Економските показатели во одредени сектори конечно покажуваат позитивни резултати. Ме радува тоа што по долго време податоците за домашниот бруто производ (БДП) покажуваат дека приватниот сектор е главниот двигател на економскиот раст во нашата земја, со особено значајно учество на градежништвото и земјоделството, изјави министерката за финансии Гордана Димитриеска-Кочоска.

Таа нагласи дека растот денес не зависи од јавната потрошувачка, туку од активностите и инвестициите на приватните компании.

– Она што посебно ме радува и охрабрува е фактот дека приватниот сектор создава нови можности, инвестира во развој и ја стимулира продуктивноста на економијата. Градежништвото бележи забележителен раст, кој директно влијае на инфраструктурниот развој, а земјоделството, после долги години негативни резултати, покажува позитивна динамика два последователни квартали. Ова јасно покажува дека сме на правилната патека и дека остваруваме резултати согласно она што како влада сме го планирале – рече Димитриеска-Кочоска.

Според неа, и покрај предизвиците во јавниот сектор и пазарните ограничувања, приватните компании продолжуваат да ја стимулираат економијата, придонесувајќи за стабилноста и одржливоста на БДП.

– Особено ме радува што растот сега го генерира приватниот сектор, кој е моторот на економијата, а не јавната потрошувачка, како што тоа беше случај во минатото – рече Димитриеска-Кочоска.

Министерката истакна дека Владата останува посветена на создавање услови за понатамошен развој на приватниот сектор.

– Ќе продолжиме да поттикнуваме бизнис средина, да вложуваме во инвестиции, иновации и нови работни места и да ја одржуваме фискалната дисциплина. Приватниот сектор, особено градежништвото и земјоделството, покажуваат дека се основниот двигател на економскиот раст и ние ќе продолжиме да ги поддржуваме со конкретни мерки и стратегии. Очекуваме дека оваа позитивна динамика ќе продолжи и во следните квартали, а Владата ќе остане фокусирана на зацврстување на економските основи, поддршка на бизнисите и создавање поволна клима за инвестирање – рече Димитриеска-Кочоска.

Таа подвлече дека овие податоци за приватниот сектор се поттикнати и од поддршката која ја добија компаниите од унгарскиот кредит кој се реализира преку Развојната банка.

The post ЕКОНОМСКИОТ РАСТ ГО НОСИ ПРИВАТНИОТ СЕКТОР Позитивни трендови бележат градежништвото и земјоделството appeared first on plusinfo.mk.

За време на 7-годишно владеење на СДСМ просечниот раст на БДП беше 1,6%, а Владата на ВМРО-ДПМНЕ за една година успеа растот на БДП да го донесе на повеќе од 3%, изјави министерката за финансии Гордана Димитриеска Кочоска во гостување во поткастот „ВМРО-ДПМНЕ зборува”.

Таа рече дека и самата била изненадена од постигнатите бројки.

– И морам да признаам дека мое огромно позитивно изненадување ова се бројки кои и јас не ги очекував. Ако се вратиме наназад кога го подготвувавме ребалансот на буџетот, нашите проекции беа дека стапката на раст за 2024 година ќе биде 2,1%, а завршивме со 2,8%. Имаше причина зошто е тоа така. За првиот квартал за 2024 година растот беше 1.9% и тоа е еден период пред распишување на избори, кој беше комплетно одговорност на претходната влада и кој самиот по себе покажуваше дека навистина ништо не работат. Вториот квартал им беше нешто подобар. Третиот квартал, со преземањето на власта, веќе БДП забележуваше повисоки стапки на раст, за да првиот квартал од 2025 го завршиме со 3% односно 3,2% доколку го исклучиме сезонскиот карактер. Клучен е моментот зошто го напоменувам сезонскиот карактер, затоа што кога ќе го исклучите сезонскиот карактер односно она кое во ад хок во дадени моменти заради сезоната влијае, ние имаме дури и повисок раст односно 3,2%, што укажува веќе три квартали по ред стабилна состојба – рече таа.

Димитриеска Кочоска рече дека двоцифрениот раст на бруто инвестициите е резултат на тоа што приватниот сектор ѝ верува на Владата и затоа инвестира.

– Очигледно е дека довербата на приватниот сектор кон Влада е огромен, како резултат на тоа се инвестира. За мене нешто кое што многу ме радува е растот на бруто домашните инвестициите којшто е веќе двоцифрен. Тоа е резултат меѓу другото и на позитивната економска клима која владее меѓу приватниот сектор. Дополнително на тоа имаме и поддршка којашто ја дадовме во форма на кредити со ниски каматни стапки, а во исто време оние 250 милиони евра проекти годинава и минатата година околу 75 милиони евра. И сето тоа направи на некој начин да има поголем оптимизам во приватниот сектор – рече Димитриеска Кочоска.

Таа рече и дека економските индикатори покажуваат дека економијата се стабилизира.

– Исто така ме радува и тоа што и градежниците гледаат голем оптимизам во градежниот сектор, имаме раст од 7.1%. Исто така за мене е многу значајно, пред некој беше објавено од страна на Државниот завод за статистика, тоа е втор месец по ред позитивен раст на индустриското производство, нешто кое со месеци наназад беше во негатива или позитивна нула. Сега имаме јас би рекла и висока стапка на индустриското производство. Исто така и извозот, после 7 квартали во континуитет негатива се забележува позитива- рече Димитриеска Кочоска.

Според неа, овие индикатори укажуваат дека има позитивно расположение во економијата и тоа доведува до стапка на раст на БДП повисока од  3%.

– Очекувам веќе во вториот квартал да биде стапката на раст и повисока. Значи сигурно некако ја зацврстуваме онаа проекција од 3,7% раст на БДП за оваа година во однос на претходната – рече Димитриеска Кочоска.

The post ЗА ЕДНА ГОДИНА ВМРО-ДПМНЕ ОБЕЗБЕДИ ЕКОНОМСКИ РАСТ ОД 3% За 7 години владеење на СДСМ просекот на раст изнесуваше 1,6%, вели Димитриеска Кочоска appeared first on plusinfo.mk.

Потпретседателот на Сојузот на синдикати за приватен сектор, Иван Пешевски, ја истакна потребата од подобрување на работничките права во приватниот сектор и ги повика работниците да се приклучат на Првомајскиот протест. Клучните барања на синдикатот се повисоки плати, безбедни услови за работа и почитување на законските права.

-Приватниот сектор во Македонија е главен двигател за економската состојба на државата. Приватниот сектор е нешто што мора веднаш да се подобри со квалификуван кадар и млади луѓе. Но, за овие две работи потребни се достоинствени односно безбедни услови за работа и повисоки плати. Повисоки плати не се 500 евра плата туку 500 евра минимална плата која ќе се множи со коефициентот на сложеност за да платите во овој сектор надминат 50 и 60.000 денари. Онолку колку што минимум треба да земаат вработените во приватниот сектор особено вработените во трудо-интензивните дејности – рече тој.

Нивното барање, како што дополни, се однесува на сите работодавачи од приватниот сектор.

– Особено оние кои пред некој ден се изјаснија дека недостасува кадар во државата. Уште повеќе ќе недостасува доколку не зголемите плата. Со сета почит кон одредени работодавачи исто од приватниот сектор кој почитуваат и Закон и колективен договор па овие проблеми се одамна надминати но тоа е сосема мал процент од вкупниот број вработени – дополни Пешевски.

Тој рече дека  ССМ активно работи на правна заштита на работниците, и информираше дека во текот на 2024 година, бесплатна правна помош и заштита добиле над 12.000 работници.

Пешевски потенцираше дека синдикатот се соочува со притисоци и напади врз своите членови.

-Во меѓувреме, додека се разгледува барањето на ССМ за бројот на членови и репрезентативност на ниво на држава, пријавени се повеќе напади кон членовите на гранките во ССМ и притисоци за отчленување и фаворизирање на друг синдикат. Нашиот апел е да не се наседнува на ваков тип притисок и членовите самоволно и доброволно веќе оддамна се определиле во кој синдикат ќе членуваат – рече Пешевски.

Протестот е закажан за 11 часот пред Собранието на Македонија, а ССМ повикува Владата и работодавачите да преземат одговорност за моменталната состојба и да овозможат итно зголемување на платите во приватниот сектор.

The post ГАЗДИТЕ ЌЕ ОСТАНАТ БЕЗ РАБОТНИЦИ, АКО НЕ ГИ ЗГОЛЕМАТ ПЛАТИТЕ За синдикатите повисока плата не е 500 евра, туку минималец appeared first on plusinfo.mk.

Претседателот на Стопанската комора на Македонија, Бранко Азески денеска одржал работен состанок со амбасадорот на Европската Унија во Македонија, Михалис Рокас.

На средбата главен фокус на разговорите биле економските перспективи на земјата во контекст на евроинтегративниот процес, можностите за забрзување на процесот и подготвеноста на македонската економија да заземе активна улога во исполнување на критериумите и обрските кои произлегуваат од истиот.

Како што соопштија од Стопанската комора на Македонија, Азески го запознал Рокас со моментните економски состојби во државата, чекорите кои Стопанската комора ги презема за подготовка и јакнење на конкурентноста на нашите компании, со цел да бидат подготвени за ЕУ пазарите и усогласување со ЕУ законодавството, вклученоста на Комората во регионалните иницијативи и соработката со ЕУ институциите.

-Бизнис-заедницата е подготвена да ги прифати неопходните реформи, но за нивна успешна имплементација е потребна предвидлива бизнис-клима и силна поддршка од институциите. Приватниот сектор има клучната улога во процесот на пристапување кон ЕУ и затоа ЕУ е и останува клучен партнер за македонскиот бизнис, нагласил Азески.

Во разговорот амбасадорот Рокас истакнал дека е потребна политичка храброст за Северна Македонија да продолжи напред, но посочил дека го охрабрува фактот што бизнис-секторот го поддржува евроинтегративниот процес и најави дека во иднина приватниот сектор ќе биде еден од клучните двигатели.

На состанокот, на кој присуствувал и генералниот секретар на Коморскиот Инвестициски Форум( ЗБ6-КИФ ) Татјана Штерјова Душковска, се отворило и прашањето за активностите на Стопанската комора на регионален план.

„Постои активен дијалог со институциите на ЕУ, и КИФ е вклучен во креирање и имплементација на акцискиот план за заедничкиот регионален пазар“, потенцирала Штерјова Душковска, се наведува во соопштението.

Амбасадорот Рокас ја поздравил иницијативата за креирање на Бизнис- Клуб Европа при Стопанската комора на Македонија, иницијатива посветена на поддршка на македонските компании во процесот на економска интеграција во ЕУ.

„Ова тело ќе функционира како платформа за поврзување на бизнисите со институциите на ЕУ, за спроведување на реформи, усогласување со европските регулативи и подобрување на конкурентноста на пазарот на ЕУ“, се додава во соопштението.

Јадранка Аризанковска, советник за ЕУ интеграции во Комората, на состанокот истакнала дека вклучувањето на амбасадорите на земјите-членки на ЕУ предводени од ЕУ амбасадорот во активностите на Клуб Европа може значително да го зајакне процесот на економска интеграција и да ги подобри можностите за соработка помеѓу македонските компании и ЕУ бизнисите. Амбасадите, посочила, можат да играат клучна улога во поврзувањето, финансиската поддршка и преносот на знаење, што ќе придонесе кон подобра подготовка на македонската економија за пристапување во ЕУ.

The post АЗЕСКИ И РОКАС ЗБОРУВАЛЕ ЗА КОНКУРЕНТНОСТА НА КОМПАНИИТЕ Приватниот сектор ќе биде еден од клучните двигатели на евроинтегративниот процес appeared first on plusinfo.mk.

Претседателот на Стопанската комора на Северна Македонија, Бранко Азески, оствари работна средба со шефот на канцеларијата на Европската банка за обнова и развој (ЕБОР) во С. Македонија, Фатих Туркменоглу.

Разговорите беа фокусирани на новата петгодишна стратегија на ЕБОР за Северна Македонија, која се очекува да биде усвоена напролет следната година.

На состанокот беше истакнато дека стратегијата, каде се дефинира ангажманот на ЕБОР во С. Македонија, останува насочена кон три главни приоритети:

„Поддршка за конкурентноста на приватниот сектор, која ќе се реализира преку подобрување на вредносните синџири, доквалификација на работната сила и зајакнување на владеењето;

Зајакнување на регионалната интеграција преку активности за меко поврзување и приближување на земјата до Европската унија;

Поттикнување на транзицијата кон зелена економија преку одржлива мешавина на извори на енергија и поголема ефикасност на ресурсите“.

Претседателот на Стопанската Комора, Бранко Азески нагласи дека стратешките насоки на Комората се комплементарни со приоритетите на ЕБОР, особено во делот на регионалната интеграција, зајакнувањето на извозните капацитети и спроведувањето на Зелената агенда.

Како клучни примери за заложбите тој ги посочи активностите во рамки на Берлинскиот процес, каде Комората посветено работи на регионалната интеграција со тоа што е на водечките позиции во регионалните здруженија и иницијативи од типот на КИФ ЗБ6 и Асоцијацијата на балкански комори (АБК).

„Дополнително, заложбите на Комората за зајакнување на извозот се материјализираат преку формирање на институции како Националниот совет за извоз, Извозниот институт, како и зајакнувањето на Клубот на извозници внатре во Комората“, се вели соопштението на Стопанската Комора.

На средбата се дискутираше и за предизвиците со кои се соочува приватниот сектор, вклучително прашања како повратот на ДДВ и подготвеноста на компаниите да ги искористат средства од најавениот унгарски кредит.

Досегашните инвестиции на ЕБОР во земјата изнесуваат околу 3 милијарди евра, реализирани преку 196 проекти, додека моменталното портфолио изнесува 1,3 милијарди евра.

The post ЕБОР ЌЕ ЈА ПОДДРЖИ КОНКУРЕНТНОСТА НА ПРИВАТНИОТ СЕКТОР Претседателот на Стопанската комора имаше средба со Фатих Туркменоглу appeared first on plusinfo.mk.

Оваа инцијатива е актуелна повеќе години, а ја прокламира и поранешниот министер за информатичко општество и администрација Дамјан Манчевски, но не успеа да ја спроведе додека беше министер. Неговите наследници ја заборавија и повеќе размислуваа на етничките квоти за вработување во јавниот сектор отколку за пропорционалната и стручната распределба на кадарот во самиот јавен сектор и размената меѓу јавниот и приватниот сектор.

Експерти и синдикати велат дека процесот на премин на кадар од јавен во приватен сектор е почнат, но него не го води владата поткрепена со програма за реализација и помош на компаниите кои се подготвени да го вработат вишокот од јавниот сектор, туку е резултат на индивидуални одлуки на работниците да го променат работното место поради лични причини.

Професорот по трудово право Лазар Јовевски вели дека иницијативата е многу стара, но никако да заживее во практика, поради одредени политики на владите кои придонесоа и во јавниот сектор да недостига кадар иако е превработен како резултат на партиските вработувања на нестручен и неефикасен персонал.

Државата нема намера да го организира преминот на работници од јавен во приватен сектор

– Заминувањето од јавниот сектор повеќе е лично и индивидуално отколку што е организирано со некоја програма. Причините на овие работници да заминат во приватен сектор не секогаш се економски за да се добие повисока плата. Најчесто овие работници не заминуваат поради тоа што во приватниот сектор добиваат подобри услови за работа, туку како резултат на незадоволството од нивниот третман во јавниот сектор. Немањето перспектива да се напредува, изразениот мобинг од раководниот кадар и лица блиски до тој кадар, преоптовареност со работа на одделни професионалци на сметка на неработење на партиски кадри и слично, се само дел од причините поради кои вработени од јавен сектор се одлучуваат да преминат во приватен сектор – вели Јовевски.

Според него, и јавниот сектор има проблем со недостиг на работници, за што причина е непропорционалната распределба на кадарот. Затоа, вели тој, процесот треба да биде планиран врз основа на анализа на состојбата за да не се доведеме да имаме нефункционален јавен сектор преполн со партиски војници.

– Има институции кои се превработени поради партиски вработувања и каде има голема нестручност и преголемо оптоварување со работа на професионалниот кадар кој останал да работи без да биде унапреден или парично награден и други институции каде што нема доволно кадар, од каде што има и најбројни заминувања, со што тие институции стануваат нефункционални. Да го земеме здравството каде што има голем одлив на работници во приватен сектор и во странство поради незадоволството од нерешениот статус, потоа во образованието… Овие сектори од јавниот сектор иако важни остануваат без работници или во нив се вработува нестручен кадар, а тоа има негативни ефекти во општеството. Ова прашање мора да се реши за да имаме функционален јавен сектор и администрација – вели Јовевски.

Што треба да направи државата?

Државата, според него, треба да ја види големата слика на иселување од земјава и да почне да се занимава со спречување на процесот кој е погубен и за нацијата и за државата.

– Земјите кои се во слична состојба веќе реализираат цели програми за сопирање или делумно запирање на процесот на иселување и враќање на дел од иселените. Мерки кои би помогнале во тоа би можеле да бидат и државна помош на компаниите да ги задржат работниците, да се дава бесплатно земјиште на млади, потоа да се помагаат младите, но и постарите генерации кои се иселуваат да дојдат полесно до стан или куќа… Во некои земји се даваат готови куќи или станови, само за да се вратат иселените, а во други, пак, дури 80 отсто од вредноста на станот или куќата ги покрива државата. Има многу мерки кои можат да помогнат да се запре или ублажи процесот на заминување на луѓето и со тоа да се намали недостигот на работници – вели Јовевски.

Почнатите процеси, вели тој, не се запираат со увоз на работници, туку со мерки со кои ќе се сведе на минимум стапката на невработени и ќе се стимулира невработеното население.

– Сè уште имаме висока стапка на невработени, и многу висока стапка на сива економија. Тоа треба да се стави во ред и да се размислува да се направи стратешки план за надминување на проблемот – вели Јовевски.

Моментално никој не поседува информација за бројките на работници од јавен сектор кои се префрлиле во приватен сектор, но сите велат дека процесот е присутен.

Плусинфо побара информација од Министерството за информатичко општество и администрација за бројките и дали планира процесот да го води плански и во договор со бизнис заедницата, но не доби одговор.

Институции остануваат без кадар поради партиските вработувања

Пред крајот на минатата година министерот за финансии Фатмир Бесими изјави дека едвај го задржува кадарот во Министерството бидејќи има големи обврски, многу работа, но е неплатен па затоа заминува во приватен сектор.

– Во Министерството за финансии има голем одлив на кадар. Голем дел наоѓаат работа во други институции. Финансии имаше 700 вработени, а сега се околу 400. Лани 40 луѓе го напуштија Министерствот надвор од тоа што беше планирано со пензионирањето. Доаѓаат раководители на сектори, даваат отказ, едноставно си одат. Многу работа, на друго место добиваат можности за подобри услови. При огласи нема соодветни кадри што се пријавуваат. Мораме да обезбедиме човечки ресурси за да функционира институцијата – изјави тогаш Бесими.

Деновиве и министерката за труд и социјална политика Јованка Тренчевска изјави дека и од нејзиното министерство има одлив на кадар во приватниот сектор.

– Масовно си одат добрите работници од јавен во приватен сектор. Секојдневно си заминуваат и од Министерството за труд и социјална политика. Ние имаме една пријатна комуникација, нема мобинг, така што работниците си заминуваат за поголеми плати. Секаде во светот во јавниот сектор се пониски платите отколку во приватниот, и тоа така треба да биде – рече Тренчевска.

Одат од јавен во приватен сектор за повисока плата

Синдикатите од јавната управа и образованието велат дека тие не располагаат со бројки, но потврдуваат дека има појава на одлив на кадар од јавен во приватен сектор и во странство, а главна причина не се подобрите услови за работа, туку повисоките плати.

– Регистрирани се заминувања на работници од јавниот во приватен сектор и заминувања во странство, но синдикатот на УПОЗ не води таква евиденција. Причините се веќе познатите состојби во секторот – ниски плати, неможноста за унапредување и слично. Платите се фактор кој ги тера овие лица да одат во приватен сектор и покрај тоа што условите за работа и таму не се многу подобри од јавниот сектор – вели Трпе Деаноски, претседател на синдикатот на УПОЗ.

И во образованието е забележана појавата на давање отказ за да се замине во странство, но немаат податок дали некој од нив се префрлил во приватен сектор.

– Имаме регистрирано вработени од образование кои заминуваат во странство со целото семејство. Заминување во приватен сектор речиси и да нема или е сосема мало или незначително. Иселувањето на овој кадар е проблем на кој треба да се работи што е можно побрзо – вели Јаким Неделков, претседател на СОНК.

Премин од јавен во приватен сектор е повидлив кај медицинскиот кадар што се гледа и од податокот дека јавното здравство кубури со кадар. Овој кадар е најприсутен и во бројките на заминати од земјава.

Според статистиките, во земјава има 270 лекари на 100 000 жители, што е за 22% помалку од европскиот просек. Во последните 10 години, секоја година си заминувале околу 200 лекари, број кој е еднаков со годишниот просек на студентите кои завршуваат студии по медицина, што значи дека – колку нови лекари дипломираат, толку лекари ја напуштаат земјава на годишно ниво.

The post ПАРТИСКИТЕ ВРАБОТУВАЊА ИМ СЕ УДРИЈА ОД ГЛАВА Државната работа им се одмили на стручните кадри appeared first on plusinfo.mk.

Како ќе изгледа генералниот штрајк, во кој ќе бидат вклучени сите вработени во јавниот сектор, од управата, правосудството, здравството, комуналните и од другите дејности, ќе се знае утре, по седницата на Советот на Сојузот на синдикатите на Македонија.

Познато е дека овој пат синдикатите нема да се повлечат, ако владата не го исполни ветеното линеарно зголемување на платите од 2.806 денари и не се фати за работа околу деполитизацијата на администрацијата и решавањето на другите проблеми. Новите преговори ќе значат и нови барања на синдикатите за усогласување на платите за 18,4 отсто, колку што беше зголемена и минималната плата.

Синдикатите велат дека состојбата е зовриена по запирањето на процесот на потпишување на Општиот колективен договор за јавната администрација, со кој требаше да се озакони правото на усогласување на платите по новиот износ на минималната плата. Но, наместо потпишување на договорот, синдикалците, во колумна на министерот за финансии Фатмир Бесими, добија најава  дека власта подготвува нов начин на вреднување на работењето на административците.

– Сѐ беше договорено на Економско-социјалниот совет и требаше само да се стават потписите, но по колумната на министерот за финансии, владините претставници се повлекоа ненадејно и нашата комуникација се сведе на пишување телефонски пораки. Состојбата меѓу работниците зовре и со непродолжување на антикризните мерки, кои дополнително, освен ниските плати, го сруши нивниот стандард. Имаме синдикати кои веќе се подготвени да штрајкуваат самостојно, ако ССМ не донесе одлука за генерален штрајк – вели претседателот на синдикатот на УПОЗ, Трпе Деаноски.

Тој најавува дека нивните барања за усогласување на платите по ваквиот потег на владата ќе се променат и наместо линеарни 2.806 денари, ќе бараат 18,4 отсто зголемување на платите колку што всушност беше процентот на зголемување на минималната плата.

– Но, освен новите барања за процентот на зголемување на платите, ние бараме и решавање на проблемот на партизација на администрацијата на сметка на стручноста. Имено, наместо унапредување на стручните административци, врз чиј грб е истурена целата работа во администрацијата, на повисоките позиции и за повисоки плати се ставаат партиски војници кои патем не доаѓаат на работа бидејќи се сопственици на бизниси, ама државата им дава плата. Оваа практика треба да прекине ако се сака да имаме ефикасна администрација. Во делови од администрацијата не се распишуваат огласи за испразнетите работни места, а работата пак ја вршат истите работници за ниски плати – вели Деаноски.

Деаноски очекува поддршка и вклучување во штрајкот и на синдикатите на работниците од приватниот сектор по утрешната седница за донесување на одлука за генерален штрајк  и начинот на кој ќе се одвива.

Дел од синдикатите и во приватниот сектори велат дека  се соочени со барање на членството за штрајк.

– Врие и во приватниот сектор, каде што тешко одат преговорите за усогласување на платите со минималната плата. Во приватниот сектор веќе имаме изедначени плати на повеќе работни позиции што придонесува за незадоволство на работниците. Има барања од синдикални организации за организирање генерален штрајк, но за овој сектор многу потешко може да се оди со оваа опција – вели генерална секретарка на СИЕР, Маре Анчева.

Таа додава дека преговорите со работодавците од приватниот сектор се одвиваат многу потешко отколку за јавниот сектор.

– Ние за 2 или 3 отсто зголемување на платите имаме тешки преговори со работодавците кои најчесто со уцени кон работниците се обидуваат да одбегнат да дадат покачување. Но, со тоа не завршува борбата за правата на работниците – вели Анчева.

Според неа, колку и да се болни преговорите на Владата со ММФ околу новиот заем, не треба да се дозволи први да страдаат работниците и нивното право да добијат достојна плата.

– Знаеме дека преговорите со меѓународните финансиски институции за добивање заем се тешки. Прва реакција на овие институции е да се крати, а каде најбрзо тоа се прави? Кај правата на работниците, односно на нивните плати. Но, со оглед на состојбата во која се сега работниците, не треба да се дозволи сето тоа да се истури на нивниот грб – вели таа.

И претседателот на Синдикатот на градежници, Иван Пешевски, вели дека и во приватниот сектор има незадоволство.

– За приватниот сектор можам да зборувам дека исто чашата е прелеана и луѓето чекаат секојдневно да апелираме и да повикаме на генерален штрајк, бидејќи повеќе не се издржува состојбата. Меѓутоа, со вакво зголемување на платата и тврдење дека имаме непродуктивни работници, или дека ќе ја мериме продуктивноста, а од друга страна се купуваат возила за Владата или има таму помножено по десет непродуктивни трошоци кои тие секојдневно ги трошат на грбот на граѓаните, навистина нема тоа да се дозволи – изјави Пешевски вчера во Охрид.

Од ССМ потсетуваат дека синдикалната кошничка секој месец се зголемува и веќе надмина 38.000 денари, што покажува дека работниците веќе не можат да врзат крај со крај. Посебно оние 112.000 кои земаат со минимална плата од 18.000 денари, тие не можат да го преживеат месецот.

– Ние како ССМ веќе подолго време апелираме да се зголемат платите линеарно за 2.806 денари и како што баравме ние од 1 мај. Зошто? Поради сево ова, знаејќи дека на 31 мај ќе прекине мерката за ограничување на маржите на основните прехранбени производи. Видовме уште ден порано сите трговци на мало и на големо ги коригираа своите цени, сите цени отидоа за плус 10 отсто, Владата како трет социјален партнер не ни излезе во пресрет – изјави вчера претседателот на ССМ Дарко Димовски.

The post ПОВИСОКИ ПЛАТИ, ПРОТИВ ПАРТИЗАЦИЈА НА ЈАВНИОТ СЕКТОР И ЗА НОВИ АНТИКРИЗНИ МЕРКИ Генералниот штрајк нема да биде само чиновнички appeared first on plusinfo.mk.

ВМРО-ДПМНЕ денеска обвини дека владата на СДСМ привидно ја намали невработеноста. Сознанијата на партијата се дека наместо намалување на бројот на невработени дел од нив се бришат од евиденцијата, а голем број од ив ја напуштиле земјата.

– Од почетокот на пандемијата имаме значајно намалување на активното население (збир од вработени и невработени лица), но затоа бројот на неактивните лица значајно се зголемува. Активното население се намалува за 30.251 лица, при намалување на бројот на вработените за 15.830 и на невработените за 14.421. Остатокот од вкупното работоспособно население се неактивните лица чиј број е зголеми за 26.878, што покажува дека лицата кои останале без работа и кои биле невработени и пред кризата, сите се префрлаат во неактивни односно не бараат работа. Затоа стапката на активност од 57,4 отсто во првиот квартал на 2020 година се сведе на 55,7 отсто во последниот квартал на 2021 година, додека стапката на невработеност од 16,2 на 15,2 отсто – велат од ВМРО-ДПМНЕ.

Оттаму се повикуваат на податоци на Евростат за да покажат дека се работи за иселување, наместо за програмско намалување на невработеноста.

– Во 2012 година биле издадени 9 317 работни дозволи од земјите на ЕУ за македонски државјани, во 2019 та година бројот на издадени дозволи е 26 653 или три пати повеќе луѓе отишле да работат во странство затоа што со СДСМ, со Зоран Заев и Ковачевски тие буквално не гледаат никаква иднина во Македонија – велат од ВМРО-ДПМНЕ.

Сознанијата на партијата се дека намалувањето на вработените исклучиво е во приватниот сектор.

– Загрижува фактот што за намалувањето на вработените е забележано исклучиво во приватниот сектор, каде што  бројот е намален за 27.996 лица, додека бројот на вработени во субјекти со друга сопственост е зголемен 12.166 лица. Според ДЗС во друга сопственост влегуваат мешовита, задружна и државна сопственост.Ова зборува дека приватниот сектор со СДСМ на власт умира, се повеќе работни места се затвораат.Со СДСМ имаме само стагнација, затоа потребни се предвремени парламентарни избори час поскоро –велат од опозициската партија.

The post НАРОДОТ СЕ ИСЕЛИ Опозициската ВМРО-ДПМНЕ тврди дека бројката на невработени не е намалена appeared first on plusinfo.mk.

Контрадикторни се некои од изјавите кои ги даваат министерот Венко Филипче и Министерството за здравство во изминатите неколку дена околу измените во Законот за здравствена заштита, а кои се однесуваат на можноста вршење дејности од мрежата од приватни оператори, дејности кои до сега согласно закон можат да ги вршат само јавни здравствени установи, вели во разговор за Плусинфо д-р Злате Мехмедовиќ од Здравствен дом – Скопје, кого го прашавме за измените во Законот за здравствена заштита, дали ќе има приватизација на Итната медицинска помош и дали измените во Законот ќе придонесат за подобрување на нејзината работа.

– Филипче вели дека отпаднал проектот за јавно приватно партнерство на Итната медицинска помош за кој има и физибилити студија. Спротивно на ова, Министерството за здравство имаше соопштение во кое се вели дека „законската измена не ги изложува граѓаните на дополнителни финансиски трошоци, туку напротив амбулантните возила на итната медицинска помош на приватните здравствени установи ќе им бидат ставени на располагање на граѓаните“. Доколку државата обезбеди средства со кои ќе ги покрива трошоците за ИМП на приватните оператори тоа е веќе реално партнерство на јавниот Фонд за здравство со приватните оператори во процесот на давање и купување услуги – вели доктор Мехмедовиќ.

Според него, досега цената на тие услуги наменети за јавната итна медицинска помош не ги покривала во целост ни трошоците за плати на персоналот кои изнесуваат околу 180.000 денари по тим, а дополнителни средства здравствените домови мораат да обезбедат за гориво, одржување на возилата, поправки, тековни технички, административни и медицински трошоци. Тоа е служба која работи со загуба и без корекција на цената на услугите по тим, па Мехмедовиќ не гледа причина за интерес кај приватните субјекти да даваат услуги по така дефинирана цена.

– Филипче вели дека сега не е време за јавно приватно партнерство и јас се сложувам деке сега не време сега за приватен партнер во овој сегмент од здравствениот систем, но би додал дека ни во блиска иднина не треба ни да се помисли на таков чекор. Граѓаните преживеаја тешки две години од оваа пандемија во која издвоија значителна сума пари за лекување од сопствениот џеб, многумина заложија куќи и станови за кредити, си ја потрошија својата заштеда на лекови, болничка дијагностика и третман. Токму од овие причини сметам дека државата не смее да дозволи приватно да се наплаќаат и услугите за Итната медицинска и стоматолошка помош, како и за домашно лекување преку носењето на овие измени во законот за здравствена заштита – истакнува д-р Мехмедовиќ.

Како што вели тој за Плусинфо, во моментов е потребно да се инвестира во кадар со кој ќе се доекипираат службите за ИМП и истиот тој кадар да се стимулира да остане во службата преку создавање квалитетни услови за работа, но и преку финансиска стимулација.

Веста за измените за Законот за здравствена заштита предизвика бурни реакции кај македонската јавност, а измените во моментов се стопирани од опозицијата со околу 2.000 амандмани. Претставниците на владата и на владејачкото мнозинство демантираа дека ќе дојде до приватизација на брзата помош, туку дека со поставување правна рамка ќе се регулираат услугите кои веќе се нудат од приватните болници. Оттаму додаваат дека законската измена не ги изложува граѓаните на дополнителни финансиски трошоци, туку напротив амбулантните возила на итната медицинска помош на приватните здравствени установи ќе им бидат ставени на располагање на граѓаните, односно Итната помош на приватните болници, граѓаните ќе може да ја користат бесплатно.

Министерот за здравство Филипче во текот на минатата недела тврдеше дека нема да има приватизација на брзата помош.

– Вие и сега имате служби за итна медицинска помош од приватни институции. Тоа се „Неуромедика“, „Аџибадем Систина“, „Жан Митрев“, „Никоб“ коишто вршат транспорт. Ние мораме да го регулираме тоа, но овде не станува збор за никаква приватизација. Граѓаните нема да имаат никаков трошок што досега го немале. Ние сега го ставаме во закон, она што со години наназад се случува на терен – рече министерот.

Тој по состанокот на Комисијата за здравство во Собранието имал консултација со пратеничките групи на ДУИ, Левица и ВМРО-ДПМНЕ при што им ги објаснил промените. За во петок е договорено меѓу сите страни во Собрание да биде организирана јавна дебата за сите измени на Законот за здравствена заштита.

Според предложените измени, се создаваат можности во рамки на мрежата на здравствени установи, итната медицинска и стоматолошка помош и домашното лекување, како и земањето и пресадување делови од човековото тело заради лекување, да ја вршат и приватни здравствени установи, покрај јавните здравствени установи, со цел да се воспостави поефективен систем на итна медицинска помош.

The post НА ИТНАТА Ѝ ТРЕБА БРЗА ПОМОШ Работи со загуба, а нема ни кадар доволно appeared first on plusinfo.mk.

– Прашуваме зашто е потребен овој трансфер на веќе обучени административци кога сведоци сме дека во последниве три години се вработени преку 40.000 нови вработени во јавниот сектор, бројка која е далеку поголема од онаа што се прикажува вишок во јавниот сектор. Во последниот период, особено последниот месец, во многу институции се поведуваат многу постапки за дисциплински престап, што само по себе повторно кажува дека целата таа операција е отпочната, но освен ние, другите молчат и го одборуваат тој чин. Тие притисоци почнуваме да ги трпиме и ние самите затоа што тоа не не одминува и нас како синдикални лидери со цел да се направи притисок и врз нас кои јавно и гласно зборуваме за трансферот – истакна претседателот на КСС Благоја Ралповски.

КСС бара наместо парите за овој трансфер да му се даваат на бизнис секторот, да се пренаменат во Фондот за пензиско и инвалидско осигурување и да се донесе законско решение за предвремено пензионирање на сите што имаат полни 60 години, со полн стаж.

Според КСС, со неодамна потпишаниот колективен договор за јавен сектор ќе се легализира овој трансфер на мала врата.

– Предвестие на таа цела операција се неуставниот колективен договор кој е потпишан во последните денови пред распуштање на Собранието, потпишани низа незаконити поединечни колективни договори еден месец претходно, за кои трудовиот инспекторат утврдува дека е прекршен законот за работни односи и бара од надлежните да се постапи по тие укажувања и секако анкетните листови за функционалната анализа кои се противзаконски, кои никако не можат да бидат функционални затоа што е направена методологија и треба да се постапи по неа, а со овие анкетни листови само се дава можност на директорите да вршат закани, заплашувања и уцени врз вработените во јавниот сектор затоа што за потребата од едно работно место сега одлучуваат само тие – велат од КСС.

The post КСС предлага да се пензионираат постарите административци наместо да се праќаат во приватен сектор appeared first on plusinfo.mk.