Управата за јавни приходи (УЈП) информира дека е завршено годишното оданочување на граѓаните за 2025 година. При тоа се евидентирани 863.100 годишни даночни пријави, а вкупниот пријавен оданочив доход достигнал 612,9 милијарди денари (9,95 милијарди евра).

Даночната управа констатира дека се уште има граѓани кои не отвориле кориснички профил преку кој се проверуваат даночните пријави, па така 158.657 пријави не се лично потврдени.

Од вкупно 704.443  пријави достапни ка корисничките профили  26.653 се лично потврдени од даночните обврзници, 1.145 се коригирани, а 676.645 се службено потврдени од УЈП.

Според податоците, 208.857 граѓани имаат обврска за доплата на данок, 313.519 имаат повеќе платен данок и право на поврат, додека кај 182.067 пријави нема разлика меѓу пресметаниот и уплатениот данок.

УЈП наведува дека само 617 даночни обврзници побарале враќање на повеќе платениот данок, во вкупен износ од 32,4 милиони денари.

Вкупниот пријавен доход за 2025 година изнесува околу 613 милијарди денари, а пресметаниот данок на личен доход достигнал 39,8 милијарди денари. Во споредба со 2024 година, пријавениот доход е повисок за 74,1 милијарда денари, додека пресметаниот данок е зголемен за 4,86 милијарди денари.

Најголем дел од пријавениот доход се однесува на приходи од работен однос, кои достигнуваат 458,6 милијарди денари или 7,44 милијарди евра. Следуваат приходите од капитал со 24,6 милијарди денари, приходите од продажба на сопствени земјоделски производи со 22,3 милијарди денари, добивките од игри на среќа со 11,1 милијарда денари, како и приходите од закуп, авторски права, самостојна дејност и други извори на доход.

The post ГРАЃАНИТЕ ПРИЈАВИЛЕ 9,95 МИЛИЈАРДИ ЕВРА ДОХОД Повеќе од 7,4 милијарди евра е дохoд од работен однос appeared first on plusinfo.mk.

Рекордна наплата од 206 милиони евра е остварена во јуни годинава, со што по третпат е надминат највисокиот месечен резултат во историјата на Царинската управа. Според директорот на институцијата и член на Извршниот комитет на ВМРО-ДПМНЕ, Бобан Николовски, во државниот буџет биле инкасирани 12,68 милијарди денари, што е за 22,5 отсто повеќе во споредба со истиот месец лани.

Раст од речиси 38 милиони евра

Гостувајќи во емисијата „За или против“ на Алфа телевизија, Николовски истакна дека во јуни биле наплатени околу 37,9 милиони евра повеќе отколку во истиот месец минатата година.

– Во Царинската управа имаме континуитет на рушење рекорди. Тоа за мене е сигнал дека сме на прав пат. Третпат имаме највисока месечна наплата од постоењето на институцијата – рече Николовски.

Тој посочи дека е надминат и претходниот рекорд поставен во јули минатата година.

Раст кај ДДВ, царините и кај акцизите

Според податоците што ги презентираше директорот на Царинската управа, најголем раст е забележан кај приходите од ДДВ при увоз.

Приходите од ДДВ при увоз се зголемени за 26,2 отсто, приходите од данок на моторни возила за 24,4 отсто, приходите од царина за 19,5 отсто, а акцизите за 15 отсто.

„Континуитетот е најважен“

Николовски оцени дека најголемата вредност не е само во соборувањето на рекордите, туку во нивното повторување од месец во месец.

– Царинската управа не само што поставува рекорди во месечната наплата, туку тоа го прави во континуитет. Токму континуитетот и доброто работење беа потребни, а веќе две години покажуваме дека сме на солиден пат – истакна тој.

The post TРЕТПАТ СРУШЕН РЕКОРДОТ ВО НАПЛАТА НА ЦАРИНАТА Во јуни во буџетот се слеале 206 милиони евра appeared first on plusinfo.mk.

Операторите на танкери речиси ги дуплираа цените на превоз на товар на рутите во Ормускиот Проток и поширокиот регион на Персискиот Залив, бидејќи постепеното закрепнување на сообраќајот предизвика бран на побарувачка за транспорт на нафта, според извори од индустријата и податоци за транспорт.

Изнајмувањето танкери сега чини околу 190.500 долари дневно, а само пред една недела изнесуваше 106.500 долари дневно. Цените на превоз на товар надвор од Персискиот Залив, исто така, нагло пораснаа.

Просечниот дневен приход (TCE) на многу големи танкери за сурова нафта (VLCC) достигна рекорд од речиси 470.000 долари за транспорт на товар во Персискиот Залив што мора да помине низ Ормускиот Проток. Износот е за 50.000 долари повеќе отколку пред една недела.

– Сопствениците на танкери се подготвуваат за значително поголеми количини на нафта од Блискиот Исток во наредните недели и се охрабрени од фактот дека просечниот дневен приход на физичкиот пазар останува над 100.000 долари дневно, и покрај намалениот обем на товар од почетокот на конфликтот меѓу САД и Иран- изјави бродскиот брокер Кларксонс.

Ова покажува дека снабдувањето со танкери е сè уште исклучително ограничено, а отворањето на Ормуз дополнително ќе го намали достапниот капацитет, оценуваат аналитичарите на Кларксонс во белешка.

Проценките на пазарот покажуваат дека дури 100 танкери се сè уште блокирани во Персискиот Залив, што дополнително го влошува проблемот со недостигот на бродови, а производителите на Блискиот Исток пласираат сè повеќе барели нафта на пазарот.

Производителите од Блискиот Исток, особено Националната нафтена компанија Абу Даби од Обединетите Арапски Емирати, нудат нафта преку серија тендери од почетокот на јуни, поканувајќи ги купувачите да земат товар во самиот Персиски Залив, што дополнително ја зголеми побарувачката за танкери.

Додека цената на изнајмувањето танкери се зголеми, трошоците за осигурување од воен ризик се намалија во последните 5 дена на околу 3% од вредноста на бродот. Претходната недела тие изнесуваа 5% од вредноста на бродот.

The post РАПИДЕН РАСТ НА ЦЕНАТА НА ПРЕВОЗОТ НА НАФТА СО ТАНКЕР НИЗ ОРМУСКИОТ ПРОТОК Дневниот приход на тенкерите вртоглаво расте appeared first on plusinfo.mk.

Македонскиот ИКТ сектор продолжува да биде еден од најсилните двигатели на економскиот раст во државата, достигнувајќи вкупни приходи од 1,77 милијарди евра во 2025 година и извоз од 676 милиони евра, покажуваат податоците презентирани на првиот македонско-грчки „Digital Bridge & Business ICT Forum”, организиран од МАСИТ и грчката асоцијација SETPE.

Според анализата на МАСИТ, секторот во 2025 година бележи раст од 7% на приходите и 7,1% на извозот во однос на претходната година. Во индустријата работат 24.134 вработени во вкупно 3.367 активни компании.

Особено значаен е долгорочниот тренд на раст. Во периодот од 2020 до 2025 година, приходите на ИКТ секторот се зголемиле за 80%, од 985 милиони евра на 1,77 милијарди евра, додека извозот пораснал за дури 193%, од 231 милион евра на 676 милиони евра. Во истиот период бројот на вработени е зголемен за 44%, а бројот на компании за 42%.

„-Овие бројки потврдуваат дека ИКТ секторот одамна не е само една од перспективните индустрии во земјата, туку еден од клучните носители на економскиот развој, извозот и висококвалификуваните работни места. Растот што го гледаме во изминатите години е резултат на континуирани инвестиции во луѓе, знаење и иновации, но и доказ дека македонските компании успешно се натпреваруваат на меѓународните пазари- изјави претседателот на МАСИТ, Јордан Димитриевски.

Анализата покажува дека ИКТ секторот учествува со околу 4,5% во БДП на државата и расте речиси двојно побрзо од вкупната економија. Додека вкупниот економски раст изнесува 3,8%, секторот бележи раст од 7,4%.

The post ИКТ СЕКТОРОТ ВО МАКЕДОНИЈА ДОСТИГНА 1,77 МИЛИЈАРДИ ЕВРА ПРИХОДИ Повеќе од 670 милиони евра се од извоз appeared first on plusinfo.mk.

Руските даночни приходи од екстракција на природни ресурси се зголемија повеќе од двојно во април, делумно поради порастот на цените на енергијата на светските пазари предизвикан од конфликтот на Блискиот Исток, објави руското Министерство за финансии.

Минатиот месец, даноците за екстракција на природни ресурси донесоа 917 милијарди рубли (12,2 милијарди американски долари) во руската државна каса, покажаа официјалните податоци. Во март овие приходи изнесуваа 443 милијарди рубљи. Најголем дел од приходите во април, околу 10 милијарди долари, дојдоа од оданочувањето на нафтата.

Април беше првиот месец во кој порастот на глобалните цени предизвикан од конфликтот на Блискиот Исток беше целосно одразен во приходите на рускиот буџет. Москва, сојузник на Техеран, не интервенираше директно воено во американско-израелскиот конфликт со Иран, но кризата на Блискиот Исток ѝ донесе значителни придобивки.

Голем дел од оваа неочекувана заработка сè уште не е депонирана во државната каса. Владата врати околу половина од своите приходи од нафта на домашните нафтени компании, обидувајќи се да го ограничи порастот на цените на бензинот и дизелот на домашните бензински пумпи и да ја поддржи надградбата и поправката на рафинериите.

Нафтениот сектор останува клучен извор на финансирање за војната на Русија во Украина. Затоа, Киев сè повеќе ги таргетира рафинериите, системите за складирање на нафта и терминалите за извоз во напади со беспилотни летала, обидувајќи се да ги намали овие руски приходи, според ДПА.

The post ВОЈНАТА ВО ИРАН ГО НАПОЛНИ РУСКИОТ БУЏЕТ Во април удвоени приходите од нафтата appeared first on plusinfo.mk.

Во првите три месеци од 2026 година, Буџетот бележи стабилна реализација и раст на приходната страна, што укажува подобрена наплата, соопшти Министерството за финансии.

Вкупните приходи во Буџетот достигнаа 81,2 милијарди денари, што претставува раст од 5,7% во однос на истиот период во 2025 година. Вкупните приходи од даноци се зголемни за 4,7%, при што највисок пораст се забележува кај Данокот на добивка од 23,6% и Данокот на личен доход од 12,3%.

Повратот на ДДВ е зголемен за 17,3%, или вкупно кон стопанството се вратени 12 милијарди денари. Воедно, приходите од увозни давачки се повисоки за 9,1%.

Раст е забележан и кај неданочните приходи од 16,4% во првиот квартал од 2026 година споредено со истиот период минатата година.

На расходната страна, вкупните расходи изнесуваат 106,3 милјарди денари, што претставува раст од 18,4% споредено со првиот квартал минатата година. Особено значаен е растот на капиталните расходи, кои во првиот квартал достигнаа 8,3 милијарди денари, што е зголемување од 196,5% во однос на истиот период лани, што укажува на засилена динамика на реализација на капиталните инвестиции.

Министерството за финансии соопшти дека ќе продолжи да работи на одговорно управување со јавните финансии, поддршка на економската активност и реализација на приоритетните развојни проекти.

The post ПОДОБРЕНА Е НАПЛАТАТА ВО ПРВИТЕ 3 МЕСЕЦИ ОД ГОДИНАВА Највисок пораст има кај Данокот на добивка и кај Данокот на личен доход appeared first on plusinfo.mk.

Царинските служби запленија голема количина тутунски производи без акцизни марки во малопродажен објект во Струга, со што е спречена нелегална продажба вредна над 1,8 милиони денари.

Акцијата била спроведена од мобилни царински тимови и службеници од Царинарницата Битола, при редовна контрола на објектот. При претресот биле пронајдени вкупно 1.027 кутии цигари, 1.387 електронски цигари – вејпови, 530 цигарилоси, 503 пакувања тутун за наргиле, 77 пури и 19 пакувања тутун за пушење, сите без акцизни маркички.

Според проценките, со оваа нелегална трговија била избегната акциза во износ од околу 509 илјади денари, што претставува директна штета за државниот буџет.

Од Царинската управа информираат дека против одговорните лица е поведена соодветна постапка, а запленетата стока е одземена.

Царинските служби најавуваат дека контролите ќе продолжат и во наредниот период, со цел сузбивање на нелегалната трговија со акцизни производи, заштита на буџетските приходи и заштита на здравјето на граѓаните.

The post 📽️ 📷 ЗАПЛЕНЕТИ ЦИГАРИ И ВЕЈПОВИ ВО СТРУГА Тутун без маркички вреден 1,8 милиони денари откриен во продавница appeared first on plusinfo.mk.

Странските туристи не само што доаѓаат во се поголем број, туку и трошат повеќе за време на престојот во земјата, објави Централна банка на Албанија според која за периодот јануари-септември годинава, странците потрошиле 4,4 милијарди евра, или 14,5% повеќе споредено со истиот период минатата година.

Само во третиот квартал, туристите потрошиле 2,3 милијарди евра, или 21,6% повеќе на годишна основа.

За периодот јануари-септември, просечната потрошувачка се проценува на околу 431 евро, во споредба со 398 евра во истиот период во 2024 година. Зголемувањето на потрошувачката е директно поврзано и со зголемувањето на бројот на посетители.

Податоците на Интитутот за статистика покажуваат дека за 9 месеци, Албанија ја посетиле 10,2 милиони странски државјани, со зголемување од 5,7% во споредба со истиот период минатата година.

Во исто време, потрошувачката на албанските граѓани што патуваат во странство исто така се зголемила. Според Центарлна банка нивната потрошувачка за 9 месеци достигнала 2,1 милијарди евра, што е зголемување од речиси 20% на годишно ниво.

The post ВО АЛБАНИЈА СЕ ОДМОРАЛЕ 10,2 МИЛИОНИ ТУРИСТИ Тие потрошиле 4,4 милијарди евра appeared first on plusinfo.mk.

Царинската управа во октомври ја надмина наплатата на приходи – во Буџетот се слеале 12,05 милијарди денари (196 милиони евра), за 11,4 милиони евра повеќе од лани, при што најголем раст од 16,6 проценти е забележан во наплатата на приходи од царина, информира Управата.

Од почетокот на годинава, заклучно со октомври наплатените приходи од Царинската управа изнесуваат 1,77 милијарди евра, за 89,4 милиони евра повеќе од истиот период лани.

Приходите од наплата на давачки при увоз на возила се зголемени за 11 проценти. Од почетокот на годинава досега се поднесени вкупно 174 кривични пријави, од кои 89 се за сторени кривични дела со возила.

– Царинската управа, во изминатиот период работи на сите фронтови. Резултатите се препознаени и од Европската комисија, која во последниот извештај нотира високо ниво на напредок во поглавјето Царинска унија со кое раководи Царинската управа. Дадовме гас до максимум, предизвик ни е да се надминеме самите себеси, да ги надминеме резултатите што самите ги постигнавме. Ова се повеќе пари за болници, училишта, патна и железничка инфраструктура – изјави директорот Бобан Николовски, во интервју за Алфа телевизија.

The post ЦАРИНСКАТА УПРАВА УРИВА РЕКОРДИ Само во октомври инкасирала 196 милиони евра appeared first on plusinfo.mk.

Актуелниот европски фудбалски првак Пари Сен Жермен (ПСЖ) објави дека остварил рекордни приходи од 837 милиони евра во претходната сезона, што претставува највисока заработка во историјата на клубот.

Според извештајот на клубот, 175 милиони евра се генерирани од приходи од натпревари, додека 367 милиони евра доаѓаат од комерцијални извори, вклучително и влезот на шест нови спонзори.

– Оваа бројка ја потврдува стратегијата на долгорочен раст и глобално позиционирање на ПСЖ како водечки спортски бренд во Европа – се наведува во соопштението на клубот од Париз.

Вкупните приходи опфаќаат активности не само на машкиот фудбалски тим, туку и на женскиот клуб, како и ракометниот и џудо одделот, кои заедно придонеле за историскиот успех.

Во претходната сезона (2023/24), ПСЖ оствари 806 милиони евра приходи — износ што тогаш беше трет највисок во европскиот фудбал. Со новиот рекорд, клубот од Париз се зацврстува меѓу најмоќните финансиски институции во спортот.

Во мај годинава, списанието „Форбс“ ја процени вредноста на ПСЖ на 4,6 милијарди долари, со што клубот се наоѓа на седмото место во светот според вредноста. На врвот на листата се Реал Мадрид (6,75 милијарди), Манчестер Јунајтед (6,6 милијарди) и Барселона (5,65 милијарди).

– Постигнавме рамнотежа меѓу спортскиот и економскиот успех. ПСЖ не е само клуб – тој е глобална платформа за спорт, култура и брендови – изјави извршниот директор на клубот, Насер Ал-Келаифи, коментирајќи го рекордот.

Со овој резултат, ПСЖ испраќа јасна порака до конкурентите: спортивниот успех и финансиската стабилност можат да одат рака под рака.

The post ПСЖ СО РЕКОРДНИ ПРИХОДИ Францускиот шампион заработи неверојатни 837 милиони евра appeared first on plusinfo.mk.