Министерот за здравство Илир Алиу во гостување во „Топ Тема“ на Телма изјави дека првата фаза од реформите во здравствениот систем ќе биде насочена кон стабилизација на примарното здравство, бидејќи дури 70 проценти од пациентите во моментов гравитираат кон Скопје, особено кон кампусот „Мајка Тереза“, иако дел од услугите припаѓаат на примарно или секундарно ниво, стои во соопштението од Министерството за здравство.

Според Алиу, во тек е процесот на регионализација, со фокус на подобрување на онколошките услуги на амбулантско ниво. Тој појасни дека Градската болница е при крај со административните подготовки, со што таму ќе може да се нудат онколошки здравствени сервиси без потреба пациентите да патуваат до Скопје.

– Во КБ Битола онколошката служба веќе функционира, а исти подготовки се прават и во КБ Тетово. Сме многу внимателни, мора да се дефинира и финансискиот момент за секоја установа и услуга. Во Битола веќе имаме три медицински сестри и еден физичар кои шест месеци ќе работат на Клиниката за онкологија во Скопје за да се вратат назад и да опслужуваат терапија – рече министерот.

Во однос на меморандумот за соработка со приватните здравствени установи, кој се потпишува за првпат, Алиу изјави дека системот веќе функционира и дека приватните и јавните здравствени работници заедно нудат услуги без застои.

– Според системот на ДРГ, граѓаните и досега можеа да избираат каде ќе се лекуваат – во приватна или во јавна установа – но тоа не е доволно. Ако примарното здравство не може да ја даде услугата која е дефинирана во здравствената патека, средствата нема да се префрлат таму, туку ќе го следат пациентот и институцијата каде навистина ги добил услугите – нагласи Алиу.

The post ГОЛЕМИ ПРОМЕНИ ВО ЗДРАВСТВОТО Новиот систем ги спојува приватните и јавните лекари appeared first on plusinfo.mk.

Министерот за здравство Азир Алиу утрово одржа состанок со интерната комисија задолжена за изготвување прелиминарна анализа на кардиолошките и кардиоваскуларните интервенции во здравствените установи во државата. На состанокот присуствуваа и заменик-министерот, Јовица Андовски и директорот на Фондот за здравствено осигурување, Сашо Клековски, соопшти Министерството за здравство.

Комисијата е формирана со цел собирање, обработка и анализа на податоци, со посебен фокус на периодот од 2022 до 2025 година во приватните и јавните здравствени установи.

– Очекувам комисијата да испорача резултати, кои се објективни и произлегуваат од максимално професионално и независно спроведен процес. Резултатите од работата ќе бидат важни од аспект на реално утврдување на состојбите и поставување цврста основа за унапредување на менаџирањето во здравството – порача пред членовите на комисијата министерот Азир Алиу.

Интерната комисија е составена од врвни екперти во областа, правници и економисти, меѓу кои д-р Васил Папестиев од Клиника за кардиохирургија, д-р Билјана Зафировска и д-р Иван Василев од Клиника за кардиологија, д-р Мишел Андонов и д-р Илир Вела од Клиника за торакална и васкуларна хирургија, д-р Ненси Лозанче од Клиничка болница Битола, д-р Валон Асани од Клиничка болница Тетово, д-р Никола Христов од Клиника „Жан Митрев“, д-р Жарко Христовски од „Аџибадем Систина“, како и претставници од ФЗОМ (д-р Ана Митевска и д-р Жаклина Крстевска), Стефанка Петковска, правник и претставници од Министерство за здравство (д-р Александар Митов, Стојанчо Стојковски и Бахар Љама).

Истовремено, Министерството за здравство испрати допис до јавните здравствени установи да достават податоци за вкупниот број извршени процедури и операции за периодот јануари 2022 – август 2025 година за извршени интервентни кардиолошки процедури, како што се коронарографии и стентирања, васкуларни ангиографии и кардиохируршки/васкуларни операции.

Процесот ќе биде максимално транспарентен. Наодите од анализата на интерната комисија ќе бидат во најскоро време доставени до стручната комисија составена од странски експерти, а извештајот од интерната комисија ќе биде објавен на веб страницата на Министерство за здравство.

The post СРЦЕВИТЕ ОПЕРАЦИИ ПОД ЛУПА Алиу очекува објективен и независен извештај од комисијата appeared first on plusinfo.mk.

Голема врева се крена по реакцијата на Клиничката болница „Аџибадем Систина“ на изјавата на проф. д-р Сашко Кедев дека „приватни институции, болници“ вршат „непотребни интервенции, коишто се профитно ориентирани“.

Кардиологот Кедев ова сериозно обвинување го кажа во емисија на радиото Канал 77, зборувајќи главно за наводно непотребни стентирања и кардиохоруршки интервенции. За волја на вистината, болницата „Аџибадем Систина“ не беше спомната од страна на Кеедев – тој не посочи ниту една конкретна здравствена установа или лекар – но во емисијата водителот ја спомна токму оваа болница.

„Аџибадем Систина“ остро ја осуди „содржината и пораката на ваквиот јавен настап“ и од д-р Кедев побара да прецизира на која болница мисли и најави тужба ако тоа не се случи.

БОЛНИЦАТА „АЏИБАДЕМ СИСТИНА“ НИКОГАШ НЕ ИЗВРШИЛА ХИРУРШКА ИНТЕРВЕНЦИЈА БЕЗ ЈАСНА МЕДИЦИНСКА ИНДИКАЦИЈА Д-р Кедев да каже на која „приватна болница“ мисли кога обвинува

По ова, попладнево се огласи Министерството за здравство и најави инспекциски надзор во приватните болници.

ИТЕН НАДЗОР ВО ПРИВАТНИТЕ КЛИНИКИ ПО ТВРДЕЊАТА НА Д-Р КЕДЕВ ЗА НЕПОТРЕБНИ ОПЕРАЦИИ Министерството апелира да се избегнуваат генерализации и сензационализам

Вечерва агенцијата МИА објави вест, според која д-р Кедев изјавил дека тужбата, што претходно му ја најави Клиничката болница „Аџибадем Систина“, доколку не прецизира во која приватна болница се врши непотребно стентирање за профит, „ќе биде можност конечно да се види што навистина се случува во македонското приватно здравство“.

– „Аџибадем Систина“ силно ја поддржува иницијативата на проф. д-р Сашко Кедев и го поттикнува јавно да соопшти во кои приватни клиники или поликлиники можеби, во Скопје или во други градови во земјата, се вршат, како што вели тој, непотребни интервенции. Добро е што Министерството за здравство најавува надзор, а посебно е важно тоа што д-р Кедев изразил спремност да проговори отворено. Нашата клиника, во сите изминати 25 години, никогаш не извршила хируршка интервенција без јасна медицинска индикација и не е случајно тоа што секоја година имаме 20.000 нови пациенти. Со тоа портфолио и со такво реноме, ние застануваме зад иницијативата на д-р Кедев – велат одговорните во „Аџибадем Систина“.

Што се однесува до најавата за тужба, од „Аџибадем Систина“ велат:

– Како и во нашата првична реакција, така и сега потсетуваме дека во спорната емисија беше спомната нашата клиничка болница, иако д-р Кедев не прецизираше на кого мисли. Затоа и побаравме тој да проговори директно и отворено, бидејќи тоа е најдобриот начин и тој лично да го сочува својот висок професионален углед, што ние искрено го почитуваме. Паушалните изјави ќе го загрозат и неговото реноме, како што го повредуваат и угледот на нашата клиничка болница, спомната во контекст на овие изјави. Д-р Кедев вели дека има докази за она што го тврди, ние силно веруваме во тоа и очекуваме јавно да ги соопшти.

Денеска, откако првичната возбуда веќе е стивната, на потег се д-р Сашко Кедев и Министерството за здравство. Доколку навистина во Македонија се вршат непотребни хируршки интревенции заради профитирање, редно е тоа да се потврди со аргументи и со докази, а јавноста за тоа да се извести благовремено.

The post Д-Р КЕДЕВ Е СПРЕМЕН ДА ЗБОРУВА ОТВОРЕНО, „АЏИБАДЕМ СИСТИНА“ ЈАВНО ГО ПОДДРЖУВА Време е да се каже и да се докаже кој врши непотребни хируршки интервенции appeared first on plusinfo.mk.

Идејата е во овој објект да се обезбедат 100 кревети, пет доктори, 30 медицински сестри, 10 болничари. Кадарот ќе го обезбедат „Аџибадем Систина“ и Клиниката „Жан Митрев“ со по 40 отсто, а болницата „Ре-медика“ ќе учествува со 20 отсто.

Се разговара за начинот на кој Фондот за здравствено осигурување ќе го компензира трошокот за лекувањето на пациентите кои ќе се сместуваат во овој објект иако однапред е јасно дека компензацијата нема да биде доволна за да се покријат сите трошоци за да се обезбеди врвна нега што значи дека приватните болници на некој начин ќе го донираат лекувањето на пациентите со ковид-19.

Во старата зграда на „Систина“ се планира итно за неколку дена да се обезбеди греење и централен довод на кислород до секој кревет, како и рендген апарат, ЕКГ апарат и друга опрема, што претставува сериозна инвестиција, која најверојатно ќе ја поднесат приватните болници. Благодарение на тоа, пак, земјава ќе добие уште една врвна Инфективна болница.

Министерот Филипче вчера соопшти дека имал конструктивна средба со сопствениците на приватните болници „Аџибадем Систина“, „Жан Митрев“ и „Ре-медика“.

„Приватните болници изразија позитивен став во однос на користење на нивните ресурси од страна на државата за справување со пандемијата. Со оглед на тоа што за првпат државата заедно со приватните здравствени институции треба да направи реорганизација за справување со ковид кризата во време на пандемија, дополнителни прецизирања на условите, начинот на користење на ресурсите на приватните здравстевени установи ќе бидат договорени на следниот состанок закажан за в недела. Дотогаш на формализирање на соработката работат тимовите од Министерството и приватните болници“, соопшти вчера Филипче.

Претходно, Клиниката „Жан Митрев“ соопшти дека се става на располагање во ковид-битката, но дека во клиниката нема слободни кревети и има листа на чекање, која секојдневно се зголемува.

Според Законот за управување со кризи, член 33, во прогласена кризна состојба Владата управува со државните, но може да побара да управува и со приватни ресурси и ресурси во сопственост на граѓаните. Според Ставот 3, „Дневниот надоместок за користење на ресурсите изнесува до 30% од просечната месечна нето плата по работник во Републиката објавена од Државниот завод за статистика во месецот пред давањето на ресурсите, а надоместокот за нивно оштетување или уништување не може да биде помал од пазарната вредност на средството, што истото ја имало во времето кога е оштетено или уништено, определена врз основа на елементите со помош на кои според обичаите во зависност од времето и местото на пазарот се утврдува пазарната цена“.

Во Ставот 5 од истиот член се додава дека „Поблиски прописи за видот на ресурсите, за начинот на водењето на евиденцијата и за поблиско определување на висината на надоместокот за нивно користење, оштетување и уништување донесува Владата.“

The post Приватните болници и Филипче најдоа решение: старата „Систина“ ќе стане нова инфективна болница со 100 кревети appeared first on plusinfo.mk.

Поради лошата епидемиолошка слика во Солун и исполнетите државни болници, Министерството за здравство на Грција, принудно презема две приватни клиники и ги става комплетно во функција на државата, врз основа на соодветниот закон изгласан од грчкиот Парламент, јави дописничката на МИА од Атина.

Солунските приватни болници, комплетно, заедно со персоналот, по наредба на државата во следните 15 дена ќе бидат на располагање на националниот здравствен систем.

Одлуката и наредбата доаѓаат откако не беше постигнат взаемно прифатлив договор меѓу Министерството и Здружението на приватни клиники.

Министерството за здравство на Грција вчера, преку итен допис, го повика Здружението, од нивните членови најдоцна до 21 часот синоќа, да побара да одредат и отстапат 200 кревети за лечење на пациенти со ковид-19 во регионалната единица Солун.

Одговорот од Здружението на приватни клиники беше негативен, по што следеше и одлуката на Министерството за здравство за реквизиција на двете приватни болници.

Согласно одлуката објавена во Службен весник на Грција, во следните 15 дена, со двете приватни клиники ќе управува раководителот на државните болници од конкретниот здравствен регион.

Паралелно управата на двете приватни клиники е лишена од било какво право на управување или правно застапување.

Дополнително, министрите за здравство и финансии на Грција ќе го одредат начинот на кој ќе бидат компензирани приватните клиники.

Вчера, во Грција беа регистрирани 3.227 нови случаи на ковид-19, од кои 774 новозаразени се во Солун.

The post Државата принудно презема две приватни клиники од Солун за пациенти со ковид-19 appeared first on plusinfo.mk.

Тој објасни дека самиот Совет за безбедност не може да прогласи кризна состојба, но дека тоа може да го стори претседателот по предлог на членовите на Советот.

– Состанокот ќе биде поврзан со коронавирусот и сите прашања ќе бидат дискутирани, со оглед на тоа што од ден на ден уриваме рекорди со новозаразени. Сите членови на Советот за безбедност, вклучувајќи ги и другите поканети, утре ќе бидат сослушани и ќе биде извлечен заклучок – истакна Марковиќ.

Тој додаде дека национализацијата на приватните болници би се сметала за краен чекор, односно тоа би се презело доколку повеќе не постои друг избор.

– Кризната состојба тоа го дозволува, но тоа ќе наиде на отпор на сопствениците на приватните болници. Најверојатно маргината на профит која тие ја остваруваат е огромна, но тоа е и поентата на приватниот сектор. Национализирање на приватните болници би било нешто крајно, ако нема друг излез. Тоа е и политички ризична одлука, им навлегувате во приватната сопственост. Мислам дека тоа премиерот го спомна повеќе од педагошка функција, за приватните болници да имаат почовечен однос – посочи Марковиќ.

Синоќа премиерот Зоран Заев ги коментираше цените за лекување во приватните болници и рече дека не може да прифати дека 12.000 евра чини лекување со трансплантација на крвта во некоја здравствена институција.

– И што ако имаше вонредна состојба, па да одевме на национализација во овој период? Не ми е својствено дека трошоците се 12.000 евра. Тоа го слушам, не сум го проверил, но во вонредна состојба здравствениот систем мора да биде еднаков за сите, за да нема вакви дисонантни појави – рече Заев во интервју за ТВ 21.

Премиерот кажа дека сѐ што има во приватните клиники го има и во јавниот здравствен систем.

– Ако некој има вишок пари, бујрум, нека оди, тоа се лиценцирани компании, здравствени установи кои работат за профит. Ние како држава не работиме за профит. Трансплантација на крв има на Инфективна клиника, „ремдесивир“ има на Инфективна и се дава по шаблон според упатствата од Светската здравствена организација. Здравствените работници прават сѐ што можат. Јас разбирам дека граѓаните се веќе нервозни – рече Заев, коментирајќи ги апелите и коментарите на социјалните мрежи.

The post Марковиќ: Утре ќе разговараме за прогласување кризна состојба, национализирање на приватните болници само ако нема друг излез appeared first on plusinfo.mk.

Одлуката ќе важи додека трае вонредната состојба во земјава.

– Фондот за здравственото осигурување ќе склучи договори со овие институции со кој ќе се утврдат обемот и видот на здравствените услуги кои приватната здравствената установа ќе ги врши во периодот на важењето на оваа Уредба, согласно прописите од областа на задолжителното здравствено осигурување, соопшти владината прес-служба.

The post И приватни болници ќе вршат интензивна нега и терапија на пациенти со корона вирус appeared first on plusinfo.mk.