Според најновите податоци на Центарот за управување со кризи (ЦУК), денеска до 13:00 часот во Македонија се регистрирани вкупно 13 пожари на отворен простор, од кои четири се активни, пет се ставени под контрола, а четири се целосно изгаснати.

Најопасна е ситуацијата кај селото Нивичино, кое се протега низ територијата на општините Василево, Радовиш и Берово. Пожарот таму зафатил делови од планините Голем Готен и Малешевските планини, каде гори нискостеблеста шума, смрека, грмушки и сува вегетација.

Во Прилеп, огнот избувнал кај селото Бешиште, на локацијата позната како Бешишки Рид, и се проширил кон селото Градешница во Новаци, како и до границата со Грција, зафаќајќи мешана шума. Иако дел од пожарот е под контрола, неколку крака сè уште се активни.

Огнени јазици се шират и во регионот помеѓу Прилеп и Кавадарци, каде пожарот беснее на релацијата Царевиќ – Смолани – Радобил – Дрен (општина Прилеп), како и во близина на селата Галиште и Трстеник (општина Кавадарци). Се гори мешана шума и ниска вегетација, а теренот е тежок за гаснење.

Уште еден активен пожар е регистриран кај Крушево, каде што градската депонија во атарот на месноста Струнга се запалила, зафаќајќи ѓубре, сува трева и нискостеблеста шума.

Во меѓувреме, пет пожари се ставени под контрола, меѓу кои и оној во Штип, кој се проширил помеѓу селата Драгоево и Селце. Во Карбинци, пак, пожарот што избувна во Јунузлија зафатил шума, додека во Делчево, градската депонија Острец била под пламен.

Во Прилеп, повторно, друг пожар изби на улицата Јоска Јорданоски, а во Куманово, во селото Градиште, пожарот зафатил ниска вегетација. Сите овие интервенции се активно следени и контролирани од надлежните служби.

Од друга страна, четири пожари се целосно изгаснати – два на подрачјето на Македонски Брод, кај селото Грешница и во реонот помеѓу Црешево, Локвица и Крапа, каде горела деградирана дабова шума. Во Македонска Каменица, кај селото Ќосевица, изгасната е борова шума, додека во Струмица, кај селото Просениково, бил изгаснат пожар со трска.

Надлежните апелираат на висока внимателност, особено поради сувото време и ветрот кој дополнително ги разгорува пожарите.

The post 4 АКТИВНИ ПОЖАРИ, НОВИ ЗАКАНИ ВО ЈУЖНИОТ РЕГИОН Најсериозна е состојбата со огнот во Прилеп, Крушево и во Малешевијата appeared first on plusinfo.mk.

Македонија се соочува со опасна серија пожари на отворен простор – вкупно 27 пожари се евидентирани во последните 24 часа. Од нив, 5 се уште се активни, 4 се ставени под контрола, додека 18 се целосно изгаснати. Огнената закана се шири низ различни региони и вклучува шуми, ниска вегетација, грмушки и стрништа, а пожарникарските тимови и институциите се во вонредна мобилизација.

Еден од најопасните пожари се наоѓа на подрачјето на општините Василево, Радовиш и Берово, во селото Нивичино, каде гори нискостеблеста шума, смрека и грмушки на просторот меѓу планината Голем Готен и Малешевските планини. Шумскиот оган таму се шири поради ветер и непристапен терен, а надлежните алармираат дека ситуацијата е сериозна.

Во Прилеп, селото Бешиште повторно е погодено на местото наречено Бешишки Рид, пламените јазици проголтуваат мешана шума, со што се загрозени и блиските населени места.

Пожар избувна и во општина Желино, помеѓу селата Церово и Групчин, каде гори деградирана и нискостеблеста шума. Според извори од теренот, ова подрачје е тешко пристапно за интервенирање со механизација, што ја отежнува акцијата.

Сериозен пожар се води и на територијата на општина Штип, меѓу селата Драгоево и Селце, каде гори сува трева и прнар, што може лесно да се прошири кон населените зони.

И во Македонски Брод се води битка со пламенот меѓу селата Локвица и Крапа, се гори дабова деградирана шума, грмушки и ниска вегетација. Огнот се спушта и по падините, заканувајќи се на локалните фарми и имоти.

Четири пожари се ставени под контрола, меѓу кои и оној кај Царевиќ и Смолани (Прилеп) на локацијата Радобилски Рид, каде што беа зафатени мешана шума и ниска вегетација. Пожарот сега не се шири, но службите остануваат на терен.

Во Македонски Брод, околу селата Латово (место викано Маркова Стапалка) и Грешница, пламенот бил делумно ограничен, но останува ризик доколку ветерот го смени правецот.

И на периферијата на Скопје, во Чучер Сандево кај Делеководите, огнот се ширел во мешана шума, но благодарение на брзата реакција е стабилизиран.

Додека дел од терените уште се борат со пламенот, добра вест е што 18 пожари се целосно изгаснати, меѓу кои и во Прилеп (с. Ново Лагово и населбата Тризла), Дебар, Боговиње, Теарце, Могила, Куманово, Охрид, Петровец, Шуто Оризари, Илинден, Гази Баба, Босилово, Велес, и Кавадарци. Станува збор главно за ниска вегетација, ѓубришта и стрништа, а причините често се човечка небрежност или високи температури.

Надлежните апелираат граѓаните да бидат особено внимателни, да не палат стрништа или отпад и веднаш да пријавуваат сомнителен чад или оган.

The post ПЕТ ПОЖАРИ СЀ УШТЕ БЕСНЕАТ Низ Македонија горат шуми, треви, стрништа appeared first on plusinfo.mk.

Во последниот дневен билтен на Центарот за управување со кризи (ЦУК) се регистрирани 11 пожари. Од вкупниот број пожари, четири се сѐ уште активни, еден е ставен под контрола, а шест се успешно изгаснати со интервенции на пожарникарите, локалните власти и граѓаните.

Најкритично е во Велешко, каде што помеѓу селата Џидимирци, Крушје и Иванковци гори мешана шума, а огнот се шири со голема брзина поради сувото време и ветерот. Слична ситуација се развива и во општина Македонски Брод, каде пожарот меѓу селата Црешнево, Локвица и Крапа каде огнот зафатил деградирана дабова шума, грмушки и ниска вегетација.

Во Василево, кај селото Нивичино, пламенот зафатил нискостеблеста шума, а на терен се испратени дополнителни екипи поради непристапноста на теренот. Во Пробиштип, пожарот што се проширил меѓу селата Троло и Петришино зафатил нивa со житна култура, што дополнително ја влошува ситуацијата поради брзото ширење на огнот низ сувата пченица.

Од ЦУК информираат дека еден од пожарите е ставен под контрола во општина Дојран, кај селото Николиќ, каде гореше нискостеблеста шума, а брзата интервенција спречила поголеми последици.

– Состојбата е сериозна, особено поради високите температури и човечкиот фактор. Граѓаните мора да бидат внимателни, да не палат огнови на отворено и да пријавуваат секое сомнително движење или чад. Ризикот е зголемен во сите делови на земјата – изјавија од Центарот за управување со кризи (ЦУК), апелирајќи на зголемена претпазливост и одговорност.

Успешно изгаснати се шест пожари во различни општини: кај манастирот Св. Илија во селото Мирковци (Чучер Сандево), каде што горела мешана шума и ниска вегетација; кај наплатната рампа Гостивар и во Тетово, каде изгорела ниска вегетација; во Охрид, каде кај селото Буково горела депонија, а во селото Требеништа се гаснел пожар во природа. Во Куманово, кај селото Умин Дол, пожарот зафатил исто така ниска вегетација, но бил ставен под контрола пред да се прошири кон објекти.

ЦУК најавува зголемен број на пожари во наредните денови, особено поради екстремно високите температури и повремените ветерни удари, кои го поттикнуваат ширењето на огнената стихија.

The post НИШТО НЕ ГИ СПРЕЧУВА ОГНОВИТЕ Четири пожари сѐ уште активни, најлошо е во Велешко и во Бродско appeared first on plusinfo.mk.