Подготвена е нацрт-одлуката за воведување на училишна кошничка, која во консултациите со трговците на големо и мало кои продаваат училишен прибор била прифатена како соодветен и практичен модел за намалување на трошоците за родителите пред почетокот на новата учебна година – информира денеска Министерството за економија и труд.

Согласно предлогот, ќе се понуди училишна кошничка до 15% попуст, а составот и крајната цена на кошничката, посочуваат дека ќе се разликува од трговец до трговец, во зависност од изборот, квалитетот и брендот на производите.

– Кошничките ќе бидат јасно означени и поставени на видно место, со прецизно наведен состав и цени на производите. На овој начин, родителите однапред ќе имаат целосна информација за тоа што ќе содржи пакетот и која ќе биде неговата цена. Попустот до 15% ќе се пресметува директно на каса и ќе биде прикажан на фискалната сметка – појаснуваат од Министерството за економија и труд.

Нацрт-одлуката е доставена до Владата и во вторник ќе биде разгледана, по што ќе се донесе одлука за нејзиното усвојување и понатамошно спроведување.

Претходно денеска премиерот Христијан Мицкоски, во одговор на новинарско прашање посочи дека на следната владина седница во вторник ќе донесат одлука со која ќе се формира годинешната училишна кошничка.

Мерката, исто како и минатата година, ќе ги опфати основните училишни материјали што најчесто се купуваат пред почетокот на учебната година, меѓу кои ранци, тетратки, моливи, гуми, линијари, лепила, маркери, блокови, како и материјали за ликовно и техничко образование.

Со владината мерка се очекува да се намали финансискиот товар за семејствата во периодот пред почетокот на учебната година кога трошоците за опремување на учениците традиционално се зголемуваат.

The post УЧИЛИШНАТА КОШНИЧКА МОЖЕ ДА БИДЕ ПОЕВТИНА ДО 15% Министерството за економија го достави предлогот до влада appeared first on plusinfo.mk.