Само сериозни реформи се решение за лошата доверба од 2% во македонското правосудство, истакнува претседателката Гордана Сиљановска-Давкова во мегаинтервјуто на МИА, чиј втор дел ќе биде објавен денеска.

Но, таа наведува, мора да се провери кој со какво богатство стапил на функција, а со какво излегол и тоа не се однесува само на правосудството.

– Секој кога ќе стапи не само на определена функција, на определена работа, лесно е да се провери со што влегол, како излегол и дали е тоа можно. Не се чудам јас на огромните пари на некои ликови во светската политика, врзани за вештачки интелигенции и така натаму, ама кога ќе видите профили што од својата работа апсолутно не би можеле да го заработат, да го стекнат богатството, сигурно дека тоа треба да се испита – вели претседателката.

Таа додава дека извештаите на ЕУ ги посочуваат главните проблеми, но не е проблем само во законодавството.

– Се покажува дека тука извештаите на Европската Унија ги нотираат главните проблеми. Не е доволно само да го хармонизирате законодавството – почнат е тој процес, но важно е бидејќи, ако предвидите построги критериуми за изборот на судии и јавни обвинители, тоа сигурно ќе се одрази или има врска со нивниот интегритет и дигнитет во постапувањето – вели Сиљановска-Давкова.

Меѓутоа, таа додава дека ние бевме сведоци оти еден антисистем стана систем или дека она што беше недозволено стана нешто редовно.

– За тоа треба време, меѓутоа тука сум и јас многу строга, имам сè уште забелешки. Мислам дека ако не решиме да раскрстиме со партизацијата и политизацијата при аплицирањето, при изборот на луѓето во судството, во Јавното обвинителство, во Уставниот суд, во Управниот суд, во управните одбори и така натаму, тогаш ќе се вртиме во круг – истакна претседателката.

Таа смета дека сите што се нашле на право место, а се погрешни луѓе, кои не го заслужуваат тоа место, нема да им бидат верни на законите, на Уставот, на владеењето на правото, на етиката и на моралот, туку на оние што ги номинирале и на оние што ги поставиле на овие високи позиции.

– Никому не му дошле умот и знаењето од позицијата на која се нашол, туку од макотрпна работа, учење, полагање, вложување во себе и ценење на сопствениот дигнитет и интегритет. Тоа е она што ни е неопходно бидејќи никој однадвор не може процентот да ви го зголеми или да ви го намали. Перцепцијата кај граѓаните е сè уште таа, значи мора да се исчекори во нејзиното надминување. Како? Со поинакви резултати, со филозофија на санкционирање, со филозофија на одговорност, со филозофија на важење на правдата и за оние на највисоки позиции, а не со нејзино избегнување, со сериозно посегање по преиспитување на потеклото на имот – вели Сиљановска-Давкова.

Според неа, тоа еднаш мора да се направи и смета дека не е невозможно.

– Секој кога ќе стапи не само на определена функција, на определена работа, лесно е да се провери со што влегол, како излегол и дали е тоа можно. Не се чудам јас на огромните пари на некои ликови во светската политика, врзани за вештачки интелигенции и така натаму, ама кога ќе видите профили што од својата работа апсолутно не би можеле да го заработат, да го стекнат богатството, сигурно дека тоа треба да се испита. А понатаму тие цврсто се држат за богатството бидејќи филозофијата им е дека со парите може сè да купат и некако добиваме впечаток дека правдата не ги стигнува сите. Тоа мора да се надмине – истакна претседателката Сиљановска-Давкова во интервјуто за МИА.

The post ПРОВЕРКА НА ИМОТ ЗА СЕКОЈ ФУНКЦИОНЕР ВО ПРАВОСУДСТВОТО Само сериозни реформи против партизација ќе ја вратат довербата appeared first on plusinfo.mk.

Што ќе се случи со парите кои граѓаните ги чуваат, народски кажано, под перница, ако државата реши значително да го намали, па дури и да го истисне кешот од употреба?

Истиснувањето на готовината е една од мерките на државата во борбата против сивата економија, која според некои анализи во земјава зафаќа од 20 до 40%.

За жал, во 2020 година се направи едно големо уназадување во борбата против сивата економија, што ѝ даде нов залет, откако владата на Зоран Заев, без објаснување, го зголеми лимитот за плаќање во кеш од 500 евра на 3.000 евра. Иако стратегијата на државата беше тој постепено да се намалува до 2025 година.

Како да се протоклува ова ретерирање, освен дека во државата има огромни количини кеш кои треба да се завртат? Колку пари има во државата кои се надвор од системот е тешко да се процени. Според некои проценки, Македонците под перница чуваат околу 2 милијарди евра.

Заев во 2020 година предложи даночна амнестија

Во изминатите триесетина години во неколку наврати било актуелизирано прашањето за даночна амнестија. Под овој поим се подразбира ограничена временска можност за одредена група даночни обврзници да платат одредена сума, односно данок, во замена за прошка на даночен долг (вклучително камати и казни), поврзани со претходен даночен период и без страв од кривично гонење. Во некои случаи, законодавството наметнува построги казни за оние кои не ја искористиле можноста за даночна амнестија.

Последниот предлог за даночна амнестија беше во 2020 година, кога тогашниот премиер Зоран Заев предложи граѓаните кои располагаат со готовина која не e влезена во системот да може да ги стават парите на сметки со тоа што ќе платат данок од 10%.

– Пред да се донесе законот за потекло на имот, за кој разговараме со Европската унија, ќе дадеме отворена можност за сите домашни физички лица кои што имаат готовински пари, а се надвор од системот, да ги стават на свои сметки, со тоа што ќе платат 10 проценти данок и во рок од 2 години ќе треба да ги инвестираат парите: да си купат стан, куќа, возило, акции, или било што. Барем еднаш да ги инвестираат, а доколку не го сторат тоа ќе треба да платат уште 10 проценти – предлагаше Заев.

Од таа мерка во пракса не произлезе ништо, но прашањето и натаму е актуелно.

Другата опција, што ја предложи Заев, беше со кешот граѓаните да купат бескаматна државна обврзница за која дополнително би се утврдила рочноста на 10 или на 15 години.

Граѓанска обврзница – чекор кон легализација на парите под перница

Министерството за финансии во 2023 година промовираше граѓанска обврзница со каматна стапка од 5% годишно. Наместо да се задолжува во банки, дома и во странство, државата реши да се задолжува кај граѓаните, за што понуди да им плати повисока камата отколку што би добиле доколку би штеделе во банка.

Ова беше промовирано како мерка со двоен ефект. Од една страна, државата се задолжува со пониска камата, а од друга страна, им дава можност на граѓаните да ги извадат парите од под перница и да ги внесат во банка, односно да ги легализираат.

Еден човек најмалку може да купи една обврзница од 10.000 денари. Горен лимит нема.

– Станува збор за граѓаните кои имаат заштеди, кои поради традицијата или општо, сè уште штедат под перница и сметаат дека е подобро да ги имаат парите при себе. Посебно сега, во период на инфлација, тие чувствуваат дека парите губат вредност надвор од системот, ова е една можност да ги вложат во државни обврзници со прилично добри приноси – објасни лани министерот за финансии Фатмир Бесими, во интервју за ТВ Сител.

Тој додаде дека граѓански обврзници ќе има постојано на пазарот. Првата аукција беше објавена за 10 милиони евра, или во противвредност 615 милиони денари, а Бесими рече дека таа сума не може да влијае врз пазарот.

Оваа мерка не им се допадна многу на приватните банки, кои стравуваа дека државата им станува конкурент на пазарот. Тие стравуваа дека наместо да го внесат кешот, постои ризик граѓаните да ги повлечат парите од банките и да ги инвестираат во граѓански обврзници, гарантирани од државата и со повисока камата.

Со ваква иста мерка во Хрватска граѓаните инвестирале 500 милиони евра.

„Црни“ пари, „бели“ пари…

Не сите пари што ги имаат граѓаните се „бели“ пари. Тоа што прави задршка кај властите во врска со една ваква радикална одлука е амнестијата на парите од даночните раеви или парите стекнати на нелегален односно криминален начин, чии сопственици би требало кривично да се гонат.

Професорот Ванчо Узунов, во врска со предлогот на Заев во 2020 година, за Фактор изјави дека за таква операција е потребна опсежна анализа.

– Има значителна сума пари која е стерилизирана и не носи позитивен ефект. Тоа не може да се случи брзо, но кога ме прашувате дали е економски исправно, велам да. Сепак, треба да се направи анализа, затоа што не сите овие пари се стекнати на еднаков начин. Некои можеби се легално ставени на страна заради отсуство на можност или храброст да се инвестираат во деловен пофат, волја да не се ставаат во банка и затоа се чувани. Но, ако се стекнати со нелегални активности, треба да се размисли зашто би се легализирале и како, no и дали тоа нема да мотивира во иднина и други лица да чекаат легализација на „црни“ пари. Значи, операцијата треба да е со претходна анализа, да се обмисли добро и да се разговара – рече тогаш Узунов.

Министерката за финансии Гордана Димитриеска Кочоска, во поткаст на Плусинфо, на прашањето дали се размислува ли за некој облик на фискална амнестија на парите во Македонија, рече:

– Во однос на заштедите на луѓето, многу е подобро да ги остават во банка и многу им се посигурни отколку дома. Тука воопшто немам дилема. Но видете, тоа е одлука на луѓето. Каде јас го гледам проблемот кај нас? На пример, оние кои што си имаат, ајде да ги наречеме „бели“ пари или „чисти“, кои ги чуваат под перница. Тоа се луѓе кои што немаат доверба во системот. Нашиот систем е многу уништен, дел од луѓето ќе ги однесат во банка, а дел од луѓето ќе кажат: „А ми гарантирате ли дека нема да се случи некоја друга банка така да пропадне?“ Бидејќи пропаста на Еуростандард банка, на пример, остави многу големи прашалници и сметам дека тоа не треба да остане затворен случај и треба да се испита до крај. Во однос на „црните“ пари, лично мое мислење – никогаш нема да ги поистоветувам со граѓаните кои што чесно заработувале. Поради која причина треба да ги ставам сите во еден заеднички кош?

Таа потсети дека според Законот за данок на личен доход, црните пари треба да се оданочот со 70% за да влезат во системот.

Но, според некои економски експерти, ова е висок процент на данок и ги охрабрува незаконското работење и сивата економија, наместо да ги дестимулира.

„Кога лице поседува имот или располага со средства поголеми од одночените, кои потекнуваат од доход, на кој не е утврден данок или не е доволно утврден и чие потекло не може да се докаже, органот за јавни приходи донесува решение за утврдување на данокот на тој доход. Основа за пресметување на данокот претставува разликата меѓу вредноста на имотот и докажаната висина на средствата за негово стекнување. Данокот на непријавениот доход се пресметува по стапка од 70%“, се наведува во Законот за данок на личен доход (член 76, 77,78).

Ако сакате да внесете повеќе од 10.000 евра, мора да кажете од каде ви се

Согласно постоечката регулатива, за уплата на поголеми суми од 10.000 евра, банките се обврзани да побараат изјава и доказ за потеклото на парите и можат да одбијат уплата доколку клиентот не поседува соодветни документи. Законот не дефинира дневен, месечен или годишен лимит за уплата на готови пари од страна на физички лица, туку постојано следење на сите трансакции.

„Врз основа на горенаведените законски одредба, во пракса банките минимум при секоја уплата на готовина во износ од 15.000 евра или повеќе, во денарска противвредност, без разлика дали уплатата е направена наеднаш или се работи за очигледно поврзани трансакции, бараат изјава од своите клиенти за потеклото на средствата“, велат од Народната банка.

Од централната банка додаваат дека кон оваа изјава клиентот е должен да приложи и соодветна документација со којашто ќе го докаже потеклото на средствата.

– Доколку уплатата на готовина се врши од страна на клиенти кои се оценети со повисоко ниво на ризик (на пример, нерезиденти, носители на јавни функции и слично), доставувањето изјава и придружна документација согласност со Законот се применува и во случај на пониски износи на готовински уплати – укажуваат од НБМ.

Како да се донесат парите од даночните раеви?

Директорот на Управата за јавни приходи Горан Трајковски во 2013 година предложи даночна амнестија на заштедите на Македонците во странските банки. Неговиот предлог дојде откако Кипар одлучи да воведе данок од 6,75% за сите кои имаат до 100.000 евра во тамошните банки, а 9,9% за оние со заштеда поголема од 100.000 евра.

– Факт е дека законот за оданочување на депозити, Кипар го прави неатрактивна дестинација. Она што го промовирав пред неколку години, односно можноста за даночна амнестија на нашите резиденти да го вратат капиталот во Република Македонија, станува атрактивна, затоа што Кипар нема да биде единствено решение. Ова ќе биде само почеток на она што ќе се случува во Европската унија како појава – предвиде тогаш Трајковски.

Интересен е примерот на Италија, која преку даночна амнестија во 2010 година собрала 95 милијарди евра, многу повеќе одошто се очекувало. Земјата ги повика граѓаните да ги префрлат парите од швајцарските банки во домашните банки, без да одговараат за затајување данок. Според тогашниот министер за финансии Џулио Тремонти, дури 98% од валканите пари, кои со години биле чувани во странство, биле вратени во Италија. Италијанските власти тогаш процениле дека во Швајцарија се чуваат 125 милијарди евра. Швајцарија и Сан Марино со причина стравуваа дека понудената амнестија ќе доведе до масовно повлекување на парите од нивните банки.

Последна иницијатива од ваков вид во земјите од нашата околина се случи во 2023 година, кога премиерот на Албанија Еди Рама предложи фискална амнестија за сите имигранти кои обезбедиле приходи до 2 милиони евра „заработени со пот“. Не беше сосема јасно како владата на Рама ќе ја мери „потта“ и на кој начин од оваа амнестија ќе бидат исклучени сите финансиски средства што доаѓаат од сомнителни или од криминални извори. За префрлање на износите во банка требаше да се плаќа данок од 4 до 10 проценти, а потоа да нема понатамошни истражни, даночни или административни постапки. Меѓународните претставници не штедеа критики и скептицизам за реализација на фискалната амнестија во Албанија. Владата на Рама во почетокот беше упорна, но потоа заборави на сопствената иницијатива.

Олесната можност за сметки во странски банки  

Нема ни приближен податок колку пари чуваат Македонците во даночните раеви и какво е нивното потекло. Законот за девизно работење забрануваше македонски државјани да имаат сметки во странство и во даночните раеви. Според податоците од Народната банка, во земјава во изминатите години се јавиле инвеститори од Девствените Острови, Кајманските Острови, Хонг Конг и од Панама.

Во 2019 година Народната банка донесе одлука според која резидентите слободно можат да отвораат и да имаат сметки кај странски банки резиденти, доколку продале недвижен имот во странство, ако издаваат недвижен имот во странство, ако имаат стекнато недвижен имот во странство и коишто треба да плаќаат трошоци за недвижниот имот во странство, ако имаат во сопственост хартии од вредност во странство и ако треба да наплатат побарувања врз основа на продажба на хартии од вредност во странство, дивиденди, камати или други приноси врз основа на хартиите од вредност.

Според законот, жител на Македонија може да прими пари од странство од друго физичко лице, жител на странска земја, неограничен износ на пари. А Македонците може да префрлат најмногу 2.500 евра. За поголема сума, се бараат документи за потекло на парите и целта за уплатата.

СТАВ

Легализација на пари без доказ за потекло?!

Одвреме-навреме во Македонија се актуелизира прашањето за легализација на парични средства без доказ за нивното потекло. Како по правило, иницијативите се интензивираат во периоди на промена на владејачката гарнитура, каков што е сегашниов.

До сега носителите на најодговорни функции во македонските влади одолевале на притисоците, плашејќи се од ризиците сврзани со таквиот потег.

Застапниците на тезата за предностите од вклучување на овој вид капитал во легалните финансиски канали ја истакнуваат можноста за зголемена понуда на финансиски средства, што би довело до пониски каматни стапки и недвосмислена корист за бизнисот.

Едно тврдење што сум го слушнал е дека сѐ уште на различни места внатре и надвор од земјава се тезаурирани пари стекнати од трансакции во сивата економија уште од периодот на матната транзиција, во услови на непостоечки или недоизградени институции на пазарната економија.

Дополнително, се укажува дека и покрај забраната и постоечките контроли, дел од овие средства континуирано се вбризгуваат во легалната економија, првенствено преку градежниот сектор. Која е тогаш смислата на забраните за внес на пари без доказ за нивното потекло во легалната економија?

Дилемите и одбојноста кон легализација се поврзани со неколку фактори:

Прво, процесот може да е во спротивност со строгите меѓународни регулативи против перење пари и финансирање тероризам;

Второ, влезот на овие пари, особено доколку се стекнати од нелегални активности, може да го наруши реномето на земјата во очите на меѓународните финансиски институции;

Трето, политичарите стравуваат од јакнење на моќта на одредени групи за интерес во земјата, кои би можеле да прераснат во силна конкуренција на политички план, што би предизвикало нарушување на безбедносната и политичката стабилност;

Четврто, а не помалку важно, наглиот прилив на финансиски средства предизвикува реална апрецијација на девизниот курс на националната валута, што влијае на намалување на конкурентноста на нејзините извозни сектори.

Би било фраза доколку заклучам дека за конечен квалификуван став за ова прашање е нужна подлабока анализа, но се чини дека преовладуваат аргументите против легализација на парите без доказ за потекло.

Со овој текст, Плусинфо се приклучува на иницијативата за зголемена транспарентност на институциите што Институтот за комуникациски студии ја спроведува во соработка со медиумите во рамките на проектот „Користи факти“, кој е поддржан од Британската амбасада.

The post И „БЕЛИТЕ“ И „ЦРНИТЕ“ ПАРИ ЈА ЈАКНАТ СИВАТА ЕКОНОМИЈА Ќе ги извлече ли некој облик на фискална амнестија парите од под перница? appeared first on plusinfo.mk.

Високи функционери, поранешни градоначалници, директори на институции, членови на управни одбори… Многу имиња и нивни непријавени имоти фигурираат во анализата за „Тајни имоти”, афера зад која според тврдењата на ВМРО-ДПМНЕ се кријат имињата на 123 функционери на власта кои сокриле имот вреден 30 милиони евра.

Опозициската партија вчера даде рок од 24 часа институциите сами да ги објават нивните имиња, а во спротивно од денес ќе ги објавуваат поединечно. Тврдењата на ВМРО-ДПМНЕ го вратија на дневен ред прашањето – што се случи со најавуваниот Закон за потекло на имот? На донесување на овој закон вчера повторно повикаа од Државната комисија за спречување на корупцијата (ДКСК), која беше прозвана од опозицијата: Зошто постои Антикорупциската, ако точно 123 лица функционери го кријат својот имот?

Од ДКСК повторија дека тие проверуваат дали функционерите точно ги пријавиле своите имоти во анкетниот лист. За ДКСК е проблем што не постои софтвер за директно поврзување со институциите кои располагаат со податоци, за да може да се спореди дали некој нешто крие. За да се утврди дали се работи за таен имот, од ДКСК сметаат дека што поскоро треба да се донесе Закон за потекло на имот, за секој граѓанин да каже од каде му се средствата за да го стекне тој имот.

Сите недопирливи

Од април 2021 година такво решение најавуваше тогашниот вицепремиер за борба против корупција, Љупчо Николовски.

„Подготвуваме Закон за потекло на имот! Имотот и капиталот ќе бидат предмет на проверка, а нелегално стекнатиот имот ќе биде конфискуван! Нема недопирливи!” порачуваше Николовски.

Со експертска и техничка помош од Советот на Европа беше направен првиот чекор – физибилити студија, а веднаш потоа формирана и работна група која почна со подготовка на Законот, по што лани во септември произлезе драфт верзија.

„Законот ќе важи за сите лица кои нема да можат во одреден законски период да го докажат потеклото на имотот. За разлика од сегашната обврска избраните и именуваните лица да поднесуваат анкетен лист за имотната состојба додека трае нивниот мандат, ваквата обврска сега добива поширок опфат во смисла на времетраењето на увидот во имотната состојба. Една од новините во драфт законската верзија е што испитување ќе се врши и доколку имотот е префрлен на трети лица“, рече Николовски.

Во драфт-верзијата било предвидено да има конфискација на имот над 30.000 евра, чие потекло не може да се докаже.

„Функционерите на СДСМ неколкукратно го зголемија својот имот во изминативе 4 години, и тоа за многу повеќе од 30.000 евра. За голем број од нив иако има докази во изобилство ЈО не отвора истрага“, реагираа тогаш од ВМРО-ДПМНЕ.

Од најавата на законот помина повеќе од една година, драфт верзијата која никој не ја виде падна во заборав, а не се врати „во живот“ дури ни во јули годинава, кога Обвинителството за гонење организиран криминал и корупција објави дека на Сашо Мијалков во случајот „Империја“ ќе му се конфискува имот во висина од 36 милиони евра, од кои 30 милиони во имот и 6 милиони евра кеш. За илустрација, според првиот имотен лист што Мијалков го поднел до ДКСК во јуни 2007 година, имотот што го поседувал бил во вредност над 1,1 милион евра, а кога се повлече од УБК во 2015 година – околу 1,5 милион евра. Јавноста прашуваше – како со плата од околу 70 илјади денари месечно, во следните години стигнал до имот вреден 30 милиони евра, и уште колку имот поседува што е надвор од лупата на надлежните?

Реприза на „имаш куќа, врати стан“

Дали овој и слични случаи, може да се расветлат единствено со закон за потекло на имот?

„Донесување на закон за испитување на потеклото на имотот добро звучи, посебно за недоволно упатените“, вели поранешниот министер за внатрешни работи и лидер на ДС, Павле Трајанов.

„Таков закон имаше во времето на СФРЈ, кој ја покажа апсурдноста на имплементација, за на крај да се сведе на флоскулата ‘имаш куќа, врати стан‘. Србија донесе Закон за утврдување на потеклото на имотот, но засега нема позитивен исчекор во борБата против криминалот и конфискација или оданочување на капиталот стекнат на криминален начин. Се отвораат дилеми – кој треба да докажува дали имотот е стекнат на чесен начин: државата, или тој што го поседува имотот? Ако треба да докажува носителот на имотот, тоа е како да те обвинат за тешко кривично дело без докази, а ти да докажуваш дека си невин“, вели Трајанов.

Има дилеми и од кога би важел законот – од денот на донесување или ќе има ретроактивно дејство, кој ќе го детектира скриениот имот, имотот во странство, како ќе се спречи опасноста од селективна примена, партиските влијанија итн.

„Предлагам донесување на Закон за борба против тешки облици на организиран криминал и висока корупција, и формирање на независна Агенција што ќе го спроведува овој закон. На Македонија и е потребен заокружен и ефикасен систем за борба против криминалот“, сугерира Трајанов.

Но, дали и таква Агенција би можела да оствари резултати, ако законот остава отворени прашања? Извори упатени во подготовката на драфт верзијата тврдат дека најголемиот дел од решенијата биле копирани токму од српскиот закон, кој, пак, една и пол година од примената сѐ уште не донел резултати. Tаму, товарот на докажување на зголемениот имот на физичкото лице е на Даночната управа, а товарот на докажување на потеклото на имот е нa даночниот oбврзник за делот во кој зголемениот имот не е во согласност со пријавените приходи. Резултатот во рок од една година од примената на законот е следен: од обработени податоци за имот и приходи зa над 1,2 милиони физички лица (врз основа на системски поврзани информации), Даночната управа идентификувала 13.000 физички лица чиј имот е далеку поголем од пријавените приходи, односно над 150.000 евра, според законскиот праг (кој кај нас бил предвиден за сума од 30.000 евра). Епилог нема, постапките „се во тек“, а од Даночната управа како оправдување го посочуваат податокот дека „и во текот на тригодишната примена на сличен закон во Велика Британија, тамошната даночна администрација поради сложеноста на постапката донела – вкупно три решенија“. Во просек – едно решение годишно.

Политички трик

Во Србија имаше случаи кога актуелни функционери нивниот несразмерно зголемен имот го правдаа со „пари од тетка од Канада“, а за некои преку истражувачкиот проект „Пандора документи“ беа објавени податоци за голем број оф-шор компании. Но, примената на законот нив до денес воопшто не ги засегна. Како оправдување за некои случаи било посочувано дека не постојат електронски податоци пред 2007 година, а за други, дека тешко може да се провери дали роднини од странство давале кеш, па останува впечатокот дека овој закон не е наменет дури ни за „ситни риби“, колку за јавна претстава.

„Законот е целосно непотребен, бидејќи Србија и досега имаше механизми и институции зa утврдување на потеклото на имот. Законот е политички трик за да и се покаже на ЕУ дека Србија сe бори против корупција”, оцени Стеван Дојчиновиќ, главен уредник на КРИК- мрежата за истражување на криминалот и корупцијата во Србија.

Слични се впечатоците и во македонската јавност. И претходно, и денес, правни експерти тврдат дека Закон за потекло на имот значи „тропање на отворена врата“. Имено, исто како што Законот за спречување на корупција овозможува да се испитува имотна состојба, така и во Законот за персонален данок има одредби според кои може да се испитува потеклото на имотот ако има индиции за несрезмерно зголемување на имотот, при што треба да се утврди фактичката состојба и да се докаже од каде му е приходот на граѓанинот. Ако надлежните се откажуваат од постоечките законски алатки, а најавуваат нови законски проекти, тогаш се јавува сомнеж дека е во игра само декларативна промоција на политичка волја за битка со криминалот, а на сцена – најкусиот пат како таа битка да се избегне.

The post АНАЛИЗА НА ДОЈЧЕ ВЕЛЕ Закон за потекло на имот – тропање на отворена врата appeared first on plusinfo.mk.

Во гостување во Дневникот на ТВ Сител таа рече дека во ресорот што го води  наследила изработка на законот, во соработка со Советот на Европа, и дека во работната група има повеќе институции кои практично треба да го спроведуваат.

– Станува збор за обид за креирање  закон за потекло на имот вон кривична постапка. Тоа што ми е важно во креирањето политики е да бидат внимателни, долго одржливи решенија коишто ќе бидат апликативни. Нам не ни треба само уште едно законско решение кое може да има преклопување со други законски решенија, кое може да биде дополнително извор за корупција, па сакајќи од еден аспект да решиме една корупција, да произведеме систем кој ќе предизвикува десет други. Затоа на мојата прва средба со работната група ги кажав моите забелешки на законот, затоа што недостигаше превентивниот дел – дека граѓаните треба да бидат свесни дека треба да бидат насочени кон легално стекнување на имотот затоа што во секој момент би можело не само да им биде одземен, туку не смее да биде алатка на некого за рекетирање и да уценува некого – рече Грковска.

Не  прецизираше кога може да се очекува донесувањето на законот кој, рече,  ќе да оди на широки јавни расправи, не само во Собранието. Притоа напомна дека и со сегашната легислатива може да се постапува против функционер кој нелегално или несоодветно стекнал имот.

Таа се осврна и на чекорите што се преземаат во борбата со корупцијата и рече дека добар механизам ќе биде дигиталната трансформација и антикорупциски проекти, како е-инспектор, најпрво како пилот-проект во три инспекторати, електронска можност за пријавување поплаки за несовесно однесување на институции, а ќе се фокусираат и на креирање на основната дигитална алатка – електронска лична карта која ќе биде своевиден дигитален потпис во користењето на е-услугите.

– Механизмите кои ги даваат дигиталните алатки овозможуваат јавна администрација која ќе биде поефикасна во опслужување на граѓаните и во таков случај физичкиот контакт помеѓу барателот на услугата и оној кој ја дава услугата е сведен на минимум, а на тој начин е сведена на минимум и можноста некој да побара и во исто време некој да се согласи да даде или да понуди корупција. Да немаме илузии дека ќе ја сведеме корупцијата на нула. Таа појава постои и во високоразвиените земји, но факт е дека една од добрите алатки која е дел од добрите политики владеење – рече вицепремиерката Грковска.

The post ЗАКОНОТ ЗА ПОТЕКЛО НА ИМОТ ВНИМАТЕЛНО ЌЕ СЕ НОСИ Сакаме да сме сигурни дека ќе може да се спроведува appeared first on plusinfo.mk.

Вицепремиерот задолжен за борба против корупцијата Љупчо Николовски денеска во обраќањето на конференцијата за детектирање и намалување на сивата економија обелодени дека драфт верзијата е готова и дека ќе биде испратена во Венецијанската комисија.

Законот нема да се однесува само на функционерите, туку на сите граѓани затоа што искуството покажува дека функционерите го препишуваат незаконски стекнатиот имот на други лица, а по завршувањето на функцијата си го враќаат.

– Овој закон преку граѓанска постапка за конфискација, која ја воведуваме, ќе важи за сите лица кои нема да можат во одреден законски период да го докажат потеклото на имотот. Значи ќе важи за сите лица, не само за функционерите. Постапката ќе биде граѓанска, брза, а не кривична и ќе има соодветен праг кој моментално во драфт верзијата е 30.000 евра – рече Николовски во обраќањето на конференцијата што ја организираа УНДП и Министерството за финансии.

The post ЌЕ СЕ КОНФИСКУВА ИМОТ НАД 30.000 ЕВРА ШТО НЕ МОЖЕ ДА СЕ ДОКАЖЕ Законот би важел за сите appeared first on plusinfo.mk.