Салата „Динко Лукариќ“ во Козала, дел од градот Риека, осамна обележана со нацистички СС симболи и свастики. Графитите се појавиле и надвор и внатре, таму каде што тренираат деца и млади, јави хрватскиот портал Fiuman.

Полицијата добила пријава и започнала постапка. Полициска управа Приморје-Горски Котар потврдила дека дејствува според овластувањата. Во моментот не е утврдено кој ги направил графитите ниту кога точно биле исцртани.

Градските служби интервенирале по полициската истрага. Градот јавно го осудил инцидентот и соопштил дека симболите биле веднаш отстранети. Пораката била јасна. Риека стои зад општество без насилство, дискриминација и нетолеранција и ваквите појави ги смета за неприфатливи и спротивни на демократските вредности.

Изнесувањето на нацистички симболи во Хрватска е забрането со закон. Во зависност од околностите, делото може да биде кривично или прекршочно. Истражните дејствија продолжуваат, а полицијата го бара сторителот.

Контекстот дополнително ја вжешти јавната дебата. Неколку дена претходно, во Риека се одржале два концерта на Марко Перковиќ Томпсон. На еден од нив тој изјавил дека не е фашист ниту нацист, додавајќи оценка за комунизмот.

– Ние не сме фашисти, нацисти. Тоа е зло, но комунизмот е можеби уште поголемо зло – изјави пејачот.

The post 📷 НАЦИСТИЧКИ СИМБОЛИ СЕ ПОЈАВИЈА ВО САЛА ВО РИЕКА Нова провокација по изјавите на Томпсон appeared first on plusinfo.mk.