Северна Македонија игра многу важна улога за стабилноста и демократската отпорност во цела Европа и низ целиот Западен Балкан, истакнаа на денешната заедничка прес-конференција министерот за надворешни работи и надворешна трговија Тимчо Муцунски со генералниот секретар на Советот на Европа Ален Берсе, кој е во прва официјална посета на земјава.

– Во текот на овие три децении, како полноправна членка на Организацијата, созревавме како демократско општество, но и активно придонесувавме кон мисијата на Советот на Европа – заштита на човековите права, демократијата и владеењето на правото – рече Муцунски.

Тој истакна дека со Берсе имале отворен, конструктивен и пријателски разговор за реформските процеси, актуелните европски предизвици и за нашата понатамошна соработка.

– Изразив благодарност за континуираната поддршка што ја добиваме од Советот на Европа, особено преку експертската помош во подготовка на важни законски решенија и Акцискиот план за малцинства како значаен сегмент од нашиот европски пат. Особено задоволство изразив што напредокот на нашата држава и покрај бројните предизвици беше препознаен со затворањето на Пост-мониторинг дијалогот од страна на Парламентарното собрание на Советот на Европа во јануари оваа година – нагласи Муцунски, додавајќи дека тоа за нас претставува признание, но и дополнителна обврска да продолжиме со уште посилна посветеност кон европските вредности, човечкото достоинство, основните права и слободи и владеењето на правото.

Тој истакна дека ја реафирмирал и важноста од доследно почитување на преземените обврски од страна на сите земји членки, без двојни стандарди, со посебен акцент на независноста и имплементацијата на одлуките на Европскиот суд за човекови права.

– Изразив и надеж дека Советот на Европа и понатаму ќе остане морален компас и објективен чувар на демократските стандарди во Европа. Во разговорите се осврнавме и на актуелните регионални и европски прашања, како и поддршката за Украина, каде што улогата на Советот на Европа има посебно значење. Го поздравив лидерството на генералниот секретар Берсе во насока на понатамошно зајакнување на улогата на Советот на Европа во актуелниот геополитички контекст, како и неговиот личен ангажман во зајакнување на демократијата преку новиот Демократски пакт за Европа. Убеден сум дека оваа плодна соработка ќе продолжи и во периодот кога нашата држава ќе го преземе претседавањето со Комитетот на министри во текот на ноември следната година. Остануваме посветен, кредибилен и конструктивен партнер на Советот на Европа – заклучи Муцунски.

Берсе изрази задоволство од посетата и од досегашната соработка, притоа нагласувајќи ја важната улога на земјава во градењето на стабилноста и демократските стандарди во регионот и Европа.

– Во оваа геополитичка средина многу е важна улогата на Советот на Европа во одржувањето на демократскиот курс, стабилноста на Европа како целина, развивајќи заеднички правен простор за земјите-членки за да можат да ги решат проблемите заедно во еден заеднички простор и европска безбедност – рече тој.

Берсе ја поздрави земјава за посветеноста кон европските вредности истакнувајќи дека Советот на Европа соработува со Северна Македонија на прашања на правата на малцинствата.

The post МАКЕДОНИЈА ЌЕ ПРЕТСЕДАВА СО КОМИТЕТОТ НА МИНИСТРИ ОД 2027 ГОДИНА Советот на Европа соработува со Скопје за прашања за малцинствата appeared first on plusinfo.mk.

Бугарија му забранила влез во земјата на адвокатот Тони Менкиноски до 2036 година. Тој вели дека во официјалниот документ што го добил стоело дека наводно тој претставувал закана за националната безбедност на Република Бугарија.

Менкиноски на денешната прес-конференција изрази сомневање дека ваквата мерка е директно поврзана со неговата работа како адвокат кој ги застапува Македонците во Бугарија пред Европскиот суд за човекови права во Стразбур и истакна оти обвинението е сериозно, но е донесено без конкретно образложение и без претходна правна постапка. Забраната му била врачена на 6 март на влез во Бугарија.

– При преминување на границата луѓето кои работеа таму не можеа никако да го поминат мојот пасош. Ме замолија да ја тргнам мојата кола на страна и притоа ми кажаа дека од Софија добиле известување со кое мора да ме задржат бидејќи треба да добијат некои документи. После половина час чекање на граница ми ги доставија овие документи, ми удрија црн печат на пасошот – вели адвокатот Менкиноски.

Според него, оваа одлука е срам за Бугарија, но и за Европската Унија и смета дека со неа се врши заплашување на адвокатите и директно мешање во независноста на адвокатската професија.

Како што вели тој, наместо да ги спроведат одлуките на Европскиот суд за човекови права, Бугарите преземаат мерки кои можат да се толкуваат како притисок врз адвокат.

– Бугарија мора да ги имплементира сите 14 пресуди, односно да го признае правото на Македонците да имаат свои клубови, своја политичка партија и свое идентификување. Сега ова е израз на немоќ сакајќи преку мене да покажат сила со тоа што не се дозволува влез на адвокатот кој ги застапува пред Европскиот суд за човекови права – истакна на прес-конференцијата Менкиноски.

Тој посочи дека ќе ги искористи сите правни и институционални механизми за да ја оспори оваа одлука. Случајот ќе биде доставен и до Комесарот за човекови права, Европскиот парламент, ОБСЕ, и Обединетите нации, како и до меѓународните организации кои ја следат состојбата со човековите права и независноста на адвокатската професија.

Став за оваа информација денеска новинарите побараа и од премиерот Христијан Мицкоски.

– Немам информација дали тоа е точно и кои се причините ако е тоа точно. Но доколку е точно тоа е уште еден срам за  демократијата кај нашиот источен сосед. Но, тоа е поголем срам за сите оние кои не веруваат во вистинските намери на политичарите од нашиот источен сосед. Јас навистина би се чувствувал засрамено да бев човек кој седи на иста маса и треба да споделува исти вредности со политичарите на нашиот источен сосед. Тука, пред сѐ, мислам на земјите-членки на Европската Унија, кои мислам дека треба да реагираат, доколку се потврди дека ова е точно – рече Мицкоски во одговор на новинарско прашање по поставувањето камен темелник на универзитетскиот кампус „Мајка Тереза“.

The post МЕНКИНОСКИ СЕ СОМНЕВА ДЕКА МУ Е ЗАБРАНЕТ ВЛЕЗ ВО БУГАРИЈА ЗАШТО ГИ ЗАСТАПУВА МАКЕДОНЦИТЕ ВО СТРАЗБУР Мицкоски оцени дека потегот на Софија е срамен appeared first on plusinfo.mk.