Судот закажа ново рочиште на 7 јули кога треба да постапи по одлуката на Апелацикиот суд со која се укинува неговата одлука за запирање на уривањето по жалба на управителот на галијата Жарко Миленковски.

– За оние кои не знаат, согласно Законот, законски застапник на институцијата е градоначалникот и јас имам право да го застапувам овој град во секоја постапка. Одлуката на Апелациониот суд во Скопје е да ја укине времената мерка на Основниот суд и ние заради тоа продолживме со извршните дејствија, а Основниот суд во Скопје закажа рочиште на 7 јули на коешто јас кажав дека ќе го застапувам Град Скопје  – изјави Шилегов по промоцијата на специјалните возила-камиони за собирање и транспорт на комунален отпад.

Шилегов тврди дека сопственикот на галијата со месеци не плаќал кирија со што создал можност за раскинување на договорот.

– Одлуката за уривање на галијата во Вардар се носи по основ на извршната клаузула во договорот што го има постигнато Градот Скопје со корисникот на просторот. Ние минатата недела продолживме со извршното дејствие со надлежниот извршител ангажиран од страна на градот – информира Шилегов.

Денеска од галијата која е затворена се  изнесува инвентарот.

The post Шилегов ќе го застапува Градот на суд за рушење на галијата appeared first on plusinfo.mk.

Судот во Стразбур ѝ дал рок на Македонија до 11 јуни да даде одговор на прашањата за судските предмети, откако претходно, како што на почетокот на октомври лани, правниот застапник на обвинетите функционери Влатко Илиевски обелодени дека судот ги повикал двете страни на пријателско спогодување, до 18 декември лани.

На прашање на Плусинфо во Министерството за правда до каде е постапката со македонските предмети во Европскиот суд за човекови права во Стразбур, потврдуваат дека државата барала одложување на рокот за одговор.

– Поради обемност на материјалите, потешкотиите за пристап до судските списи бидејќи се работи за тековни предмети пред домашните институции и состојбата со пандемијата, на барање на државата се пролонгираше рокот до 11 јуни, 2021 година – велат од Министерството за правда.

Европскиот суд за човекови права уште лани на 25 септември испрати известување до македонското Биро за застапување пред судот во Стразбур, за пријавите на поранешните функционери, аболицирани од Иванов во 2016 година.

Државата во судот во Стразбур ја тужат поранешниот премиер Никола Груевски, Сашо Мијалков, поранешниот шеф на УБК, потоа Гордана Јанкулоска, Миле Јанакиески, Киро Тодоровски. Првата апликација до судот беше поднесена од поранешниот градоначалник на Битола Владимир Талевски пред три години, на 3 ноември 2017 година. Во истиот месец само неколку дена подоцна во меѓународниот суд стасале уште пет тужби од Македонија поврзани со аболицијата на Иванов. Судот побара од македонската Влада објаснување за обвинетите лица во неколку случаи на СЈО, односно на Обвинителство за организиран криминал и корупција.

– За девет месеци дете се раѓа, а Владата побара пролонгирање на одговор кој може да се направи најмногу за три месеци, ако се има предвид дека Европскиот суд за човекови права, бара прецизни одговори за три судски предмети, а за кои пандемијата не беше пречка да се дојде до одговорите – вели за Плусинфо Влатко Илиевски, правниот застапник на десетте поранешни функционери кои ја тужат државата пред Европскиот суд за човекови права во Стразбур.

Во барањето до Европскиот суд за продолжување на крајниот рок за поднесување одговори, власта како аргумент ја споменува кризата со ковид-19 и вели дека министерствата морале да ги променат своите работни аранжмани што „имало влијание врз достапноста на членовите на тимот“ кој работи на таа проблематика и нормалниот начин на работа. Потоа, во барањето до судот во Стразбур, се објаснува дека пандемијата „значително влијаела на работните аранжмани на домашните судови“, а се бара одложување и затоа што апликациите се однесувале на „многу сложен и уникатен пакет факти за кои е потребна длабинска анализа“.

– Аргументите на Министерството за правда за одложување на рокот за одговор не соодветствуваат со фактите и драматично се презентирани пред Европскиот суд за човекови права во Стразбур од страна на власта – вели адвокатот Илиевски.

Тој ова свое тврдење, со кое е запознаен и судот во Стразбур го поткрепува со заклучок на Владата, донесен на седницата од 20 октомври 2020 година во кој министерствата и сите други јавни институции направиле план за, како што вели, непречен обем на работа и континуиран работен процес. Според овој владин заклучок, вели Илиевски, сите вработени треба да бидат на располагање на работодавачот, преку комуникација со е-пошта и други ИТ-алатки.

– Работата на судовите не беше попречена од пандемијата на кој било начин во текот на изминатите месеци. Всушност, судовите, особено Основниот кривичен суд во Скопје, надлежен за случаите на апликантите, работи со сета сила, дури и по работното време на судот, со толкав интензитет што честопати некои судски рочишта треба да бидат одложени бидејќи нема слободна судница погодна за големиот број обвинети. Ова може лесно да се докаже од распоредот на судските рочишта на веб-страницата на Судот – вели Илиевски за Плусинфо.

Тој смета дека аргументите на Министерството за правда за комплексноста на случаите и нивниот број се драматични, едноставно затоа што освен случаите поврзани со притворите, останатите случаи, всушност има само 3-4 различни судски случаи, делат идентични правни прашања на кои треба да се одговори.

– А, прашањата на ЕСЧП се многу прецизни и конкретни за кои не се потребни девет месеци да се одговори, имајќи предвид дека првите три месеци дадени од Судот за процесот на преговори беа користени од Владата за да се подготват одговорите на прашањата на Судот – објаснува адвокатот.

Оттаму, апликантите, вели Илиевски, имаат сериозни сомневања дека има друга вистина.

– Вистинската причина за барањето за одложување на крајниот рок за одговор на Владата, што исто така ќе ја одложи одлуката, односно, пресудата на ЕСЧП, е дека треба да се купи дополнително време во кое ќе има Основниот суд во Скопје време за донесување пресуди во овие случаи. Се очекува да бидат осудителни пресуди. Имајќи предвид дека повеќето од апликантите се поранешни високи функционери од најголемата опозициска партија, ова ќе биде од голема политичка корист за идната власт по претстојните локални избори, закажани за октомври 2021 година – вели адвокатот Илиевски.

The post Власта калкулира со пресуди во корист на своја штета во Стразбур appeared first on plusinfo.mk.