Пожарникарите од ТППЕ Велес синоќа имаа повеќе интервенции поради обилните дождови, а најдраматичната од нив се случила околу 19 часот, кога успеале да спасат мајка и дете заглавени во поплавен автомобил кај поранешниот силос на „Жито Вардар“, информираат од Територијалната противпожарна единица Велес.

Според информациите, возилото останало заглавено на поплавена улица, а мајката и детето не можеле самите да излезат. Благодарение на брзата интервенција на пожарникарите од ноќната смена, двајцата биле успешно и безбедно извлечени.

По оваа спасувачка акција, пожарникарите веднаш продолжиле со неколку интервенции на извлекување вода од поплавени дуќани и подруми долж главната улица „Благој Ѓорев“, локација која секој пообилен дожд ја претвора во критична зона поради нерешената атмосферска канализација.

Како што информираат од ТППЕ Велес, причина за честите поплави во овој дел од градот е високата ридеста конфигурација на Велес, од каде поројната вода од повисоките улици се слева кон главните градски правци, предизвикувајќи поплави и материјална штета.

Интензивната ноќ за пожарникарите не завршила тука. Околу 22 часот, третата ноќна смена итно се упатила кон гаснење на големиот пожар што избувнал во фабриката „Аронија“, во сопственост на ДПТУ „Мирана“.

Борбата со огнената стихија траела цела ноќ. Пожарот бил локализиран во 4 часот наутро, а целосно изгаснат во 6:30 часот.

The post МАЈКА И ДЕТЕ ЗАГЛАВЕНИ ВО ПОПЛАВЕН АВТОМОБИЛ Пожарникарите од Велес ги спасиле во последен час appeared first on plusinfo.mk.

Најмногу дожд изминатите 24 часа наврнал во Крива Паланка – дури 91 литар на метар квадратен, покажуваат најновите мерења на Управата за хидрометеоролошки работи (УХМР). Најмалку дожд, пак, е измерен во Претор – само два литра на метар квадратен.

Според УХМР, до 08:00 часот утрово се измерени и 68 литри во Виница, 46 во Берово, 27 во Прилеп, 16 во Тетово, 14 во Штип, 13 во Скопје – Петровец, 9 во Битола, 7 во Куманово и Крушево, и 5 литри во Демир Капија.

Од УХМР напоменуваат дека поради локалноста на процесите, количината на паднат воден талог може значително да варира од едно до друго место, и на одредени локации може да биде многу поголема од онаа што е измерена на официјалните станици.

Времето ќе биде променливо облачно и нестабилно со локални поројни врнежи и грмежи. Наместа процесите ќе бидат поинтензивни, во форма на невреме со обилен пороен дожд, грмежи, засилен ветер и можност за град.

Максималната дневна температура ќе се движи меѓу 22 и 28 степени, а во Скопје ќе биде променливо облачно, со услови за нестабилно време, пороен дожд, грмежи и засилен ветер, како и изолирана појава на град. Температурата во главниот град ќе достигне до 26 степени.

The post ПОТОП ВО КРИВА ПАЛАНКА Предупредување од УХМР за ново невреме и појава на град appeared first on plusinfo.mk.