Избегнување директно изложување на сонце и активности на отворено во периодот од 11 до 17 часот, носење светла и лесна облека, заштитни очила и светлобојна капа, останување во затворени и климатизирани простории, при престој на отворено во најтоплиот период да се прават чести одмори под сенка, да се внесува умерена количина храна, да се избегнува масна и висококалорична храна, како и храна која содржи голема количина шеќер, да се внесува доволно вода и минерални безалкохолни пијалаци без да се чека да се почувствува жед, да се избегнува алкохол, пијалаци што содржат кофеин и многу студени пијалоци – ова се дел од препораките за заштита од топлото време кои денеска ги објави Институтот за јавно здравје (ИЈЗ) поради најавата од Управата за хидромететоролошки работи (УХМР) за очекувани високи максимални дневни температури до, па и над 40 степени од утре, 1 август до 7 август.

Ранливите групи кои ги опфаќаат лицата над 60 години, бремените жени, децата, социјално ранливите, работниците на отворено, како и тие со хронични заболувања (кардиоваскуларни болести, невролошки, белодробни и бубрежни болести, шеќерна болест, ментални болести, дебелина и лица под терапија која го зголемува мокрењето), потребно е да бидат посебно дисциплинирани за овие препораки и да ја земаат својата редовна терапија. За сите промени во здравствената состојба задолжително да го консултираат својот матичен лекар.

Од Институтот препорачуваат и затворање прозорците и ролетните во текот на денот и нивно отворање навечер, кога температурата е пониска. Во паркирано возило да се отвори прозорецот со цел да овозможи вентилација и да не се останува долго во возилото. Неопходно е туширање со млака вода по потреба, а за дополнително разладување да се ставаат ладни облоги или да се потопат стапалата во студена вода.

Доколку се јави чувство на зашеметеност, слабост, вознемиреност или интензивна жед и главоболка, треба да се побара помош, да се оди во постудено место колку што е можно побрзо и да се измери телесната температура, да се консумира вода или негазиран минерален пијалак. При болен мускулен грч, најчесто во нозете, рацете и во стомакот, потребен е одмор на студено место и консумирање течност која содржи електролити. Лекарска помош е потребна ако топлотните грчеви траат подолго од еден час.

Ако некој член од семејството или лице на кое му се помага, има топла и сува кожа, грчеви и/или е во бессознание, веднаш да се повика 194 или 112, а додека се чека Итната медицинска помош треба да се префрли на студено место и да се стави во хоризонтална положба со подигнати нозе над 20 сантимети висина, да се отстрани гардеробата, да се воспостави надворешно ладење, како студени облоги на вратот, пазувите и слабините, постојано да се разладува и да се прска кожата со вода, да не се дава терапија, а ако лицето е во бессознание, да се постави во бочна положба. Ако се почувствуваат невообичаени симптоми/знаци или ако тие траат подолго потребна е консултација со својот доктор, стои во препораките од ИЈЗ.

Оттаму апелираат граѓаните да ги почитуваат препораките за заштита и претпазливост за време на високи температури.

ИЈЗ издаде и препораки за патувањата.

„Пред да заминете на патување треба да се информирате за здравствената состојба, присутните заразни болести и потенцијалните здравствени ризици во земјата или регионот каде патувате, најмалку еден месец претходно треба да проверите дали се препорачува вакцинација или превентивна терапија (на пример, вакцинација против жолта треска или профилактична терапија за маларија), да се осигурате дека вие и членовите на вашето семејство, особено децата, ги имате примено сите рутински вакцини, а доколку ви се потребни дополнителни информации, консултирајте се со матичниот лекар или со надлежниот Центар за јавно здравје“, препорачува ИЈЗ.

Препораките се поради тоа што летниот период носи зголемен ризик од заболувања поврзани со високите температури, инфекции кои се пренесуваат преку инсекти, како и повреди и здравствени ризици поврзани со активности на вода.

„Задолжително треба да ги земете лековите кои редовно ги користите, средства за прва помош, антипиретици и аналгетици, лекови за гастроинтестинални тегоби, средство за дезинфекција на раце, репелент против инсекти, крем за сончање со заштитен фактор СПФ 30 или повисок и здравствена документација и полиса за патничко здравствено осигурување. За заштита од инсекти нанесувајте репеленти (средства кои ги одбиваат комарците), особено доколку патувате во подрачја каде има ризик од заболувања што се пренесуваат преку комарци. Се препорачува употреба на репеленти на база на DEET (30–50%) или икаридин (icaridin/picaridin) кои треба да се нанесуваат на непокриените делови од кожата, а да се избегнува контакт со очите, носот и со устата. Средствата кои ги одбиваат комарците може да се користат во секој период од денот, и во затворен и на отворен простор, строго според упатството на производителот, особено по капење, пливање или интензивно потење. Ако користите и крем за сончање, најпрво нанесете го него“, препорачува ИЈЗ.

Бремени жени, доилки и деца треба да користат само средства кои ги одбиваат комарците кои се наменети и одобрени за овие категории и секогаш да се следат упатствата за употреба. Ако патувате во тропски или суптропски подрачја, земете доволна количина за целото времетраење на патувањето. Носете светла, лесна и облека од природне материјал (памук, лен) со долги ракави и ногавици, како и затворени обувки и чорапи кога условите го дозволуваат.

„Комарците кои пренесуваат денга, чикунгуња и зика се најактивни во текот на денот, особено во раните утрински и доцните попладневни часови, додека комарците кои ја пренесуваат маларијата се најактивни од самрак до изгрејсонце. Кога е можно, престојувајте во климатизирани простории или во простории со заштитни мрежи на прозорците и вратите. Доколку спиете на отворено или во простории без соодветна заштита, користете заштитна мрежа за спиење, по можност третирана со инсектицид. Доколку за време на патувањето добиете зголемена телесна температура (38 °C или повисока), осип, силна главоболка, повраќање или други симптоми на заболување, веднаш побарајте медицинска помош. Маларијата и другите тропски заболувања можат брзо да напредуваат и бараат навремено лекување“, апелира ИЈЗ.

Доколку планирате капење, пливање, нуркање или пловење, користете само уредени и означени капалишта каде квалитетот на водата се следи согласно здравствените стандарди, избегнувајте капење во води со видливо загадување, необична боја, непријатен мирис, присуство на отпад или со прекумерен развој на алги. Внимавајте да не голтате вода при капење и внимавајте малите деца да не внесуваат вода во устата. По капење, истуширајте се со чиста вода и измијте ги рацете пред јадење.

Доколку имате отворени рани или оштетувања на кожата, избегнувајте капење во природни водни површини, почитувајте ги предупредувањата и препораките на надлежните служби за безбедност на капалиштата, не дозволувајте деца да престојуваат покрај вода без постојан надзор, при пловење задолжително користете спасувачки елек, избегнувајте капење во реки, езера и други слатководни површини во земји каде има ризик од заболувања како шистозомијаза и лептоспироза.

Доколку во рок од три недели по враќањето имате зголемена температура или други симптоми на заразна болест, задолжително информирајте го вашиот лекар каде и кога сте патувале. Имајте предвид дека доброволното дарување крв може привремено да биде одложено по враќањето од одредени земји, се наведува во препораките од Институтот за јавно здравје.

ВРЕЛИ ДЕНОВИ, ЖЕШКИ НОЌИ, ТЕМПЕРАТУРИ НАД 40 СТЕПЕНИ Топлинскиот бран ќе трае најмалку до крајот на следната недела

The post ЗАШТИТЕТЕ СЕ ОД СОНЦЕТО, ВНИМАВАЈТЕ ПРИ ПАТУВАЊАТА Институтот за јавно здравје објави препораки за заштита од горештините appeared first on plusinfo.mk.