А од друга страна ушите друго слушаат и на очите не веруваат. Можеби не сте знаеле, ама Македонија е економски лидер во регионот. Кај и да отидете во соседството полошо се живее од овде. Така се фалат од Владата. Најголем економски развој, историски највисоки инвестиции, највисок раст на бруто домашниот производ… се нај, нај, нај! Да не заборавиме и дека минималната плата се качи на 300 евра.

Апсурд до апсурд, човек не знае дали и апаратче за уши да си купи. За жал таква е Македонија во овие пет години, времето на Заев и постзаевизмот. Економските подвизи, квалитетниот живот и инвестиците ги има само во фалбите на власта преку медиумите и во кафеанските муабети на нивните поддржувачи. Тие, на пример, повеќе му веруваат на зборот на премиерот, отколку на својот фрижидер.

Но, тука сакам да потенцирам едно друго лидерство на власта: задолжувањето! Ниту една досегашна македонска власт не се задолжувала толку многу како оваа, ниту пак, без план, трошела толку многу како оваа. За ова мораме да и оддадеме призание – навистина се лидери.

Да не бидам сфатен погрешно, не сум против тоа државата да се задолжува. Таа и има обврска да го прави тоа во кризни времиња, затоа што државата има најлесна достапност до свежи пари, па макар и тие да биле скапи. Но категорично сум против задолжувањето да е без план каде и како ќе се потрошат позајмените пари и особено сум против ако е без соодветна контрола при трошењето.

Еве на пример, денес ќе аплаудирав за новото задолжување од речиси 1 милијарда евра, ако претходно Владата излезеше во јавноста и објаснеше на какви се проекти ќе се потрошат парите. Флоскулата „парите ќе служат за поддршка на буџетот” не е доволна или пак остава простор за сомнавање дека позајмицата ќе се претопи од државната сметка во фирми блиски на луѓето од власта.

А пред да се направи задолжувањето можеше и вака да се објасни: на пример, за автопатот од Скопје до косовска граница од овие пари ќе се вложеа 30 милиона евра. Таа инвестиција ќе овозможи поврзување на државата со Јадранското и Јонското Море, а ќе се врати за 15 години.

Или пак можеа како еден од проектите да кажат вака: ќе го спасуваме Преспанското езеро, а потоа ќе направиме младински кампови со сите содржини за да можеме да ги привлечеме средношколците и студентите од цела Европа да поминат бар 7 дена тука. Ќе потрошиме од овие пари 300 милиона евра, ќе се гради две години, а инвестицијата ќе се врати за 12 години.

Или ќе направиме толку и толку хидроцентрали, или…

На ваков начин јасно и гласно ќе беше кажано дека позајмените пари ќе се инвестираат во иднината на државата и ќе се враќаат од проектите во кои се вложува. А вака, кредитите ќе се стопат за неколку месеца „ќе се поддржи буџетот”, а потоа во следните 30-40 години ќе ги враќаат идните генерации.

Македонија е толку презадолжена, заради расипништвото, не само на оваа власт, туку и на претходните, што и не знаеме дали е доволно да кажеме дека нашите деца ќе ги враќаат кредитите. Можеби и децата на нивните деца ќе го почуствуваат товарот што сегашната власт им го остава!

The post Чии деца ќе ги враќаат огромните кредити на СДСМ и на ДУИ? appeared first on plusinfo.mk.

– Растот на јавниот долг секогаш треба да биде предмет на критика, но доколку споредуваме може лесно да се увиди кој какви политики спроведувал. Во период од 10 години кога мандатот го има ВМРО-ДПМНЕ јавниот долг беше зголемен за 2,9 милијарди евра во време на три кризи: светска финансиска криза, должничка криза во еврозоната и политичка криза. Сегашнава Влада остварува рекорди единствено во најлоши рејтинзи во економските извештаи и има катастрофални резултати во справување со кризни состојби. Во 2020-та година со дефицит од 53,4 милијарди денари и пад на БДП од 6,1%, влеговме во рецесија најдлабока од осамостојувањето и најголема во споредба со повеќето земји од регионот – вели Илиеска.

Таа додава дека во 2021 година со дефицит на буџетот од 38,8 милијарди денари и 4% раст на БДП, го доживеавме најлошото остварување во споредба со земјите во регионот.

– Од почетокот на оваа година до сега имаме дефицит на буџетот од 13 милијарди денари, кој за последниве 26 месеци вкупно изнесува 1,7 милијарди евра, што јасно покажува дека економската криза сериозно го руши економскиот стандард на граѓаните. Дополнително, инфлацијата и нискиот раст водат во ситуација на стагфлација. За жал, со економската криза се справуваат исто како што се справија и со здравствената криза – додава таа.

The post ВЛАДАТА Е РЕКОРДНА САМО ВО ЗАДОЛЖУВАЊЕТО Во ВМРО-ДПМНЕ се загрижени за јавниот долг appeared first on plusinfo.mk.

Власта вели дека долгот се држи под контрола, а се зголемува поради тоа што државата мора да се справи со последиците од коронакризата и да вбризга дел од парите во економијата и кај граѓаните преку четвртиот пакет економски мерки. Опозицијата, пак, со став дека „должничкото сценарио станува драматично“. Експертите се со став дека е добро да не се надмине границата, зашто ќе биде проблем враќањето на долгот ако економијата не почне да се опоравува.

Министерот за финансии Фатмир Бесими за надминатите 60,3 отсто од БДП со долгот ја обвини редовната ревизија на податоците за домашниот бруто производ направена од Државниот завод за статистика.

Тој рече дека како резултат на ревизијата на податоците за БДП јавниот долг веќе не изнесува 59,5 проценти од БДП, како што беше објавено кога Владата ја усвои прекроената државната каса, туку сега е 60,3 отсто од БДП. Оваа ревизија, како што информира, ја помести и вредноста на буџетскиот дефицит во однос на БДП од претходните 8,4 на 8,5 проценти.

Овој податок покажува дека е надминат критериумот од Мастрихт според кој со ваков процент на задолженост земјава влегува во категоријата високозадолжени земји.

Според усвоениот критериум од Мастрихт, земјите со долг кој надминува 60 проценти од БДП се рангираат како високо задолжени. Или, според класификациите на Светската банка, земјите со јавен долг од 40 отсто од БДП се сметаат за ниско задолжени, оние со долг од 40 до 60 проценти од БДП се умерено задолжени, а земјите со долг над 60 отсто од БДП се во категоријата на високо задолжени земји.

Опозицијата ова веќе подолг период го толкува како драматично должничко сценарио. Претседателот на ВМРО-ДПМНЕ, Христијан Мицкоски, неодамна напиша пост на својот профил на Фејсбук во кој предупреди дека се надминува границата од Мастришките критериуми од над 60 отсто од БДП.

„Должничкото сценарио станува драматично, додека Владата нема капитални проекти, а ги троши парите на граѓаните. Економијата на Заев блеска со порази, неспособност и криминал. Го достигнаа историскиот максимум во задолжувањето, исто како и во кризата и неспособноста на било која влада до сега“, напиша Мицкоски.

Во тој контекст се и дискусиите по ребалансот на пратениците од опозициската партија поврзани со ребалансот на буџетот.

– Јавнот долг порасна за милијарда евра, а се нема план како да се намали. Дури и фискалната стратегија не содржи план за намалување на долгот. Дефицитот ќе стигне на 920 милиони евра и е најголем во однос на сите дефицити на државните буџети. Ова е фактички најлошо сценарио од кое тешко дека ќе излеземе – рече вчера во својата дикусија пратеникот Никола Мицевски.

Буџетскиот дефицит кој сега изнесува 8,5 проценти од БДП и номинално е ист како и претходно – 920 милиони евра, ќе предизвика ново зголемување на јавниот долг, зашто тие пари ќе се позајмат сега веќе и од домашни извори.

За економистите државата фактички е влезена во црвената алармантна зона и тешко ќе може да излезе од таму ако не заживее економијата.

Економскиот институт „Фајнанс тинк” во својата анализа од јуни алармираше дека порастот на јавниот долг и продолжувањето на здравствената криза, следната година ќе создадат проблеми бидејќи доспева обврзницата од половина милијарда евра.

„Обезбедените средства за време на ковид-19 од близу една милијарда евра се доволни да го финансираат предвидениот буџетски дефицит во 2020 година и отплатата на еврообврзницата од 270 милиони евра во декември 2020, но продолжените економски ефекти од пандемијата и обврзницата која достасува во јули 2021 година во вредност од половина милијарда евра ги зголемуваат потребите за финансирање и притисокот врз јавниот долг“, наведоа тогаш од „Фајнанс тинк“.

Професорот Борче Треновски вели дека е добро да не се надмине границата од 60 отсто, зашто земјата може да биде доведена во тешка состојба да се справи со неговото враќање.

– Целата наша стратегија е дека ние брзо ќе се опоравиме и ќе можеме во блиска иднина безболно да го вратиме нивото на јавен долг и дека ќе имаме економски раст следната година, и годината после неа и ќе се опоравиме. Меѓутоа што ако хипотетички ситуацијата не е баш така? Значи што би можеле да направиме во тој момент? Од каде ќе најдеме ние извори за да го поттикнеме нашиот економски раст и да можеме да го вратиме долгот и да се раздолжиме имајќи предвид дека ќе мора дополнително да се задолжуваме за да се раздолжиме во периодот кој доаѓа. Шеесетте проценти е онаа психолошка граница која беше психолошки ограничена, меѓутоа истражувањата покажуваат дека не е пожелно да се надминува оваа граница – изјави за „Денар“ професорот Борче Треновски.

Власта се правда дека буџетот е стабилен, а економијата почнува да се опоравува па враќањето на долгот ќе биде полесно.

The post Се вклучи црвениот аларм на презадолженост, нѐ очекува ли грчко сценарио? appeared first on plusinfo.mk.