Не смееме да дозволиме и никогаш нема да дозволам, барем додека сум на оваа позиција, предмет со такви страшни докази во насока на докажување на одредено кривично дело од кое ќе му се згади на македонскиот народ така да се затвори, изјави министерот за внатрешни работи Панче Тошковски, за случајот „Мазут“.

Тошковски порача дека „секој треба да си ја сработи работата која му е дадена согласно закон.

Не мислам дека „Мазут“ е предмет што е затворен и не мислам дека е паднат, потенцирра министерот.

– Јавното обвиниелство е надлежно и е главен мотор во водењето на овие кривични постапки. МВР работата што требало да ја сработи ја сработило и тоа е видливо и во рамки на овие предмети и во рамки на сите постапувања што се во надлежност на МВР. Факт е дека ЈО потфрлува, во континуитет. Тоа го говорат сите можни мерења на јавно мислење во изминатите 10, 15, 5 години, небитно. Тоа е факт. ЈО доколку сака да ја заслужи довербата на граѓаните, мора да испорача правда – рече Тошковски во гостување на Телма.

Според Тошковски, обвинителот може да донесе одлука каква што цени дека треба да донесе, ама, потенцира, „пред фактите и боговите молчат“.

Прашан како ќе се бори протиов обвинителката Катерина Коларевиќ, Тошковски рече „јас не планирам да се борам со ниту еден обвинител“.

– Кога јавноста ќе го види тоа што го видов јас, а не може да не го види. Ќе дојде ден. Не може да ставате такви работи под тепих. На повраќање ме тераше фактот што го видов, а притоа истиот не е ниту од далеку соодветно процесуиран во постапката што е во тек – изјави Тошковски.

Тошковски, нагласи дека „би сакал да верува дека е направен пропуст во текот на редовната работа на Обвинителството“.

– Кога имате состанок со истражители кои ви велат „министер, ова што се случува во овој предмет е во најмала мера надвор од памет“, во смисла на непостапување согласно очекувањата на истражителите, втемелени на доказите кои што истите ги испорачале, ги анализирале и им дале основано сомнение дека има незаконско работење за конкретниот предмет, а притоа имаме друга слика, перцепција и постапување – појасни Тошковски.

Тошковски ги појасни и деталите околу текот на истрагата за наводната „шпионска афера“ во претседателскиот кабинет и притоа ги отфрли обвинувањата за бавност во постапката, нагласувајќи дека форензичката анализа на обемни докази бара време кое често ги надминува очекувањата на јавноста.

– Ќе оставам ЈО да донесе одлука согласно она што го имаме доставено до нив, од анализираните докази кои беа анализирани од Секторот за компјутерски криминал при МВР и нека оцени ЈО како смета дека треба да ја продолжи целокупната постапка. Јас одговорно тврдам дека во она што го имам добиено како сознанија  дека овде ниту од далеку не можеме да говориме за нешто што би требало да значи шпионска афера – изјави Тошковски.

Според Тошковски, факт е дека Обвинителството мора да испорача правда ако сака да ја врати довербата, правејќи споредба меѓу одлуката за отворање на случајот „Мазут“ и отворањето на наводна шпионска афера во претседателскиот кабинет.

– Од една страна имаме затворање на случај што згрозува од аспект на тежина на докази кои ги има во него, од страна на обвинител, од друга страна имаме отворање на афера во јавноста во истиот временски период, откако јавноста е згрозена од затворањето на случајот, без да ги знае деталите за случајот, со шпионска афера што била многу време работена во рамки на МВР, а тоа многу време е два месеци. Вам ова не ви е сомнително? Особено од аспект на она што ќе следи и во едниот и во другиот случај – порача Тошковски.

Министерот, исто така, посочи дека тезата дека е потребно да се зголеми бројот на истражители во рамки на Обвинителство е неспорен.

– И тоа го работиме, меѓутоа, тезата дека ЈО нема доволно ресурси да испорача е неточна – рече тој.

Прашан каква е соработката на МВР со Јавното обвинителство, Тошковски рече дека „генерално, со одредени обвинители, особено од ОЈО ГОКК имаат фантастична соработка и тоа се покажало многупати досега во процесуирањето на огромен број случаи во последните 2 години“.

– Одлична соработка имаме и со ОЈО Скопје, ОЈО Струмица, ОЈО Охрид … има јавни обвинители кои чесно, совесно и професионално си ја вршат работата и заедно во соработка со МВР постапуваат и процесуираат соодветно кривични пријави и резултатите се видливи – рече министерот за внатрешми работи Панче Тошковски.

The post НА НАРОДОТ ЌЕ МУ СЕ ЗГАДИ ОД ПРЕДМЕТОТ „МАЗУТ“ Според Тошковски, случајот не е затворен appeared first on plusinfo.mk.