Дискотеката „Пулс“, но и други објекти во градот Кочани, не биле опфатени во плановите за надзор на Дирекцијата за заштита и спасување, беше посочено на продолжението на судењето за пожарот во кочанската дискотека.

Во судницата на денешното рочиште за пожарот во „Пулс“ беа презентирани планови за квартални инспекциски контроли, годишни програми и службени документи на Дирекцијата за заштита и спасување, потпишани со името на Шабан Салиу кој од 2012 до 2017 бил директор на институцијата.

Салиу реагираше дека дел од потписите на документите не се негови, иако на нив стои неговото име како директор.

Обвинителството посочи дека во 2015 година Кочани немало назначен инспектор, што се гледа и од доказите за годишните програми и распоредот на инспектори. И покрај тоа, во 2015 година инспектори од Скопје извршиле надзор само врз еден правен субјект со низок ризик, што обвинителството го оцени како селективно.

Во делот на угостителските објекти, програмата за 2012 до 2014 година предвидувала надзор врз поголеми хотели, ресторани и мотели, но кафулињата и дискотеките повторно не биле опфатени.

Александар Наунов од здружението „16 Март“ оцени дека денешното рочиште отвора уште посериозни прашања.

– Денес во судница слушнавме одбрана дека дел од потписите не биле на обвинетиот. Иако на документите стоело неговото име како директор, остана впечаток дека најголемото прашање повеќе не е кој ја водел институцијата, туку кој го држел пенкалото – истакна Наунов.

Тој додаде дека ако навистина некој друг потпишувал наместо директорот, тогаш тоа укажува на системски пропусти.

– Ако некој можел да става туѓ потпис, да поминуваат планови и извештаи без знаење на раководството, тогаш прашањето е каде била контролата. Директорската функција не е рамка за име на документ, таа носи одговорност за тоа што излегува од институцијата – нагласи Наунов.

Според него, јавноста оправдано се прашува чиј бил потписот, кој го дозволувал тоа и како таквата пракса можела да трае со години.

Во пожарот што избувна на 16 март 2025 година во дискотеката „Пулс“ во Кочани загинаа 63 лица, а над 200 беа повредени, дел од нив со тешки изгореници. Настанот предизвика широка јавна реакција и отвори прашања за безбедносните стандарди, инспекциските надзори и примената на прописите за работа на угостителските објекти. б

The post ДИСКОТЕКАТА „ПУЛС“ И ОБЈЕКТИ ВО КОЧАНИ НЕ БИЛЕ ВО ПЛАНОВИТЕ ЗА НАДЗОР Во судницата беа презентирани нови докази appeared first on plusinfo.mk.

Со изведување материјални докази на Обвинителство, денеска во судницата на Кривичниот суд во Идризово продолжи судењето за пожарот во кочанската дискотека „Пулс“, во кој загинаа 63 луѓе, а 222 беа повредени.

Пред Судот беа презентирани докази за објектот, неговата сопственост и движењето на имотот, односно целокупната фактичка, правна и сопственичка историја на објектот каде се наоѓаше дискотеката „Пулс“.

Обвинителството презентираше 19 записници од извршен увид од комунални инспектори во кафе-барот „Класик“, во кои како управител е наведен обвинетиот Митко Стојанов, директор на фирмата „ММММ кафе“, која стопанисуваше со кафе-барот и со дискотеката. Сите увиди се извршени во негово присуство.

Беа презентирани повеќе докази поврзани со барање од Никола Кузманов од 1999 година, кој е првиот сопственик на имотот каде беше „Пулс“. Барањата се однесуваа на изградба на деловен објект, заедно со план, проект и елаборат за градба, како и документ и одобрение за градба издадени од Министерство за урбанизам и градежништво.

Беа приложени и документи од Гроздан Милковски – сопственик на имотот и на објектот во кој функционираше дискотеката, како и документација за легализација на бесправна градба на дел од објектот . Меѓу овие докази беа приложени имотен лист со објект на Милковски, купени од претходниот сопственик Кузманов, како и документација за легализација на дивоизградената доградба на објектот, направена подоцна.

На минатото рочиште се изведуваа материјални докази на Обвинителството – видеоснимки и фотографии од „Пулс“, од критичната вечер и од претходните години.

Судот на почетокот на денешното рочиште им посочи на дел од одбраната дека доказите кои се презентираат од Обвинителството се обезбедени во оригинал и доколку сакаат може да извршат увид.

Одбраната на Митко Стојанов до Судот достави предлог за укинување на мерката притвор и замена со мерки за претпазливост, укажувајќи дека тој повеќе од една година е без работа и без приходи и дека мора да работи за да го враќа хипотекарниот кредит, за да не остане без куќа.

Пожарот во дискотеката „Пулс“ во Кочани избувна на 16 март 2025 година за време на настап на групата ДНК. Судењето го води судијката Дијана Груевска-Илиевска, а обвинението го застапува тим од 15 јавни обвинители.

The post ОБВИНЕТИОТ МИТКО СТОЈАНОВ БАРА ДА МУ СЕ УКИНЕ ПРИТВОРОТ ЗА ДА НЕ ОСТАНЕ БЕЗ КУЌА Презентирани докази за објектот во кој работеше дискотеката „Пулс“ appeared first on plusinfo.mk.

Снимки од критичната вечер на 16 март 2025 година, кога избувна пожарот во дискотеката „Пулс“ во Кочани за време на концерт на ДНК, беа прикажани на денешното рочиште во Кривичниот суд за големата трагедија во која загинаа 63 млади луѓе, а 222 беа повредени.

Обвинителот Дарко Јакимовски рече дека доказите се прибавени од социјални мрежи, медиумски објави и од видеа што ги снимиле присутни гости во дискотеката. Според Обвинителството, материјалите се релевантни за утврдување на начинот на сценски настап на групата, користењето пиротехника и за моментите непосредно пред и по избувнувањето на пожарот.

Јакимовски истакна дека видеата покажуваат дека групата ДНК имала јасно дефиниран сценски распоред, кој се повторувал на повеќе настапи, а пиротехничките средства биле користени и во затворени простори. Особено внимание беше посветено на движењето на починатиот член на групата, Мартин Атанасов-Буцо.

Обвинителот прикажа видеа на кои се гледа моментот на активирање на огнометот и почетокот на пожарот. Ги потенцирше и моментите кога се активирале прскалките, како и точната локација, на која, според видеата, почнал пожарот. Прикажа и снимки од излезот од дискотеката од надворешната страна, каде што голем број луѓе се обидуваат да излезат преку единствената врата.

Претходно беа прочитани исказите на две девојки, дадени за време на истрагата, а кои поради психичката состојба не можеа лично да сведочат пред Судот.

Во исказот на Ана Томева, која работела во „Пулс“ е наведено дека сопственикот на „Пулс“ Дејан Јованов-Деко имал заштита од лица во полицијата и во инспекциските служби. Според неа, редовно работел без контрола на документите и без обележани противпожарни излези.

„Пожарот го забележав откога друг присутен викна дека се запалило, по што настана паника и турканица кон единствениот излез што го знаев“, се вели во нејзиниот исказ.

Девојката опишала дека на скалите и кај главната врата се создал огромен метеж, по што била извлечена од други лица и пренесена во болница, поради вдишан чад и повреди.

Томева во Обвинителството сведочела дека работела и во кафулето „Класик“ и во дискотеката „Пулс“, без да биде пријавена, а платата ја добивала во готово.

„Парите ни ги даваше на рака. Газда беше Дејан Јованов, син му Михаил Јованов ни ги даваше инструкциите. Никогаш не одлучуваше за нешто без да го праша. Кога ќе куцневме на терминал, место фискална излегуваше сметка-испратница. Тие сметки ги чуваа келнерите. Тие ги викавме „црни пари”. Газдата Дејан Беше опседнат со пари, нè тераше да работиме сè и сешто. Хигиената во локалите беше на најниско ниво. Во „Пулс“ имаше просторија кај што се чуваше вино. Имаше пукната цевка, мирисаше лошо. Нè тераше да ја чистиме. Лице познат како Цуната беше главен дилер на дрога. Беше стално апсен, па пуштан“, кажала Ана во Обвинителството.

Кажала и дека често гледале како доаѓаат маж и жена Митеви, инспектори, мажот бил викан Глобус.

„Беа арогантни. Стоеја со Деко на шанк“, рекла таа.

Според неа, полцијата ретко им кажувала да ја исклучат музика по истекот на работното време.

„Полицијата ни велеше само да ја намалиме. Кои други го штителе, не знаеме, важно Деко секогаш знаеше кога ќе доаѓа инспекција. Кога доаѓаа, вработените се тргаа настрана, седнуваа на маса, глумеа дека се гости”, кажала таа.

Посочила и дека вработените немале никаква обука за противпожарна заштита и спасување, ниту знаеле каде се наоѓаат противпожарните апарати. Во сведочењето било наведено и дека при најавени инспекциски контроли, дел од вработените и присутните се претставувале како гости, за да се прикрие реалната состојба во локалот.

Таа во пожарот ги изгубила момчето и блиски пријатели.

Синот на Деко, Михаил Јованов реагираше на овој исказ и ја нарече изјавата неточна.

– Изгледа затоа не доаѓа да сведочи – рече тој.

Друг сведок, Лина Крстева, која често била гостин во дискотеката, изјавила дека за време на пожарот немало лица кои ги насочувале или им помагале на присутните.

„Видов еден полицаец кој само стоеше и не ни помагаше“, сведочела Крстева.

Одбаната на првообвинетиот Деко долго се противеше на намерата на ЈО да се прочитаат исказите на двата сведока, Обвинителството, пак, побара исказите да се прифатат за да се избегне дополнителна виктимизација на жртвите. Судот дозволи да се читаат исказите. За овие сведоци психијатри вештаци констатирале дека имаат психички растројства и не можат да дојдат да сведочат и да поминат низ настанот по вторпат или кога и да било. Едната од нив паднала во несвест во автобус, бидејќи повеќе не може да гледа многу луѓе на едно место, а другата, која е меѓу најтешко повредените преживеани, е половина изгорена.

На моменти, дел од адвокатите инсистираа двете девојки и во ваква ситуација да дојдат и да сведочат, што предизвика револт, гласни реакции и солзи од присутните родители.

Адвокатот Ванчо Шехтански рече дека јавноста треба да знае дека едната од нив е ќерка на обвинител од Кочани.

Судењето за трагедијата од 16 март 2025 година го води судијката Дијана Груевска-Илиевска, а го застапува тим од 15 јавни обвинители. Им се суди на 35 физички и за 3 правни лица за тешки дела против општата сигурност.

The post НА СНИМКИ ОД НАСТАПОТ НА ДНК СЕ ГЛЕДА КАКО ПОЧНУВА ПОЖАРОТ ВО „ПУЛС“ Газда Деко го интерсираа само пари, сведочела вработена appeared first on plusinfo.mk.

Преживеаните и повредени лица од пожари се соочуваат со сериозни психолошки последици, покажа истражувањето на Универзитетската клиника за психијатрија спроведено кај 50 повредени лица во трагичниот пожар во Кочани – испитаници кои биле лекувани во рамки на третманот на лузни со PDL (Pulsed Dye Laser) на Универзитетската клиника за дерматологија.

Резултатите покажуваат дека кај една третина од испитаниците е регистрирана анксиозност, 27,5 проценти имаат симптоми на посттрауматско стресно нарушување (ПТСР), а 21,6 проценти се соочуваат со депресија, соопшти проф. д-р Славица Арсова, директорка на Универзитетската клиника за психијатрија, на втората Научна конференција на Универзитетската клиника за дерматологија, што се одржа викендов во Скопје.

Истражувањето е спроведено во периодот од јануари до март 2026 година и ќе биде дополнително проверувано со цел да се добијат научно верификувани податоци за психолошките последици од една од најтешките трагедии во поновата македонска историја.

– Пожарот во клубот Пулс претставува масовна несреќа од човечки фактор, настан кој според литературата носи значително повисок психијатриски морбидитет од природните катастрофи – изјави проф. д-р Арсова.

Дури 72 проценти од испитаниците пријавиле загуба на блиска личност во трагичниот настан, што се покажува како значаен фактор за појава на ПТСР. Истовремено, 96 проценти го наведуваат семејството како главен извор на поддршка, што ја нагласува неговата клучна улога во процесот на опоравување.

– Забележително е дека најголем дел од поддршката се бара кај семејството и од една страна е добро што кај нас опстојува оваа поврзаност со семејството. Сепак, од друга страна, сè уште егзистира стигмата кога станува збор за барање стручна помош – истакна Арсова.

Еден од најзначајните наоди од истражувањето е улогата на механизмите за справување со траумата. Избегнувачките стратегии, како повлекување, емоционално оттурнување и негирање се директно поврзани со повисоки нивоа на психолошки нарушувања и можат да доведат до продлабочување на симптомите. Истражувањето дополнително покажува дека жените се особено ранлива категорија, со повисоки нивоа на анксиозност, депресија и ПТСР.

– Избегнувањето на проблемот, емоционалното дистанцирање, самодистракцијата, негацијата, како и употребата на психоактивни супстанции и алкохол претставуваат ризични и неефикасни стратегии за справување со траумата – предупредува проф. д-р Арсова.

Во истражувањето биле вклучени 72 проценти мажи и 28 проценти жени, од кои најголем дел се на возраст од 18 до 29 години.

ЈЗУ Универзитетска клиника за психијатрија најавува дека ќе продолжи со систематско следење и научно истражување на психолошките последици од трауматскиот настан во Кочани, со цел навремено препознавање, намалување на стигмата и обезбедување соодветна стручна поддршка за сите засегнати граѓани од трауматскиот настан.

The post ТРЕТИНА ОД ПРЕЖИВЕАНИТЕ ОД ПОЖАРОТ ВО КОЧАНИ СТРАДААТ ОД АНКСИОЗНОСТ, ДЕПРЕСИЈА И ПОСТТРАУМАТСКО РАСТРОЈСТВО Истражување на Клиниката за психијатрија appeared first on plusinfo.mk.

По повод една година од трагедијата во дискотеката „Пулс“ во Кочани во Собранието денеска се одржува комеморативна седница, на која присуствуваа пратеници, министри, претседателот на Собранието Арфим Гаши, како и претседателката Гордана Сиљановска-Давкова и премиерот Христијан Мицкоски.

Пред присутните се обрати претседателот на Собранието Гаши.

– После една година се собравме да се потсетиме. Се собравме како никогаш до сега, не како власт и опозиција, туку како опшство кое беше длабоко повредено од оваа ужасна трагедија. Да им испратиме порака на семејствата дека во оваа болка не се сами. Бранот на оваа болка не зафати сите, донесе болка, но и солидарност.

Оваа седница е да се потсетиме, но и да размислиме. Трагедии како оваа ни покажуваат дека одговорноста на институциите е поголема отколку што проценуваме и дека правдата е поважна отколку што замислуваме. Затоа е важно институциите, Јавното обвинителство, судовите, Министерството за внатрешни работи и сите истражни органи да работат во овој процес со професионализам, независно и целосно транспарентно. Правдата не треба да биде пребрза, но ниту задоцнета. Само правдата и вистината може да донесат мал спокој за семејствата и за општеството. Точно и прецизно да се таргетираат виновниците за оваа трагедија. Ова исто треба да биде лекција дека спроведувањето на законот на нашата држава е обврска од која никој не е амнестиран.

Сепак, не сум на оваа говорница за да оправдувам некого ниту да демантирам гласини што неправедно се обидоа да ја искористат трагедијата за други цели и да фрлат сенка врз институциите. Тука сум за да потсетам дека трагедиите никогаш не треба да бидат поле на раздор. Тие треба да бидат моменти на солидарност, на хуманост и на сплотеност.

Затоа што, почитувани присутни, во тие денови видовме дека никој не добива ништо од поделбите. Во најтемните моменти на земјата ја видовме и најсветлата страна на нашето општество. Видовме како блеска силата на хуманоста, утехата што ја носи солидарноста и искрената поддршка.

Оваа трагедија е последниот аларм за сите политички и општествени чинители, да се вратиме кон самите себе и нашата човечност, да се издигнеме како поединци, за повторно да ја изградиме државата од почеток, но овој пат на темелите на правда и чесност – рече Гаши.

На 15 март лани во дискотеката „Пулс“ во Кочани дојде до пожар во кој животот го загубија повеќе од 60 лица, а повеќе од 200 беа повредени.

The post ТРАГЕДИИТЕ НЕ ТРЕБА ДА БИДАТ ПОЛЕ НА РАЗДОР, ТУКУ НА СОЛИДАРНОСТ И СПЛОТЕНОСТ Спикерот Гаши на комеморативната седница за пожарот во дискотеката „Пулс“ appeared first on plusinfo.mk.

Со порака дека сеќавањето мора да добие трајна форма, Советот на Општина Кочани на вчерашната 9. седница едногласно ја поддржа иницијативата за изградба и уредување на спомен-обележјето „Патека на бесконечноста за 63 ангели“. Предлогот беше усвоен со 19 гласа „за“ и произлегува од иницијатива на Здружението „16 март 2025 Кочани“.

Со порака дека сеќавањето мора да добие трајна форма, Советот на Општина Кочани на вчерашната 9. седница едногласно ја поддржа иницијативата за изградба и уредување на спомен-обележјето „Патека на бесконечноста за 63 ангели“. Предлогот беше усвоен со 19 гласа „за“ и произлегува од иницијатива на Здружението „16 март 2025 Кочани“.

Според усвоениот план, спомен-обележјето „Патека на бесконечноста за 63 ангели“ ќе биде изградено во Стариот парк, во централното градско подрачје, на локацијата меѓу улиците „Браќа Ставреви“ и „Кеј на Револуцијата“.

The post КОЧАНИ ЌЕ ГРАДИ СПОМЕН ОБЕЛЕЖЈЕ ЗА ТРАГЕДИЈАТА ВО „ПУЛС“ Советот на Општината ја изгласа инцијативата appeared first on plusinfo.mk.

Запрена е истрагата за шестмина полицајци и началници што се осомничени за кривичното дело предизвикување општа опасност во случајот за трагичниот пожар во дискотеката „Пулс“ во Кочани, објави ТВ Телма.

При истрагата е утврдено дека нивните овластувања не биле поврзани со контрола на противпожарни мерки, туку за проверка на сообраќајната безбедност и паркинг просторот на објектот. Поради тоа, Обвинителството смета дека овие полициски службеници не можат да се гонат за смртните последици од пожарот, туку за друго кривично дело, односно за злоупотреба на службената положба.

Во одлуката на обвинителот кој ја спроведуваше исрагата се вели дека, во согласност со Законот за угостителска дејност, полицијата во конкретниот случај требало да изврши проверки само во делот дали се исполнети условите за заштита на јавниот ред и мир и за безбедноста во сообраќајот.

Според извори од истрагата, дел од осомничените биле во притвор еден месец, по што добиле поблаги мерки за обезбедување што се укинати. Со истрагата за „Пулс“ се опфатени уште дваесетина други полициски службеници, осомничени за делото предизвикување на општа опасност.

За пожарот во Пулс се обвинети 35 физички и три правни лица. Меѓу нив се сопственикот на „Пулс“, негови блиски, инспектори на државни институции, поранешни министри и припадници на агенцијата што ја обезбедувала дискотеката и нејзиниот сопственик. На почетокот на судскиот процес сите се изјаснија дека не се чувствуваат виновни.

The post ЗАПРЕНА ИСТРАГАТА ЗА ШЕСТМИНА ПОЛИЦАЈЦИ ВО СЛУЧАЈОТ „ПУЛС“ Беа осомничени за предизвикување општа опасност appeared first on plusinfo.mk.

Одбраната на членовите на обезбедувањето на клубот „Пулс“ во Кочани,  во своите воведни зборови оцени дека обвинението против обезбедувачите е неосновано, без конкретни докази и изградено врз хаотични претпоставки. Адвокатите нагласија дека дел од обвинетите имале ограничени задачи и не можеле да спречат внес на пиротехника, а како клучни причини за трагедијата ги посочија институционалните пропусти и недостигот на надзор.

Бранителот на Јане Јанчевски, директор на агенцијата за обезбедување Рубикон, адвокатот Јовица Страшевски, во воведниот говор рече дека не се исполнети елементите на кривичното дело што му се става на товар на Јанчевски, па затоа предложи да се ослободи од обвинението поради непостоење на докази.

– Не може сите обвинети со ваков опис на обвинението, сите да презеле исти дејствија и да се извршители на исто дело Тешки дела против општата сигурност, а притоа да нема поврзани докази кој какво дејство презел. Со ваков обвинителен акт и докази како бранител имам тешка задача да објаснам и дојдам до конкретен логичен заклучок, зошто од описот на обвинението нема логичен заклучок – изјави Страшевски.

Во обвинението, според Страшевски не е јасно наведено какви дејствија и кои од тие дејствија по својот карактер претставуваат исполнување на делото што му се става на товар, како и уште поконкретно, не е јасно кои дејствија кога и со кого го сторил.

– Диспозитивот на обвинението претставува акт на измислено, свесно и хаотично извртување на вистината во поглед на обвинетиот Јанчевски, со цел да се создаде заблуда во јавноста. Обвинителството има погрешно утврдена фактичка состојба во однос на делото што му се става на товар на Јанчевски. Ќе докажеме дека Јанчевски ниту бил, ниту поттикнал сторување на делото – рече Страшевски.

Адвокатот Дејан Стојчев, посочи дека не постои никаков писмен договор за приватно физичко обезбедување со сопственикот на дискотеката или каква било исплата, а на Јанчевски му се ставаат на товар дела како да има писмен договор.

– Овој судски процес е единствена шанса мојот клиент да ја докаже својата невиност – рече Стојчев.

Адвокатот Зоран Зафировски во воведниот збор истакна дека неговиот клиент, обезбедувачот Лазар Захариев и самиот претрпел сериозни последици од трагичниот настан.

Зафировски нагласи дека Захариев повеќе од 3 часа извлекувал деца и посетители од дискотеката, сè до моментот кога немало веќе кого да спасува, по што завршил на болничко лекување со нарушено здравје. Одбраната посочи дека обвинетиот имал обврска само за патролно обезбедување и пристигнал во објектот два часа по почетокот на настапот на групата ДНК, со што немал можност да види што се внесува во дискотеката.

– Дали обезбедувачите имаат вина поради фактот што на територија на општина Кочани со години нема инспектор за пожар и поради фактот што контролата на пиротехника од страна на МВР постои само на хартија – праша адвокатот Зафировски.

Обвинетиот Захариев, во воедниот збор пред судот само изјави дека жали што во кобниот ден не успеал да спаси повеќе животи.

Бранителот на обвинетиот обезбедувач Ивица Грозданов, адвокатот Ѕвонко Давидовиќ, во воведниот говор рече дека пожарот во дискотеката „Пулс“ е последица на целокупниот однос на државата кон редот, законот и со еден збор  – системот.

– Корумпираниот систем е причина, но не ги гледам во судница креаторите на овој систем. Рибата од главата смрди. Се прашувам каде било Обвинителството во Кочани во изминатите 13 години. Ивица Грозданов не бил ниту најмалото тркалце и му се става на товар дека без писмен договор со агенцијата за обезбедување Рубикон не изготвиле план за обезбедување на дискотека – рече Давидовиќ.

Надзорот и контролата на малолетниците, рече Давидовиќ, не е обврска на обезбедувањето и не е кривично дело.

Одбраната на обвинетиот Мартин Ѓорѓиев, кој исто така е дел од обезбедувањето, адвокатката Елизабета Панева, рече дека ќе докажат дека не го сторил делото што му се става на товар.

– Обвинителството го товари Мартин Ѓорѓиев дека постапил спротивно од законот за приватно обезбедување и дека заедно со Ивица Грозданов, Лазар Захариев и Стојанче Димитриев… вршејќи обезбедување, не извршиле проверка на идентитетот и овозможиле влез и присуство на малолетници во дискотеката, како и дека не го спречиле внесот на пиротехниката со која е предизвикан пожарот. Ќе докажеме дека немало умисла и договор меѓу овие обвинети. Ќе докажеме дека Мартин не постапил спротивно на одредбите на Законот за обезбедување, затоа што на кобната вечер неговата работна задача била да става печат на влезниците, а не да врши проверка на идентитетот. Имал можност, но не и законска обврска да проверува идентитет. Можноста не создава и обврска – рече Панева.

На денешното рочиште, одбраната на обвинетите градоначалници истакна дека постапката се води врз основа на нецелосна истрага и без обезбедени факти кои директно ги поврзуваат обвинетите со катастрофата.

Претходно, одбраната на обвинетите градежни инспектори нагласи дека „причината за трагедијата не е поради градежни пропусти на структурата на објектот“ и дека инспекторите „не можеле да постапат бидејќи немало пријава или наредба за инспекциски надзор“. Сите изразија жалење и сочувство на семејствата на починатите лица.

Во пожарот во дискотеката „Пулс“ во Кочани, што се случи на 16 март годинава, загинаа 63 лица, меѓу кои и деца, а над 210 беа повредени.

Судењето го води судијката Диана Груевска Илиевска и се одвива под засилени безбедносни мерки, со присуство на обвинетите, роднини на жртвите, обвинителството, одбраната и бројни новинари.

На обвинителна клупа се 37 лица – сопственици, управители, инспектори, поранешни градоначалници, обезбедувачи и државни службеници.

Судењето продолжува на 10 декември.

НА ЕКСГРАДОНАЧАЛНИЦИТЕ ИМ СЕ СУДИ БЕЗ ФАКТИ, СИЛНИТЕ ЕМОЦИИ НЕ СЕ ДОКАЗ Љупчо Коцевски со правна гимнастика ја задоволува јавноста која бара одмазда

The post А КАДЕ БИЛО КОЧАНСКОТО ОБВИНИТЕЛСТВО ЦЕЛИ 13 ГОДИНИ ЗА „ПУЛС“? Обезбедувачите не загрозија, туку спасуваа животи, посочи одбраната appeared first on plusinfo.mk.

Коалицијата Вреди целосно го поддржува формирањето на анкетната комисија во Собранието, бидејќи со години граѓаните беа оставени без одговори и манипулирани, соопшти Вреди.

„Оваа практика мора да заврши. Нашиот став беше и останува јасен дека е потребна сеопфатна комисија, избегнувајќи каков било селективен или политички мотивиран пристап, и токму таква комисија се формира. Сега комисијата сериозно ќе ги испита и со широк мандат сите сериозни случаи што ја потресоа земјата низ годините, од Дурмо турс и Беса транс, до модуларната болница и трагедијата во Кочани. Само таков сеопфатен пристап може да ги истакне неуспесите и институционалните празнини што одзедоа животи“, соопшти коалицијата.

Вреди очекува анкетната комисија да ги истакне не само индивидуалните неуспеси, туку и моделите на лошо управување што дозволија последователни трагедии низ годините.

ВЛАСТА ПОБАРА АНКЕТНА КОМИСИЈА ЗА КОЧАНИ, МОДУЛАРНАТА ВО ТЕТОВО И ЗА АВТОБУСКИТЕ НЕСРЕЌИ Опозицијата поднела неуредна иницијатива, Гаши им ја врати на доработка

The post МОРА ДА СЕ ОТКРИЕ ВИСТИНАТА ЗА СИТЕ ТРАГЕДИИ Вреди дава целосна поддршка на Анкетната комисија во Собранието appeared first on plusinfo.mk.

Не можеме да ви гарантираме брзина во судењето, но ќе направиме сѐ, за процесот да се одвива непречено. Не знаеме колку ќе трае, може 5 месеци или 5 години, рече судијката Диана Груевска Илиевска на почетокот на судењето за пожарот во дискотеката „Пулс“ во Кочани, во кој загинаа 63 лица.

– Барам дисциплина од сите странки. Сите ќе имаат можност да ја изнесат својата верзија на случајот и својата одбрана. Ќе дојдеме до правдата – рече судијката.

Втор судија во судечкиот совет е Ахмет Идризи. Има и резервен поротник, со цел процесот да се одвива непречено. Откако ги прочита имињата на присутните 34 обвинети и на нивните адвокати, судијката донесе решение кон предметот „Кочани“ да се спои и обвинението против сопственикот на агенцијата за обезбедување „Рубикон“, Александар Нацев.

– Се спојуваат постапките поради економичност на постапката. Против ова решение не е дозволена жалба. Како што знаете, дополнително имаше обвинителен акт за Александар Нацев, кој е оценет. Се работи за истите дејствија и предметот ќе се спои, постапката ќе тече заедно – рече судијката.

На судењето се присутни повеќе од 50 родители на загинатите во пожарот и 30-ина домашни медиуми. Акредитирани се и странски медиуми како БМТ, ТРТ, Франспрес, Ројтерс, Асошиејтед прес, Андалузија и други.

Поранешниот градоначалник на Кочани, Николче Илиев, ќе го бранат 5 адвокати од обвинението за Тешки дела против безбедноста за пожарот во Кочани.

The post СУДОТ НЕ ГАРАНТИРА БРЗИНА, ТУКУ НЕПРЕЧЕНО СУДЕЊЕ ЗА ПОЖАРОТ ВО „ПУЛС“ Правдата можеби ќе дојде за 5 месеци, можеби за 5 години, порача судијката Диана Груевска Илиевска appeared first on plusinfo.mk.