Во втората половина од 2025 година највисок скок на цените на продадени станови, споредено со истиот период од претходната година, има во Куманово за 24 проценти, Тетово 22 проценти, Карпош, Кисела Вода и Гази Баба со по 16 проценти, Центар 14 проценти, а пад на цените на продадени станови има во Гостивар два процента.

– Анализата на опсегот на постигната продажна цена по метар квадратен укажува дека најнизок забележан минимум во втората половина од годинава има во Чаир, 19.543 денари по метар квадратен, а највисок забележан максимум има во Центар 232.722 денари по метар квадратен, покажува Извештајот од Регистарот на цени и закупнини за втората половина од 2025 година што ги објави денеска Агенцијата за катастар на недвижности.

Најмногу продажби на станови во второто шестмесечје од 2025 година има во Аеродром – 240, Чаир – 188, Центар – 186, Карпош – 171, а највисока вкупна вредност на остварена цена од продажба на станови постигната е во Центар 1.379.518 илјада денари, Аеродром 1.347.308 илјада денари, Карпош 1.088.279 илјада денари. Највисока просечна цена по метар квадратен постигната е во Центар, 104,3 илјада денари по метар квадратен, Карпош, 99,6 илјада денари по метар квадратен, Аеродром, 88,9 илјада денари по метар квадратен, Кисела Вода, 83,2 илјада денари по метар квадратен, Охрид, 78,1 илјада денари по метар квадратен.

Според Извештајот, највисока вкупна вредност на остварена цена од направените купопродажби за овој период постигната е во Центар – 82,8 милиони евра, Аеродром – 59,1 милиони евра, Карпош – 57 милиони евра, а најниска во Велес – 5,6 милиони евра.

Споредувајќи со истиот период од претходната година, највисок раст на обемот на купопродажби имаат Штип со 46 проценти и Гостивар 43 проценти, а најголем пад има Велес со 30 проценти.

Најмногу купопродажби во второто шестмесечје од 2025 година се направени во Аеродром – 757 купопродажби, по што следуваат Центар со 636 купопродажби и Гази Баба со 586 купопродажби, а најмалку во Бутел – 203 купопродажби.

Движењето на цените меѓу второто шестмесечје од оваа година, наспроти истиот период од претходната година укажува на пораст на бројот на продадени станови во Гостивар, 93 проценти, Штип, 23 проценти, Прилеп, 15 проценти и Тетово, 13 проценти, а најголем пад на бројот на продадени станови има во Струмица 20 проценти и Битола 19 проценти.

Од 1 јули до 31 декември 2025 година, во Регистарот на цени и закупнини регистрирани се вкупно 17.603 трансакции. Споредбено со првото полугодие од 2025 година, во второто полугодие на 2025 има пораст на вкупниот број на трансакции на пазарот на недвижности за 11,6 проценти. Во однос на второто полугодие од 2024 година забележан е благ пораст на вкупниот број трансакции на пазарот на недвижности за 6,4 проценти. Од Агенцијата за катастар на недвижности оценуваат дека растот на обемот на трансакциите може да се поврзе со подобрени услови за финансирање и зголемена доверба во пазарот на недвижности.

Во втората половина од 2025 година во Регистарот се впишани 9953 продажби на недвижности, 2031 продажби од инвеститор, 306 откупи од државата и 75 продажби на лицитација, однoсно вкупен број од 12365 купопродажби што укажува на благ пораст за 3,4 проценти во однос на втората половина од 2024 година.

The post СТАНБЕНИОТ КВАДРАТ УРИВА РЕКОРДИ, „ШАМПИОНОТ“ ЧИНЕЛ 3.776 ЕВРА! Најмногу поскапеле становите во Куманово, Тетово, Карпош, Кисела Вода и Гази Баба appeared first on plusinfo.mk.

Основното јавно обвинителство Куманово донесе Наредба за спроведување истражна постапка против едно физичко и едно правно лице за кои постои сомнение за сторено продолжено кривично дело Измама од член 247 од Кривичниот законик.

„Пријавениот сопственик на правното лице, со цел да прибави противправна имотна корист за себе и за својата фирма, лажно прикажувал факти дека врши посредување при продажба на станови и возила во сопственост на Агенцијата за управување со одземен имот – Скопје. Осомничениот 35-годишник од Скопје на две оштетени лица во Куманово им се претставил како вработен во Агенцијата за управување со одземен имот и со нив склучил фиктивни договори за наводна продажба на станови во Скопје и Охрид. Измамените граѓани му уплаќале пари, еден дел во готово, а еден дел на сметка на правното лице, со што осомничениот прибавил вкупна противправна имотна корист од 115.754 евра“, соопшти Јавното обвинителство.

Ценејќи дека се исполнети законските основи, јавниот обвинител до судијата на претходна постапка од Основниот суд во Куманово ќе достави предлог за определување мерка притвор за осомничениот, се додава во соопштението.

The post ИМ ПРОДАВАЛ ФИКТИВНИ СТАНОВИ, МУ УПЛАТИЛЕ 115.754 ЕВРА Истрага против скопјанец за измама на двајца кумановци appeared first on plusinfo.mk.

Продажниот салон, или т.н. „Showroom“ се наоѓа во Градскиот трговски центар на првиот кат и веќе е достапен за сите заинтересирани граѓани секој работен ден од 10 до 18 часот.

Во присуство на медиумите и останати гости, инвеститорот детално го презентираше целиот комплекс „Гранд Скопје“, како и предностите за живеење во станбено-деловниот објект „Гранд Ривер“ кој е во моментов во градба и од каде всушност започнува и продажбата.

Леонид Антиќ: Се гради согласно највисоките архитектонски стандарди и нормативи за градење енергетски ефикасни објекти

– „Гранд Ривер“ претставува модерен станбено-деловен објект кој содржи три нивоа под земја, приземје и дваесет ката, а се гради согласно највисоките архитектонски стандарди и нормативи за градење енергетски ефикасни објекти – изјави Леонид Антиќ од МГ Фешн, додавајќи дека објектот е дизајниран да овозможи максимален комфор на идните корисници, како и целосно искористување на погледот и природната светлина, како кон реката Вардар, така и кон планината Водно.

Тој објасни дека објектот „Гранд Ривер“ како дел од комплексот „Гранд Скопје“ нуди атрактивни придобивки за неговите идни станари, поволност да имаат сѐ на дофат на рака, модерна шопинг галерија во централниот дел на комплексот, но и простор за одмор и релаксација во строгиот центар на градот, кој го обезбедува софистицираниот урбан парк кој ќе биде составен дел од „Гранд Скопје“.

Антиќ потсети дека инвеститорот МГ Фешн во рамки на комплексот предвидува и капитална инвестиција за уредување на јавната површина близу 7.500 м2 со разновидно парковско зеленило, налик на светските урбани паркови, и изрази подготвеност за соработка со Општина Центар за уредување на овој простор.

Продажниот салон ќе биде отворен секој работен ден од 10 до 18 часот

Зад архитектонското решение на „Гранд Скопје“ стојат реномираните архитекти Мартин Пановски и Јана Гугуловска Ѓорѓевиќ од „Радиус архитекти“. Пановски пред присутните истакна и дека создавањето луксузен комплекс во центар на град е голем предизвик и голем творечки поттик за секој архитект. Нивната цел, вели тој, била од простор на којшто досега имало едно мртво ништо, да создадат современ, жив и вибрирачки градски простор, полн со енергија својствена на центар на секоја метропола.

– Очекувано, реката сама по себе за нас архитектите секогаш претставува особена инспирација, што се забележува и во обликувањето на објектот „Гранд Ривер“. Но, за нас поголема инспирација беше Градскиот трговски центар, не како појавност туку како концепт – јавна пешачка улица над која се поставени станбено-деловни кули. Затоа креиравме комплекс кој се состои од јавна пешачка трговска улица низ која доаѓате до голем јавен простор (планираниот урбан парк), со продори кон кејот на Вардар и кули ориентирани кон Вардар и Водно – додаде Мартин Пановски, еден од авторите на проектот „Гранд Скопје“ во однос на инспирацијата за овој проект.

Мартин Пановски: Целта ни беше од простор на којшто досега имаше едно мртво ништо, да создадеме жив и вибрирачки градски простор

Од самиот почеток на градбата на комплексот „Гранд Скопје“, несебична поддршка даваат и жителите на Ново Маало, на чии имоти всушност се предвидува овој комплекс и чии претставници беа исто така присутни на денешниот настан.

Во отсуство на архитектот и генерациски скопјанец Владимир Пота, кој воедно е и сопственик на имот во Ново Маало, беше прочитан и извадок од негов текст, во кој тој комплексот го нарекува новиот Downtown на Скопје кој непоколебливо ќе биде создаден во 21. век во новото столетие на главниот град.

Пота вели дека овој нов „Downtown“ во својата комплетност ќе ги содржи сите атрибути кои му припаѓаат како современ, административно деловен, станбен центар, кој ќе го дефинира и конечно, артикулира просторот кој денес го нарекуваме „паркингот пред Холидеј Ин“ и супстандарното Ново Маало.

The post ПОЧНА ПРОДАЖБАТА НА СТАНОВИ ВО „ГРАНД СКОПЈЕ“ Нов „Downtown“ ќе никне врз супстандарното Ново Маало (ФОТО) appeared first on plusinfo.mk.