Политикологот Огнен Вангелов смета дека Македонија треба да развие сопствени механизми за заштита од можни нови бугарски блокади во процесот на евроинтеграциите, наместо да се потпира на неизвесни промени во правилата за одлучување во Европската Унија. Во интервју за порталот МКД, тој предлага комбиниран правен, дипломатски и политички пристап, чија централна идеја е уставните измени да не бидат неповратна отстапка доколку Софија повторно го злоупотреби правото на вето.

Вангелов оценува дека не постои реален механизам со кој однапред може да ѝ се одземе на Бугарија можноста за вето, освен евентуална промена на принципот на едногласност во ЕУ. Бидејќи такво решение не зависи од Македонија и не е извесно кога би се случило, според него, државата мора да ја намали сопствената ранливост и политичката тежина на бугарските условувања.

Како прв столб на таквата стратегија, Вангелов предлага уставно-правна самозаштита. Ако се усвојат уставни измени, тие, според него, не треба трајно да важат доколку Бугарија повторно ја блокира Македонија поради историски, јазични или идентитетски прашања што не се дел од европското право. Затоа предлага уставноправните експерти да изнајдат механизам со кој измените автоматски би престанале да важат во случај на такво вето, без повторно да биде потребно двотретинско мнозинство.

Вториот елемент од неговиот предлог се однесува на Вториот протокол меѓу Скопје и Софија. Вангелов смета дека преку механизмите предвидени во Договорот за добрососедство треба да се бара негово прецизирање или изменување, така што прашањата поврзани со историјата, образованието, културата и јавната меморија повеќе да не претставуваат дел од пристапниот процес кон Европската Унија. Според него, Историската комисија треба повторно да функционира како експертско, а не политичко тело.

Третиот столб е засилена дипломатска офанзива кон земјите членки на ЕУ и европските институции. Вангелов смета дека Македонија треба постојано да објаснува дека суштината на спорот не е само внесувањето на Бугарите во Уставот, туку обидот историските и идентитетските толкувања на Софија да се претворат во долгорочни услови за членство. Таквиот пристап, според него, нема да го елиминира ветото, но може да ја намали неговата легитимност и да ја зголеми политичката цена за државата што го користи.

Во интервјуто за МКД, Вангелов заклучува дека решението не лежи во еден дипломатски потег, туку во комбинирана стратегија: продолжување на реформите и европскиот курс, истовремено со создавање внатрешни правни гаранции, разграничување на билатералните прашања од пристапниот процес и градење поширока европска поддршка против злоупотребата на правото на вето.

The post УСТАВНИТЕ ПРОМЕНИ НЕ СМЕАТ ДА БИДАТ „НЕПОВРАТНИ“ Огнен Вангелов предлага модел на уставно-правна заштита од бугарското вето appeared first on plusinfo.mk.

Последните изјави на првите луѓе упатени во надворешната политика на Македонија, дека „протоколите не се дел од преговарачката рамка“, внесоа збунка во јавноста. Посебно кај оние што го прочитале македонскиот евроинтегративниот пакет и знаат дека на Вториот протокол се повикува имплицитно во самата рамка, усвоена од Советот на ЕУ на 30 јуни 2022, како на годишни прегледи и мерки за ефективна имплементација според членот 12 (од Договорот меѓу двете држави)“. Но исто така и експлицитно во Заклучоците на Советот на ЕУ од 18 јули 2022 (ден по потпишувањето на Вториот протокол на 17 јули), како на „Протоколот од вториот состанок на заедничката меѓувладина комисија“. Конечно, истата експлицитна формулација стои и во Изјавата на тогашниот македонски премиер, со која се отвори Првата меѓувладина конференција на Македонија со ЕУ на 19 јули 2022. Значи, во 3 официјални документи.

Со оглед на фактот дека изјавиве доаѓаат од извонредно писмени луѓе и без сомнение, посветени на напредокот на Македонија кон ЕУ (експресно спроведени реформи), се обидувам да си го објаснам променетиот наратив. Наратив кој звучи како негирање на очигледното, во стилот на онаа бугарска шеговита изрека, „тази дупка не е дупка“ (оваа дупка не е дупка).

Барајќи логична причина за сменетиот наратив, претпоставувам дека се работи за обид за „креативно решавање“ на бугарското вето. Зашто ветото постои, а бугарските политичари во безброј изјави не уверија дека од нас очекуваат испорака на целиот пакет бесмислени барања од идентитетска природа. Не се работи за САМО ЕДНО барање околу Бугари во Уставот, туку ги очекуваат и второто и третото и стоитретото барање од Вториот протокол, кои се просто препишани од нивната Рамковна позиција донесена едногласно во бугарскиот парламент во 2019. А во неа, Македонци и македонски идентитет нема, ни како народ, ни како јазик, ни како историја.

Значи, ДУПКА СЕПАК ИМА во правниот систем на нашава држава, кога нашето политичко водство го потпишало Вториот протокол на 17 јули 2022 и подоцна го верификувало неговото присуство во преговарачката рамка. Бугарија издејствувала скандалозната содржина да биде прифатена од Советот на Европската унија, иако е спротивна на европското и меѓународното право. Значи, ДУПКА ИМА и во правниот систем на ЕУ! И врзани сме во јазол со невозможни за исполнување барања, зад кои пред четири години застанале Македонија и ЕУ, со целите свои гломазни администрации, правни експерти, ПР експерти итн. Чаре?

Дупка во заб се затвора со пломба, откако ќе се исчисти гнилото. Дупка на пат, со асфалт изгазен со валјак. Дупка во правниот систем решава Уставниот суд или Собранието. За Вториот протокол треба ДА СЕ КОНСТАТИРА дека е правно ништовен документ и од Македонија и од ЕУ, за да го снема од правниот промет како кочница за евроинтеграцијата.

Да се потсетиме на хронологијата поврзана со напорите за поништување на Вториот протокол и негово дискредитирање како правно-обврзувачки документ пред европските институции. Пред четири години, во колумна во истиов медиуми (24.8.2022, еден месец по потпишувањето) под наслов „Протоколот е правно ништовен и не смее да наметнува штетни дејствија“, образложив дека не е полноправен правен документ, туку е обичен записник, зашто не е ратификуван во Собрание. Притоа предложив: „ Да се отвори дебата во општеството, во институциите, секако во Собранието, за следните можни чекори: писмено известување и објаснување до Бугарија за потребата од формално поништување на Протоколот; најава за можен прекин на Договорот, поради неисполнување на важни развојни одредби од заемен интерес и прекршување на редица членови; барање за итен прекин на прекршувањата на Договорот со непријателски дејствија преку бугарските клубови, изјави и дејствување на највисоки бугарски функционери; барање за дигање на ветото за почеток на нормални преговори на Македонија без непринципиелни уцени.“ Но, ова укажување беше игнорирано, додека нашата евроинтеграција се комплицираше, со секоја од многуте бугарски влади.

Кога ни по три години не мрднавме и преговарачката рамка ни стана јамка, излегов со најава (4.7.2025) дека како граѓанин ќе поднесам Уставна иницијатива за поништување на Вториот протокол, кој е нон-документ и треба тоа едноставно да го утврди Уставниот суд. Трнав од правното толкување на Вториот протокол и преговарачката рамка, укажувајќи на 7 правни прекршувања и кршења на Уставот и законите, поднесувајќи ја на 24 јули 2025, пред една година. Уставниот суд ја прифати за разгледување и еве, уште чекаме продолжение на постапката.

Во меѓувреме европскиот известувач за напредокот на Македонија во Европскиот парламент, Томас Вајц од Европските Зелени, побара амандман за разјаснување на позицијата на Вториот протокол во преговарачката рамка, од страна на правната служба на Советот на ЕУ, повикувајќи се на започнатата процедура за поништување во Уставен суд и неговата неускладеност со европското право. Ова ме поттикна да се обратам директно, како иницијатор на Уставната иницијатива и како поранешна пратеничка и потпретседателка на македонското Собрание, до европските пратеници од Комисијата за надворешна политика и Мешовитиот комитет за Македонија и ЕУ, со појаснување на проблемите што ги содржи овој протокол. Тоа беше повод за организирање на бугарските пратеници ОД СИТЕ ПАРТИИ да испратат зеднички нонпејпер до колегите, инсистирајќи на клучното значење на Вториот протокол во македонската преговарачка рамка и барајќи да не се прифати амандманот на Вајц. По целата таа парламентарна бура, бугарската страна со пријателите победи и овој амандман не доби мнозинство, исто како ни следниот од Вајц, на пленарна седница, во слична насока. Бугарите жестоко го бранат Вториот протокол во преговарачката рамка, зашто за тоа се избориле.

Кога барањата за толкување на односот Втор протокол – преговарачка рамка не успеаја низ голема парламентарна врата, со македонскиот активист од Германија, Гоце Перовски, дојдовме на идеја да пробаме на мала врата: како граѓани поднесовме барање до европските институции за увид во документацијата околу македонската преговарачка рамка и Вториот протокол. Рокот е некаде во првата половина на август, па да видиме што ќе добиеме.

И еве не, како македонски граѓани, но и како Македонци од светот, изначекани по европските и светски чекалници за да добие Македонија пристап до институциите, каде што природно, географски и цивилизациски, припаѓа. Како добронамерници, ги поддржуваме сите политички напори за напредок на земјава и очекуваме добри вести. Но од политичарите очекуваме ЈАСНИ И РАЗБИРЛИВИ СТАВОВИ.

Да заклучам: Ако изјавите „протоколите не се дел од преговарачката рамка“ значат дека државата НЕ ГИ ПРИЗНАВА ЗА ПРАВНО ВАЛИДНИ (бидејќи процедурално, тие de jure не се валидни) и во таа смисла, НЕМА НАМЕРА ДА ГИ ИСПОЛНУВА, тогаш изјавите може да ги наречеме „добри вести“.

Но сепак, не е доволно да се заврши со изјави на поединечни функционери, колку и да се високи хиерархиски. Овој процес на ПОНИШТУВАЊЕ НА ПРОТОКОЛИТЕ мора да има ПРАВНА РАЗВРСКА во Македонија, за да може да има и во европските институции. Со ова земјава би се ослободила од товарот на преземени обврски, нератификувани во Собрание, необјавени во Службен весник, што прекршуваат 3 члена од Уставот, 14 члена од Законот за преговарање, потпишување и ратификација на меѓународни договори и 2 члена од Законот за надворешни работи.

The post Тази дупка е дупка и мора да се затвори за да го изодиме европскиот пат appeared first on plusinfo.mk.

Европската комесарка за проширување, Марта Кос, изјави дека денеска е „Супер вторник“ за проширувањето на Европската Унија, поради одржувањето пристапни конференции со четири земји кандидати во ист ден.

Кос на платформата „Икс“ објави дека за првпат по повеќе од 20 години се одржуваат толку пристапни конференции во еден ден. На денешните конференции учествуваат Црна Гора, Украина, Молдавија и Албанија.

– Нашите предводнички Украина, Молдавија, Албанија и Црна Гора прават големи чекори напред – наведе Кос, додавајќи дека Црна Гора е на чело на колоната како најнапредна земја во пристапните преговори.

Еврокомесарката посочи дека Украина и Молдавија го отвораат Кластерот 6, што ги опфаќа областите како одбраната и безбедноста каде, според неа, аргументите за нивното членство во ЕУ се особено силни.

– Албанија ќе ги затвори своите први поглавја, а Црна Гора е цврсто во завршната фаза на формалните преговори, со затворени 18 од вкупно 33 поглавја – додаде таа.

Кос нагласи дека денешниот моментум мора да се претвори во „конкретни резултати на терен“.

– Денеска е ден и за славење и за поглед кон иднината. Ја имаме поддршката од земјите членки, но само доколку земјите кандидати ги исполнат условите – заклучи европската комесарка Кос.

The post ЗА МАРТА КОС ДЕНЕСКА Е „СУПЕР ВТОРНИК“ Четири земји кандидати ќе одржат пристапни конференции со ЕУ appeared first on plusinfo.mk.

Премиерот на Албанија, Еди Рама, изјави дека Албанија по пристапувањето во Европската Унија нема да го следи примерот на Бугарија и нема да издава албански пасоши на етничките Албанци кои живеат во Македонија.

– Ние не сме земја која може да прави што сака и како сака кога станува збор за прашања кои се однесуваат на внатрешната хармонија на европското семејство – изјави Рама.

Тој посочи дека Бугарите го сториле тоа дури откако станале членка на ЕУ, „бидејќи нивниот пасош стана многу моќен“.

Рама претходно изјави и дека Албанија нема да ѝ стави вето врз Македонија доколку стане членка на ЕУ. Одговарајќи на прашање на студент од Скопје тој оцени дека тоа е механизам кој може да ја попречи интеграција и додаде дека долго време се залага за нов пристап на Унијата кон земјите кандидати, имено, кандидатите порано да бидат вклучени во процесот на европското одлучување.

Албанија наскоро треба да затвори три поглавја од пристапните преговори. На 14 јули во Брисел ќе се одржи 9. Меѓувладина конференција на Албанија и ЕУ.

Рама порача дека „Албанија не запира“.

АЛБАНИЈА НЕМА ДА Ѝ СТАВИ ВЕТО НА МАКЕДОНИЈА Рама упати јасна порака до Скопје

The post АЛБАНИЈА НЕМА ДА ИЗДАВА ПАСОШИ НА АЛБАНЦИ ВО МАКЕДОНИЈА ПО ВЛЕЗОТ ВО ЕУ Рама отфрла бугарско сценарио и самоволие appeared first on plusinfo.mk.

„Важно е да нагласам дека не бараме гаранции дека ќе станеме членка во ЕУ, туку уверување дека нашите пристапни преговори нема да зависат од билатерални прашања поврзани со историјата и идентитетот“.

Вака истакна заменик-министерот за надворешни работи и надворешна трговија Зоран Димитросвки денеска во Рим. На состанокот со колегите министри од Групата „Пријатели на Западен Балкан“, Димитровски истакна дека Македонија останува цврсто посветена на спроведувањето неопходни реформи, при што нагласи дека напредокот кон членството треба да се оценува исклучиво врз основа на исполнувањето на Копенхашките критериуми и постигнатите реформски резултати.

Состанокот се одржа на покана на министерот за надворешни работи и меѓународна соработка на Италија, Антонио  Тајани.

На средбата учествуваа министрите за надворешни работи од земјите – членки на Европската Унија и од Западен Балкан, како и високи претставници на институциите на Европската Унија. Во фокусот на дискусиите беа иднината на политиката на проширување, европската перспектива на Западен Балкан и улогата на регионот во зајакнувањето на европската стратешка автономија.

Во рамки на дискусијата посветена на политиката на проширување, заменик министерот Димитровски истакна дека проширувањето претставува стратешка инвестиција во безбедноста, стабилноста и отпорноста на Европа, нагласувајќи дека пристапниот процес мора да остане кредибилен, предвидлив и заснован на заслуги, со полноправното членство во Европската Унија како единствена крајна цел.

На панелот посветен на европската стратешка автономија на Европската Унија и европските предизвици поврзани со обезбедувањето храна, синџирите на снабдување и поврзаноста, Димитровски ја истакна важноста на подобрата интеграција и поврзаност на Западен Балкан со Европската Унија, како и потребата од унапредување на инфраструктурните, транспортните и економските врски.

Тој нагласи дека зајакнувањето на регионалната поврзаност и отпорноста на синџирите на снабдување се од клучно значење за поголема конкурентност и стабилност на целиот регион.

The post МАКЕДОНИЈА НЕ БАРА ГАРАНТИРАНО ЧЛЕНСТВО, ТУКУ ФЕР ПРАВИЛА ЗА ПРЕГОВОРИ Процесот не смее да зависи од прашања за историјата и идентитетот appeared first on plusinfo.mk.

Покажавте силни перформанси во рамките на реформската агенда. Доаѓам во Скопјe за да ја охрабрам Владата да го стори истото тоа и во пристапните преговори затоа што сега имаме можност која се случува еднаш во генерацијата, да го оствариме проширувањето – вели во интервју за МИА еврокомесарката за преговори за проширување и соседска политика непосредно пред нејзината утрешна посета на Скопје.

– Северна Македонија покажа дека може да испорача резултати кога има политичка волја. Ова јасно го гледаме во нејзините силни перформанси во рамките на реформската агенда. Ќе дојдам во Скопјe за да ја охрабрам Владата да го стори истото тоа и во преговорите за пристапување. Сега имаме можност која се случува еднаш во генерацијата, да го оствариме проширувањето. Ова доаѓа со јасни избори. Оние што ги исполнуваат своите обврски напредуваат. Ова го гледаме најјасно во Црна Гора и Албанија. Оние што не ги исполнуваат своите обврски, заостануваат. Во моменти на забрзување застојот значи фактичко назадување – вели еврокомесарката Кос на прашањето дали има предвид нова иницијатива за деблокада на македонската евроинтеграција.

Според неа, напредокот во преговорите за пристапување бара клучен елемент: доверба меѓу земјите кандидати и земјите членки.

– Според моето искуство, таквата доверба првенствено се гради врз два елемента: исполнување на обврските и ставот на земјите кандидати кон ЕУ и нејзините земји членки. Ова почнува со добрососедски односи. Кога меѓусебната доверба расте, процесот на пристапување станува побезбеден. Убедена сум дека ова би било случај и за Северна Македонија – нагласува Кос.

Таа притоа укажува дека досега нема случај на давање гаранции на земја кандидат дека нема да се појави друг спор за време на пристапниот процес до ратификацијата на договорот за пристапување од последната од 27-те земји членки.

– Вистината е дека ниедна земја кандидат никогаш не добила гаранција дека нема да се појави друг спор за време на процесот на пристапување сè до моментот кога и последната земја членка ќе го ратификува договорот за пристапување. Ова е начинот на кој функционира проширувањето на ЕУ. Важно е да се прифати оваа реалност – нагласува Кос.

Во коментар на германско-францускиот нон пејпер, кој промовира постепена интеграција на Западен Балкан во ЕУ пред полноправно членство, таа вели процесот на пристапување бара време, но оти во денешниот свет Европската Унија не може да си дозволи да чека предолго. И, вели, задоволна е од тоа што гледа како европските лидери ја водат оваа дебата, со цел да се изнајдат начини, вели, „да ја доближиме ЕУ до идните граѓани многу порано“.

– По летото, Комисијата има намера да предложи нови начини на земјите членки да ги доближат земјите кандидатки до ЕУ пред пристапувањето. Но, има една важна точка. Ова ќе бара напредок во преговорите за пристапување. Ова останува приоритет. Без таков напредок, понатамошната постепена интеграција ќе биде ограничена – посочува еврокомесарката Марта Кос во интервјуто за МИА, што целосно ќе биде објавено утре.

Комесарката за проширување Кос ќе пристигне утре во Скопје да разговара за патот на земјата кон ЕУ и напорите за реформи, со фокус на спроведувањето на агендата за реформи во рамките на планот за раст за Западен Балкан. До денес, посочуваат, земјата добила 142,1 милиони евра во рамките на Инструментот за реформи и раст по напредокот во спроведувањето на клучните реформи.

За време на посетата на земјата комесарката Кос ќе се сретне со премиерот Христијан Мицкоски и со вицепремиерот и министер за европски прашања, Беким Сали. Нивните дискусии, се посочува, ќе се фокусираат на напредокот во спроведувањето на агендата за реформи, приоритетите за постепена интеграција во ЕУ и пошироките случувања поврзани со патот на земјата кон ЕУ.

Како што наведуваат од Кабинетот на еврокомесарката, предвидено е Кос и премиерот Мицкоски да одржат заедничка прес-конференција. Таа ќе се сретне и со претседателот на Собранието, Африм Гаши, за да разговараат за важноста на конструктивниот политички дијалог и широката меѓупартиска поддршка за реформите поврзани со ЕУ.

Комесарката Кос ќе посети студентски дом во Скопје, реновиран со средства од ЕУ. Таа исто така ќе се сретне со младински организации од земјата за да разговараат за можностите што ги нуди поблиската интеграција со ЕУ на младите луѓе, вклучително и преку програми, како што се „Хоризонт Европа“ и „Еразмус+“.

Подоцна во текот на денот, комесарката Кос ќе се сретне со претставници на организациите на граѓанското општество и медиумите за да разговара за спроведувањето на клучните реформи поврзани со ЕУ, особено во областа на владеењето на правото – наведуваат од Кабинетот на еврокомесарката Кос.

The post ВИСТИНАТА Е ДЕКА НИТУ ЕДНА ЗЕМЈА КАНДИДАТ НЕ ДОБИЛА ГАРАНЦИИ Еврокомесарката Кос доаѓа во Скопје со порака дека шансата е сега appeared first on plusinfo.mk.

Унгарскиот премиер Петер Маѓар изјави дека забрзаниот прием на Украина во ЕУ „не би бил фер“ кон земјите од Западен Балкан, истакнувајќи дека унгарската влада е меѓу земјите-членки кои би сакале побавно темпо на процесот.

– Мислењата се поделени кога станува збор за пристапувањето на Украина во Европската унија. Унгарија е за процес базиран на заслуги и конкретни резултати – рече Маѓар вчера на прес-конференција во Брисел пред состанокот на Европскиот совет, објави унгарскиот портал „Телекс“.

Маѓар, исто така, го поздрави фактот дека е постигнат договор со Украина во врска со правата на унгарското малцинство во Закарпатскиот регион. Ова овозможи отворање на првиот кластер преговори за пристапување на Украина во Европската унија.

Според него, унгарската влада не е сама во спротивставувањето на отворањето на други кластери за преговори.

Тој нагласи дека „Европската унија не може да ги заобиколи земјите од Западен Балкан – кои со години водат преговори – со примена на различен модел на проширување за Украина, бидејќи тоа не би било ниту фер ниту прагматично“.

Како што изјави, „некои би сакале различен процес на пристапување“.

– Некои би ги отвориле сите преговарачки поглавја веднаш, а некои би отвориле само две поглавја – рече тој, истакнувајќи дека унгарската влада е меѓу земјите-членки кои би сакале побавно темпо на процесот.

Како што изјави, ќе биде потребна едногласност.

– Тешко е да се најде компромис меѓу 27. земји-членки, но се сеќавам на ситуации од минатото кога тоа беше постигнато – рече премиерот.

Маѓар, исто така, рече дека е малку веројатно Унгарија да се согласи со другите земји-членки за сите прашања, но дека е посветен на претставување на интересите на унгарскиот народ во секоја дискусија.

– Ние ќе ја претставуваме Унгарија на поинаков начин. Нема да се судриме само заради судирање. Без разлика дали ќе се согласиме или ќе ставиме вето на нешто, тоа нема да биде од причини на внатрешна политика или партиски интереси, туку исклучиво врз осно

The post БРЗА ТРАКА ЗА УКРАИНА Е НЕПРАВДА ЗА ЗАПАДЕН БАЛКАН Будимпешта е против забрзано отворање кластери за Киев appeared first on plusinfo.mk.

Новите членки на Европската Унија би можеле да го изгубат правото на национално вето во одредени клучни области на повеќе од 15 години по приемот во членство, врз основа на новите „заштитни“ клаузули кои би биле вклучени во пристапните договори на секоја земја поединечно, изјави денеска европската комесарка за проширување Марта Кос, во моменти кога Украина и Молдавија официјално ги почнуваат преговорите за членство во ЕУ.

– Ова ќе биде нова генерација на пристапни договори, во смисла дека ќе имаме нови заштитни механизми – рече Кос, пренесе Еурактив.

Таа наведе дека целта на новите клаузули ќе биде да се обезбеди новите членки да ги почитуваат европските правила и пет, десет или петнаесет години по пристапувањето во Унијата.

Кос истакна дека новите одредби не значат воведување второкласен или придружен статус за идните членки.

– Полноправното членство ќе биде можно дури кога државите ќе ги исполнат сите услови. Не постои половично или четвртина членство. Постои само полноправно членство – порача европската комесарка за проширување.

Франција, Германија, Холандија, Белгија и Луксембург минатата недела побараа воведување нови заштитни клаузули за да се осигура дека идните членки нема да можат да ја „загрозат способноста на Европската Унија да делува“.

Кос, како што пишува Еурактив, со најавата на овие клаузули ги поддржа предлозите кои ги заговараат Франција и Германија, како и уште неколку држави членки, на идните членки да им се ограничи можноста за одлучување за буџетски, безбедносни и надворешнополитички прашања.

Стартувањето на новата фаза од формалните преговори за членство доаѓа во време кога сè поголем број влади на државите членки бараат дополнителни заштитни механизми во случај новите членки по приемот да отстапат од реформите во областа на демократијата, владеењето на правото или слободата на медиумите.

The post ДО 15 ГОДИНИ БЕЗ ПРАВО НА ВЕТО ЗА НОВИТЕ ЕУ-ЧЛЕНКИ Кос открива нови правила за проширувањето appeared first on plusinfo.mk.

Украинскиот претседател Володимир Зеленски изјави дека Украина е подготвена да отвори дури 6 кластери во пристапните преговори со Европската Унија и дека очекува летово да донесе нов напредок на европскиот пат на земјата.

Во своето редовно вечерно обраќање, Зеленски порача дека Киев ги завршил подготовките за дипломатските активности што следуваат наредната седмица и нагласи дека Украина нема да биде причината за евентуални одложувања во преговарачкиот процес.

Киев гледа кон Брисел

Зеленски потсети дека Европската Унија ја потврдила подготвеноста за отворање на првиот кластер во преговорите со Украина.

– Направивме апсолутно сè за овој напредок и сум благодарен на сите што помогнаа и на сите што работат за нашата земја – изјави украинскиот претседател.

Советот на ЕУ оваа седмица официјално го почна процесот за отворање на Кластер 1 во пристапните преговори со Украина и со Молдавија.

На иста маса со Трамп, без тет-а-тет средба

Иако американскиот претседател Доналд Трамп ќе учествува на работен состанок на Г7 заедно со Зеленски, засега не е предвидена посебна билатерална средба меѓу двајцата лидери.

Според висок претставник на американската администрација, руското напредување во Украина во моментов е „повеќе или помалку запрено“.

Дронови, пожари и нови напади

Додека дипломатијата бара напредок, војната продолжува со несмалено темпо.

Локалните власти во рускиот Краснодар соопштија дека едно лице загинало, а тројца биле повредени во напад со украински дрон. Според гувернерот Венијамин Кондратиев, остатоци од беспилотно летало предизвикале пожар на бродски терминал.

Украинскиот Генералштаб не го коментираше нападот, но потврди дека украинските сили погодиле објект за преработка и пумпање нафта во Волгоград, како и цели во окупираните делови на Доњецк и на Запорожје.

Запорожје повторно доби струја

Во меѓувреме, нуклеарната централа „Запорожје“ повторно е поврзана со електроенергетската мрежа по поправките извршени за време на локален прекин на огнот, постигнат со посредство на Меѓународната агенција за атомска енергија.

Ова е дури 19-ти случај централата да остане без надворешно напојување од почетокот на војната.

The post КИЕВ Е СПРЕМЕН ДА ОТВОРИ 6 КЛАСТЕРИ СО ЕУ Украина брза кон Унијата додека војната трае appeared first on plusinfo.mk.

Германскиот канцелар Фридрих Мерц во Минхен призна дека чувствува „сè поголема непријатност“ затоа што Европската Унија не успева да постигне значаен напредок во пристапните процеси со земјите од Западен Балкан и соседството.

– Мораме да осмислиме нова стратегија за да ги доближиме овие земји до ЕУ. Не сакам да ве изгубам – порачал Мерц откако дебатата ја отвори претседателот на Црна Гора на Минхенската безбедносна конференција. 

Главна кочница, според него, е принципот на едногласност во Унијата, односно правото на вето на земјите членки. Мерц посочи дека постојаното блокирање од страна на Унгарија станало „слон во собата“. Изразил надеж дека тоа ќе се надмине.

– По изборите што ќе се одржат во април, се надеваме дека ќе можеме да ги отвориме следните поглавја и да ви се приближиме уште повеќе кон Европската Унија – заклучил тој.

Процесот на проширување на ЕУ со Западниот Балкан останува под знак прашалник.

Во текот на 2024 и 2025 година, унгарскиот премиер Виктор Орбан повеќепати сигнализирал дека нема автоматски да поддржи забрзано членство на Украина, имплицитно најавувајќи вето. Орбан неодамна изјави дека земјите членки ги поставуваат правилата на игра, велејќи дека членството на Украина би значело безбедносен и финансиски ризик за Унијата.

The post НЕ САКАМ ДА ВЕ ИЗГУБАМ, УНГАРИЈА Е СЛОНОТ ВО СОБАТА На Мерц му е непријатно што Западен Балкан уште не е во ЕУ appeared first on plusinfo.mk.