Од 27 септември, во Европската Унија ќе се применуваат нови правила кои треба да им обезбедат на потрошувачите појасни информации за законската гаранција и трајноста на производот. Во продавниците и онлајн продавниците ќе се појави задолжително известување за правата на потрошувачите, а производите со подолга комерцијална гаранција за трајност ќе ја добијат новата етикета GARAN.

Целта на новите правила е да им помогнат на потрошувачите полесно да проценат колку долго можат да го употребуваат производот и кои се нивните права, ако се расипе. ЕУ очекува со ова правило да ги поттикне производителите да произведат потрајни производи и да ја намалат количината на електронски и друг отпад.

Од 27 септември, физичките и онлајн продавниците  ќе мора јасно да го прикажат усогласеното европско законско гарантно известување кое  ќе ги потсети клиентите дека за стоките купени во Европската Унија, тие имаат најмалку две години правна заштита во случај на дефект.

Ова право не е ново – двегодишниот рок веќе постои. Новина е обврската на трговците јасно и еднообразно да ги информираат клиентите за тоа.

Во известувањето ќе биде наведено во кои случаи потрошувачот може да се повика на законската гаранција, какво решение продавачот мора да му понуди и какви чекори треба да преземе за да ги оствари своите права. Исто така, ќе содржи QR код што води до дополнителни информации на соодветниот јазик.

Доколку производот не работи како што треба, продавачот мора да обезбеди бесплатна поправка или замена. Во одредени околности, клиентот може да има право на намалување на цената или враќање на парите.

Заедно со известувањето за законската гаранција, се воведува и европската ознака GARAN. Таа нема да се прикажува на секој производ, туку само на оние за кои производителот доброволно нуди комерцијална гаранција за издржливост подолга од две години.

За производот да ја носи оваа етикета, гаранцијата мора да биде бесплатна за потрошувачот и да го опфаќа целиот производ, а не само поединечните делови. Етикетата ќе наведе колку години производителот гарантира дека производот ќе ги одржува потребните функции и перформанси при нормална употреба.

Доколку производот не ги исполнува овие очекувања во текот на наведениот период, производителот ќе мора да го поправи или замени бесплатно. Етикетата треба да им го олесни на клиентите споредувањето на производите, но и да ја поттикне конкуренцијата на пазарот меѓу производителите кои нудат подолги гаранции за издржливост.

Новите европски правила, исто така, носат заштита од одредени процедури што ги поттикнуваат потрошувачите предвреме да го заменат производот или неговите делови.

– На производителите ќе им биде забрането да ги мотивираат потрошувачите да менуваат резервни делови пред да биде навистина потребно и ќе биде забрането да рекламираат дека можете да ставите само оригинален резервен дел- велат од ЕУ.

Поконкретно, на трговците на мало повеќе нема да им биде дозволено да даваат неосновани тврдења дека поправката од независен сервисер или употребата на резервни делови од друг производител ќе ја наруши функционалноста на производот. Голем проблем сè уште останува цената и достапноста на резервни делови, предупредуваат сервисерите.

The post ОД 27 СЕПТЕМВРИ НОВИ ПРАВИЛА НА ЕУ ЗА ГАРАНЦИЈА И ТРАЈНОСТ НА ПРОИЗВОДИТЕ Се воведува етикета „гаран“ за производи со трајност подолга од 2 години appeared first on plusinfo.mk.