Министерот за култура и туризам Зоран Љутков најави дека по оштетувањето на спомен-куќата на авторот на македонската химна Владо Малески во Струга веднаш ќе се започне со изработка на проект за обнова и реставрација на заштитениот објект. Љутков денеска беше во Струга и лично ја посети спомен-куќата на Малески која беше оштетена пред два дена при изведба на градежни работи на соседен објект.

– Најостро ги осудувам сите дејствија и неодговорни постапувања што доведуваат до уништување или загрозување на заштитени објекти. Културното наследство е непроценливо богатство кое не смееме да го загрозуваме од небрежност, од несовесност или од краткорочни интереси – изјави Љутков од Струга и додаде дека инспекциската служба на Управата за заштита на културно наследство констатирала сериозни оштетувања.

Во однос на обвинувањата на опозицискиот СДСМ дека власта е одговорна за актуелната состојба на спомен-куќата, Љутков вели дека сите решенија за рушење и дозволи за градба на соседниот објект биле издадени во последните седум години, кога, како што рече, власт во Струга се СДСМ и ДУИ.

Во текот на посетата на заштитениот објект, друштво на Љутков му правеше заменик-министерот за правда Ален Деребан, кој рече дека одобрението за градба на соседниот објект било издадено незаконски, а дека градоначалникот го поништил решението вчера, односно по рушењето на спомен-куќата.

– Веднаш после рушењето на заштитениот културен објект, градоначалникот го поништил решението и во образложението за поништување на одобрението за градење има констатирано дека решението што го издал во ноември 2024 година е издадено спротивно на закон и спротивно на проектите коишто се доставени до органите за култура врз основа на кои требало да се издаде тоа одобрение. Како резултат на таквото незаконско одобрение за градење на соседниот објект дошло до рушење на објектот прогласен за заштитено културно наследство – појасни Деребан.

Заменик-министерот за правда ги повика МВР и Јавното обвинителство да ги обезбедат сите материјални докази поврзани со спорниот објект поради, како што рече, сомнение за сторени повеќе кривични дела.

The post ЉУТКОВ НАЈАВИ ПРОЕКТ ЗА РЕСТАВРАЦИЈА НА СПОМЕН-КУЌАТА НА ВЛАДО МАЛЕСКИ Одобрението за градба на соседниот објект било издадено незаконски appeared first on plusinfo.mk.

Друштвото на писателите на Македонија (ДПМ) бара итна санација и враќање во првобитната состојба на спомен-куќата на авторот на македонската химна Владо Малески во Струга, која беше оштетена пред два дена при изведба на градежни работи на објект во непосредна близина.

Од ДПМ велат дека будно и со длабока загриженост го следат случајот со спомен-куќата на Малески која, како што посочуваат, има статус на поединечно заштитено добро.

„Со оглед на тоа што една од основните заложби на Друштвото на писатели е грижата за книжевното и културното наследство што ја негува колективната културна меморија и го афирмира ликот и делото на неговите основачи, воедно и втемелувачи на современата македонска државност и култура, Управниот одбор на ДПМ бара од надлежните институции координирано да ги преземат сите неопходни мерки за што побрза санација на настанатата штета и враќање на спомен-куќата на Владо Малески во Струга во нејзината првобитна состојба“, наведуваат од Друштвото на писатели, додавајќи дека ќе продолжат да ги следат случувањата.

Претходно денеска, министерот за култура и туризам Зоран Љутков најави дека веднаш ќе се започне со изработка на проект за обнова и реставрација на заштитениот објект.

The post ДРУШТВОТО НА ПИСАТЕЛИТЕ БАРА ИТНА САНАЦИЈА НА СПОМЕН-КУЌАТА НА ВЛАДО МАЛЕСКИ „Институциите да ги преземат сите мерки“ appeared first on plusinfo.mk.