Превентивните прегледи се најдобриот начин за рано откривање или спречување на многу заболувања, уште пред појавата на првите знаци или симптоми. Водени од искусен лекар и насочени индивидуално според вашите лични карактеристики, пол, возраст, медицинска и семејна историја, тие можат да откријат ризик-фактори за вашето здравје и да спречат развој на хронични заболувања. Ваквиот пристап овозможува превенција на болести и рано откривање со цел започнување ефикасен третман.

Во Клиничката болница „Аџибадем Систина“ повеќе од 10 години успешно функционира специјализираниот Оддел за превентивни прегледи. Од 28 октомври, за пациентите се достапни нови превентивни пакети кои ги содржат најважните испитувања и анализи преку кои се добива детална проценка на целокупното здравје.

– Новите пакети за превентивни прегледи содржат основни прегледи, но и напредни имиџинг-дијагностички испитувања со цел да се направи целосна проценка на состојбата на пациентот. Сите прегледи ги изведуваат специјалисти од соодветната област како кардиолози, пулмолози, радиолози, нутриционисти, гинеколози, уролози и др. По завршувањето на прегледите, пациентите добиваат детален медицински извештај за состојбата на сите органи и системи. Покрај раната детекција на болест, превентивните прегледи се многу важни бидејќи, зависно од резултатите, даваме препораки за промена на животниот стил, навиките и начинот на исхрана, со цел подобрување на здравјето. Затоа препорачуваме превентивни прегледи еднаш годишно, дури и кај лица без здравствени проблеми, за навремено откривање на промени кои можат да бидат сигнал за дејствување – вели д-р Александар Станимировиќ од Check-up одделот на „Аџибадем Систина“.

ПРЕГЛЕДАЈТЕ ГО ЦЕЛОТО ТЕЛО ВО САМО ЕДЕН ДЕН

Одделот за превентивни прегледи – Check-up во „Аџибадем Систина“ ви овозможува да ги направите сите испитувања и анализи во само еден ден. За време на вашиот престој се грижи стручно лице од Check-up тимот, кое ќе ги закаже сите потребни прегледи и ќе ве придружува низ целиот процес. По завршувањето на испитувањата, сумираните резултати и медицинскиот извештај ги добивате во просториите на Одделот, специјално дизајнирани да овозможат удобност и приватност. За повеќе информации за содржината на пакетите, посетете го линкот. Вашиот преглед можете да го закажете преку контакт-центарот на 02/3099-500.

Превентивните прегледи се светски стандард и практика во сите развиени земји. Следејќи ги таа визија и својата општествена одговорност, „Аџибадем Систина“ континуирано ја промовира грижата за здравјето и апелира до граѓаните редовно да прават превентивни прегледи.

The post НОВИ CHECK-UP ПАКЕТИ ЗА ЦЕЛОСНА ПРОЦЕНКА НА ЗДРАВЈЕТО ВО „АЏИБАДЕМ СИСТИНА“ Превенцијата е најдобриот лек appeared first on plusinfo.mk.

Икона на балканската музика и симбол на сила, Лепа Брена во едно неодамнешно интервју откри дека во 2010 година минала низ еден од најтешките периоди во животот – тивка и опасна здравствена криза. Иако секогаш важела за силна жена со железна дисциплина, зад сцената таа водела борба која можела да ѝ го одземе животот.

Сè започнало со наизглед рутинска операција за циста на јајник. Но, по интервенцијата, лекарот ѝ препорачал генетски BRCA тест – анализа што го открила најлошото: Брена има мутација на генот што значително го зголемува ризикот од рак на дојка. Веднаш ѝ биле откриени високи тумор маркери и таа итно заминала на нова операција.

– Тестот покажа дека имам мутиран ген и голема шанса за рак на дојка. Тумор маркерот беше многу зголемен, па итно морав на операција. За ова молчев, но беше голем шок за мене – откри Брена во својата исповед.

Во истата година, таа го загубила и својот татко, правејќи ја таа фаза во нејзиниот живот уште потешка. Но, не се откажала – ни пред болеста, ни пред тагата. Нејзиното молчење тогаш било одлука да го заштити семејството, а денес, нејзиниот збор е инспирација за илјадници жени.

Брена вели дека не сака сожалување – таа зборува јавно за да ги поттикне другите жени да се информираат, да се тестираат, да не чекаат. Таа ја користи својата слава одговорно, како платформа за животно важна порака: Превенцијата спасува животи.

The post ЛЕПА БРЕНА ЈА ВОДЕЛА НАЈТЕШКАТА БИТКА ВО ТИШИНА Пејачката ја криела тајната со години, дури и од најблиските appeared first on plusinfo.mk.