“.

Актуелниот градоначалник и кандидат за втор мандат од редовите на ВМРО-ДПМНЕ, Дарко Костовски, изјави дека проектот е дел од визијата за создавање здрави генерации и унапредување на спортската инфраструктура во општината.

– Со големо задоволство најавувам дека Бутел добива уште еден затворен базен. Овој објект ќе биде симбол на здрав живот и грижа за нашите деца. Од првиот ден кога станав градоначалник, ветив дека детската благосостојба ќе биде во фокусот на мојата работа – и тоа ветување го исполнуваме – рече Костовски.

Тој додаде дека пливањето како спорт има огромно значење за здравиот развој на младите, но и за промоција на активен и квалитетен живот на сите жители.

– Со овие инвестиции не создаваме само услови за развој на идни спортски таленти, туку и простор за рекреација и здрав живот на секој граѓанин. Со ефикасна работа и јасна визија, успеавме да го забрзаме развојот на спортската инфраструктура во Бутел – нагласи градоначалникот.

Новиот базен, кој веќе има готов проект во 3Д форма, ќе биде изграден според најсовремени стандарди, а општината најавува дека изградбата ќе започне веднаш по завршувањето на административните постапки.

Костовски потенцира дека неговиот тим ќе продолжи со силна динамика и посветеност во реализацијата на проектите кои го подобруваат животот на жителите на Бутел.

– Ова е само уште една потврда дека кога има волја и визија, резултатите се видливи. Ќе продолжиме да ги создаваме потребните услови за подобар живот и развој на нашата општина – порача тој.

The post СЕ ГРАДИ НОВ МОДЕРЕН БАЗЕН ВО БУТЕЛ Ветувањето за здрави генерации станува реалност, порача Костовски appeared first on plusinfo.mk.

По три децении се гради водовод во Љубанци и Љуботен, соопшти вицепремиерот и министер за транспорт, Александар Николоски. Министерот денеска заедно со премиерот Христијан Мицкоски беа во работна посета на општина Бутел, каде извршија увид во градежните работи за изградба на водовод за селата Љубанци и Љуботен.

„Проектот се реализира после три децениското барање на жителите на овие населени места да добијат чиста вода за пиење. Проектот е финансиран од буџетот на Министерството за транспорт во вредност од 106 милиони денари. Проектот се реализира со цел да се обзбедат поквалитетни услови за живот за сите граѓани во општина Бутел“, соопштија од Министерството за транспорт.

Во написот се вели дека е предвидено да се изгради нова пумпна станица на локацијата на постојниот резервоар за висока зона како и да се изградат нови резервоари за двете населени места.

„Со реализција на проектот се гради пумпна станица во Радишани, цевковод од пумпната станица Љуботен до резервоар Љуботен и цевковод од пумпна станица Љуботен до резервоар Љубанци“.

The post 📷 ПО 3 ДЕЦЕНИИ СЕ ГРАДИ ВОДОВОД ВО ЉУБАНЦИ И ВО ЉУБOTЕН Николоски и Мицкоски беа на увид на работите за пумпна станица и за цевковод appeared first on plusinfo.mk.