Експерти велат дека проектот ќе може да се реализира бидејќи железничкиот транспорт е приоритет и во Европската Унија која издвојува високи суми за тоа. Тоа е дел од кинескиот проект „Појас и пат“ кој ѝ е од интерес на Европа. Но, велат експертите, треба добра подготовка на проектот во која ќе се задоволат високите европски стандарди, добра изведба и многу промени во институционалната поддршка на инвестициите во транспортот како и промени во менаџирањето со железницата. Тие предлагаат и дополнителен развој на железницата во земјава како најевтин превоз на стоки и патници.

Идејата за брза пруга датира уште од претходната држава која планираше да изгради пруга на која возовите би се движеле до 250 километри на час. На брзата пруга државава се врати и во 2015 година, кога се планираше и либерализација на железничкиот сообраќај, но и двете идеи останаа само на хартија без притоа ништо да се направи. Во меѓувреме, поради лошите политики замре целосно железничкиот сообраќај во земјава, а превозот на стоки и патници се сведе на минимум.

Проектот е можно да се изгради во два владини мандата

Николоски кој со седнувањето во министерското столче во транспорт, веднаш побара парите планирани за изградба на третиот дел од пругата кон Бугарија да се пренасочат кон брзата пруга смета дека иако е скап, овој проект би нѐ чинел поевтино од пругата кон Бугарија.

– Некаде по километар меѓу 6 до 10 милиони евра, или според неговите пресметки, ако Македонија има околу 215 км пруга од Табановце до Гевгелија, тоа би значело некаде од 1,6 милијарди до 2,1 милијарда евра да се изгради пруга со две линии – изјави тој деновиве.

Николоски најави и дека сака пругата да се реализира во два мандата на оваа влада што значи во период од речиси 8 години.

Експертите, пак, имаат поинакви проценки за чинењето на брзата пруга.

– Не треба да се расфрламе со бројките бидејќи цената на проектот ќе зависи од тоа што тој всушност ќе опфати. Дали ќе биде тоа целосно нова пруга или ќе се реконструира старата со одредени нови делови, колку тунели ќе има и слично. Последните цени од 2018 година за брзите пруги се движеа од 15 до 40 милиони евра од километар. Во меѓувреме овие цени се зголемени, па не е добро да кажуваме бројки пред да се види проектот. Да потсетам дека брзите пруги секогаш се двоколосечни и за нивна изградба се проценува дека се потребни најмалку 5 до 6 години, но вакви проекти се градат и подолго. Ефектите од вакви пруги се долгорочни и поволни за економијата – вели професорот Зоран Кракутовски од катедрата Железници на Градежниот факултет.

Треба да се искористи наклонетоста на Европа кон железничкиот транспорт

Според Кракутовски, државата треба да ја искористи наклонетоста на Европската Унија која сака да го заживее Коридорот 10 во железничкиот транспорт, бидејќи овој проект е скап за да се финансира од нашиот буџет.

– Европската Унија издвојува високи суми пари за железниците како евтин транспорт, што како земја можеме и ние да искористиме дел од овие пари. Доколку и за нас се отворат европските кохезиони фондови и ако имаме добар проект кој ќе се изработи по европски стандарди, тогаш земјава ќе може да ја искористи можноста Европската Унија да инвестира дури 80% од потребните пари за реализација на проектот – вели тој.

Кракутовски вели дека проектот за брза пруга кој треба да биде подготвен со геометриска прецизност и да овозможи безбеден сообраќај треба да ги содржи сите стандарди за безбедност, влијанието на животната средина и да го добие позитивното јавно мислење. Затоа треба да ги мине трите нивоа на проектирање – одредување на коридорот на трасата со предфизибилити студија – идеен проект со физибилити студија и реализација на проектот што е предвидено според европските стандарди.

– Институциите ќе треба да ги усогласат законите со европските, а ќе треба да се донесе и нов правилник за проектирање пруга бидејќи сегашниот предвидува проектирање пруга со брзина од 160 километри на час. Брзите пруги се и до 300 километри на час. Тоа лесно може да се реализира со размена на искуствата со Србија која веќе го направи тоа. Но кај нас треба да се измени и законот за градење во кој речиси ништо нема во однос на критериумите за изградба на пруги, односно за железничката инфраструктура. Во меѓувреме, добро е да се формира и државна агенција за имплементирање на инвестиционите проекти во железницата и како најважен дел, да се формира институт за транспорт кој ќе ги собира и навреме ажурира податоците за транспортот во земјава – вели тој.

Целосно нова пруга или да се искористи старата?

Кракутовски смета дека брзата пруга може да се гради како целосно нова или да се комбинира со сегашната пруга во одделни нејзини делови за да се обезбеди безбедност, но и да се овозможи изградба и на други значајни објекти предвидени во Сообраќајната студија со проектен просторен план која е подготвена и за неа треба мислење да дадат јавноста и пратениците.

– Најкритичен за брзата пруга е делот меѓу Велес и Демир Капија каде што се планира изградба и на две акумулации за вода каде што нивото на железницата ќе биде под нивото на акумулациите. Во тој дел може да се направи бајпас решение кое ќе овозможи старата пруга да се поврзе со новата. Мислам дека напоредно треба да се користат и старата и новата пруга. Старата пруга треба да остане да се користи во домашниот превоз на стоки и патници, а новата пруга да се користи за меѓународен брз превоз и во останатиот дел од времето за домашен превоз со цел да биде рентабилна– вели тој.

Професорот исто така смета дека изградбата на овој клучен проект за железницата, но и инвестирањето во други инфраструктурни проекти може да врати во земјава голем дел од инженерите кои се школуваа овде, а сега работат во големи европски компании кои се врвни во изградбата на железничката инфраструктура.

– 90% од инженерите кои завршуваат на нашите факултети заминуваат во странство. Една силна градежна офанзива во инфраструктурата, верувам, би вратила дел од нив или како изведувачи на работите или како проектанти, бидејќи дел од нив се вработени во големите европски компании кои градат или менаџираат железнички транспорт – вели тој.

Експертите, исто така, сметаат дека не треба да се занемарува железничкиот транспорт и во останатиот дел од земјата и посочуваат на железничкото поврзување и со другите земји.

– Не треба да се занемари податокот дека тежински најголем железнички сообраќај се реализира со Косово и тој дел од железницата треба да се реконструира. Добро е да се поврзат и Тетово и Гостивар со брза пруга на која возовите ќе се движат со 160 километри на час, а едно поврзување и на Охрид со Скопје со движење на делот од пругата со 100 километри на час би значело стигање до Охрид со Скопје за 1 час. Исто така, не треба да се остават недовршени и железничките поврзувања со Бугарија и со Албанија. Сето тоа ќе биде корист за нашето стопанство кое ќе има поевтин превоз и можности за прием на стоката и нејзин извоз преку три пристаништа – вели Кракутовски.

Како ќе се менаџира пругата?

Тој вели дека напоредно со инвестирањето во брзата пруга треба да се одвива и подготовката на кадарот и организациската структура на железници транспорт за еден ваков потфат со цел железницата да не трупа загуби туку да биде одржлива.

– Но, за сето ова треба и политичка подготвеност која ја немаше долги години во кои железницата се доведе до сегашната состојба, без притоа да се гледаат предностите на овој транспорт кој е далеку пред патниот транспорт. Состојбата може да се подобри дури и само со добро менаџирање и вработување стручен, а не партиски кадар – вели Кракутовски.

Проектот го иницира Кина во 2008 година кога влезе во сопственичката структура на грчкото пристаниште Пиреа. Македонската влада, предводена од ВМРО-ДПМНЕ, во 2015 година се согласи заедно да се подготви физибилити студија која ќе покаже како ќе се гради и колку ќе чини овој проект во земјава. Меѓутоа, од тогаш до денес нема никаква најава дека нешто од овој проект ќе се реализира. Во меѓувреме, со последните реконструкции од 2012 година е проектирана брзина на возовите од 120 километри на час, а брзите железници бараат истата да може безбедно да издржи возови кои ќе се движат со брзина помеѓу 160 и 200 километри. Во некои процени се зборува дури и за 300 км на час.

Регионот веќе гради брзи пруги

Лани Србија, која веќе гради брза пруга кон Унгарија и кон Ниш, ги повика земјите од регионот да се приклучат за да се поврзат грчките пристаништа со европските градови (Атина-Солун-Скопје-Ниш-Белград-Загреб-Љубљана-Салцбург). На почетокот на годинава земјава и Србија потпишаа Меморандум за соработка за изградба на брза железничка линија од Скопје до Ниш. Во план беше модернизација на железницата, што ќе придонесе за развој на регионот.

Србија очекува да добие грантови од ЕУ во вредност од 35% на проектот за железницата. Вкупната вредност на проектот за изградба на пругата се очекува да достигне 700 милиони евра.

Се очекува до крајот на 2025 година и Унгарија да ја заврши делницата од Будимпешта до Суботица. Србија веќе е готова со делот од Белград до Нови Сад, а веќе се работи и на делот за пругата до Ниш.

Во проектот се вклучи и Грција која планира модернизација на железничкиот сообраќај од пристаништата до границата со нашата земја.

Поволен детаљ за регионот и изградбата на пругата долж Коридорот 10 е и тоа што комесарот на ЕУ за одржлив транспорт и туризам Апостолос Ѕиѕикостас, доаѓа токму од Грција.

The post ЌЕ ГО ФАТИМЕ ЛИ ПОСЛЕДНИОТ ВОЗ ЗА БРЗАТА ПРУГА? Најрано за 8 години Македонија ќе може да се пофали дека фатила приклучок appeared first on plusinfo.mk.

Во меѓувреме Иран и Северна Кореја, каде Путин е во официјална посета, продолжуваат да ѝ обезбедуваат дронови, ракети и муниција на Русија. Во тој контекст, евроатлантската поддршка за Киев треба да се зајакне и да продолжи низ времето, до конечната цел – да се постигне прифатлив мир за обете страни.

Од тој аспект, Самитот за мир во Украина кој се одржа во Биргеншток, на езерото Луцерн во Швајцарија, и каде присуствуваа 93 земји и 8 меѓународни организации, беше добар вовед, но не промени ништо суштински. Пред сѐ затоа што отсутен беше главниот гостин, кој не беше поканет, а со кој утре ќе треба да се постигне примирје и да се договорат поствоените услови, односно, Руската Федерација. Оттука, заклучокот од конференцијата беше разочарувачки. Не само што во финалното соопштение не се спомна ништо за влезот на Украина во НАТО или за територијалните прашања, туку не стана збор ни за украинското право да ја поврати контролата над нуклеарната централа Запорожје или пристаништата на Азовското Море. 12 учесници не го ни потпишаа документот, меѓу кои и Индија, Саудиска Арабија, Мексико и Индонезија.

Тоа што на сите веќе им е јасно е дека Володимир Зеленски не може веќе да се надева само на воена победа, туку мора да преговара за брз мир, во релативно кратко време, договарајќи се директно или индиректно со Москва. За таа цел Киев мора да направи одреден воен камбек, доколку сака да има поповолна преговарачка позиција. Тука проблемите се бројни, а некои се и стратешки непоправливи. Ограничената дозвола од САД, Велика Британија, Франција и Германија, за употреба на западно оружје надвор од границите, тешко дека ќе ја помести или подобри ситуацијата на терен. Останува главното ограничување, честопати премногу потценето, кое не ѝ дозволува на Украина да победи, односно, неможноста да се уништат или расцепкаат логистичките линии на Москва, есенцијален предуслов за водење на една војна на исцрпување.

Проблемите на едните и на другите

Останатите проблеми се добро познати. Киев нема доволно војници и со право не ги регрутира своите дваесетгодишници, со цел да не остане целосно без каква било иднина, во услови на веќе крајно неповолна демографска состојба. Русија и покрај огромните загуби нема проблеми да обезбеди човечки материјал, додека во исто време мобилизира речиси двојно повеќе економски ресурси, од вкупната западна помош за Украина. Западот само ја пополни мунициската дупка на Украина, но моралот почнува драматично да опаѓа.

Ни на Русија не ѝ цутат рози, затоа што забележливо е дека и ним им се брза, а не дека им се води бескрајна војна. Оттука и наивниот руски предлог за прекин на огнот, кој САД енергично го одби. Сепак, Украина е таа која се наоѓа во понеповолна позиција и таквата ситуација сериозно ја збунува Америка. Односно, пристапот на САД да ја спречи Русија во освојувањето на Украина, без директно инволвирање е контрадикторен од самиот старт на конфликтот. Со тоа, како што нѐ подучува и Виетнам или Авганистан, на САД му недостасува јасна стратегија или теорија на успех. Америка се наоѓа во тешката позиција да не знае како да ја спречи украинската пропаст, доколку не се подигне квалитетот и квантитетот на помошта во војната. Од таа причина извира и збунетоста, засилена од администрацијата пред крај, поделениот и поларизиран домашен фронт, Кина, која добива на агресивност, фрустрирачката улога во Блискиот Исток и секако – непредвидливите претседателски избори во ноември.

И покрај сѐ тоа, пристигнуваат сигнали за одредено подобрување на украинските позиции на терен. Во меѓувреме, САД потпишаа билатерален безбедносен договор со Украина, далеку послаб од очекувањата на Зеленски, но кој гарантира децениска воена соработка.

Кина игра на страната на Русија

После месеци доцнење, САД и ЕУ го зголемија економскиот притисок кон Русија. На самитот на Г7 се одлучи да се искористат профитите од замрзнатите руски средства на Руската централна банка и да послужат како гаранција за заемите кон Украина, нешто околу 50 милијарди долари. Киев инаку е во ужасна финансиска состојба и се обидува да испреговара со ММФ договор за реструктурирање на долгот.

Западните сојузници сѐ почесто креираат долгорочни заложби кон Украина, со цел нивната помош да не зависи од внатрешните политички или економски стресови и промени. Со други зборови, му испраќаат порака на Путин дека војната нема да биде кратка и да помисли на сопствениот воено-индустриски апарат кој не плива во најмирни води. Ова потсетува на логиките од првата Студена војна.

Проблемот е што за разлика од тогаш, Кина денес игра на страната на Москва. Сѐ додека Ши Џинпинг верува дека има поголема корист од војната во Украина, малку што му можат евроатлантските притисоци. Се разбира САД нема да се откаже од нови санкции за кинеските банки и фирми, додека Европејците се далеку повнимателни. Можеби поголем ефект врз Кина ќе имаат одредени принципи кои ѝ се важни и кои беа нагласени во Луцерн: нуклеарната безбедност, прехранбената сигурност и територијалниот интегритет. Токму територијалниот интегритет е слабата точка на Пекинг, затоа што тоа и е средство преку кое го одржува во живот барањето за припојување со Тајван.

Како што спомнавме, Путин излезе со свој максималистички предлог, оттука не-предлог, барајќи признавање на руската анексија во 4 региони, кои притоа не ги контролира ни воено, како и барањето Украина да остане неутрална. Тоа се разбира не се прифатливи услови за почеток на преговори. Но, и Москва, додека претендира еднострано предавање, е свесна дека порано или подоцна мора да седне и да преговара. Во меѓувреме, официјални гласини од Киев говорат дека евентуален територијален компромис веќе не е табу-тема и не се исклучува априори од страна на Киев.

Не може да се исклучи и корејско сценарио

Но, Америка ќе продолжи да ја отфрла идејата за преговори со Русија, под оправдание дека тоа би било еднакво на прифаќање на нејзините услови. Америка реално не ја сака Украина во НАТО, нешто што на прва би нѐ навело дека е полесно да се прифати условот за неутралност на Владимир Путин, но во реалноста, без НАТО и без враќање на загубените територии, САД го губат Зеленски и којзнае кој може да влета во една таква ситуација. Воедно, прифаќање на руските победи преку договор би бил вистински пораз за Америка, која во овој историски момент тоа не може да си го дозволи.

Бидејќи станува збор за војна од која зависи европската и глобалната рамнотежа, не може да се исклучи и едно последно сценарио, она корејското. Договорено примирје, со ограничени територијални загуби за Киев, кои, се разбира, меѓународната заедница никогаш формално не би ги прифатила. Но, и тоа сценарио е реално само под услов независна Украина да обезбеди цврсти и кредибилни безбедносни гаранции од Западот. За потоа постепено да биде интегрирана во европскиот простор.

Проблемот е што за воопшто да се дојде до тоа, според актуелните односи на сила и состојбата на терен, тоа ќе зависи пред сѐ од цврстината или слабоста на рускиот фронт. Тоа значи дека иницијативата во моментот не е во западни или американски раце.

Засега, а во иднина – којзнае?!

The post На Украина ѝ треба повеќе од само воена победа appeared first on plusinfo.mk.

– Баланс+ всушност е и единствениот производ на пазарот за кој што постои клиничка студија со која е докажано неговото позитивно влијание врз метаболичките процеси во организмот кој помага и дијабетичарите да имаат квалитетна исхрана. Придобивките од овој производ и неговата неопходност во секојдневната исхрана кај лицата со дијабетес, го поттикнаа нашето партнерство со Сојузот на здруженија на дијабетичари. Заедно ќе работиме на едуцирање на членството за тоа каква и колкава е потребата од Баланс+ во секојдневната исхрана и колку е важно за нив консумацијата на функционални производи со пробиотски култури, протеини, калциум. Ова е значаен чекор затоа што достапноста на соодветни производи е прашање за голем број лица со дијабетес, не се работи само за поединци туку за голем број граѓани од сите возрасти и нивната потреба од соодветни висококвалитетни производи. Со големо задоволство ќе ги здружиме силите со СЗДСМ и со нетрпение очекуваме позитивно да влијаеме на животот на лицата со дијабетес – велат од Бимилк.

За Сојузот ова е значајна помош која ќе придонесе пред сѐ за едукација на членството за полесно справување со предизвиците на болеста.

– Нашите членови секојдневно се соочуваат со разни предизвици, покрај од здравствен аспект уште и од снабденост и достапност на соодветни, а квалитетни производи. Исхраната е најважниот дел од справување со нашата состојба, а достапноста на вакви производи е ретка, посебно од млечните производи за кои е потребно да бидат вклучени во нашето мени. Баланс+ е докажано добар и потребен за нас, затоа што ја балансира исхраната и снабдува со потребни минерали, витамини, пред сѐ пробиотици и пребиотици. Оваа соработка е една од активностите за кои како Сојуз тежнееме и се залагаме, и ваквата поддршка од Баланс+ е толку значајна и потребна за нас. Се заблагодаруваме на компанијата што го иницираше ова партнерство и што ја покажува својата грижа и за дијабетичарите како засегната група – истакнува Димче Велев, претседател на Сојузот на здруженија на дијабетичари на Македонија.

Во Сојузот се вклучени сите здруженија од Македонија и нивната работа се однесува на потребите на лицата со дијабетес. Во Македонија има регистрирано околу 116.000 лица со дијабетес.

The post БАЛАНС+ ВО ИСХРАНАТА Едукација на Сојузот на здруженија на дијабетичари на Македонија appeared first on plusinfo.mk.

– Секојдневно се обезбедуваат сто отсто од потребите на регулираниот пазар, односно за домаќинствата и за малите потрошувачи. До овој момент не е направен ни еден киловат час увоз за задоволување на овој дел од пазарот. Во моментов се разговара за конкретни мерки, кои ќе бидат понудени на одредени потрошувачи од кои дел ќе бидат снабдувани од „ЕСМ Продажба”. Тие нема да бидат на регулираниот пазар. Во овој момент се прават анализи за колкави количини се работи за секторите здравство, образование, јавните комунални претпријатија за снабдување со вода, а по проектирање и дефинирање на количините на електрична енергија и средствата кои ќе бидат потребни, ќе бидат објавени и презентирани на јавноста – рече Андонов, на денешната прес-конференција во Владата во одговор на новинарско прашање.

Тој посочи дека се прават максимални напори да биде зголемено домашното производство на електрична енергија.

– Тоа значи дека ќе се потрудиме сите дополнителни количини да бидат обезбедени од домашното производство. Една од опциите за обезбедување поголемо домашно производство е и преку работата на ТЕ-ТО, кое не работи во овој период. Се прават разговори и анализи како во текот на ноември ТЕ-ТО да работи. По проектирањето на бројките, количините и потребните средства ќе бидат усвоени и ќе бидат објавени од претставници на Владата, по што точно ќе се знае која количина на електрична енергија од каде ќе биде обезбедена – прецизира Андонов.

Прашан кога ќе боде потпишан договорот за набавка на природен гас за потребите на топланите во Скопје, Андонов рече дека директорот на ЕСМ и ЕСМ преку соопштение ја информираа јавноста дека се добиени неколку информативни понуди на тендерот за набавка на гас и дека е побарано од понудувачите да достават дополнителни информации кои ќе ја потврдат сериозноста на понудата.

– ЕСМ е државна компанија и нејзиното функционирање подразбира почитување на одредени процедури кои мора да бидат запазени во интерес на граѓаните и токму тоа е и направено. Јавноста беше информирана дека е побарано во наредните неколку дена компаниите да достават потребни документи со кои ќе ја докажат сериозноста на својата понуда како што се сериозност за обезбедените количини, договор за техничка соработка, потребни гаранции и по нивното доставување јавноста навремено ќе биде информирана – истакна Андонов.

Тој потенцира дека грејната сезона почна навреме и до овој момент се одвива континуирано и без прекини во испораката и без технички проблеми.

– Ве уверувам дека и во текот на ноември ќе има топлина за сите граѓани на Скопје, а начинот на кој ќе биде обезбедена ќе биде објавен во следните неколку дена – рече Андонов.

The post РЕГУЛИРАНИОТ ПАЗАР Е 100 ОТСТО ПОКРИЕН Андонов вели дека секојдневно се обезбедуваат потребните количини appeared first on plusinfo.mk.

– Заради регулирање на потрошувачкиот однос на снабдувачот со потрошувачите утврден во Правилата за снабдување со топлинска енергија, потребно е да се склучи Договор за снабдување со топлинска енергија – велат од ЕСМ.

За таа цел потрошувачите на чии име се води парното греење во домот/објектот, потребно е да се обратат во пунктовите на ЕСМ Снабдување со топлина ДООЕЛ Скопје, каде во куса постапка ќе им биде приложен на потпис Договор со новиот снабдувач, кон кого ќе ја имаат обврската за плаќање на услугата.

– Договорот е ист како и досега, и е одобрен од Регулаторната комисија за енергетика – информираат од компанијата.

За склучување на договорот потребно е да се понесе документ за лична идентификација и фактура (или копија) за топлинска енергија од претходниот снабдувач.

Во Скопје постојат три пункта, со работно време од понеделник до петок од 08 до 18 часот и сабота од 09 до 13:30 часот, на следните локации:

Пункт Центар на Ул.Кочо Рацин бр.33 – Олимписки базен,

Пункт Исток на Ул. Јане Сандански бр.49-н.Аеродром и

Пункт Запад на Ул. Лондонска бр.8-н.Тафталиџе.

– Корисниците можат веднаш да пристапат кон пунктовите со цел склучување на договорите. Напоменуваме дека ЕСМ Снабдување со топлина ДООЕЛ Скопје ќе им овозможи на граѓаните соодветен временски период за регулирање на обврската, и дека доколку од различни причини корисниците не успеат да склучат нов договор до крајот на месецот, греењето непрекинато ќе се испорачува и во ниеден момент испораката нема да биде загрозена – информираат од ЕСМ.

Корисниците кои нема да ги склучат договорите по овој повик, ќе бидат контактирани од снабдувачот ЕСМ Снабдување со топлина ДООЕЛ Скопје, со цел да се изнајде термин соодветен за потрошувачите за склучување на договорот, со оглед на тоа што одредени корисници може да бидат отсутни во следниот период, или од различни лични, здравствени и други причини да не можат да се јават на пунктовите.

– ЕСМ Снабдување ќе воспостави директни контакти, додека за корисниците кои не можат да ги напуштат своите домови ќе им излезе во пресрет и ќе им овозможи Договорот да го склучат во нивниот дом. Поради повеќе прашања пристигнати до Службата за грижа на корисници, ги информираме корисниците дека не е правно возможно преземање на постоечките договори со претходниот снабдувач, односно е единствено можно да се склучат нови договори – велат од ,  ЕСМ Снабдување со топлина ДООЕЛ Скопје

Оттаму информираат дека новиот снабдувач во следниот период ќе воспостави и сопствен систем за он-лајн наплата.

The post ИСПОРАКАТА НА ТОПЛАНИТЕ НЕМА ДА БИДЕ ПРЕКИНАТА Скопјани на три пункта ќе можат да потпишат договори со новиот снабдувач appeared first on plusinfo.mk.

– Македонскиот јазик, македонскиот идентитет и посебност се меѓународно потврдени и признаени од целиот свет. Со нашиот сосед, Бугарија, имаме Договор за соработка и добрососедство, кој патем е потпишан и на македонски јазик. Очекуваме во духот на овој Договор, да продолжиме заеднички да ги градиме односите. За темите кои произлегуваат од Договорот изразуваме волја да ги решаваме преку работата на комисиите кои имаат надлежност за тоа – изјави портпаролката Кузеска.

– Мицкоски не е за договор на било која тема, тој бара начин само како наштети на државата, особено на процесите кои не водат кон ЕУ – кажа Кузеска.

The post СДСМ не гледа потреба од лидерска средба appeared first on plusinfo.mk.

Портпаролката на партијата Богданка Кузеска, рече дека тоа не сакаат да го прифатат Христијан Мицкоски и ВМРО ДПМНЕ, зошто знаат дека нивната неодговорност и деструктивност им гарантира изборен пораз.

– Дека има услови за одржување на изборите, говори и позитивниот одговор на ОБСЕ/ОДИХР дека се подготвени да продолжат со набљудувачката мисија на парламентарните избори во Република Северна Македонија – објасни Кузеска.

Таа рече дека СДСМ во овој период има три приоритети.

– Зашти на здравјето на граѓаните, брза трансформација на економијата и функционални институции, како гарант на демократијата.Токму затоа сметаме дека предвремените парламентарни избори треба да се одржат во првиот можен термин, а предизборната кампања и гласањето да бидат усогласени со заштитните протоколи. ДИК по крајот на вонредната состојба, треба да ги заврши обврските и во рок од 22 дена да се одржат изборите – рече таа.

Според неа, избори мора да има поради здравјето на граѓаните, поради трансформација на нова економија, поради институциите кои треба да им служат на граѓаните во оваа држава.

– СДСМ нема да дозволи неодговорен политичар како Христијан Мицкоски и ВМРО-ДПМНЕ, да ги попречат демократските процеси и вештачки да создадат криза – рече Кузеска.

The post Кузеска: СДСМ нема да дозволи неодговорен политичар како Мицкоски да ги попречи изборите appeared first on plusinfo.mk.