Скопје ќе се поднови со 100 електрични автобуси. Првите возила се очекува да стигнат до крајот на годинава.

Градоначалникот Орце Ѓорѓиевски на денешната седница на Советот на Град Скопје информираше дека е потпишан договорот за набавка на 150 електрични автобуси.

Набавката ја спроведе централната власт, договорот е потпишан со унгарската фирма „Икарус“.

– Сум ги видел автобусите, ултрасовремени. Нашите тимови веќе работат на двете позиции, Автокоманда и Ѓорче Петров, каде ќе се поставуваат полначите за електричните автобуси – рече Ѓорѓиевски.

Тој најави дека наредната недела ќе биде распишан тендерот за проектирање и изградба на трасата за системот БРТ за брзиот автобуски превоз.

Тендерот за нови автобуси го спроведе Министерството за транспорт и врски. Ова беше трета јавна набавка по ред, откако првите две беа поништени. Министерот Александар Николоски пред еден месец кога заврши тендерот рече дека првите 30 автобуси ќе стигнат до крајот на декември. Според условите во тендерската документација, планирано е сите 150 автобуси да бидат испорачани во рок од 18 месеци.

Проценетата вредност на целокупната набавка, според огласот објавен на Бирото за јавни набавки, изнесува околу 51 милион евра. Од 150 автобуси, 100 ќе бидат за Град Скопје, а останатите 50 за другите градови.

Новите автобуси значително ќе го подобрат квалитетот на јавниот превоз во Скопје. Патниците повеќе години наназад се соочуваат со нередовен превоз, а ЈСП „Скопје“ нема доволно возила за да ги задоволи потребите на градот.

The post ЗА 4 МЕСЕЦИ НОВИ АВТОБУСИ ВО СКОПЈЕ Потпишан е договорот со унгарски „Икарус“ за набавка на 150 возила appeared first on plusinfo.mk.