Сојузот на синдикатите и работодавците да седнат на преговарачка маса и да се договорат за минималната плата. Она што ќе го договорат, Владата ќе го прифати, истакна денеска заменик-министерот за економија и труд, Марјан Ристески.

Тој нагласува дека до тогаш важи постојната формула од трипартитниот договор од  2022 година.

-Владата е за покачување на минималната плата, но врз база на реални параметри кои се актуелни во економската состојба и ситуација во Македонија. Она што ние го застапуваме како став е да се договорат, бидејќи најголемиот товар ќе оди на приватниот сектор каде се 600.000 вработени. Треба да седнат и она што ќе го договорат синдикатите и работодавците, Владата ќе го прифати. Владата е работодавец на околу 100.000 вработени во администрацијата. Да нагласам, сѐ додека не се договорат важи постојната формула што е вклучено во Законот за минимална плата што ја договориле на трипартитен договор токму овој репрезентативен синдикат, Организацијата на работодавачи и тогашната Влада во 2022 година – рече тој.

Според Ристески, Оперативниот план за вработување, главно млади лица, даде одлични резултати, а годинава стартува порано, од март. Потенцира дека повеќе пари се насочуваат во поатрактивните дејности.

-Лани оперативниот план од 40 милиони евра даде големи резултати со реализација на 90%. Годинава се предвидени повеќе средства за многу поатрактивни мерки каде најмногу од парите ќе бидат насочени. Очекуваме преку 16.000 лица, од кои претежно млади, невработени до 29 години, да го искористат правото и со овие активни мерки да се вработат во текот на оваа година. Оваа година, за разлика од лани, оперативниот план ќе биде ставен во функција уште од март. Ги повикувам младите да ги користат овие мерки – рече Ристески.

Ристески најави дека повеќекратно ќе се зголемат казните за трговците кои не го почитуваат Законот за нефер трговски практики од сегашните 20.000 евра.

– Направени се голем број контроли од КЗК, откриени се поголеми неправилности. Има отворено 30 предмети, а се контролира и Законот за заштита на потрошувачите. Досега се изречени казни во висина од околу 200.000 евра што сметаме дека е многу малку. Инсистираме да има промени во казнената политика и зголемување на казните и очекуваме сегашните казни од 20.000 евра повеќекратно да се зголемат, дури и по 200.000 евра и освен трговците, да бидат казнети и добавувачите. Со зголемувањето на казните, ќе имаме уште поголема контрола на цените – објаснува Ристески.

Заменик-министерот нагласи дека по два месеца се очекуваат ефектите од Законот за работно ангажирање лица, кој стапи во сила со почетокот на годинава. Најави дека наскоро ќе почне кампања со која бенефитите од Законот ќе бидат претставени пред фирмите во сите градови.

– Законот за работно ангажирање лица е за сузбивање на сивата економија. Опфатени се три дејности: угостителството, земјоделството и услужните дејности и очекуваме да даде добри резултати, па со законот да бидат опфатени и други дејности. Очекуваме да бидат опфатени околу 15.000 лица кои ќе бидат работно ангажирани. Официјална промоција на Законот ќе имаме на 3 февруари. Ќе имаме и кампања низ цела Македонија и на лице место на сите работодавци ќе им биде објаснето како полесно да го искористат овој закон – рече Ристески.

Посочи дека годинава е зголемен младинскиот додаток од 3.000 на 5.000 денари за млади до 23 години кои ќе бидат ангажирани во производните дејности.

-Вкупната вредност на парите предвидени за младински додаток се 210 милиони денари, а исплатата ќе биде преку Агенцијата за вработување. Ги повикувам сите заинтересирани, производни капацитети во Македонија, фирми, кои сакаат да ангажираат млади, да ги вработат. Покрај платата, ќе го добиваат и овој младински додаток, сега од 5.000 денари. Досега, од 2020 година, овој младински додаток го имаат искористено околу 19.000 млади лица во Македонија, просекот годишно е над 3.000 лица, а сега, со зголемување на додатокот, очекуваме над 3.500 млади да работат во производните дејности – рече Ристески.

The post СИНДИКАТИТЕ И РАБОТОДАВАЧИТЕ ДА СЕДНАТ И ДА СЕ ДОГОВОРАТ ЗА МИНИМАЛЕЦОТ Ристески вели – додека не се договорат минималецот ќе се исплаќа по закон appeared first on plusinfo.mk.

Како сезонски работници можат да работат студенти, пензионери, невработени лица, корисници на социјална и друг вид помош без да ги изгубат правата на стипендија, старосна и семејна пензија, како и надоместокот за невработеност и за социјална заштита.

Ова го предвидува Предлог законот за ангажирање лица, кој во Собранието го доставија група пратеници од ВМРО-ДПМНЕ и од СДСМ. Законот треба да придонесе за формализирање на непријавената работа и за унапредување на владеењето на правото.

Според овој предлог закон во земјоделството, шумарството, рибарството ќе можат да се ангажираат сезонски или привремени работници за: подготовка на земјиште, садење, сеење, жнеење, наводнување на земјиште, заштита на растенија, управување со земјоделски машини (трактор, комбајн и др.), обрежување, пресадување и проретчување, кастрење/стрижење, пасење, нега на стока и друг работи во сточарството, берење зрнести плодови, берење јаболчести плодови, берење јаткасти плодови, берење и наводнување градинарски култури, берење тутун и др. хортикултура, собирање диви плодови, калемење, сечење стебла, уништување штетници, чистење, лупење, сортирање, пакување, складирање, работи поврзани со одгледување, негување, грижа и користење на шумите.

Во секторот објекти за сместување и сервисни дејности за храна: шанкер/бармен, келнер, готвач, собар, мијач на садови, доставувач на храна, аниматор, хостеса.

Домаќинствата ќе можат да ангажираат сезонски работници за: чување деца, чување стари лица и чистење, работи поврзани со чистење за потребите на станбени згради – чистење, одржување и поправка.

Сезонскиот работник може да се ангажира непосредно од работодавачот или со посредување на Агенцијата за вработување од евиденцијата на невработени лица, но не и од приватна агенција за вработување.

Според Законот за сезонски работи и привремени работи можат да се вработат студенти, невработени и вработени лица, самовработено лице, корисник на семејна и старосна пензија, корисник на социјална со исклучок на корисници на семејна пензија по основ на неспособност за работа и самостоен живот и странец кој има регулиран престој согласно закон, како и лица помлади од 18 години кои согласно општите прописи од работните односи ги исполнуваат условите за засновање на работен однос.

Домаќинството, угостителот или земјоделецот може да ангажира лица за вршење работа од сезонска или повремена природа најмногу до 120 дена во текот на календарската година при што се бројат само деновите кога има работно ангажирани лица.

Исто лице за сезонски работи може да се ангажира најмногу до 60 дена, додека за повремена работа може да се ангажира последователно или со прекин најмногу до 15 дена во еден месец или најмногу до 60 дена во календарската година.

Со законот се забранува ангажирање на лице кое е во работен однос кај тој работодавач за вршење дополнителна или друг вид работа од сезонска или повремена работа.

Еден сезонски работник може да биде ангажирано кај повеќе работодавачи при што неговото вкупното работно ангажирање не може да биде повеќе од 12 часови во текот на денот.

Работодавачот може истовремено да ангажира најмногу до 10 лица или најмногу до 10% од вкупниот број вработени лица кај истиот работодавач, но не може да ангажира лице кое било вработено кај него во претходната година. За ова е предвиден исклучок, ако претходно вработениот се пензионирал или добил семејна пензија.

Работниците кои се ангажирани како сезонски или привремено можат да работат најмногу 12 часа на ден, односно најмногу 48 часа неделно, со право на паузи, дневен и неделен одмор, согласно општите прописи од работните односи.

Работно ангажираното лице има право на паричен надоместок за работно ангажирање, кој му се исплаќа во паричен износ за секој час на работно ангажирање и кој не може да биде понизок од минималниот основен нето паричен износ по час согласно со овој закон.

Минималниот основен нето паричен износ по час не може да биде понизок од часот кој се пресметува врз основа на минималната плата која министерот за економија и труд, ја објавува во „Службен весник“ согласно со закон.

На паричниот надоместок работодавачот е должен да уплати данок на личен доход, придонес за пензиско и инвалидско осигурување и дополнителен придонес за задолжително здравствено осигурување за случај на повреда на работа и професионално заболување, како и придонес за осигурување во случај на невработеност.

Паричниот надоместок може да му се исплати на работно ангажираното лице на крајот од работниот ден или најдоцна во рок од пет дена по истекот на работниот ангажман и се исплаќа на трансакциска сметка на работно ангажираното лице.

Работниот однос на сезонски и привремено ангажираното лице може да престане ако престанала потребата за ваков вид работници, по барање на ангажираното лице, како и во случаи кога се повредени договорените обврски и поради неизвршување на работните обврски.

Доколку работното ангажирање престане работодавачот е должен на лицето за денот на откажувањето да му ги плати само данокот и придонесите.

Предвидени се и казни за непочитување на одредбите од овој закон.

Агенцијата за вработување ќе треба да воведе регистар за евиденција на работно ангажирање на сезонски и привремени вработувања, а Управата за јавни приходи ќе треба да направи надградба на системот за наплата на даноци и придонеси. И двете институции тоа ќе треба да го направат во рок од 6 месеци од денот на влегувањето во сила на законот.

The post СТУДЕНТИ И ПЕНЗИОНЕРИ ЌЕ МОЖЕ ДА РАБОТАТ БЕЗ ДА ГИ ИЗГУБАТ СТИПЕНДИИТЕ И ПЕНЗИИТЕ Со нов закон ќе се уредува сезонската работа appeared first on plusinfo.mk.