Рускиот телевизиски водител и еден од најгласните пропагандисти на Кремљ, Владимир Соловјов, повика Русија да ја нападне Велика Британија со нуклеарното подводно оружје „Посејдон“.

– Удрете ги со Посејдон – рече Соловјов во емисија на руската државна телевизија, додавајќи дека на Британците треба да им се дадат „три дена да научат да дишат под вода“.

Повикот следува по извештаите дека Украина употребува беспилотни летала од британско производство за напади врз цели длабоко на руска територија, меѓу кои индустриски и логистички објекти. Соловјов побара да бидат нападнати британските фабрики за оружје, пристаништата и бродовите што учествуваат во снабдувањето на Украина, а се заложи и за затворање на британската амбасада во Москва и зс протерување на британските новинари.

Ова не е првпат Соловјов да бара директен руски напад врз Велика Британија. Во мај годинава тој повика да биде нападната фабриката во Стивениџ, каде што компанијата МБДА ги произведува крстосувачките ракети „Сторм шедоу“, откако овие британски ракети беа употребени од украинската армија за напади врз руски цели.

– Тоа е Велика Британија. Па што? – изјави тогаш Соловјов.

Владимир Соловјов е долгогодишен водител на една од најгледаните политички емисии на државниот канал „Русија 1“ и е познат како еден од најгласните медиумски поддржувачи на Владимир Путин и на војната во Украина.

Тој нема функција во руската влада или во воениот врв и неговите повици не претставуваат официјална наредба или објавена политика на Кремљ, но неговите емисии се дел од рускиот државен медиумски систем, а Соловјов повеќепати јавно повикувал на напади врз членки на НАТО.

„Посејдон“, оружјето што Соловјов сега предлага да биде употребено против Британија, е руски нуклеарно погонуван подводен дрон проектиран да носи нуклеарна боева глава.

Неговата закана доаѓа во период на сè поостра конфронтација меѓу Москва и Лондон поради британската воена помош за Киев и украинските напади врз цели во Русија, но засега нема официјална најава од Кремљ дека Москва планира напад врз Велика Британија.

The post „ДАЈТЕ ИМ НА БРИТАНЦИТЕ ТРИ ДЕНА ДА НАУЧАТ ДА ДИШАТ ПОД ВОДА“ Човек на Путин повика Русија да ја нападне Британија со нуклеарниот „Посејдон“ appeared first on plusinfo.mk.

Соединетите Американски Држави веднаш ќе почнат да тестираат нуклеарно оружје, најави американскиот претседател Доналд Трамп во објава на неговата платформа Трут соушл.

„Соединетите Американски Држави имаат повеќе нуклеарно оружје од која било друга земја. Ова беше постигнато, вклучително и со целосното ажурирање и реновирање на постојното оружје, за време на мојот прв мандат. Поради огромната деструктивна моќ, МРАЗЕВ да го направам тоа, но немав избор! Русија е втора, а Кина е на далечно трето место, но ќе биде рамноправна во рок од 5 години. Поради тестирањето на програмите од други земји, му наложив на Министерството за војна да започне со тестирање на нашето нуклеарно оружје на рамноправна основа. Тој процес ќе почне веднаш. Ви благодарам за вашето внимание на ова прашање“, објави денеска Трамп.

Тој не прецизираше кое оружје ќе биде тестирано.

Американските медиуми објавија дека претседателот изјави дека денуклеаризацијата би била „огромна работа“, но повтори дека продолжувањето на нуклеарните тестови по 30-годишниот мораториум е „соодветно“.

– Се чини дека сите тие спроведуваат нуклеарни тестови. Имаме повеќе нуклеарно оружје од кој било друг. Ние не тестираме… но ако другите тестираат, мислам дека е соодветно и ние да го правиме тоа – им рече Трамп на новинарите во разговор во претседателскиот авион „Ер форс уан“.

Тој не даде детали за тоа кога или каде ќе се одржат американските нуклеарни тестови.

– Имаме места за тестирање. Ќе биде објавено.

На прашањето дали е загрижен за влегувањето на САД во поризична нуклеарна средина, Трамп вели дека „ тоа го имаме под контрола доста добро“.

– Би сакал да видам денуклеаризација. Всушност, разговараме за тоа со Русија, а Кина би била вклучена ако направиме нешто – изјави Трамп.

Во извештај од август на Конгресната истражувачка служба се вели дека на САД ќе им бидат потребни 24 до 36 месеци за да спроведат нуклеарен тест откако претседателот ќе ја издаде наредбата.

Ниту една од трите големи нуклеарни сили – Русија, САД и Кина – не спровела нуклеарен тест од 1996 година, кога Кина последен пат го стори тоа. Последниот нуклеарен тест на Русија беше во 1990 година, а САД последен пат детонираа нуклеарна направа во 1992 година.

Сепак, светските нуклеарни сили продолжуваат да развиваат и да тестираат системи за испорака на нуклеарни боеви глави.

Американскиот претседател го објави статусот за тестирање на нуклеарното оружје кратко пред планираниот состанок со кинескиот претседател Си Џинпинг во Јужна Кореја. Кина е, исто така, воспоставена нуклеарна сила.

Според извештајот на Стокхолмскиот меѓународен институт за истражување на мирот (СИПРИ), во моментов има 9 нуклеарно вооружени држави: САД, Русија, Кина, Обединетото Кралство, Франција, Индија, Пакистан, Северна Кореја и Израел.

Неколку дена претходно, рускиот претседател Владимир Путин ја нагласи воената нуклеарна сила на Русија, за време на состанокот со неговиот генералштаб во команден центар на непозната локација.

Путин рече дека војската постигнала бројни успеси во војната против Украина и потврди дека тестирањето на нуклеарната ракета со долг дострел „Буревестник“ било успешно.

Според руските власти, ракетата „Буревестник“ беше тестирана на 21 октомври за време на неодамнешната вежба на руските стратешки нуклеарни сили.

Путин зборуваше и за нуклеарната подморницата „Посејдон“ и нејзината ракетна моќ, која, како што рече „значително ја надминува ракетната моќ на нашата најперспективна интерконтинентална ракета Сармат“.

– Нема друга ракета како „Сармат“ во светот. Сè уште не е влезена во борбена должност, но наскоро ќе влезе – рече Путин.

The post САД ИТНО ЌЕ ТЕСТИРААТ НУКЛЕАРНО ОРУЖЈЕ Путин се пофали со „Посејдон“, Трамп издаде наредба до Министерството за војна appeared first on plusinfo.mk.