Проблемот со ограничениот престој од 90 дена во рок од 180 дена за македонските превозници во Шенген зоната е сериозен, а институциите веќе работат на трајно решение, изјави вицепремиерот и министер за транспорт Александар Николоски.

– Досега системот беше книжeн и во пракса постоеја одредени толеранции. Со електронска евиденција тоа веќе нема да биде возможно. Добро е што превозниците реагираа, бидејќи нивната реакција придонесе Европската комисија предвреме да ја презентира новата визна стратегија – рече Николоски, во гостување на „Топ Тема“ на телевизија Телма.

Тој појасни дека во новата европска визна политика веќе е вметнато она што Македонија го побарала, а тоа е професионалните возачи, без разлика дали управуваат камиони или автобуси, да добијат посебен статус.

Николоски информираше дека Хрватска веќе има закон во собраниска процедура, Романија подготвила законски драфт, а по разговорите во Унгарија, се очекува решение и таму по изборите. Преостанати за усогласување се Австрија и Германија, како најважни транзитни и крајни дестинации за македонските превозници.

Во однос на Велика Британија, која е надвор од Шенген, вицепремиерот објасни дека таму се применува постоечката пракса на доделување работни визи. Паралелно, се работи и со Бугарија и Грција на модели за непречен дневен транзит на професионални возачи во пограничните региони.

Додаде дека поради потребното време за усогласување на сите постапки, договорено е воведувањето на новиот електронски систем за евиденција да се одложи за македонските граѓани до 30 септември 2026, а дотогаш ќе важи досегашната книжна евиденција.

Во однос на преполовените европски квоти за извоз на челик, Николоски рече дека тоа е едно од најголемите економски предизвици со кои се соочува домашната металуршка индустрија,

Тој објасни дека квотите што Европската Унија ги применува за земјите што не се нејзини членки потпаѓаат под таканаречени „квоти за трети земји“, во чија рамка се наоѓа и Македонија. Бидејќи во истиот систем е вклучена и Кина, голем дел од количините се алоцираат токму таму, што го ограничува извозот од регионот.

Информираше дека паралелно со тоа, од јануари 2027 година треба да започне пресметувањето на јаглеродната компонента во увезените производи во рамките на СИБАМ јаглеродната такса, која ќе санкционира продукција извршена со т.н. „нечиста енергија“, доколку земјата извозник нема воспоставено сопствен систем за евиденција и наплата на јаглеродни емисии.

Министерот посочи дека ниедна земја од регионот сè уште нема воспоставено таков механизам, делумно поради доцнењето на Европската Унија со финализирањето на правилата, кои се очекува да бидат објавени до септември годинава.

Во однос на квотите, Николоски потврди дека се водат интензивни разговори преку Министерството за надворешни работи и надворешна трговија и македонската Мисија во Брисел.

– Решение мора да се најде во рамки на тоа да земјите од Западен Балкан, или ако не можеме да влеземе како група, тогаш, Македонија да биде исклучени од политиките за трети земји, а тоа е единственото логично решение, рече министерот, укажувајќи дека регионот веќе е силно интегриран во европските економски текови, со договори за слободна трговија и статус на придружни членки и кандидати – рече тој.

Тој предупреди дека доколку не се најде решение, земјите од регионот би можеле да бидат принудени да разгледуваат реципрочни мерки, што не би било во интерес никому, како што рече имајќи во предвид дека странски инвеститори во Македонија произведуваат полупроизводи за европските пазари.

The post ВЛАДАТА БАРА ПОСЕБЕН СТАТУС ЗА ВОЗАЧИТЕ ВО ШЕНГЕН Николоски најавува решение до септември 2026 appeared first on plusinfo.mk.

Проблемот со превозниците на товарен превоз и на патници со влезот и излезот од шенген зоната најверојатно ќе се реши преку издавање годишни визи со повеќекратен влез и излез, изјави премиерот  Христијан Мицкоски, по средбата со странските инвеститори.

Мицкоски информира дека во процесот Македонија е проактивна и веќе разговара на билатерално ниво со неколку држави од ЕУ за решавање на проблемот.

-Предизвикот со транспортерите е пред нас и ние ќе мораме да го решаваме. Беше тука комесарот кој е задолжен за влез/излез системот. Ние како држава тука сме проактивни, нашата дипломатија и министерствата за внатрешни работи и транспорт работат заедно. Веќе имаме на билатерална основа разговор со неколку држави од Европската Унија кои истовремено се и членки на Шенген зоната, така што најверојатно начинот на кој ќе се реши тој проблем, ќе биде преку издавање годишни визи со повеќекратен влез и излез од Шенген зоната – рече Мицкоски.

Тој потсети дека транспортерите не ги опфаќаат само карго превозниците, туку и патничкиот сообраќај.

The post ПРЕВОЗНИЦИТЕ ЌЕ ДОБИВААТ ВИЗИ СО ПОВЕЌЕКРАТЕН ВЛЕЗ ВО ШЕНГЕН ЗОНАТА? Македонија почна билатерални разговори со повеќе земји на ЕУ appeared first on plusinfo.mk.

Сè уште нема конкретно решение за олеснување на шенгенското правило за престој 90 во 180 на превозниците од Западен Балкан, а на транспортните компании поради правилото им снемува возачи. Тие бараат ЕУ и земјите од Западен Балкан итно да договорат преодно решение кое ќе им овозможи на превозниците нормално да функционираат додека не стапат на сила измените на визната стратегија во ЕУ.

Билјана Муратовска, генерална секретарка на македонската транспортна асоцијација Макам-транс вели дека процесите треба да се забрзаат и она што Европската унија го понудила како решение во измените на визната стратегија да стане реалност за превозниците.

– Она што го баравме е прифатено – возачите на камиони да бидат прифатени како професионалци, не како туристи, но потребно е време во Европската Унија целосно да се реши проблемот на превозниците од Западен Балкан. Процедурите за усогласување и прифаќање на измените на визната стратегија се подолги во Унијата поради големиот број земји кои треба да дадат свое мислење и да ги прифатат измените, па потоа да се гласа низ телата на ЕУ. Затоа е договорено да се формира работна група која ќе најде привремено решение за проблемот – вели Муратовска.

Таа додава дека групата досега имала два состанока, а нов е закажан за две недели и очекува да се договори преодно решение кое ќе биде прифатливо за превозниците.

– Во меѓувреме ние како асоцијација на превозниците не запираме со активностите. Испративме писмени дописи до амбасадите на секоја земја од ЕУ, до сите комори во земјава и до евроамбасадорот Михалис Рокас со барање да се забрза процесот. Очекуваме да се предложи некаков модел на виза која ќе им овозможи на возачите полесно да се движат низ Шенген зоната. Во дописите бараме и да се забрза процесот на воведувањето на новите измени на визната стратегија на ЕУ за да не се случи превозните компании да останат без возачи, па проблемот да се прелее и кај компаниите кои извезуваат во ЕУ – вели Муратовска.

До ново привремено или трајно решение, објаснува таа, на сила е правилото за престој 90 во 180 на кое превозниците се усогласуваат додека можат.

– Ако се продолжи со сегашната политика, мислам дека нема да има потреба превозниците повторно да ги блокираат границите, бидејќи, како што и многупати досега кажав, поради немање возачи превозниците ќе запрат со превозот, а ЕУ сама ќе се блокира. Последиците нема да ги трпат само превозните компании, туку и останатите компании, па и граѓаните како во Европа, така и во земјите засегнати со проблемот. Затоа е и нашето барање процесите да се забрзаат, а коморите и странските компании во земјава да лобираат во своите земји, во асоцијациите и во ЕУ да се изнајде и да се применува преодното решение – вели таа.

Превозниците, додава таа, не бараат нешто што не може да се овозможи, туку само бараат да се олесни пристапот до пазарот на транспорт за кој како превозници веќе имаат потпишано билатерални договори со сите земји.

– Несфатливо е тоа што Европската Унија не ги усогласи дозволите за пристап до пазарот на транспорт и визите, па сега го имаме овој проблем. Дополнително, намерно или не, проблемот е направен при изземањето на патните превозници од регулирањето на статусот на останатиот превоз – бродскиот и авионскиот – вели Муратовска.

Комисијата, според изјавите на претставниците од другите балкански земји, досега разгледувала пет предлози и преодно решение, но основа на сите е возачите да не се апсат и депортираат, како досега од одредени земји, кога ќе го надминат дозволеното времетраење на престојот во таа зона, туку да им се дозволи да го завршат превозот на товар што го започнале.

Превозниците од Македонија, Србија, Босна и Херцеговина и од Црна Гора во периодот од 26 до 30 јануари, ги блокираа премините за товарен сообраќај поради строгите правила на ЕУ за престој во Шенген зоната.

Тие ги прекинаа блокадите на товарните премини откако Европската комисија почна да ја разгледува можноста за воведување специјални визи за професионалните возачи на камиони, што би им овозможило да останат подолго во земјите од ЕУ и непречено да ја извршуваат својата работа.

Во предложената стратегија на Европската Унија за визи, чија работна верзија беше презентирана на 29 јануари во Брисел, се наведува дека професионалци од трети земји, како што се возачи на камиони, уметници на турнеи, спортисти кои присуствуваат на спортски настани, експерти кои работат на прекугранични проекти, работна сила што ги поддржува индустриите и услугите на ЕУ, имаат потреба да останат во ЕУ подолго од дозволениот лимит, без намера за трајно населување.

Новиот систем за влез и излез кој е проблематичен за превозниците, строго го ограничува престојот на возачите од земјите надвор од ЕУ на 90 дена во период од 180 дена, па поради природата на нивната работа, професионалните возачи многу брзо го достигнуваат овој лимит, по што им се заканува депортација или забрана за влез во ЕУ.

The post ТРОМОСТА НА ЕУ ГИ ВОЗНЕМИРУВА ВОЗАЧИТЕ Превозниците бараат да се забрза примената на измените за да не останат без возачи appeared first on plusinfo.mk.

Во очекување на трајно решение Европската комисија треба реално да го идентификува проблемот со транспортниот сектор и непречениот транспортен тек и во најскоро време да имплементира соодветни мерки кои ќе обезбедат предвидливост и непречена работа на транспортните компании кои работат во меѓународниот патен сообраќај, рече министерот за транспорт Алексаднар Николоски по денешниот состанок со претставници на Европската комисија.

Заменик претседателот на Владата и министер за транспорт Александар Николоски, заедно со министерот за внатрешни работи, Панче Тошковски и заменик министерката за европски прашања, Викторија Трајков, денеска одржаа конференциски состанок со претставници на Европската комисија како и со директорката на Директоратот за проширување, Валентина Суперти. На состанокот беа вклучени и ресорните министри за транспорт, за внатрешни работи и за евроинтеграции од земјите од Западен Балкан, Црна Гора, Србија, Босна и Херцеговина, Косово и Албанија.

На состанок се разговарало за надминување на проблемите со кои се соочуваат транспортерите во земјите на Шенген зоната, како и наоѓање долгорочни решенија за превозниците.

Николоски ја поздрави иницијативата на ЕК за надминување на проблемот и преку аргументирани факти го истакна ставот на Владата преку кој се бара соодветно решение за овие категории работници поради потребата од извршување на работните обврски во рамки на земјите од Шенген зоната.

Претставниците на Европската комисија ја потврдија новата визна стратегија на ЕУ во која превозниците се прифатени како професионалци и истакнаа дека ја разгледуваат можноста оваа категорија работници да биде третирана исто како и пилотите и машиновозачите.

На состанокот беше потврдено дека биометриската евиденција преку електронскиот систем за влез и излез од/во земјите од Шенген зоната, наместо од почетокот од април, се одложува до септември оваа година.

Во меѓувреме се формира работна група на експертско ниво која веќе следната недела треба да се состане и да ги материјализира заклучоците од денешниот состанок на високо ниво.

На состанокот ЕК ја потенцира важноста на транспортниот сектор и влијанието врз целокупната економија и најави целосна посветеност во изнаоѓање на трајно прифатливо решенија кое е во интерес на сите засегнати страни.

На состанокот беше потенцирано дека ова е многу важна тема за Европската Унија и во наредниот период ќе се продолжи комуникацијата меѓу сите засегнати страни.

Македонската Влада веќе изрази целосна поддршка на превозниците и во насока на изнаоѓање прифатливо решение ги презеде сите мерки што ѝ стојат на располагање со цел да се овозможи непречена работа во рамки на меѓународниот патен сообраќај.

The post СЕ РАЗГЛЕДУВА МОЖНОСТА ВОЗАЧИТЕ ДА БИДАТ ТРЕТИРАНИ КАКО ПИЛОТИТЕ И МАШИНОВОЗАЧИТЕ Биометриската евиденција е одложена до септември годинава appeared first on plusinfo.mk.

Превозниците на товар од Србија и Босна и Херцеговина продолжуваат да ги блокираат товарните терминали на граничните премини петти ден, додека превозниците во Црна Гора и Северна Македонија ги прекинаа блокадите откако ЕК објави нова визна стратегија што би го решила проблемот со ограничувањата за престој на професионалните возачи во Шенген зоната.

Во вторник, 3 февруари, ќе се одржи состанок на министрите од сите земји од Западен Балкан со претставници на Европската комисија за проблемот на превозниците од регионот во Шенген зоната, за што шефот на Делегацијата на ЕУ во Босна и Херцеговина, Луиџи Сорека ја информираше синоќа претседавачката со Советот на министри на Босна и Херцеговина, Борјана Кришто.

Тие телефонски разговараа за прекинот на непречениот проток на стоки и функционирањето на меѓународниот транспорт, предизвикани од блокадите на граничните товарни терминали кон земјите од ЕУ.
Новата визна стратегија на ЕУ што ја презентираше ЕК, како што беше најавено, ќе им помогне на превозниците од Западен Балкан, бидејќи „ЕУ сака да овозможи пофлексибилни правила за прекуграничните работници“.

Возачите на камиони од Северна Македонија, Србија, Црна Гора и Босна и Херцеговина почнаа да ги блокираат граничните премини во понеделникот, 26 јануари, сметајќи дека новиот систем за контрола на влез и излез (ЕЕЅ) во Шенген зоната дискриминира превозници од ЕУ.

The post СРПСКИТЕ И БОСАНСКИТЕ КАМИОНЏИИ НЕ СЕ ПОВЛЕКУВААТ ОД ГРАНИЦИТЕ Европската комисија ги покани министрите од Западен Балкан на средба appeared first on plusinfo.mk.

Новата визна стратегија на Европската Унија ќе им помогне на транспортерите од Западен Балкан, изјави денеска извршната потпретседателка на Европската комисија за технолошки суверенитет, безбедност и демократија, Хена Виркунен, и рече дека ЕУ сака да овозможи пофлексибилни правила за прекуграничните работници.

Одговарајќи на новинарско прашање, Виркунен истакна дека проблемите на возачите од Западен Балкан се познати на Комисијата, како и дека новата визна стратегија предвидува одредени флексибилности, но дека безбедноста на границите сè уште останува приоритет.

-Системот за влез и излез не воведува нови барања за краткорочни престои во Шенген – рече Виркунен.

Таа истакна дека возачите кои ја преминуваат границата секој ден веќе имаат одредени исклучоци бидејќи ги користат истите контролни пунктови, додека предизвиците се појавуваат само во специфични случаи.

– Ги анализираме овие предизвици и работиме на нивно решавање како дел од стратегијата – додаде Виркунен.

За превозниците од Западен Балкан, во моментов правилата остануваат исти, но Комисијата планира дополнителни решенија што би можеле да ја олеснат секојдневната работа и да ги намалат тензиите на границите.

Според европската процедура, во следната фаза, ЕК го испраќа предлогот за новата визна стратегија до Советот на ЕУ и Европскиот парламент, каде што се дискутира предлогот, се даваат коментари и е можно да се побараат измени или дополнувања.

По дискусиите меѓу Комисијата, Советот и Парламентот, ставовите на трите страни се усогласуваат сè додека не се постигне конечен договор, по што документот станува правен акт.

Во стратешката анализа објавена денеска, Комисијата наведува дека постојниот режим од 90 дена престој во период од 180 дена создава сериозни проблеми за секторите што зависат од постојана прекугранична мобилност, вклучително и товарниот транспорт, што е прашање од особено значење за земјите од Западен Балкан.

Во документот на Европската комисија се наведува дека сегашните правила на ЕУ дозволуваат престој во Шенген зоната до 90 дена во рок од 180 дена, додека за секој подолг престој е потребна долгорочна виза или дозвола за престој.

Сепак, Комисијата забележува дека одредени категории професионалци од трети земји, кои во голема мера зависат од честа мобилност меѓу земјите-членки, имаат потреба да останат во ЕУ подолго од дозволениот лимит, без намера за трајно населување.
Меѓу тие категории, посебно се споменуваат возачите на камиони кои вршат услуги за компании во Европската Унија, заедно со уметниците на турнеја, спортистите и професионалците ангажирани во прекугранични проекти.

За земјите од Западен Балкан, а особено за Србија, ова прашање има дополнителна тежина бидејќи голем дел од товарниот сообраќај кон ЕУ го вршат возачи кои не се државјани на земјите-членки, пишува Блиц.

Ограничувањата за престој, во комбинација со долги чекања на границите, доведуваат до прекини, дополнителни трошоци и намалена конкурентност на транспортните компании од регионот.

Комисијата во документот наведува дека постојниот систем е дополнително комплициран со билатерални договори склучени од поединечни земји-членки пред стапувањето во сила на Шенгенските правила, кои дозволуваат престој подолг од 90 дена само на територијата на одредена држава. Ваквите решенија, како што се оценети, ја нарушуваат унифицираната примена на Шенгенскиот систем.

Европската комисија најавува дека ќе работи во соработка со земјите-членки за да пронајде прагматични решенија што би овозможиле продолжен краткорочен престој за одредени категории граѓани на трети земји, а воедно би ги зачувала безбедносните стандарди и економските придобивки за ЕУ.

Во овој контекст, Комисијата ја разгледува и можноста за воведување нова законска рамка на ниво на ЕУ, со посебен фокус на правилата за продолжен краткорочен престој, како и постепено укинување на постојните билатерални договори што отстапуваат од единствените Шенген правила.

Во документот се нагласува дека засега станува збор за стратешки размислувања и анализи, и дека сите промени на правилата ќе зависат од понатамошните преговори меѓу Европската комисија и земјите-членки.

Еден од следните чекори е да се разгледаат нови правила за продолжен краткорочен престој за професионалци од трети земји, вклучително и возачи на камиони.

The post ЕУ НАЈАВУВА ФЛЕКСИБИЛНИ ПРАВИЛА ЗА ПРЕКУГРАНИЧНИТЕ РАБОТНИЦИ Новата визна стратегија ќе им помогне на превозниците од Западен Балкан appeared first on plusinfo.mk.

Бугарските превозници се жалат дека претрпуваат големи финансиски загуби поради блокадите што ги вршат превозниците од Србија, Босна и Херцеговина, Црна Гора и Северна Македонија протестираа поради проблемите со новиот систем за влез и излез од ЕУ. Транспортерите од Бугарија поради блокадите мораат да користат алтернативни патишта до европските дестинации, кои минуваат низ Романија, што го продолжува нивното растојание за 500-600 км, пишуваат бугарски медиуми.

Превозниците од Србија, Босна и Херцеговина, Црна Гора и Северна Македонија протестираа поради проблемите со новиот систем за влез и излез од ЕУ и економските загуби што произлегуваат од тоа за превозниците поради ограничувањето на престојот на територијата на земјите-членки на 90 дена во рок од 180 дена, објавија „Нова“ и „БНТ“.

Вчера, премините со Србија беа блокирани за тешки товарни возила во двата правци. Денес, по полноќ, сообраќајот беше ограничен за возила над 3,5 тони на нашите гранични премини со Северна Македонија „Врашка Чука“, „Брегово“, „Стрезимировци“, „Ѓуешево“, „Делчево“ и „Златарево“, пишуваат бугарските медиуми.

На заедничката граница меѓу Бугарија и Северна Македонија, блокадата ги опфаќа сите соседни гранични премини – Деве Баир – Ѓуешево, Делчево – Станке Лисичково и Ново Село – Златарево, на територијата на Република Северна Македонија. Бугарските возачи што минуваат се навремено известени за ограничувањата и опциите за чекање, со цел да се спречат метежи и тензии, пишуваат бугарските медиуми.

Протестот е планиран за 7 дена, но може да заврши порано доколку се одржи состанок со претставници на здруженијата и Европската комисија.

Во бугарските медиуми се пренесуваат ставови на транспортни здруженија дека ситуацијата е „економски неодржлива“ за компаниите, а се најавуваат и разговори меѓу претставници на транспортниот сектор и бугарските институции за координација на мерките и евентуален заеднички настап кон Европската комисија, со цел да се ублажат последиците од новиот систем за влез и излез во ЕУ.

Дополнително, бугарското Министерство за надворешни работи преку медиумите соопшти дека внимателно ја следи состојбата и дека, доколку ситуацијата ескалира, Бугарија ќе ги искористи дипломатските канали и контактите со Европската комисија за да се олесни режимот и да се најде решение за проблемите со новиот систем за влез и излез во ЕУ и примената на правилото 90/180 дена.

The post БУГАРСКИТЕ ПРЕВОЗНИЦИ СЕ ЖАЛАТ НА БЛОКАДИТЕ Трпат загуби, возат по 500-600 километри повеќе appeared first on plusinfo.mk.

Превозниците од Босна и Херцеговина, Србија, Црна Гора и Северна Македонија масовно излегоа на протест поради новите правила за влез во Шенген-зоната и воведувањето на дигиталниот систем ЕЕС, што предизвика сериозен сообраќаен хаос на клучните гранични премини кон Европската унија.

Во акцијата, според здруженијата на превозници, учествуваат околу 75.000 камиони, а блокирани се товарните премини кон Хрватска, Унгарија, Романија и кон Бугарија. Колоните на камиони се протегаат со километри, а застојот веќе се чувствува во снабдувачките ланци, особено во транспортот на прехранбени производи и индустриска стока.

Превозниците предупредуваат дека новиот дигитален систем за евиденција на влез и излез од Шенген-зоната дополнително ги забавува процедурите, бидејќи секое возило и секој возач мора поединечно да мине низ подетални проверки, што драстично го зголемува времето на чекање на границите.

Според нив, проблемот не е во самата дигитализација, туку во начинот и темпото на нејзино воведување, без доволно техничка подготвеност и без транзициски период што би спречил вакви блокади. Велат дека трошоците ги плаќаат превозниците, но и економиите на земјите од регионот, кои во голема мера зависат од копнениот извоз кон ЕУ.

Од здруженијата најавуваат дека блокадите ќе продолжат доколку не се отвори итен дијалог со институциите на Европската унија и со граничните служби на земјите членки, со цел да се најде практично решение што нема да го парализира товарниот сообраќај.

Во меѓувреме, надлежните служби во земјите од регионот апелираат на трпение, но признаваат дека ситуацијата е сериозна и дека постои ризик од дополнително влошување доколку протестите ескалираат во наредните денови.

Воведувањето на системот EES е дел од пошироката стратегија на Европската унија за засилена контрола на надворешните граници и дигитално следење на движењето на патници и возила од трети земји, но случувањата на терен покажуваат дека примената на новите правила носи сериозни последици за транспортниот сектор на Балканот.

ЕВРОПСКАТА КОМИСИЈА ЌЕ ГО РЕШАВА ПРОБЛЕМОТ СО ПРЕВОЗНИЦИТЕ ПРЕКУ ВИЗНАТА СТРАТЕГИЈА Ги разбира и стравовите на превозниците од Западен Балкан

НИКОЛОСКИ Ѝ ПОНУДИ ТРИ РЕШЕНИЈА НА ЕУ ЗА ПРОБЛЕМОТ НА ПРЕВОЗНИЦИТЕ Се очекува вистинска реакција, наместо економски колапс на регионот

The post 75.000 КАМИОНИ ГИ БЛОКИРАА ГРАНИЦИТЕ КОН ЕВРОПСКАТА УНИЈА Балканско востание на транспортерите appeared first on plusinfo.mk.

Доколку се реализира најавата на превозниците од Западен Балкан, в понеделник во земјава ќе се затворат за товарен сообраќај граничните премини: Деве Баир, Делчево, Ново Село, Дојран, Богородица, Меџитлија, Ќафасан, Блато и Блаце, а Табановце – Прешево ќе биде затворен од српска страна.

Поради воведувањето на новиот систем за влез и излез (ЕЕС) на Европската Унија, македонските превозници, како и од Косово, Србија, Црна Гора и Босна и Херцеговина, најавија дека в понеделник ќе почнат седумдневна блокада на граничните премини што одат кон шенген-зоната. Блокадата ја поддржаа и превозниците од Црна Гора.

Билјана Муратовска, генерален секретар на Асоцијацијата на здруженијата на работодавачите на превозните трговски друштва на Република Македонија, „Макам-транс“, изјави дека се свесни за последиците од блокадата, но истакнува дека ако се реализираат нивните барања, придобивките ќе бидат огромни во однос на раст и развој на економијата во државата и во Западен Балкан.

Муратовска вели дека засега нема никакви сигнали од Европската комисија за какви било преговори во однос на решавање на проблемот со евиденција на престој во шенген-зоната во согласност со правилото 90/180 дена за професионалните возачи.

– Доколку до понеделник не се добие каква било информација од ЕУ, протестот во сите четири држави ќе почне точно во 12 часот за сите возила што излегуваат од државата, а за сите возила што ќе влегуваат во државата граничните премини се затвораат во 00.00 часот со цел сите што се враќаат дома да може да влезат и да му се приклучат на протестот – изјави Муратовска.

Главното барање на превозниците е да се најде решение за престојот на возачите во шенген-зоната, како што појаснува Муратовска, да не се евидентираат денови или да ни издаваат некој вид визи што не се лимитирани со број на денови.

– Новите правила ќе значат целосен колапс на економијата во државата, односно во целиот регион на Западен Балкан, вклучувајќи ја и Турција (држави што не се членки на ЕУ и на шенген-зоната), поради прекин на синџирот на снабдување. А транспортната индустрија во која има вложен огромен капитал и обезбедува прилив на ефективни странски пари во буџетот ќе биде целосно разнишана – укажува Муратовска.

Протестот, истакнува, почнува на 26 јануари, а според реакцијата на ЕУ, ќе зависи дали ќе почне или ќе трае кратко, но сепак максимално траење на блокадите ќе биде 7 дена, што е синоним за еден просечен циклус на превоз на стока.

– Во земјава се затвораат за товарен сообраќај граничните премини: Деве Баир, Делчево, Ново Село, Дојран, Богородица, Меџитлија, Ќафасан, Блато и Блаце, а Табановце – Прешево ќе биде затворен од српската страна. Со оваа блокада свесни сме дека ќе има одредени минимални финансиски загуби за сите, но сепак придобивките од ова, ако се реализираат нашите барања, ќе бидат огромни во однос на раст и развој на економијата во државата и во Западен Балкан – вели Муратовска.

Вицепремиерот и министер за транспорт Александар Николоски претходно изјави дека една година алармираат за проблемот со транспортерите и со електронската евиденција во ЕУ истакнувајќи дека се работи за огромен економски проблем, кој може целосно да ги колабира македонската и регионалната економија.

Од Европската Унија претходно соопштија дека нема никакви промени кај престојот во новиот систем за влез и излез.

– Системот за влез и излез (ЕЕС) на ЕУ не воведува никакви нови барања во врска со краткиот престој во шенген-зоната – изјави на 19 овој месец портпаролот на Европската комисија за внатрешни работи, Маркус Ламерт.

Во врска со тврдењата на здруженијата на превозниците од Западниот Балкан дека ЕЕС „во основа ги остава нивните работници и возачи без работа“ поради што се најавени блокади на граничните премини меѓу балканските земји и шенген-зоната за 26 јануари тој посочи на причините за воведување на системот..

-Она што го прави ЕЕС е да обезбеди подобро спроведување на постојните правила и систематско откривање на неправилности – рече Ламерт нагласувајќи дека ЕК внимателно го следи прашањето за најавите на превозниците и е во контакт со партнерите од Западниот Балкан.

Ламерт потенцира дека со ЕЕС не се воведени никакви измени во однос на постојните правила за престој во шенген-зоната.

– Според правилата, државјани на трети земји без виза имаат право да останат во шенген-зоната вкупно 90 дена во кој било период од 180 дена. Сè што е надвор од ова мора да биде покриено со виза за долг престој или со дозвола издадена од земја членка – рече Ламерт.

Тој додаде дека шенген-правилата веќе им даваат флексибилност на превозниците, особено на оние што често ја преминуваат границата на ист премин.

– Лицата што имаат локална дозвола не се обврзани при влез да се регистрираат во ЕЕС-системот. Дали тоа се прават при случајни гранични проверки или не зависи од земјите членки на надворешните граници, а не од Комисијата. Правилата за престој во Шенген зоната се јасни, тие не се променети и имаат одредена вградена флексибилност- додаде Ламерт.

ЕВРОПСКАТА УНИЈА Е ГЛУВА НА ПОВИЦИТЕ ДА ГО РЕШИ ПРОБЛЕМОТ СО БАЛКАНСКИТЕ ПРЕВОЗНИЦИ Извозниците веќе најавуваат огромни загуби

The post В ПОНЕДЕЛНИК ГРАНИЧНИТЕ ПРЕМИНИ СЕ ЗАТВОРААТ ЗА ТОВАРЕН СООБРАЌАЈ КОН ЕУ Превозниците бараат промени на системот за влез и излез во шенген зоната appeared first on plusinfo.mk.

Скопскиот градоначалник Орце Ѓорѓиевски вечерва во емисијата „Топ Тема“ на Телма рече дека во Град Скопје затекнал превработенст на хигиеничарки и возачи.

– Дваесет и пет хигиеничарки не ми требаат мене. Еве, не ми требаат 25 хигиеничарки, но има во Град Скопје. Десетина шофери не ми требаат, еве сам се возам уште. Се возев во Кисела Вода сам, се возам и сега. Најбезбедно се чувствувам така. Тоа е мое лично право на избор. Нема ниту обезбедување, имам соработник кој што ми помага околу ова – порача Ѓорѓиевски.

Тој најави дека од среда ќе почне инспекција на дивите такси превозници.

The post НЕ МИ ТРЕБААТ 25 ХИГИЕНИЧАРКИ И ДЕСЕТИНА ШОФЕРИ Ѓорѓиевски вели дека во Град Скопје има превработеност appeared first on plusinfo.mk.