Генералниот секретар на Обединетите нации, Антонио Гутереш, остро ги осуди масовните израелски воздушни напади врз Либан, во кои, според него, се убиени и ранети стотици цивили, меѓу нив и деца, а значително е оштетена и цивилната инфраструктура, објави новинската агенција ДПА.

– Гутереш недвосмислено ги осудува масовните напади. Генералниот секретар остро ја осудува загубата на цивилни животи и е длабоко загрижен поради растечкиот број жртви – изјави неговиот портпарол Стефан Дужарик.

И покрај прекинот на огнот во конфликтот со Иран, Израел започна интензивни напади врз цели во Либан, вклучително и главниот град Бејрут. Либанското Министерство за здравство соопшти дека се убиени најмалку 254 лица, а 837 се повредени.

Израелската војска тврди дека целела команданти на Хезболах и нивна воена инфраструктура, но либанските власти наведуваат дека меѓу жртвите има голем број цивили. Во нападите се уништени и бројни станбени објекти.

Високиот комесар на ОН за човекови права, Фолкер Турк, го оцени обемот на нападите од средата како „ужасен“.

– Таков масакр, само неколку часа по договорот за прекин на огнот со Иран, е целосно несфатлив. Тоа врши огромен притисок врз кревкиот мир што им е очајно потребен на цивилите – рече Турк.

Црвен крст соопшти дека е „згрозен од катастрофалните човечки загуби и уништувањето“ во густо населените делови на Либан, додавајќи дека земјата повторно тоне во „паника и хаос“.

Сцени на уништување и ужас во Бејрут

Воени авиони срамнија со земја повеќе згради во центарот на Бејрут, кревајќи густ чад над градот, во, како што го нарече израелскиот министер за одбрана, „ненадеен удар“ врз Хезболах, објави Гардијан.

Главниот град беше преполн со уништени автомобили и запалени остатоци од објекти што службите за итна помош тешко ги гаснеа, додека Израел бомбардираше повеќе од 100 цели поврзани со Хезболах низ земјата.

Болниците упатија итни апели за дарување крв, а Министерството за здравство ги повика граѓаните да ги расчистат улиците за да им се овозможи непречен пристап на амбулантните возила. Граѓаните во паника брзаа да ги проверат своите семејства.

Еден маж бил снимен како трча кон оштетена зграда во населбата Чија, извикувајќи: „Има луѓе внатре!“ На социјалните мрежи се споделуваа снимки од деца покриени со прашина од урнатините, додека семејствата очајно ги бараа своите блиски.

Израел не го признава примирјето

Портпарол на израелската армија на арапски јазик најави дека нападите ќе се прошират подлабоко во Бејрут, откако претходно беа концентрирани во јужните предградија, каде што поддршката за Хезболах е силна. Тој посочи дека групата „се препозиционира“ во мешаните делови на градот и најави дека израелските сили ќе ги таргетираат нејзините борци без оглед на локацијата.

Набргу потоа беше срушена уште една зграда во населбата Талет ал-Кајет во западен Бејрут, која досега не беше погодена во конфликтот. Најавата дека нападите може да зафатат кој било дел од градот предизвика страв кај жителите.

– Каде да одам? Цел Либан е засегнат. Израел заврши со Иран и сега се свртува против нас – изјави жител кој побара анонимност.

Либан е „одделен конфликт“

Кабинетот на израелскиот премиер Бенџамин Нетанјаху соопшти дека двонеделното примирје на Блискиот Исток не се однесува на Либан, што е спротивно на тврдењата на пакистанските посредници.

По почетното молчење, и претседателот на САД, Доналд Трамп, изјави дека Либан претставува „одделен конфликт“ и не е дел од договорот. Израелскиот министер за одбрана Израел Кац посочи дека двете боишта – Иран и Либан – се одвоени и дека целта е „да се промени реалноста во Либан и да се отстранат заканите за населението на север“.

Иран размислува за повлекување од примирјето

За разлика од САД и Израел, Иран смета дека Либан е опфатен со договореното двонеделно примирје и, според новинската агенција Фарс, размислува за повлекување од договорот.

Ирански извори за агенцијата Тасним изјавиле дека земјата е подготвена да се повлече од прекинот на огнот доколку Израел „продолжи да го крши примирјето во Либан“. Кризата, како што се наведува, била тема и на разговорите меѓу иранскиот министер за надворешни работи и неговиот пакистански колега.

The post ИЗРАЕЛ ГИ МАСАКРИРА БЕЈРУТ И НАДЕЖИТЕ ЗА МИРОВЕН ДОГОВОР Во страотните напади 254 мртви, главно цивили appeared first on plusinfo.mk.

Претседателот Доналд Трамп преку социјалните мрежи соопшти дека Соединетите Американски Држави ќе започнат блиска соработка со Иран, за кој оцени дека поминал низ „многу продуктивна промена на режимот“.

Според неговите наводи, во земјата повеќе нема да има збогатување ураниум. Трамп истакна дека САД, во соработка со иранските власти, ќе го отстранат сиот длабоко закопан нуклеарен „прав“. Тој додаде дека локациите биле под прецизен сателитски надзор на Вселенските сили и дека ништо не е допрено од датумот на нападот. Во објавата се наведува дека во тек се преговори за олеснување на тарифите и санкциите кон Иран. Претседателот Трамп информираше дека веќе е постигната согласност за голем дел од предвидените точки од договорот.

Во меѓувреме, иранската новинска агенција Тасним објави дека став на Техеран е дека конечниот договор меѓу Иран и САД мора да биде потврден со обврзувачка резолуција на Советот за безбедност на Обединетите нации.

Според агенцијата, планот од 10 точки предложен од Иран, кој ќе биде основа за идните преговори со САД, предвидува дека сите можни договори мора да бидат одобрени со обврзувачка резолуција на Советот за безбедност на ОН.

Усвојувањето на таква резолуција би го претворило договорот во обврзувачко меѓународно право и, како што се вели, би претставувало значајна дипломатска победа за иранскиот народ.

Овој предлог договор усвоен на два часа пред крајот на ултиматумот на Трамп донесе двонеделно примије по што очекувањата се дека конечно ќе заврши војната на Блискиот исток.

Најавите за прекин на војната резултираше со нагло намалување на цените на суровата нафта на светските берзи.

The post ТРАМП СОГЛАСЕН ЗА „ПОГОЛЕМ ДЕЛ“ ОД ТОЧКИТЕ Иран бара крајниот договор да стане обврзувачка резолуција на ООН appeared first on plusinfo.mk.

Кина го поздрави прекинот на огнот меѓу САД и Иран, наведувајќи дека Пекинг, исто така, вложил „напори“ за запирање на борбите.

Пекинг ги поздрави напорите направени од пакистанската страна, изјави портпаролката на кинеското Министерство за надворешни работи, Мао Нинг, за време на редовната прес-конференција во Пекинг, одговарајќи на прашање од агенцијата Анадолија.

– Кина се залага за прекин на огнот и решавање на конфликтите преку политички средства за да се постигне долгорочна стабилност во регионот на Заливот и Блискиот Исток – рече Нинг.

Пекинг „вложи свои напори во овој поглед“, додаде таа.

Американскиот претседател Доналд Трамп објави синоќа дека се согласил да „го запре бомбардирањето и нападите врз Иран за период од две недели“.

Објавата дојде помалку од два часа пред рокот што Трамп го постави за Иран да ја отвори повторно Ормуската Теснина и да го прифати договорот, или да се соочи со она што тој го опиша како уништување на „цела цивилизација“.

The post КИНА ПОМОГНАЛА ДА СЕ ПОСТИГНЕ ДОГОВОРОТ ЗА ПРЕКИН НА ОГНОТ Пекинг се залага за мир и стабилност appeared first on plusinfo.mk.

Потпретседателот на САД Џ.Д. Венс, кој учествуваше во последните часови од преговорите што доведоа до прекин на огнот со Иран, рече дека тоа е „кревко примирје“ кое открило многу за функционирањето на иранскиот систем.

Зборувајќи во Будимпешта, Венс рече дека реакциите од Иран биле различни, во  зависност од тоа од кој дел од владата доаѓаат. Тој изјави дека министерот за надворешни работи (Абас Арагчи) реагирал позитивно на планот, додека други, како што тврди, лажеле за ефектите од американските воени дејствија како и за самата рамка за прекин на огнот

– Затоа велам дека ова е кревко примирје. Имате луѓе кои јасно сакаат да седнат на преговарачка маса и да работат со нас на добар договор, а потоа ги имате оние кои лажат дури и за кревкото примирје што веќе го постигнавме – рече тој.

– Ако Иранците се подготвени да соработуваат со нас со добра намера, мислам дека можеме да постигнеме договор. Ако лажат, измамат и се обидат да спречат дури и ова кревко примирје што го воспоставивме да се спроведе, тоа нема да оди добро – предупреди тој.

Тој додаде дека американскиот претседател Доналд Трамп побарал од својот тим засега да ја одложи употребата на одредени воени, дипломатски и економски алатки за притисок врз Иран. Но, тој нагласи дека тие опции остануваат на маса ако Иран не се вклучи конструктивно во преговорите за трајно завршување на војната.

– Тој ни рече да дојдеме на преговарачка маса. Но, ако Иранците не го сторат истото, ќе видат дека американскиот претседател не е некој со кого треба да се поигрува. Тој е нетрпелив. Тој е нетрпелив да постигне напредок – рече Венс.

The post „ОВА Е КРЕВКО ПРИМИРЈЕ, ТРАМП Е НЕТРПЕЛИВ, СО НЕГО НЕМА ПОИГРУВАЊЕ“ Венс за постигнатиот договор со Иран appeared first on plusinfo.mk.

Либанското движење Хезболах рано утринава ги прекина нападите врз северен Израел и израелските трупи во Либан како дел од примирјето меѓу САД и Иран – изјавија три извори блиски до групата, пренесени од британските медиуми.

Се очекува Хезболах набргу да издаде официјално соопштение во врска со својот став за прекинот на огнот.

Пакистанскиот премиер, кој беше клучен посредник меѓу Вашингтон и Техеран, синоќа објави дека прекинот на огнот во Иран ќе се однесува и на Либан. И покрај тоа Израел изутринава продолжи со воените операции во јужен Либан и издаде нова наредба за евакуација на еден град најавувајќи можни идни напади.

Израелскиот премиер Бенјамин Нетанјаху претходно изјави дека двонеделното примирје меѓу САД и Иран не го вклучува Либан.

Поради овој став на Израел либанската армија упати повик до цивилите да не се враќаат во селата и градовите во на јужен Либан.

„Граѓаните да се воздржат од враќање во јужните села и градови и да не се приближуваат до областите каде што напредувале израелските окупаторски сили, со цел да се зачува нивната безбедност, особено затоа што можат да ги изложат своите животи на опасност од тековните израелски напади“, објави Командата на либанската армија.

Командата, исто така ги повика жителите да ги почитуваат упатствата на распоредените воени единици и да бидат внимателни со неексплодираните убојни средства и сомнителните предмети што останале од израелската агресија, и да ги пријават во најблискиот воен центар или други безбедносни сили.

The post ХЕЗБОЛАХ ГИ ПРЕКИНА НАПАДИТЕ КАКО ДЕЛ ОД ПРИМИРЈЕТО МЕЃУ САД И ИРАН Израел продолжува со воените операции во јужен Либан appeared first on plusinfo.mk.

Цената на нафтата утрово падна под 100 долари за барел откако американскиот претседател Доналд Трамп изјави дека се согласил на двонеделно примирје со Иран, кое предвидува итно и безбедно повторно отворање на Ормускиот Теснец.

Фјучерсите на Брент паднаа за 14,51 долари, или 13,3%, на 94,76 долари за барел, додека WTI падна за 17,16 долари, или 15,2%, на 95,79 долари за барел.

Пресвртот на Трамп дојде кратко пред неговиот рок за Иран да го отвори Ормускиот Теснец, каде што транзитира 20% од светската нафта, или да се соочи со широки напади врз неговата цивилна инфраструктура.

„Ова ќе биде двостран прекин на оган!“, напиша тој на социјалните мрежи, откако претходно во вторникот објави дека „цела цивилизација ќе умре вечерва“ ако неговите барања не бидат исполнети.

Иран изјави дека ќе ги запре нападите ако престанат нападите против него и дека безбедниот транзит низ Ормускиот Теснец ќе биде можен две недели во координација со иранските вооружени сили, според изјавата на министерот за надворешни работи Абас Аракчи.

Сепак, повеќе земји од Персискиот Залив идентификуваа лансирања на ракети и напади со беспилотни летала или издадоа предупредувања до цивилите да се засолнат.

„Дури и со мировен договор, Иран може да се охрабри почесто да се заканува на Ормускиот Теснец во иднина, а пазарот ќе го процени зголемениот ризик за Ормускиот теснец во иднина“, рече аналитичарот на MST Marquee, Саул Кавоник.

Војната меѓу САД и Израел со Иран го забележа најстрмниот месечен пораст на цената на нафтата во историјата во март од повеќе од 50%.

– Примирјето е добар почеток и може да го отвори патот за потрајно повторно отворање на теснецот, но има уште многу „ако“ што треба да се решат – рече аналитичарот на IG, Тони Сикамор.

WTI ја задржа својата ценовна премија во однос на Брент, во пресврт на типичните ценовни шеми поради тоа што неговиот договор за испорака е за мај, додека Брент е за јуни, што одразува дека барелите со претходен датум на испорака имаат повисока цена.

The post ЦЕНАТА НА НАФТАТА ПАДНА ПОД 100 ДОЛАРИ ЗА БАРЕЛ Договорот за примирје веднаш се почувствува на берзите appeared first on plusinfo.mk.

Американскиот претседател Доналд Трамп изјави дека иранскиот режим побарал прекин на огнот со САД, додавајќи дека Вашингтон ќе ја разгледа можноста само доколку се обезбеди слободен премин низ Ормускиот теснец.

Трамп, во објава на платформата X, наведе дека барањето дошло од, како што го опиша, „нов претседател на иранскиот режим“, кој, според него, бил помалку радикален и поинтелигентен од неговите претходници.

– Претседателот на новиот ирански режим, многу помалку радикализиран и многу поинтелигентен од неговите претходници, штотуку побара од САД прекин на огнот. Ќе размислиме за тоа кога Ормускиот теснец ќе биде отворен, слободен и прооден. Дотогаш, ќе продолжиме да го ракетираме Иран – рече Трамп.

Тој претходно посочи дека САД би можеле да го напуштат Иран во рок од „две или три недели“, додавајќи дека по таков потег се очекува пад на цените на нафтата.

Американскиот претседател исто така изјави дека Вашингтон нема да се вклучи во обезбедување на преминот низ Ормускиот теснец, нагласувајќи дека земјите зависни од нафта и гас од Блискиот Исток треба сами да се погрижат за безбедноста на поморската рута.

– Што ќе се случи со преминот, ние нема да имаме никаква врска со тоа – изјави Трамп пред новинарите во Овалната соба, додавајќи дека други земји, како Кина и Франција, ќе се погрижат за сопствените интереси.

The post ПРЕКИН НА ОГНОТ, НО ПОД ЕДЕН УСЛОВ Трамп бара од Иран да го ослободи Орумускиот теснец appeared first on plusinfo.mk.

Ние не го користиме Ормускиот Теснец, во одреден момент, тој ќе се отвори сам по себе,  рече денеска американскиот претседател Доналд Трамп.

– Би било убаво ако земјите што го користат теснецот, како Кина, се вклучат – рече Трамп пред медиумите.

На прашање за прекин на војната, тој рече:

– Не сакам прекин на огнот. Не се завршува кога буквално ја уништувате другата страна.

Трамп разговараше со новинарите пред Белата куќа пред да отпатува во својот имот Мар-а-Лаго во Палм Бич, Флорида, за викендот.

На прашањето дали мисли дека Израел ќе биде подготвен да ја заврши војната кога тој ќе биде подготвен, тој рече: „Мислам дека да“.

– Мојот однос со Израел е многу добар. Сакаме слични работи, повеќе или помалку. Сакаме да победиме – рече тој.

На прашањето дали има план за иранскиот остров Харг во Перскискиот Залив, тој одговори: „Можеби имам план, можеби немам, но како би му кажал на новинар…“

– Тоа е место за кое луѓето зборуваат – рече американскиот претседател.

Порталот Аксиос денеска објави дека администрацијата на Трамп ја разгледува можноста за заземање или за поморска блокада на иранскиот остров Харг со цел да го принуди Техеран повторно да го отвори Ормускиот Теснец.

Како што наведуваат изворите на медиумот, Трамп не може да го заврши конфликтот под свои услови додека Иран ја контролира пловидбата низ теснината, што во меѓувреме го поттикнува порастот на глобалните цени на енергенсите.

Островот Харг, кој се наоѓа на околу 24 километри од иранскиот брег е клучен за нафтениот сектор на Иран, бидејќи околу 90 проценти од извозот на сурова нафта се реализира преку него, но евентуалната операција за негово заземање би можела директно да ги изложи американските сили на напади.

Си-Би-Ес Њус објави дека функционерите на Пентагон вршат детални подготовки за евентуално распоредување на американски копнени сили во Иран.

Високи воени команданти упатија конкретни барања за подготовка за опцијата, додека претседателот Трамп разгледува чекори во американско-израелскиот конфликт против Иран, меѓу кои и можноста за распоредување копнени сили во регионот, велат изворите за Си-Би-Ес Њус.

Трамп денеска, пак, на социјалната мрежа Трут соушл објави дека „сме многу блиску до постигнување на целите додека размислуваме за намалување на нашите големи воени напори на Блискиот Исток во однос на терористичкиот режим на Иран“.

Тој наведе 5 цели: Целосно уништување на ракетните капацитети на Иран, местата за лансирање и сè што е поврзано со нив, уништување на одбранбената индустриска база на Иран, уништување на нивната морнарица и воздухопловни сили, вклучително и противвоздушното оружје. Како четврта цел наведе никогаш да не се дозволи Иран да се приближи до нуклеарен капацитет и секогаш да се биде во позиција САД да реагираат брзо и енергично на таква ситуација, доколку се случи. Последната цел е заштита, на највисоко ниво, на американските сојузници на Блискиот Исток, вклучувајќи ги Израел, Саудиска Арабија, Катар, Обединетите Арапски Емирати, Бахреин, Кувајт и други.

За Ормускиот Теснец претседателот на САД напиша дека мора да биде заштитен и следен, по потреба, од други земји што го користат.

„Доколку нè прашаат, ние ќе им помогнеме на тие земји во нивните напори поврзани со Ормускиот Теснец, но тоа нема да биде потребно откако ќе се отстрани заканата од Иран. Важно е дека тоа ќе биде лесна воена акција за нив“, објави Трамп.

КУКАВИЦИ, ЌЕ ВИ ГО ЗАПОМНИМЕ ОВА! Трамп распали по НАТО, го нарече тигар од хартија

The post ТРАМП ПОБАРА КИНА ДА СЕ ВКЛУЧИ ВО ОТВАРАЊЕТО НА ОРМУСКИОТ ТЕСНЕЦ Претседателот на САД не сака прекин на огнот со Иран appeared first on plusinfo.mk.

Кремљ објави дека рускиот претседател  се согласил привремено да ги запре нападите врз украинските градови до 1 февруари. Одлуката следела по лично барање од американскиот претседател, со цел да се создадат поволни услови за можни преговори.

Портпаролот на Кремљ Дмитриј Песков, потврди дека иницијативата дошла директно од Вашингтон. Тој нагласи дека Трамп побарал една недела воздржаност од напади врз Украина, во период кога земјата се соочува со екстремен студ и сериозни проблеми со електричната енергија и греењето.

– Да, секако. Тоа беше лично барање на претседателот Трамп – изјави Песков, одговарајќи на прашањето дали Путин го прифатил предлогот.

Американскиот претседател претходно, на состанок на кабинетот, рече дека побарал запирање на нападите со долг дострел кои ја оставиле  без струја и греење. Тој додаде дека рускиот лидер се согласил на привремен прекин.

Украинската државна метеоролошка служба вчера објави нагло опаѓање на температурите во наредните денови, дури до -30 степени.

Паралелно со овие дипломатски сигнали,  соопшти дека руските сили презеле контрола врз три украински населби. Според тврдењата, станува збор за Ричне и Тернувате во југоисточниот дел на земјата и Бересток во источниот регион Донецк. Овие информации засега не се независно потврдени.

Заедно со скептицизмот околу тоа дали Путин навистина се согласил привремено да ги запре нападите врз украинската енергетска инфраструктура, Володимир Зеленски претходно се осврна на извештаите дека рускиот претседател наводно го поканил во Москва.

Зеленски вели дека е подготвен за состанок на лидери во кој било формат, но не во Москва, нарекувајќи ја таквата опција „невозможна“. Тој додаде дека нема да се сретне со Путин ниту во Белорусија, земја со силни врски со Кремљ.

– Апсолутно е невозможно за мене да се сретнам со Путин во Москва. Тоа би било исто како да се сретнам со него во Киев. Можам исто така да го поканам во Киев, нека дојде. Го поканувам јавно, ако се осмели, се разбира.

The post ТРАМП ЗАМОЛИЛ, ПУТИН СЕ СОГЛАСИЛ, ЗЕЛЕНСКИ СКЕПТИЧЕН Ќе има ли прекин на нападите врз Киев до 1 февруари? appeared first on plusinfo.mk.

Канцеларот на Германија, Фридрих Мерц денеска изјави дека Европа мора да ја „зголеми цената на војната“ во Украина за да ја принуди Русија на прекин на огнот.

– Прекинот на огнот сè уште не е на дневен ред, сосема очигледно, бидејќи Русија не го сака. Затоа мора да продолжиме да ја зголемуваме цената на војната, за Русија да разбере дека нема смисла да ја продолжува – посочи Мерц на партиската конференција на Демохристијанскиот сојуз на Германија (ЦСУ).

Претходно, претседателот на Германија, Франк Валтер Штајнмаер истакна дека руската анексија на Крим и нападот врз Украина претставуваат историска пресвртница.

Според него, мора да се спречи сценарио во кое региони или цели земји се третираат како сопственост на неколку големи сили и повика на поактивна улога на меѓународната заедница.

The post МЕРЦ ЈА ПРИЗНАВА СУРОВАТА РЕАЛНОСТ Без согласност на Русија, нема безбедносни гаранции за Украина appeared first on plusinfo.mk.