Премиерот Христијан Мицкоски очекува успешно завршување на процесот за наоѓање нов сопственик на Алта банка АД Битола и продолжување на нејзиното функционирање, оценувајќи дека тврдењата на опозицискиот СДСМ за нејзино пропаѓање се невистинити. Во однос на тврдењата дека постои неизвесност и околу тоа дали банката располага со готовина, тој ги повика граѓаните да проверат во филијалите дали можат да ги подигнат средствата што им припаѓаат.

Одговарајќи на новинарско прашање за обвинувањата на СДСМ дека Алта банка ќе пропадне, како и за нивните тврдења дека се доведува во прашање расположливоста на готовина во банката, Мицкоски по пуштањето во употреба на детската градинка „Лавче“ во Инџиково во општина Гази Баба, рече дека граѓаните треба внимателно да ги разгледуваат пораките што доаѓаат од опозициската партија, бидејќи, според него, досегашното искуство покажало дека тие не се точни.

– Да, можеби треба да внимаваме на сите оние пораки кои што доаѓаат од опозицискиот СДСМ бидејќи искуството досега вели дека без исклучок сè е невистина. Тргнете наназад од тоа дека ќе банкротираме, преку мигрантите, па сè до овој случај на Алта банка – изјави Мицкоски.

Тој оцени дека СДСМ се обидува да ги пренесе сопствените стравувања врз граѓаните, користејќи, како што рече, негативни сценарија и хорор-соништа.

– Јас сум свесен дека кај нив Фројд работи дури и додека сонуваат и се обидуваат овие хорор-соништа, коишто ги сонуваат, да ги пренесат на граѓаните. Но имам чувство, често пати се повикувам на моите чувства, дека нивниот сон нема да биде реалност, односно јаве и дека тоа што го работиме и тоа што го разработивме изминатиов период ќе резултира со нов сопственик на Стопанска банка Битола и дека сè ќе биде онака како што треба – рече премиерот.

Како доказ дека процесот се движи во посакуваната насока, Мицкоски го посочи континуираното укинување на мерките што биле воведени на почетокот на постапката.

Во однос на прашањето дали во Алта банка има доволно готовина за исплата на клиентите, Мицкоски рече дека не може лично да даде одговор бидејќи нема сметка во таа банка. Наместо тоа, ги повика новинарите и граѓаните да се обратат во некоја од филијалите и директно да ги прашаат клиентите што ги подигнуваат своите средства.

– И дали имало кеш или нема кеш, јас ве повикувам да појдете во некоја од филијалите, да ги прашате граѓаните коишто одат таму и коишто го подигнуваат тоа што им припаѓа, да ги прашате нив дали има кеш или нема кеш. Јас не можам да одговорам бидејќи немам сметка во Алта банка АД Битола – изјави Мицкоски.

The post ПРЕМИЕРОТ ОЧЕКУВА УСПЕШНА ПРОДАЖБА НА АЛТА БАНКА АД БИТОЛА Тоа што постојано се олеснуваат мерките е добар знак appeared first on plusinfo.mk.