Поминаа четири години од денот кога на македонската јавност ѝ беше претставен Францускиот предлог како „единствена шанса“ за почеток на преговорите со Европската Унија. Тогаш се тврдеше дека со неговото прифаќање конечно ќе биде деблокиран европскиот пат на државата. Денес, четири години подоцна, време е без политички страсти да се постави едно едноставно прашање: дали Македонија навистина го доби ветеното или плати висока политичка и државна цена без соодветен резултат?

Најважните елементи на предлогот беа: уставни измени со внесување на Бугарите во Преамбулата на Уставот; спроведување на Договорот за пријателство од 2017 година и билатералните протоколи; следење на исполнувањето на овие обврски како дел од преговарачката рамка со ЕУ како и можност Бугарија и понатаму да влијае врз текот на пристапните преговори доколку оцени дека обврските не се исполнуваат.

Предлогот предизвика силна политичка и општествена поларизација во Македонија. Поддржувачите тврдеа дека тоа е единствениот начин да се деблокира европскиот пат, додека противниците сметаа дека со него билатералните историски и идентитетски прашања за првпат се вградени во преговарачката рамка на ЕУ, што создава опасен преседан. Во јули 2022 година се одржаа и масовни протести против неговото прифаќање.

Од денешна перспектива, резултатите од спроведување на предлогот остануваат предмет на сериозна дебата. Иако формално беа отворени пристапните преговори и беше завршен скринингот, суштинските преговори не продолжија бидејќи не се усвоени уставните измени што се предуслов за следната меѓувладина конференција. Во меѓувреме, Албанија продолжи самостојно на европскиот пат, додека Македонија остана во застој.

Што доби Македонија?

Објективно гледано, Македонија доби три работи. Прво, беше формално деблокирано бугарското вето и се одржа првата меѓувладина конференција со Европската Унија. Второ, беше завршен скрининг-процесот, кој претставува техничка подготовка за пристапните преговори. Трето, Европската Унија испрати политичка порака дека местото на Македонија останува во Унијата.

Но, ниту една од овие придобивки не значеше и реален напредок во преговарачкиот процес.

Кога денес ќе се направи биланс, станува јасно дека цената што Македонија ја прифати беше значително поголема од конкретните резултати. Главните негативности на Францускиот предлог за Македонија може да се сведат на неколку суштински политички, правни и идентитетски прашања:

Прво, билатералниот спор со Бугарија е внесен во европскиот пристапен процес. Наместо Македонија да напредува првенствено според Копенхашките критериуми — владеење на правото, демократија, економски реформи и функционални институции, нејзиниот напредок стана зависен и од исполнувањето на обврски поврзани со Договорот за добрососедство и двата билатерални протоколи со Бугарија. Со тоа, прашања од историјата, јазикот и идентитетот добија европска институционална тежина.

Второ, Бугарија доби трајна можност да го блокира процесот. Иако формално преговорите се водат со Европската Унија, за отворање и затворање на кластерите и поглавјата е потребна согласност од сите земји членки. Тоа значи дека Софија може во повеќе фази повторно да поставува услови или да оцени дека Македонија недоволно ги исполнува преземените обврски. Практично, ветото не беше целосно отстрането, туку беше претворено во механизам што може повторно да се активира.

Трето, уставните измени се поставени како услов пред вистинското отворање на преговарачките кластери. Македонија ја одржа првата меѓувладина конференција и го заврши скринингот во декември 2023 година, но не може да премине во следната фаза без внесување на Бугарите во Уставот. Така, политички чувствително внатрешно прашање стана надворешен услов за европски напредок.

Четврто, не постојат цврсти гаранции дека со уставните измени ќе завршат бугарските барања. Францускиот предлог не содржи механизам што би ја спречил Бугарија во иднина да отвора нови прашања, како толкувањето на заедничката историја, учебниците, историските личности, говорот на омраза или работата на историската комисија. Македонија треба да исполни конкретен услов, додека обврската дека потоа нема да има нови условувања не е еднакво конкретна.

Петто, создаден е преседан националниот идентитет на кандидатска држава да биде предмет на притисок во пристапниот процес. Европските интеграции треба да се засноваат врз реформи и усогласување со европското право, а не врз прифаќање на историски толкувања на соседна држава. Токму тука е најголемиот принципиелен проблем: Македонија е ставена во позиција постојано да докажува нешто што за другите народи и држави се смета за саморазбирливо како на пример сопствениот јазик, историја и национална посебност.

Шесто, македонскиот јазик не е целосно заштитен од бугарски еднострани толкувања. ЕУ го употребува македонскиот јазик без дополнителни квалификации во своите документи, што е позитивно. Но Бугарија приложи еднострана декларација со која го изнесува сопствениот став за потеклото на македонскиот јазик. Иако таа декларација формално не е став на ЕУ, фактот дека останува во официјалниот контекст на процесот создава простор прашањето повторно да се политизира.

Седмо, Македонија и Албанија беа раздвоени на европскиот пат. Двете држави ја одржаа првата меѓувладина конференција во јули 2022 година, но Албанија потоа продолжи со отворање на кластерите и поглавјата, додека Македонија остана блокирана поради уставните измени. Денес Албанија има отворено сите 33 преговарачки поглавја, додека Македонија сè уште нема започнато суштински преговори по кластерите.

Осмо, предлогот создаде длабока внатрешна политичка поделба. Наместо европската интеграција да биде обединувачки државен проект, таа се претвори во извор на недоверба, протести, меѓупартиски конфликти и сомневање дека државата повторно прифатила асиметричен договор под надворешен притисок.

Деветто, Македонија презеде обврски без јасен рок за членство. Државата треба да направи уставни и политички отстапки веднаш, додека ЕУ не гарантира датум за прием, автоматско отворање на кластерите или заштита од идни блокади. Оттука произлегува суштинската асиметрија: македонските обврски се конкретни и непосредни, а европската награда е условна и временски неопределена.

Десетто, со Францускиот предлог проблемот не беше решен, туку беше префрлен во самата преговарачка постапка. Формално беше отворен процесот, но суштински Македонија остана во чекалницата. Советот на ЕУ ја одобри преговарачката рамка на 18 јули 2022 година, а првата меѓувладина конференција се одржа на 19 јули, но по завршувањето на скринингот процесот повторно застана.

Најкратко кажано, Францускиот предлог не го укина бугарското условување, туку го европеизираше. Македонија доби формален почеток на преговорите, но за возврат прифати билатерални историски и идентитетски прашања да станат дел од процесот во кој Бугарија има можност да влијае врз секоја наредна фаза.

Четири години подоцна, веќе не е потребно да чекаме историјата да ја даде својата оценка. Резултатите се видливи: Македонија не ги започна суштинските преговори по кластери, беше раздвоена од Албанија, а бугарските барања од билатерален спор беа претворени во дел од европската преговарачка рамка. Наместо ветената деблокада, државата доби нов и долгорочен механизам на условување; наместо сигурен европски напредок, доби обврски без цврсти гаранции и без јасен рок за членство.

Затоа, врз основа на досегашните политички и правни последици, Францускиот предлог не може да се оцени како успешно компромисно решение за Македонија. Тој не го реши македонско-бугарскиот спор, туку го внесе во пристапниот процес и ѝ овозможи на Бугарија своите билатерални барања да ги поставува под европско знаме. Македонија, пак, ја плати политичката цена, а сè уште не го доби она што во јули 2022 година ѝ беше ветувано, реален, предвидлив и непречен почеток на преговорите за членство во Европската Унија.

The post ЧЕТИРИ ГОДИНИ ПОДОЦНА Што навистина ѝ донесе Францускиот предлог на Македонија? appeared first on plusinfo.mk.

Осум земји-членки на Европската Унија побараа пристапниот процес за земјите-кандидати да стане поконкретен, попредвидлив и заснован на јасно утврдени правила и временска рамка за членство. Во заедничкиот нон-пејпер се нагласува дека напредокот мора да зависи од спроведените реформи, но и дека постојаното менување на условите ја нарушува довербата во процесот на проширување.

Зад документот стојат Австрија, Хрватска, Чешка, Грција, Унгарија, Италија, Словачка и Словенија. Осумте држави бараат процесот да остане заснован на заслуги, при што секоја земја-кандидат би напредувала според сопствените резултати и спроведените реформи.

Во нон-пејперот се предупредува дека воведувањето нови политички предуслови и менувањето на правилата во текот на преговорите ја поткопуваат довербата во европската перспектива на земјите-кандидати. Авторите оценуваат дека пристапниот процес мора да биде појасен и попредвидлив, за државите однапред да знаат кои услови треба да ги исполнат и во кој рок можат да очекуваат напредок.

Документот предлага и воведување заштитни клаузули со кои Европската Унија би можела и по евентуалното членство на одредена земја да го следи исполнувањето на обврзувачките меѓународни договори што биле дел од пристапниот процес. Посебен акцент се става на обврските поврзани со добрососедските односи.

Според авторите, ваквите клаузули не би претставувале нови услови за земјите-кандидати, туку механизам со кој би се гарантирало исполнувањето на веќе преземените обврски.

Новиот нон-пејпер доаѓа еден месец по француско-германската иницијатива претставена од францускиот претседател Емануел Макрон и германскиот канцелар Фридрих Мерц на самитот ЕУ – Западен Балкан во Тиват.

Со таа иницијатива беше предложен нов модел на постепена интеграција во Европската Унија. Покрај вклучувањето на земјите-кандидати во одделни европски политики и во заедничкиот пазар пред полноправното членство, беше предложено и пристапувањето да се одвива низ јасно дефинирани етапи и преодни фази.

The post ОСУМ ЗЕМЈИ ЧЛЕНКИ БАРААТ ПРОШИРУВАЊЕТО НА ЕУ ДА БИДЕ ПОПРИНЦИПИЕЛНО Да биде засновано на заслуги, реформи и да биде предвидливо appeared first on plusinfo.mk.

Европскиот комесар за внатрешни работи и миграција, Магнус Брунер, денеска изјави дека Европската комисија, поради проблемите што ги имаат професионалните возачи од Западен Балкан со Системот за влез/излез (EES), им предложила на членовите на Унијата и на земјите од Западен Балкан да разговараат и да се договорат за долгорочни визи.

Брунер го кажа ова во интервју за Европскиот весник(European Newsroom – ENR), и притоа ја наведе Хрватска како пример, која веќе го стори тоа и склучи договори со земјите од Западен Балкан за долгорочни визи.

Тој додаде дека ќе им предложи на земјите од Западен Балкан да разговараат и да склучат вакви договори со другите членки на Унијата.

– Тоа е моментално излезот. Земјите-членки можат да издаваат дозволи за престој, долгорочни визи, тоа е на земјите-членки да го сторат. И на долг рок, се обидуваме да најдеме решенија во новата визна политика. Затоа разговараме и со земјите-членки – рече Брунер.

Тој исто така рече дека ова е важно и поради европските компании кои  исто така се  погодени од воведувањето на новиот систем.

-Правилото дека можете да останете во Европската Унија 90 дена во рок од 180 дена не е променето. Но, секако сега со системот EES знаеме кои се оние што го пречекоруваат дозволениот престој. И тоа е разликата. Сега системот покажува дали некој ќе остане повеќе од 90 дена. Европските компании се исто така засегнати, но се обидуваме да најдеме долгорочно решение. Потребно е време бидејќи земјите-членки мора да се договорат за правната основа за тоа, па затоа не можеме да го направиме тоа во следните недели или месеци – рече Брунер.

Тој, исто така, рече дека знае дека сегашната ситуација врши притисок врз економиите на земјите, кои мора да бидат поддржани.

– Мораме да ги поддржиме и да се обидеме да најдеме решенија, но ни треба правна основа за тоа – рече Брунер.

Зборувајќи за системот EES, тој рече дека во првите осум месеци од неговата имплементација имало 110 милиони регистрации, од кои 45.000 биле одбиени поради лажни документи, како и 1.100 лица на кои им бил одбиен влез поради безбедносни проблеми, што претставува безбедносна закана за Европската Унија.

The post ЕВРОПСКАТА КОМИСИЈА ПРЕДЛОЖИ ДОЛГОРОЧНИ ВИЗИ ЗА ПРОФЕСИОНАЛНИТЕ ВОЗАЧИ ОД ЗАПАДЕН БАЛКАН Следат поединечни преговори со секоја земја членка appeared first on plusinfo.mk.

Известувачот за Македонија во Европскиот парламент Томас Вајц во текот на дебатата за европската иднина на земјите од Западен Балкан се заложи за нејзино наградување за напредокот и за спроведените реформи.

– Многу земји во регионот, а секако и Република Северна Македонија, покажаа напредок, спроведоа реформи, ова е видливо. Плаќањата се извршени кон земјата, постои динамика во оваа земја. Се работи на реформите што ги побаравме и ова треба да се награди. Можеби со делумна интеграција на пазарот и нашиот роаминг простор – рече тој.

Според Австриецот, целта е да не се изгуби мотивацијата во Македонија, додавајќи дека лично верува оти прашањата за идентитетот го растргнале регионот на Западен Балкан.

– Рани се отворени и навистина е многу важно кога една од овие земји ќе постигне напредок и ќе има добри односи со своите соседи. Не ни треба повторно регион со етнички проблеми – рече Вајц.

Тој посебно ги револтираше бугарските европратеници со алузиите кон Бугарија и нејзиното соучесништвото со нацистичкиот режим во Втората светска војна.

– Инвестирањето во помирување и во добри билатерални односи не е лесно. На Австрија ѝ беа потребни 40 години за да признае дека била соучесник во нацистичкиот режим – рече Вајц.

Кај членовите на ЕП од Бугарија наиде на гнев неговото видување за идентитетските прашања.

– Никогаш не би си дозволил да го доведам во прашање идентитетот на соседна земја. Исто како што не би си дозволил да го доведувам во прашање идентитетот на Бугарија, бидејќи таа беше под турска власт 500 години. Мора да бидеме свесни за реално остварливото градење добрососедски односи меѓу Република Северна Македонија и Бугарија. Имаме улога да го поддржиме градењето на овие добрососедски односи и да не ја занемариме темата – потенцира Вајц.

Тој предложи амандман за бришење на параграфот 73 од извештајот за Македонија, во кој се бара „реално остварливи резултати“ на Мешовитата комисија за историски и образовни прашања според Вториот протокол.

Зад оваа навидум строго техничка постапка лежи политички маневар: ако амандманот биде усвоен, текстот нема конкретно да го спомене Вториот протокол кон Договорот за добрососедство меѓу Северна Македонија и Бугарија.

Според бугарските медиуми, бугарските европратеници имаат помалку од еден месец да ги мобилизираат големите европски семејства и да го одбранат местото на Вториот протокол во резолуцијата, со цел да го спречат Вајц да го истурка надвор од Ивештајот за Македонија што на 6 јули ќе се најде на пленарна седница на Европскиот Парламент.

Во предметниот став се инсистира Заедничката историска комисија да постигне „јасни и опипливи резултати“, потпирајќи се исклучиво на „објективни, автентични и докажани историски извори и документи“, „во согласност со одредбите од Вториот протокол“. Терминот „заедничка историја“ е исто така присутен таму.

Во исто време, Вајц го остава ставот 71 недопрен, барем според јавно достапните информации, во кој важноста на Комисијата е наведена во многу поблага верзија и правилно е забележано дека самите историски толкувања не се дел од формалните критериуми за членство во ЕУ.

The post ВАЈЦ ПОБАРА ДА СЕ НАГРАДИ НАПРЕДОКОТ НА МАКЕДОНИЈА Поднесе и амандман со кој се ескивира Вториот протокол appeared first on plusinfo.mk.

Иранците бараат нешта со кои не можам да се согласам, изјави денеска пред новинарите во комплексот на Белата куќа претседателот на САД, Доналд Трамп.

– Или ќе се договориме или ќе ги збришеме – додаде тој.

Претходно, Трамп рече дека не е задоволен од последниот предлог на Иран за решавање на конфликтот, кој почна со американско-израелските напади врз Исламската Република на 28 февруари годинава. Шефот на американската држава истакна дека „преговара телефонски“ со Техеран.

– Штотуку завршив разговор со Иран. Не сум задоволен – изјави Трамп.

Освен тоа, тој нагласи дека не е загрижен за американските резерви на борбени ракети во контекст на стравувањата дека тие се „топат“ во текот на воените дејствија против Иран.

Од друга страна, Трамп изјави дека вчера разговарал со номинираниот за премиер на Ирак, Али аз Заиди, и му изразил силна поддршка. Вашингтон се стреми да одржува блиски односи со Багдад од безбедносни причини со оглед на тензиите во регионот.

Претседателот на САД ја коментираше и својата претстојна посета на Кина, нагласувајќи дека таа ќе биде „одлична“. Трамп потврди дека ќе се сретне со кинескиот лидер Шји Џјинпинг.

Американскиот претседател најави и дека најверојатно ќе учествува на самитот на Г7 во Франција, планиран за средината на јуни.

The post ИЛИ ЌЕ СЕ ДОГОВОРИМЕ ИЛИ ЌЕ ГИ ЗБРИШЕМЕ! Трамп вели дека Иранците бараат нешта со кои тој не може да се согласи appeared first on plusinfo.mk.

Иран достави нов предлог за преговарачка рамка до Пакистан, кој е посредник во процесот на мировните преговори меѓу Техеран и САД, јави ИРНА, повикувајќи се на ирански дипломатски извори.

Портпаролот на Министерството за надворешни работи на Иран, Есмаил Багеи, во петокот изјави дека прекинот на војната и постигнувањето траен мир се приоритет на Техеран во разговорите со Вашингтон. Како што се наведува, примирјето меѓу Иран, САД и Израел беше воспоставено на 7 април со цел да се овозможи дипломатско решение, а подоцна беше продолжено на неодредено време.

Преговорите меѓу Техеран и Вашингтон се одржаа на 11 април во Исламабад, со учество на делегации предводени од претседателот на иранскиот парламент Мохамад Багер Калибаф и американскиот потпретседател Џеј Ди Венс, но без постигнување договор.

Техеран ја пренел својата најнова позиција до Вашингтон преку Пакистан, кој посредуваше во првата рунда директни преговори минатиот месец, објави во петокот државната агенција ИРНА.

Судбината на Ормускиот теснец — преку кој пред војната минуваше околу една петтина од светската нафта и течниот природен гас — е во сржта на актуелниот застој. И Иран и САД сигнализираат дека чекаат прво другата страна да повлече потег пред да се согласат да ги олеснат ограничувањата за сообраќај.

ИРНА не даде детали за тоа што опфаќа иранскиот предлог по клучните прашања, како што се Ормускиот теснец или нуклеарните активности на Иран.

Белата куќа денеска соопшти дека нема да изнесува детали за приватни дипломатски разговори, одговарајќи на прашањето за новиот предлог на Иран упатен до САД преку посредникот Пакистан.

– Не изнесуваме детали за приватни дипломатски разговори. Претседателот Доналд Трамп јасно стави до знаење дека Иран никогаш не смее да поседува нуклеарно оружје, а преговорите продолжуваат со цел да се обезбеди краткорочната и долгорочната национална безбедност на САД – изјави портпаролката на Белата куќа, Ана Кили за Ројтерс.

Трамп во четвртокот изјави дека блокадата на иранските пристаништа ѝ ги одзема неопходните приходи од нафта на Исламската Република, тврдејќи дека притисокот ќе го натера Техеран повторно да седне на преговарачката маса.

Во исто време, од Вашингтон доаѓаат сигнали дека, покрај дипломатијата, се разгледуваат и воени опции. „Фокс њуз“ објавува дека командантот на американскиот ЦЕНТКОМ, адмирал Бред Купер, му ги претставил на претседателот Доналд Трамп можните сценарија за таканаречениот „финален удар“ врз Иран.

Пентагон, исто така, размислува за зајакнување на своето воено присуство во регионот, вклучително и распоредување на напредни системи како што е хиперсоничната ракета „Dark Eagle“, со дострел од околу 2.700 километри. Во меѓувреме, бомбардерите Б-1Б Лансер веќе го зголемија своето присуство на Блискиот Исток.

The post ИРАН ПОНУДИЛ НОВ МИРОВЕН ПРЕДЛОГ ДО САД Вашингтон паралелно разгледува воен одговор appeared first on plusinfo.mk.

Претседателот на САД Доналд Трамп навести дека веројатно нема да го прифати најновиот предлог на Иран за окончување на конфликтот, кој предвидува повторно отворање на Ормуската Теснина со одложување на решавањето на нуклеарното прашање.

Според извори запознаени со ситуацијата, Трамп го изнел ставот на состанок со високи претставници за национална безбедност, изразувајќи резервираност кон планот што Техеран го доставил деновиве, пренесе „Си-Ен-Ен“.

Американски претставници оцениле дека отворањето на теснината без решавање на прашањето за збогатувањето ураниум би ја ослабело преговарачката позиција на САД, додека понатамошна блокада би продолжила да го поттикнува растот на цените на енергенсите, вклучително и на горивата во САД.

Притоа не се прецизирани следните чекори на Администрацијата во САД, а официјални лица изразиле загриженост поради можни поделби во иранското раководство и нејаснотии околу прашањето кој е крајниот фактор што ги носи одлуките во Техеран.

Белата куќа одби да ги коментира деталите од преговорите, наведувајќи дека станува збор за чувствителни дипломатски разговори и оти САД ќе прифатат само договор што ја исклучува можноста Иран да дојде до нуклеарно оружје.

The post ТРАМП НЕМА ДА ПРИФАТИ ДОГОВОР БЕЗ РЕШЕНИЕ ЗА УРАНИУМОТ Неприфатливо е Иран да направи нуклеарно оружје appeared first on plusinfo.mk.

Иран испрати нов предлог до Соединетите Американски Држави за деблокирање на Ормускиот теснец и ставање крај на војната, додека за разговорите за нуклеарната програма предлага да бидат одложени за подоцнежна фаза, објави американскиот медиум „Аксиос“, повикувајќи се на американски официјален претставник и двајца извори запознаени со преговорите.

Според предлогот, Техеран се обидува да го заобиколи најспорното прашање за нуклеарната програма, со цел побрзо да се постигне договор за отворање на Ормускиот теснец и прекин на непријателствата.

Иранскиот план, според „Аксиос“ е доставен преку пакистански посредници и предвидува продолжување на прекинот на огнот на подолг рок или постигнување траен договор за прекин на војната, додека зануклеарните разговори е предвидено да започнат дури откако ќе се деблокира теснецот и ќе се укине американската блокада.

Ваквиот пристап, според извори на „Аксиос“, е обид за излез од дипломатскиот ќорсокак, во услови кога иранското раководство е поделено околу тоа какви отстапки треба да му понуди на Вашингтон.

САД, пак, остануваат на ставот дека Иран мора да го запре збогатувањето ураниум и да се откаже од можноста за развој на нуклеарно оружје, што останува клучна точка на спор меѓу двете страни.

Американскиот претседател Доналд Трамп се очекува денеска да одржи состанок со својот тим за национална безбедност во Белата куќа, на кој ќе се разговара за застојот во преговорите и за следните чекори на Вашингтон. Според американски медиуми, Трамп и натаму размислува за продолжување на поморската блокада врз Иран, како средство за дополнителен притисок врз Техеран.

Дипломатската криза дополнително се продлабочи откако пропадна најавената средба меѓу американските пратеници и иранскиот министер за надворешни работи Абас Арагчи во Исламабад. Трамп изјави дека го откажал патувањето на своите претставници, оценувајќи дека разговорите можат да се водат и телефонски, без нови дипломатски мисии.

Во меѓувреме, Арагчи, пристигна во Санкт Петербург во официјална посета на Руската Федерација, каде ќе се сретне со рускиот министер за надворешни работи Сергеј Лавров, како и со рускиот претседател Владимир Путин.

Арагчи претходно се сретна со високи пакистански и омански претставници за време на неговите посети на Исламабад и Мускат.

The post ИРАН ПРЕДЛОЖИ ПЛАН ЗА ДЕEСКАЛАЦИЈА НА КОНФЛИКТОТ Арагчи ќе му го претстави на Путин во Москва appeared first on plusinfo.mk.

Пратеничката група на ЗНАМ, со поддршка на пратениците од мнозинството, поднесе Предлог на закон за дополнување на Законот за безбедност на сообраќајот на патиштата, по скратена постапка, со кој се предвидува возачот кој поседува возачка дозвола од Б категорија, да има право да управува мотоцикли со автоматски менувач од категоријата „А1“, чија зафатнина на моторот не е поголема од 125 м3 и чија сила на моторот не е поголема од 11 КW, a соодносот на јачината на моторот и масата на возилото не надминува 0.1 KW/кг.

– Со овој Предлог на закон се предвидува возачот кој поседува возачка дозвола од Б категорија, да има право да управува мотоцикл со автоматски менувач од категоријата А1 согласно ЕУ регулативата, откако ќе наполни 23 години, поседува минимум пет години возачка дозвола од категорија „Б“ и посетува 4-часовна теоретска обука за безбедност при управување на мотоцикли во авто школа и која важи само на територијата на државата, изјави на прес-конференција пратеникот Павле Арсовски.

Содржината на обуката, формата, содржината на потврдата и начинот на водење на евиденција за издадени потврди за посета на обуката ја пропишува министерот за внатрешни работи во рок од 15 дена во рок од влегување на сила на овој закон. Автошколата ќе треба да ја издаде дозволата за посета на четири часа обука сообраќајни правила и прописи и го известува МВР.

Арсовски потенцира дека овој закон има за цел да мотивира и да поттикне што поголем број на граѓани својот автомобил при вршењето на секојдневните обврски да го заменат со мотцикл.

На новинарско прашање, Арсовски рече дека пратеничката група на ЗНАМ е обединета и останува компактна.

The post СО „Б“ КАТЕГОРИЈА ДА МОЖЕ ДА СЕ ВОЗИ МОТОР ДО 125 КУБИЦИ Поднесен предлог закон во Собранието appeared first on plusinfo.mk.

Премиерот Христијан Мицкоски денеска изјави дека деновиве се очекува да завршат консултациите и Владата да излезе со предлог-име за нов државен јавен обвинител.

– Следнава недела очекуваме да финишираат консултациите и да излеземе со предлог име кое ќе го испратиме до Парламентот – рече Мицкоски одговарајќи на новинарски прашања по поставувањето камен-темелник на нов кампус на Универзитетот „Мајка Тереза“ во Скопје.

The post СЛЕДНАТА НЕДЕЛА ЌЕ ИМА ПРЕДЛОГ ЗА НОВ ДРЖАВЕН ОБВИНИТЕЛ Мицкоски очекува да финишираат консултациите appeared first on plusinfo.mk.