Фер понуда или обид за понижување?

Како што дознава Плусинфо од високи црковни извори, МПЦ-ОА планира да му понуди на поглаварот на ПОА, г.г. Јован, да се пензионира, а за возврат да добие Канцеларија за образование во МПЦ-ОА.

Неофицијално, на епископот брегалнички г. Марко, ќе му биде понудено како хороепископ да замине во Делчевскиот манастир (Св. Богородица Балаклија), под власт на актуелниот епископ брегалнички г. Иларион од МПЦ-ОА.

Се очекува и епископот полошко-кумановски г. Јоаким да добие понуда како хороепископ да замине во Поречкиот манастир (Рождество на Пресвета Богородица) под власт на епископот дебарско-кичевски г. Тимотеј од МПЦ-ОА. Инаку, во административна смисла, титулата хороепископ не значи баш многу: не смее да ракополага, не смее да поставува свештеници, не смее да осветува храмови, не смее да прави ништо без дозвола од надлежниот епископ.

Интересно е тоа што во плановите на МПЦ-ОА воопшто не е вклучен епископот стобиски г. Давид од ПОА, за кого, наводно, МПЦ-ОА веќе испратила абер до Српската православна црква (СПЦ), доколку постои расположение кај српскиот патријарх, да дозволи да му се отвори подворие во Скопје. На тој начин епископот г. Давид би добил своја канцеларија, односно претставништво, а тој лично би бил дел од раководството на СПЦ.

До истекот на месецот

Неблагодарно е сега да зборувам за тоа што треба да им се понуди на архиерејите од Православната охридска архиепископија, бидејќи до крајот на месецов ќе имаме седница на Синодот на којашто со сигурност ќе биде тоа прашање ставено на дневен ред.

Ова во разговор за Плусинфо го изјави епископот преспанско-пелагониски г. Петар од МПЦ-ОА, кој признава дека веќе се доцни со интеграцијата на двете цркви.

– Не би сакал сега да коментирам и да откривам информации, бидејќи се плашам дека би можел да бидам погрешно разбран од браќата архиереји во смисла дека се поставувам над Синодот. Оваа тема со сигурност ќе биде точка на дневен ред на следната седница на Синодот, бидејќи времето си одминува, а оваа работа мора да се реши еднаш засекогаш. Сметам дека нема многу да чекате и дека до крајот на месецов ќе добиете информација каков став ќе заземе МПЦ-ОА – изјави владиката Петар.

Оваа тема со сигурност ќе биде точка на дневен ред на следната седница на Синодот, бидејќи времето си одминува, а оваа работа мора да се реши еднаш засекогаш.

г. Петар Митрополит преспанско-пелагониски, МПЦ-ОА

Официјален став побаравме и од раководството на Православната охридска архиепископија (ПОА), но оттаму нѐ информираа дека засега не добиле никаков предлог или понуда.

– До овој момент немаме добиено никаква официјална информација поврзана за тоа како ќе се одвива интеграцијата на двете цркви. Сепак, ние очекуваме ова прашање да се реши на радост на сите. Во моментов не би сакале да коментираме информации кои се базираат на шпекулации – ни одговорија од ПОА.

The post ЕДЕН ВО ПЕНЗИЈА, ДРУГ ВО ОТПИШАНИТЕ Каква понуда им крчка МПЦ-ОА на владиците од ПОА? appeared first on plusinfo.mk.

Не верувам дека архиепископот ќе свика заседание во текот на оваа недела, затоа што е прва недела од Велигденскиот пост и тогаш не се заседава. Сите архиереји во текот на оваа недела се в црква, таков е периодот.

Владика Тимотеј Портпарол на Синодот на МПЦ-ОА

Ова за Плусинфо го изјави митрополитот дебарско-кичевски и портпарол на Синодот на Македонската православна црква (МПЦ-ОА), г. Тимотеј, одговарајќи на прашањето зошто МПЦ-ОА не им се приклучи на сите останати православни цркви кои повикаа на мир во Украина и го осудија рускиот атак.

– Без никакво двоумење го осудуваме рускиот напад врз Украина и најдобро би било да престане таа лудорија. Меѓутоа, тоа не зависи од нас. Гледате дека не ги слушаат и поголемите сили, а сигурно нема да нѐ послушаат и нас. Во секој случај, ние сме солидарни со оној кој страда, бидејќи тоа е христијански. А особено сме солидарни со оној врз кој е извршена воена агресија. Во овој случај, ние се солидаризираме со украинскиот народ и ја осудуваме руската агресија. Ова го кажувам јас како портпарол на Синодот на МПЦ-ОА, а официјалниот став на црквата зависи од тоа кога ќе се одржи заседанието. Не верувам дека архиепископот ќе свика заседание во текот на оваа недела, затоа што е прва недела од Велигденскиот пост и тогаш не се заседава. Сите архиереји во текот на оваа недела се в црква, таков е периодот – изјави г. Тимотеј.

Официјален јавен повик за прекин на војната помеѓу Русија и Украина нема ни од Православната охридска архиепископија (ПОА), но оттаму објаснуваат дека ставот на ПОА е всушност истиот став на Српската православна црква (СПЦ).

– Нашиот став е ист со ставот на Патријаршијата. Ние се приклонуваме кон ставот на Патријаршијата и се согласуваме со секој збор што е напишан во соопштението. Повикуваме на мир и жалиме поради тоа што војната ја водат два братски православни народа – велат извори од ПОА.

Досега, официјална осуда за војната во Украина и повик за мир испратија Вселенската патријаршија, Грчката црква, Грузиската, Бугарската, Албанската, Српската, Романската, Полската, црквата на Чешка и Словачка, Американската православна црква, Финската, Ерусaлимската и Црногорската правосавна црква.

The post ЏАБЕ ЌЕ ПОВИКАМЕ НА МИР КОГА НИКОЈ НЕМА ДА НЀ ПОСЛУША Само уште МПЦ-ОА официјално не го осудила конфликтот во Украина appeared first on plusinfo.mk.

Ваква порака денеска испрати српскиот патријарх Порфириј, кој во интервју за „Политика“ оцени дека „никој друг од страна не може да има поголемо разбирање за проблемот од нас самите кои со векови на овие балкански простори заедно се вградуваме во Црквата Христова, без никакви меѓусебни недоразбирања“.

За упатеноста прашањата да се решаваат меѓу Белград и Скопје, според него, е дефинирано и со Томосот со кој вселенскиот патријарх во 1922 година потврдил дека епархиите во денешна Македонија припаѓаат на Српската патријаршија.

Дека нешто се крчка и дека СПЦ најверојатно наскоро ќе го извади проблемот од замрзнувачот, каде го беше ставила во 2015 година кога ги прекина и ги замрзна преговорите со МПЦ-ОА поради судскиот процес што се водеше против првиот архиереј на Православната охридска архиепископија (ПОА), г.г. Јован, говори и минатонеделната изјава на епископот бачки г. Иринеј (Буловиќ) дека е неопходно да продолжи дијалогот помеѓу СПЦ и МПЦ-ОА за надминување на отвореното црковно прашање.

Од друга страна, пак, митрополитот преспанско-пелагониски г. Петар од МПЦ-ОА не сака да чуе за никакви преговори со СПЦ доколку претходно не се овозможи заедничко богослужение помеѓу владиците и свештениците од двете цркви. Тој смета дека само вселенскиот патријарх Вартоломеј може да ѝ додели автокефалност на МПЦ-ОА, оти, како што објасни, Цариград е мајка-црква на Македонската црква.

Не се откажуваме!

Не само што не се откажуваме, туку со целосна одговорност за верниот народ во Македонија сакаме нарушеното единство повторно да се воспостави, вели поглаварот на СПЦ, г.г. Порфириј.

– Секој разговор што може да создаде минимум можности за воспоставување на нарушеното единство на Црквата е благословен и ме радува, бидејќи тоа е уште една рана што ме боли мене и секој свештеник, епископ на Српската црква, па и многу верници. Секој раскол е рана на телото Христово, на Црквата. А ние овде во Пеќката патријаршија, српски владици, не само што не се откажуваме, туку со целосна одговорност за верниот народ во Северна Македонија, чија побожност, љубов кон Црквата Христова им е позната на сите, сакаме нарушено единство повторно да се воспостави. Светиот архиерејски Синод на СПЦ на последната седница, имајќи ги предвид различните можности што ги даваат светите канони и принципите на црковната икономија, одлучи повторно да ги повика епископите кои се одвоија од Пеќката патријаршија заедно со братски, трпелив дијалог да се најде благословено решение – вели патријархот.

Лично јас, додава тој, сум убеден дека тие коишто ја прекинаа комуникацијата во 1967 година, не го направија тоа сами по свој разум.

– Но сега имаме можност и целосна слобода по свој разум да направиме сè за сите да можеме да пристапуваме од заедничката чаша. Ако навистина тоа е нашата цел, тогаш натписот на етикетата не може да биде почетна премиса за разговори, туку цел што треба да биде плод на молитвата кон Бога, Свети Сава и Светиот крал Милутин, Светите Климент и Наум, Свети Георги Кратовац и сите наши свети предци кои со својата вера, градењето на Телото Христово на земјата и мачеништвото станаа наши животни топоси. Молитвата кон овие светци ќе ни покаже благословени решенија за сите сложени прашања кои се дел од решението, но ние, владиците на Пеќката патријаршија, од сè срце сакаме да се реши ова прашање – изјави српскиот патријарх Порфириј.

Цариград е нашата мајка-црква!

Митрополитот преспанско-пелагониски г. Петар од МПЦ-ОА не сака да чуе за никакви преговори со СПЦ доколку претходно не се овозможи заедничко богослужение помеѓу владиците и свештениците од МПЦ-ОА и СПЦ, но не и помеѓу владиците и свештениците помеѓу МПЦ-ОА и ПОА.

Владиката смета дека единствено Цариградската патријаршија може да ѝ додели Томос за автокефалност на МПЦ-ОА, оти, како што вели, Цариград е мајка-црква на Македонската црква.

– Прашањето во врска прашањето за автокефалност на МПЦ-ОА е во надлежност на Цариградската патријаршија, затоа што по последниот Вселенски собор во осмиот век, сите цркви примиле автокефалност од Цариградската патријаршија, а не од другите цркви кои се обидувале да дадат автокефалност. И самата Руска православна црква добила автокефалност од Цариградската патријаршија, а истото важи и за СПЦ и за Бугарската црква, за Романската, Грчката црква… Значи, не е воопшто спорно прашањето дека одлука за автокефалност доделува Цариградската патријаршија. Воопшто не е спорно тоа што Србите сега го посочуваат, вклучувајќи го и српскиот патријарх Порфириј, дека СПЦ ги доделила нашите епархии. Тоа е факт и од фактите нема бегање. Но, Србите ги премолчуваат другите факти, односно дека на четвртиот Вселенски собор е донесена одлука дека во новоформирана држава, ако се исполнети условите за автокефалност, тогаш на црквата во таа држава треба да ѝ биде доделена автокефалност. Секако, тоа го прави мајката-црква, а во конкретниов случај тоа е Цариградската патријаршија. Србите сакаат да ја поништат одлуката за доделување самостојност на МПЦ-ОА и сакаат да нè сведат на состојбата и на положбата на нашата црква како што била во времето пред Втората светска војна, односно ние да бидеме дел од СПЦ, дури и да не бидеме автономна црква – објаснува г. Петар.

Србите сакаат да ја поништат одлуката за доделување самостојност на МПЦ-ОА и сакаат да нè сведат на состојбата и на положбата на нашата црква како што била во времето пред Втората светска војна, односно ние да бидеме дел од СПЦ, дури и да не бидеме автономна црква.

г. Петар Митрополит преспанско-пелагониски, МПЦ-ОА

Владиката посочува дека МПЦ-ОА сега ја очекува автокефалноста од Цариградската патријаршија, а не од СПЦ.

– СПЦ не сака да го реши прашањето за автокефалност, туку само да го подобри. Имено, во 1992 година, кога за првпат имавме средба во Калишта на ниво на комисии, донесовме став дека треба да сослужуваме на ниво на владици и на свештеници. Тоа првично беше прифатено, но Србите подоцна го одбиле таквиот став. Затоа, ако сакаат да го решиме прашањето, тогаш тоа може да го сториме само доколку прифатат заеднички богослужби. Тоа можеме ние да го понудиме и сметам дека нашиот Синод нема да одбие заедничко сослужување со владиците и со свештениците од СПЦ и со која било друга помесна православна црква, но не и со ПОА. Проблемот со ПОА ќе се решава дополнително. Тука треба да се почне, а потоа ќе видат и ќе се уверат дека нашата црква ги исполнува сите услови за добивање автокефалност – објаснува г. Петар.

На прашањето како ќе реагираат другите православни цркви доколку Цариград ѝ додели автокефалност на МПЦ-ОА, владиката Петар вели дека незадоволство може да се појави само кај оние цркви кои имаат иста агенда. Во тој контекст, тој ја посочи СПЦ која ја поддржува Руската православна црква по прашањето за непризнавање на Украинската православна црква.

Погрешни адреси

Епископот стобиски г. Давид (Нинов) од Православната охридска архиепископија (ПОА), во разговор за Плусинфо вели дека здраворазумски би било МПЦ-ОА да започне братски дијалог со ПОА и со СПЦ, а како што потсетува, решението на проблемот не се наоѓа ниту во Софија, ниту во Константинопол.

– Во однос на неодамнешната изјава на eпископот бачки г. Иринеј за започнување на дијалог со МПЦ, на будниот набљудувач, веднаш ќе му биде јасно дека воопшто не станува збор за нешто неочекувано и ново. Потсетувам дека aрхиепископот охридски и митрополит скопски г.г. Јован во време на најжестокиот државен прогон против ПОА, се застапуваше за принципиелен дијалог со МПЦ-ОА и неговиот став стана официјален став на Соборот на СПЦ. Спомнатите прогони, засега, pro forma, се стивнати, иако суптилниот државен прогон врз ПОА продолжува со одбивањето на државата да ја спроведе обврзувачката одлука на Европскиот суд за човекови права од Стразбур за регистрација на ПОА, како и со нарушувањето на секуларното општествено уредување од страна на дел од домашните политички чинители, кои преземаат верски надлежности што ѝ припаѓаат на МПЦ-ОА. Нашата канонска црква имаше трпение да чека, со сожалување гледајќи како МПЦ-ОА го троши скапоценото време, тропајќи на погрешни врати. Секогаш ќе го имаме тоа трпение во однос на нашите сограѓани, кои припаѓаат на МПЦ-ОА. Но, решението на проблемот на МПЦ-ОА не се наоѓа ниту во Софија, ниту во Константинопол – објаснува владиката.

Ние не би сакале МПЦ-ОА и следните 50 години да ги потроши залудно, обраќајќи се на погрешни адреси, додава г. Давид.

– Здраворазумски би било МПЦ-ОА да започне братски дијалог со ПОА и СПЦ. Дури, заради природната упатеност едни на други, би се осмелил да кажам и за конструктивен дијалог со ПОА, бидејќи тоа што ПОА и МПЦ-ОА можат да го договорат, сигурно ќе биде прифатено од СПЦ. Ние не би сакале МПЦ и следните педесет години да ги потроши залудно, обраќајќи се на погрешни адреси, упорно одбивајќи да се упати на единствената точна и, воедно, најблиска адреса, но доколку превидувањето и понатаму претставува нивен избор, ќе го почитуваме, за возврат барајќи државата да го почитува нашето уставно гарантирано право на вероисповед. Засега, помеѓу ПОА и МПЦ-ОА постои суштинска разлика во вероисповедта. ПОА е сеправославно призната автономна архиепископија со свој Синод, своја црковна јурисдикција, и се наоѓа во литургиско и канонско единство со останатите православни цркви, а МПЦ-ОА, за жал, пребива вон тоа единство. Ние би сакале таа разлика да не постои – објаснува владиката Давид.

The post СПЦ НУДИ РАКА, МПЦ ГРИЗЕ ПРСТ Нема што да преговараме, Цариград е нашата мајка-црква! appeared first on plusinfo.mk.

„Дури по цели три и пол години ‘темелно размислување и проучување’, Основниот граѓански суд во Скопје, во јануари 2021 г., го одби барањето на Православната охридска архиепископија за исполнување на пресудата на ЕСЧП во Стразбур за регистрација на оваа верска заедница, а со едноставно образложение дека така му се сакало на првоминистерот Зоран Заев, за кој не е тајна дека по сите религиозни прашања е индоктриниран од струмичкиот митрополит на непризнатата МПЦ, Наум. За тоа колку верска слобода има во Република Северна Македонија знае целиот свет, освен новинарите во оваа држава, кои нотираат дека Република Бугарија не ги регистрира здруженијата во таа држава, кои ги добиле случаите во ЕСЧП, а не им пречи тоа што во нивната држава една верска задница полни шеснаесет години не е регистрирана. Сепак, секое зло за свое добро, вели народот, зашто потсмевот и подигравката паѓаат на претседателот на државава Стево Пендаровски и на првоминистерот Зоран Заев, коишто праќаат писма до Вселенската патријаршија за признавање на МПЦ, а во државата во која тие се челници, токму по нивна заложба на се прифаќаат пресудите од ЕСЧП, кои се однесуваат на верските слободи“, се наведува во реакцијата од ПОА.

The post Апелациониот суд одби да ја регистрира ПОА иако Стразбур пресуди во нејзина корист appeared first on plusinfo.mk.

„Појдовен стремеж, пред сè да им биде општествената одговорност и штедриот израз на човекољубие кон ближниот, а како и секогаш, под ближен да се подразбира буквално секој сограѓанин, без разлика на националната или верската припадност. Согласно на вековното православно предание, да се практикува принципот на саможртвена љубов, со цел да се сочува животот на ближниот! Следствено, најважно е, секој од граѓаните припадници на Православната Охридска Архиепископија, будно да внимава и да не си дозволи да стане ниту носител, уште помалку преносител на вирусот“, наведено е во соопштението.

Синодот на ПОА истовремено им изразува целосна молитвена поддршка на лекарите и на севкупниот медицински персонал, кои без престан се борат да ѝ стават крај на пандемијата, и го призива благословот Божји да пребива на нив.

„Ги повикуваме граѓаните припадници на Архиепископијата да го прифатат ова искушение како нова можност за преобразба на животот и на тој начин да отворат простор во нивните срца да воскресне Лекарот на нашите души и тела, Христос Господ!“, стои во соопштението.

The post ПОА повикува на општествена одговорност и на нова можност за преобразба appeared first on plusinfo.mk.