Едно лице е повредено во гаснењето на пожарот синоќа во Битолско и пренесено во болница поради изгореници на дланките, соопшти денеска Стојанче Ангелов, директор на Дирекцијата за заштита и спасување (ДЗС) и најави детали за подоцна.

– Имаме и едно повредено лице, најверојатно со изгореници на дланките. Тој е пренесен во болница и дополнително ќе објавиме за неговите повреди – рече Ангелов.

Според него, вчерашниот ден бил најтежок во оваа сезона на пожари од аспект на загрозеност на населени места, бидејќи имаше два алармантни пожара. Во видеоизјава Ангелов соопшти дека во текот на вчерашниот ден имало над 40 пожари на отворен простор, а од нив активни во овој момент се шест кои не загрозуваат населени места, ниту има опасност да влезат во квалитетна шума.

Драматично вчера било во селото Богомила во општина Чашка и во пелагониските села Ивањевци, Лознани и Новоселани. Тој им се заблагодари на ангажираните тимови на ДЗС и ја пофали пожртвуваноста на населението кое ги бранело своите куќи, како и брзата реакција на локалните пожарникари и од доброволните друштва.

Во Богомила огнот вчера се приближил до првите куќи.

– Благодарение на храбрата и брза реакција, пред сѐ, на локалното население, беше спречена катастрофа. Бргу пристигнаа и пожарникарите од Велес кои дадоа голем придонес – најпрво за локализирање, ставање под контртола и гасење на овој тежок пожар – посочи Ангелов.

За младиот тракторист Аце (Александар Чепиговски) од село Ивањевци Ангелов истакна дека со неговиот огромен трактор направил херојско дело, орајќи директно низ пожарната линија и гасејќи голем дел од линијата којашто загрозувала еден дел од селото Лознени.

– Тој покажа извонредна вештина на управување со неговиот огромен трактор, изложувајќи се на голем ризик орајќи директно низ линијата на огнот со што го сопре ширењето на пожарот на повеќе места. Битката беше многу тешка и затоа апелирам до граѓаните да бидат многу внимателни – рече Ангелов.

Тој го оцени како сериозен и пожарот кој трае неколку дена на територијата на Македонски Брод. Се работи за тешкопристапен карпест терен, поради што вчера наутро почнал со работа еден модул за шумски пожари на ДЗС, составен од 25 доброволци и пет оперативци на Дирекцијата.

– Во текот на вчерашниот ден имаа извонредни резултати бидејќи изгаснаа поголема линија од пожарот, а рано утрово продолжија со работа – посочи Ангелов.

„Ер тракторите“ вчера интервенирале на големиот пожар во атарот на село Студеничани кој се ширел кон планината.

– Делумно пожарникарите, делумно слаб дожд помогнаа овој пожар да ја изгуби силата, но, за жал, сѐ уште е активен – додаде Ангелов во видеоизјавата.

Најтешка ситуацијата со справување со пожарите вчера била во Пелагонија каде што пожарот ги загрозил селата Ивањевци, Лознани и Новоселани.

– Во доцните попладневни часови лично пристигнав во селото Лознени и тоа што го видов беше застрашувачки затоа што огнот беше на 50-ина метри над куќите и се движеше по висока сува трева кон првите куќи на селото. Веднаш побарав поддршка од тимови од четири „пинцгауери“ од ДЗС, на местото гасеа локалните пожарникари од Битола, но нивните сили беа недоволни затоа што линијата на огнот беше екстремно долга. Потоа „пинцгауерите“ ги распоредивме околу селата, борбата се водеше неколку часа, извонредно голем придонес даде локалното население – вели Ангелов.

Веднаш потоа ангажирал тим за брз одговор на ДЗС, составен од 20 припадници на Доброволното противпожарно друштвво „Архангел“ од Битола, кои брзо се распоредиле и помогнале во гасење на преостанатите линии.

The post 🎥 ЖИТЕЛ НА БИТОЛСКО ДОБИЛ ИЗГОРЕНИЦИ НА ДЛАНКИТЕ ПРИ ГАСНЕЊЕТО ПОЖАР Херојско дело на младиот тракторист Александар Чепиговски кој ја изора линијата на огнот appeared first on plusinfo.mk.