Срирасми Сувади некогаш беше една од најблиските жени на идниот тајландски крал Маха Ваџиралонгкорн, познат како Рама X. Беше негова трета сопруга и мајка на неговиот син Дипангкорн, но нејзиниот живот драстично се промени во 2014 година, кога нејзиното семејство се најде среде голем корупциски скандал.

Срирасми и тогашниот престолонаследник Ваџиралонгкорн се венчале во 2001 година, но нивниот брак не бил јавно потврден до 2005 година, кога таа го родила нивниот син, принцот Дипангкорн Расмиџоти. По раѓањето на детето, таа добила повисок кралски статус.

Сè се променило во 2014 година. Седум нејзини роднини биле обвинети за злоупотреба на врските со кралското семејство и корупција. Меѓу нив бил и нејзиниот чичко Понгпат Чајапан, висок полициски функционер, кој подоцна бил осуден за повеќе кривични дела. Нејзините родители исто така биле уапсени и обвинети дека ја злоупотребиле својата врска со кралското семејство.

Во ноември 2014 година Ваџиралонгкорн побарал семејството Сувади да го изгуби кралското презиме. На 11 декември било објавено дека Срирасми се откажува од својот кралски статус. Според достапните податоци, по разводот добила 200 милиони тајландски бахти, односно околу 6 милиони долари според тогашните проценки.

Нејзините родители подоцна биле осудени за дела поврзани со злоупотреба на кралските врски. Нејзиниот чичко Понгпат, поранешен шеф на Централното истражно биро, бил осуден на долгогодишна затворска казна во случајот кој вклучувал корупција, изнуда и злоупотреба на влијание.

Срирасми, пак, целосно исчезнала од јавниот живот. Во 2020 година во странските медиуми се појавија фотографии за кои беше наведено дека ја прикажуваат во провинцијата Рачабури, со избричена глава и облечена во едноставна будистичка облека. Австралискиот извештај за човековите права во Тајланд, повикувајќи се на меѓународни медиумски извештаи, исто така наведува дека таа наводно живеела во домашен притвор во Рачабури.

Сепак, за ова нема јавно достапна официјална потврда дека Срирасми денес навистина е во домашен притвор, ниту дека живее во условите што ги опишуваат некои таблоиди, без струја и санитарен јазол. Академска студија за тајландската монархија исто така го опишува домашниот притвор како нешто што било „reported“, односно пријавувано од медиумите, а не како официјално потврдена информација.

Исто така не е потврдено дека таа е жива или почината – едноставно со години нема јавни информации за нејзиниот живот, па во медиумите се појавуваат шпекулации дека можеби и не е жива.

Најголемата трагедија за Срирасми е токму губењето на контактот со нејзиниот син. Дипангкорн останал во кралската палата и денес е единствениот официјално признат син на Ваџиралонгкорн. По смртта на принцезата Бајракитијабха во јуни годинава, тој повторно се најде во центарот на вниманието поради прашањето кој ќе го наследи кралот.

Странските медиуми пак, со години пишуваат за наводни развојни или здравствени проблеми кај младиот принц, но тие информации не се официјално потврдени од палатата.

Случајот со Срирасми е особено необичен затоа што таа од жена од скромно потекло стана членка на кралското семејство, мајка на принцот кој денес се смета за главен машки кандидат за престолот, а потоа за само неколку години го изгуби статусот и исчезна од јавноста.

The post БЕШЕ НАЈБОГАТА ПРИНЦЕЗА НА СВЕТОТ, А ПОТОА ИЗГУБИ СÈ Срирасми Сувади беше сопруга на тајландскиот крал и мајка на неговиот единствен официјално признат син appeared first on plusinfo.mk.