Во Грција цените на праските, јагодите, црешите и  јаболката се движат од  2 до 9 евра. Повисоки се цените на чоколадните производи, кафето, дел од производите за хигиена, пишува Порталб.мк. Атрактивните места во Грција кои се најпосетувани од македонските граѓани веќе се полнат со туристи.

Голем дел од рестораните, продавниците, таверните, вилите, хотелите во најпосетуваните туристички места во Грција, веќе се отворени – ги примија првите гости во оваа летна сезона. Иако почетокот на сезоната вообичаено се поврзува со летниот распуст во училиштата, во најпосетуваните грчки локации за македонските граѓани веќе има туристи, не само од кај нас туку и од Бугарија, Германија, Романија.

Во пресрет на летниот шпиц дел од цените во продавниците и на плажите се задржаа на ланското ниво но дел од цените, според менаџерите од трговијата веќе се зголемени, а ќе има и нови поскапувања.

Во маркетите забележливо беше поскапувањето на кафето, чоколадото но и кај средствата за хигиена. Така, познатото грчко чоколадо Лакта (Lacta) годинава чини 2,75 евра, грчка алва од 200 грама 2,35 евра, пакување од 4 лименки пиво во вкупна количина од 500 мл се продава за 5,20 евра.

Половина килограм пакуван леб чини од 1,50 евра до 2,98 евра за килограм а маслинки во тегла се продаваат од 3,95 евра до над 5 евра, во зависност од грамажата и брендот.

„Порталб“ ги регистрираше и цените на дел од основните прехранбени производи заедно со овошјето и зеленчукот.

Цените на овошјето и на зеленчукот во различни маркети се продаваат главно по иста цена, но сепак беа видливи разлики во цената од едно до две евра. Килограм цреши чини од 8,9 евра до 11 евра.

-Црешите се меѓу најскапото овошје, многу е висока откупната цена, но овие цени овде се главно повисоки од оние на пример во Солун, таму можете да купите цреши и за 4 евра, но овде е туристичко место и цените се повисоки. Вообичаено дел од цените на зеленчукот ги намалуваме кога ќе почне сезоната – вели сопственик на маркет лоциран во едно од туристичките места на првиот крак Касандра.

Килограм праски се продава за 2,50 евра, килограм јагоди за 2,90 евра, протоколи за 2,80 евра а јаболката од 2 евра до 3 евра. Килограм пиперки чини 2,60 евра а краставици 0,39 евра додека килограм домат се продава за 2 евра.

Кафе, еспресо, капучино, фрапе, во маркетите се продаваат од 2,20 евра до 2,80 евра, но дел од продавачите велат дека цените од овој месец ќе бидат зголемени.

– Цената на кафето постојано се зголемува, ќе мора да го поскапите, со овие цени не само што немаме добивка туку сме и во загуба – вели вработен во еден маркет.

Позначајно се зголемени и цените на чоколадата и другите чоколадни производи.

– Јас еве продава сладолед и не знам како туристите го купуваат, јас ги прашувам зошто го купувате кога е толку многу скап – вели друг продавач во маркет.

На плажите во поголем дел од туристичките места на Касандра, две лежалки и чадор за сонце се достапни доколку купите пијалак кој чини најмалку 5 евра. Порција салата и мала пица во рестораните покрај плажата се продаваат по 10 евра, цената на сендвичите се движи од 4, 50 евра до 9 евра а порција морска храна од 15 евра до 17 евра. Порција суфлаки или гиро во рестораните се продава за 9 евра.

Инфлацијата не ја поштеди ниту Грција, порастот на цените значајно се почувствува и во туризмот кој е еден од стратешките сектори на кои се потпира грчката економија. Географски блиска, Грција, заедно со Албанија и Бугарија, кои исто така излегуваат на море, се најпосетуваните дестинации од нашите граѓани.

The post КАКВИ ЦЕНИ ВЕ ОЧЕКУВААТ ОВА ЛЕТО ВО ГРЦИЈА? Скапо е, ама туристите не штедат appeared first on plusinfo.mk.

Во првите три месеци од годинава во споредба со состојбата на крајот од минатата година, само државните јавни претпријатија и фирмите во државна сопственост ги зголемиле доспеаните, а неплатени обврски за над 15 милиони евра. На квартално ниво пораст на долговите има и во Јавното здравство и кај општините – покажува споредбената анализа на „Порталб“ врз основа на податоците од првиот квартал од годинава во однос на последниот од лани.

На крајот на март внатрешниот долг на сите сектори и институции на централно и на локално ниво надмина 651 милион евра.

Министерствата, општините, јавните претпријатија на централно ниво, државните фирми и јавното здравство за три месеци или во првиот квартал од годинава, во споредба со последниот од минатата ги зголемиле долговите. Според новите податоци од Министерството за финансии доспеаните, а неплатени обврски на државните ЈП и фирмите во државна сопственост на крајот од март надминаа 358 милиони евра и во однос на состојбата во декември кога изнесувале 343,3 милиони евра, сега се зголемени за дури 15,2 милиони евра. Според висината на доспеаните, а неплатени долгови се општинските јавни претпријатија со износ од 111,4 милиони евра, но кај нив има намалување од 2,3 милиони евра.

На трето место со доспеани, а неплатени обврски се општините чиј долг на крајот на март надминаа 63 милиони евра и за три месеци се зголемени за 2,6 милиони евра. На четврто место со неплатен долг од 59,8 милиони евра се Јавните здравствени установи и овие обврски во однос на последниот квартал од лани кога изнесувале 54,3 милиони евра, се зголемени за 5,4 милиони евра. Долгот на буџетските корисници од прва линија (министерства и институции кои се под нивна надлежност) е скоро 16 милиони евра и за три месеци е зголемен за 2,2 милиони евра.

Сумираните податоци покажуваат дека на пример само oпштините и jавните претпријатија формирани и менаџирани од локалните власти, заедно должат дури 174,8 милиони евра.

Првите пет места на новата должничка листа на Министерството за финансии се резервирани за 5 фирми под државна капа. На прво место со доспеани, а неплатени обврски во износ од 88,4 милион евра е „Номагас“ АД Скопје, на второ место со долг од 74,5 милион евра е АД МЖ „Транспорт“, на трето место со 59,1 милион евра е државната ЕСМ – електрани, следува ЈП МЖ – инфраструктура со долг од скоро 59 милион евра и на петто место е државната ЕСМ – дистрибуција со доспеани а неплатени обврски на крајот на март во износ од 33,7 милиони евра.

Доспеаниот, а неплатен долг само на овие пет компании менаџирани од државата изнесува 314,7 милиони евра што претставува половина од вкупниот внатрешен долг што го пријавиле сите институции, јавни претпријатија, министерства, агенции, здравство, образование, култура, судство, општини…

На крајот на март внатрешниот долг на сите сектори и институции на централно и на локално ниво надмина 651 милион евра и во споредба со последниот квартал од лани, или за три месеци, тој е зголемен за 25,5 милиони евра.

The post ЗА ТРИ МЕСЕЦИ ВНАТРЕШНИОТ ДОЛГ Е ЗГОЛЕМЕН ЗА 25,5 МИЛИОНИ ЕВРА Кои државни фирми и општини должат најмногу? appeared first on plusinfo.mk.

Од 2006 година заклучно со 2024 та, преку извршители се наплатени фантастични скоро 2,1 милијарда евра. Годишниот извештај на Комората на извршители покажува дека лани од должниците, фирми, граѓани и држава, биле наплатени 160,6 милиони евра со 44,15% реализација на извршните решенија, што претставува највисоко ниво од 2020-та година, пишува Порталб.мк.

Во најава се нови законски измени кои треба да водат кон намалување на трошоците за извршување што ги плаќаат граѓаните.

Речиси 880.000 евра повеќе наплатиле извршителите во 2024 во споредба со 2023 година од сите категории на должници – граѓани, фирми и од државата. Годишниот извештај на извршителите покажува дека лани од должниците биле наплатени 160,6 милиони евра. Споредбената анализа на податоците што ја направи „Порталб“ покажува дека за пет години наплатената сума е зголемена за 37,5 милиони евра.

Наплатена сума

2020 година  – 123 163 000 е

2021                  –  130 005 000 е

2022                 – 144 350 000 е

2023                 – 159 761 000 е

2024                 – 160 637 000 е

Извор: Комора на извршители

Најголеми должници според наплатениот износ се компаниите со 84,3 милиони евра, од граѓаните присилно, преку извршители биле наплатени скоро 47 милиони евра а од државата 31,5 милиони евра.

                                         Доверители                      Должници

Правни лица                 127 383 000 е                  84 335 000 е

Физички лица                 33 340 000 е                 46 934 000 е

Држава                                2 074 000 е                 31 500 000 е

                                         Извор: Комора на извршители

Правните лица односно фирмите се појавуваат и како најголеми доверители кои лани од должниците наплатиле скоро 127,4 милиони евра, следуваат граѓаните со 33,3 милиони евра и државата со близу 2,1 милион евра.

Компаративната анализа на податоците на „Порталб“ покажува дека во изминатите пет години, двојно се зголемил износот на наплатени средства од граѓаните, од 24,6 милиони евра во 2020 година на скоро 47 милиони евра во 2024 година. Од друга страна износот на наплатениот износ од правните лица е намален од 89,4 милиони евра на 84,3 милиони евра.

Лани реализацијата на извршните барања изнесувала 44, 15% што е највисоко ниво од 2020 година. Најмногу реализирани барања за извршување имало во судовите во Охрид, Струга и Дебар а најмалку во судовите во Кочани, Берово, Виница и Делчево.

Во средината на 2023 година беа направени измени на Законот за извршување со кои оној момент кога износот на каматата ќе го достигне главниот долг (кредитот), пресметката застанува, односно сумата за каматата не може да го надмине главниот долг. Со ова ново решение беа опфатени и постапките за извршување кои беа во тек. За измените тогаш не гласаа пратениците на ВМРО-ДПМНЕ и на Левица. Во меѓувреме Уставниот суд го укина застарувањето како можност за ненаплата на долговите а токму временската рамка за застарување требаше да ги заштити граѓаните од злоупотреби со „чување“ на предмети за кои потоа се пресметуваат енормни камати.

Сега граѓанските активисти најавуваат иницијатива за нови законски измени со кои треба да се таргетираат адвокатите и нотарите како „алки“ во постапката за присилна наплата. Дел од извршителите се правдаа дека во високите трошоци за извршување што ги плаќаат граѓаните удел имаат адвокатските и нотарските тарифници. Евентуалните нови законски измени би биле надлежност на Министерството за правда.

The post ИЗВРШИТЕЛИТЕ ОД ГРАЃАНИТЕ НАПЛАТИЛЕ 47 МИЛИОНИ ЕВРА Но, најголеми должници се компаниите appeared first on plusinfo.mk.

Додека статистика на месечно ниво, во март, измери инфлација во „негативна зона“, новите експертски процени укажуваат дека годинава сепак ценовниот притисок ќе се зголеми. Новата анкета за инфлациски очекувања што ја направи НБМ покажува дека економистите очекуваат забавување на економскиот раст, а зголемување на инфлацијата, пишува Порталб.мк.

Од друга страна статистика во март измери негативна инфлација на месечно ниво но цените на дел од производите, пред сè земјоделските и натаму е на високо ниво.

Првиот економски квартал заврши под економски ризици поради неизвесноста од веќе отворената „трговска војна“ и рецесијата која тропа на врата кај нашиот најважен трговски партнер Германија. Новите трговско-царински тензии меѓу најголемите светски економии веќе се рефлектираат во глобалната економија – застој во инвестиции, затворање на фабрики, намалени нарачки, зголемена невработеност. Економските аналитичари во новата анкета на НБМ нотираат дека сите овие ризици подразбираат неизвесност која пред сè ќе се одрази врз економскиот раст. Според новите процени на економистите, годинава растот на БДП ќе забави на 3,1% за разлика од претходната анкета, во која навеле повисоки очекувања за раст.

„Испитаниците сега очекуваат економски раст од 3,1% за оваа година (3,3% во претходната анкета) и 3,5% за 2026 година (3,7% во претходната анкета). За 2027 година се очекува дека растот ќе забрза и ќе достигне 3,8%“ – се наведува во новата анкета.

Од друга страна новите прогнози на економските аналитичари упатуваат на зголемена инфлација во споредба со процените дадени во претходната анкета.

„Испитаниците и натаму очекуваат натамошно забавување и постепено стабилизирање на инфлацијата на среден рок. Сепак, патеката на очекуваното забавување според оваа анкета е поумерена. Така, за 2025 година очекуваат просечна стапка на инфлација од 3,7%, (3% во претходната анкета), којашто би се свела на 3,1% во 2026 година (2,5% во претходната анкета). На среден рок, за 2027 година испитаниците очекуваат дека просечната стапка на инфлација ќе се стабилизира и ќе се сведе на 2,7%” – прогнозираат анкетираните економски аналитичари.

Во март годинава во однос на февруари стапката на инфлација била-1,3% додека во првиот квартал од годинава во споредба со истиот период лани трошоците на живот се зголемени за 4,2%. Според новите статистички мерења, на месечно ниво, намалување на трошоците на живот има кај сите групи, лебот, млекото, млечни производи, месо, шеќер, освен кај овошјето, каде трошоците за живот се зголемени за 3,8%.

Во групата на основните прехранбени производи, на месечно ниво поголемо намалување на трошоците има кај месото, млекото па и кај маслата но споредбата на квартално ниво покажува натамошен ценовен раст. На пример само за масла и масти трошоците на живот се зголемиле за над 11% а за млеко, сирење и млечни производи за скоро 6%.

И последните податоци за индексот на цените во земјоделство покажуваат натамошен „ценовен притисок“. Во февруари во споредба со истиот месец лани индексот на излезните (аутпут) цени на растителното производство се зголемиле за 9,7% а посебно кај зеленчукот за 11,9%, кај вината 13,7% а кај овошјето и грозјето за 4,9%.

Од владата оценија дека мартовското намалување на инфлацијата било резултат на мерките за замрзнати маржи и цени.

The post ЕКОНОМИЈАТА ЌЕ ЗАБАВИ, ИНФЛАЦИЈАТА ЌЕ РАСТЕ Што покажа новата анкета за инфлациските очекувања на Народна банка? appeared first on plusinfo.mk.

Општините Чаир и Сарај испорачале реализација на буџетските приходи и расходи под 90%. Ретки се локалните самоуправи кои успеале во целост да го наплатат или надминат годишниот план за наплата на данок на имот, пишува Порталб.мк во анализата на буџетите на Струга, Тетово, Чаир, Сарај и на Град Скопје.

Општина Струга во 2024 испорачала реализација на вкупните приходи на ниво од 93,9%. На приходната страна повеќе пари во однос на планот се собрани од данок на доход, додека потфрлање има кај наплатата на данок на имот кој во однос на планот е реализиран со 88,2%. Највисока приходна ставка во износ од 14,8 милиони евра се државните трансфери. На расходната страна реализацијата изнесува 93,7%. За исплата на плати и придонеси се потрошени 13,9 милиони евра а повисоки трошковни ставки се и „други градежни објекти“ и „поправка и тековно одржување“.

Реализација на Буџет 2024

Приходи                           Расходи

Општина Струга                  93,9%                                 93,7%

Општина Тетово                 95,5%                                  92,8%

Општина Чаир                     85,7%                                 85,2%

Општина Сарај                    86,2%                                 85,9%

Град Скопје                           76,8%                                 75,6%

Извор: Министерство за финансии

Општина Тетово која располага со еден од поголемите буџети на локално ниво, лани собрала 95,5% од планираните годишни приходи. Оваа општина во однос на наплата на даноците успеала да испорача реализација повисока од планираната а конкретно од данокот на имот остварувањето било 104,5%. Годишните расходи во однос на планот се остварени на ниво од скоро 92,8%. Исплатата на плати и придонеси и кај оваа општина се највисока трошковна ставка кој го чинела буџетот 22,3 милиони евра а втора по висина на износ се „договорни услуги“ за што се исплатени нешто повеќе од 2,2 милиони евра.

Скопската Општина Чаир во економската 2024 реализирала 85,7% од планираните годишни приходи. Податоците покажуваат дека кај оваа локална самоуправа има позначајно потфрлување на наплатата кај сите клучни даноци – на доход, на имот, на специфични услуги. Конкретно, реализацијата на наплатата на данокот на имот во однос на планот изнесува 88,6%. На расходната страна буџетското остварување изнесува 85,2%. За исплата на плати и придонеси се потрошиле 15,9 милиони евра. По околу 1 милион евра се оделе преку ставките „комунални услуги, греење, транспорт“ и „поправки и тековно одржување“.

Реализација на приходи од данок на имот

Општина Струга                          88,2%

Општина Тетово                       104,5%

Општина Чаир                            88,6%

Општина Сарај                           75,9%

Град Скопје                                  71,7%

Извор: Министерство за финансии

Позначајно неостварување на приходите има и Општина Сарај, со годишна реализација од 86,2%. Во однос на планот повеќе пари се собрани од данок на доход, додека наплата на данок на имот е остварена со 75,9%. На расходната страна реализацијата изнесува 85,9%. За исплата на плати и придонеси во 2024 та оваа општина потрошила 8,9 милиони евра а позначајни трошковни ставки се и „други градежни работи“ и „договорни услуги“.

Во 2024 вкупните буџетски приходи на Град Скопје изнесувале 101,8 милиони евра и во однос на планот тие се реализирале со 76,8%. На приходната страна поголема наплата од планираната има по основ на данок на доход и даноци на специфични услуги додека потфрлување има кај данокот на имот, каде остварувањето изнесува 71,7%. Ставката „глоби и такси“ е реализирана со 24,6%. На расходната страна буџетот на Град Скопје лани се реализирал со стапка од 75,6%. За исплата на основни плати и придонеси се потрошиле 34,1 милион евра и оваа сума е пониска во однос на планираната на годишно ниво. Лани Град Скопје потрошил помалку пари од планираното скоро по сите основи – за договорни услуги, трансфери до јавни претпријатија, купување на опрема, поправки. Меѓу највисоките трошковни ставки се „субвенции до јавни претпријатија“ каде реализацијата изнесува 93,1%, ставката „други градежни објекти“ е остварена со 78%, а „договорни услуги“ со 72,5%.

Во 2024, на ниво на државата, расходите на сите општини заедно со Град Скопје се реализирале со 85,2%, а приходите со 86,5%.

The post ЧАИР И САРАЈ ПОТФРЛИЛЕ СО НАПЛАТА НА ДАНОК НА ИМОТ Какви приходи и расходи имале лани Струга, Тетово, Чаир, Сарај и Град Скопје? appeared first on plusinfo.mk.

На локално ниво, највисоки износи се трошат за плати и придонеси, договорни услуги, градежни објекти. На приходната страна пак дел од општините не успеале да го остварат планот за наплата на даноците.

Општина Арачиново од годишните планирани приходи за 2024 година реализирала 81,5%. На приходната страна големо потфрлување има кај клучниот извор на финансирање, од данок на имот собрала 69.500 евра што е само 53,1% во однос на планот. Помалку пари се собрани и од данок на доход и од данок на специфични услуги. Буџетските трошења на оваа општина во однос на планот се реализирани со стапка од 78,3%. Најголем дел од буџетот или 1,8 милиони евра се потрошиле за плати и придонеси а повисоки трошковни ставки се „договорните услуги“ и „поправки и тековно одржување“.

Реализација на Буџет 2024

Приходи Расходи

Општина Арачиново 81,5% 78,3%

Општина Гостивар 95,8% 95,5%

Општина Дебар 92,8% 91,2%

Општина Кичево 90,9% 90,7%

Извор: МФ

Општина Гостивар е една од оние кои успеале да ја наполнат општинската каса блиску до планот – со реализација на вкупните приходи од 95,8%. Наплатата на данокот на имот изнесува 90,5% а нешто повеќе од годишниот план била реализацијата по основ на данок на доход. Највисока приходна страна се државните трансфери. На расходната страна и оваа општина лани имала помала реализацијата во однос на планот, од 95,5%. За основни плати и придонеси биле потрошени 16,7 милиони евра. Повисоки трошковни ставки се „други градежни објекти“, „поправки и тековно одржување“ и „договорни услуги“.

Во однос на планот за годишните приходи, Општина Дебар успеала да оствари 92,8% и потврдувањето е како последица на понискиот износ на државните трансфери. Оваа локална самоуправа успеала да наплати повисок износ од планираниот по основ на данокот на имот со натфрлање од околу 15% а повеќе пари од планираното наплатила и од данок на доход и од данок на специфични услуги. На буџетската расходна страна, вкупните трошења се реализирале со стапка од 91,2%. И кај оваа општина највисока расходна ставка се основните плати и придонеси за што лани биле потрошени 4,9 милиони евра. Повисоки износи се одлеале по основ на „други градежни објекти“ и комунални услуги, греење, транспорт“.

Реализација на приходи од данок на имот

Општина Арачиново 53,1%

Општина Гостивар 90,5%

Општина Дебар 115,0%

Општина Кичево 114,7%

Извор: МФ

Во групата локални самоуправи кои успеале да наплатат повеќе даноци во однос на планот е Општина Кичево. Вкупните буџетски приходи лани биле реализирани со 90,9% а целосното неостварување е главно поради понискиот износ на државни трансфери. Наплата на данокот на имот изнесува 14,7% повеќе во однос на планот а повеќе пари се собрале и од данокот на доход додека најголем износ е собран од наплата на „даноци на специфични услуги“. На расходната страна од буџетот на општината реализацијата изнесувала 90,7%. За исплата на плати и придонеси лани се потрошиле 11,4 милиони евра а зад оваа ставка според износот е ставката „други градежни објекти“. Позначајни износи се одлеале и о основ на „договорни услуги“ и „разни трансфери“.

Во следното продолжение на анализа ќе се објават буџетските податоци за Струга, Тетово, Чаир, Сарај и Град Скопје.

The post КАКО СЕ ПОЛНЕЛЕ И ПРАЗНЕЛЕ ОПШТИНСКИТЕ КАСИ? Арачиново, Гостивар, Дебар и Кичево најмногу трошеле за плати и договорни услуги appeared first on plusinfo.mk.

Јавните државни и локални претпријатија лидери според долгот

На крајот од 2024 вкупниот внатрешен долг изнесувал 626,3 што е за 217,4 милиони евра повеќе од доспеаниот долг пријавен во 2023 година. Новите сумирани податоци за 2024 година покажуваат дека на годишно ниво доспеаните, а неплатени внатрешни обврски се зголемиле во скоро сите групи на субјекти и на централно и на локално ниво. Тренд на намалување на долгот има на полугодишно ниво – на крајот на првата половина од 2024 година внатрешните обврски изнесувале 660,8 милиони евра и во однос на второто економско полугодие се намалени за 34,5 милиони евра.

На годишно ниво покажува дека повеќе од двојно е зголемен доспеаниот долг на јавните претпријатија и на трговските друштва во државна сопственост, од 167,5 милиони евра во 2023 година тој се зголемил на  343,5 милиони евра во 2024.

Според висината на долгот на второ место се општинските јавни претпријатија кои на крајот од минатата година исто така значајно го зголемиле долгот во однос на 2023 – пријавиле доспеани а неплатени обврски во износ од 113,7 милиони евра што е за скоро 38 милиони евра зголемување во однос на декември 2023 година.

Jавното здравство го намалува долгот

Општините со доспеани, а неплатени обврски во износ од 60,7 милиони евра се трети на листата субјекти со највисок долг и обврските во однос на крајот од минатата година се зголемиле за 2 милиони евра.

Јавното здравство за една година го намалило долгот за скоро 7 милиони евра, со што тој на крајот од минатата година изнесувал 54,4 милиони евра но и покрај намалувањето овој сектор и натаму котира високо според износот на доспеани а неплатени обврски. Останатиот дел од внатрешниот долг отпаѓа на буџетските корисници од прва и втора линија (министерства, агенции, институции од образование, култура, социјална политика..), потоа на регулаторните тела, планските региони.

За што најмногу се должи? 

Новите сумирани податоци за 2024 та покажуваат дека највисоките должнички износи се за комунални услуги, греење, комуникации и по овој основ доспеаните долгови достигнале 120 милиони евра, по основ  на главнина за заеми кон други нивоа на власт долгот достигнал скоро 113 милиони евра а долгот по основ на други тековни расходи изнесувал 69,4 милиони.

По основ на договорни услуги долгот изнесувал 58,6 милиони евра а за материјали и ситен инвентар биле пријавен доспеаните а неплатени обврски од 58,2 милиони евра.

На новата должничка листа на Министерството за финансии на прв место со долг од 112,8 милиони евра е државната „Номагас“, на второ место е државната „МЖ Транспорт“ со 69,2 милиони евра а на трето место е „МЖ Инфраструктура“ со пријавени доспеани, а неплатени обврски во износ од 58,8 милиони евра.

Пресметката покажува дека само на овие три фирми во државна сопственост отпаѓа дури 38,4% од вкупниот долг.

The post ЗА ЕДНА ГОДИНА ВНАТРЕШНИОТ ДОЛГ ПОРАСНАЛ ЗА 217 МИЛИОНИ ЕВРА Кој води на листата? appeared first on plusinfo.mk.

Според податоците од Буџетот за 2025 година, трошењето, односно расходите на Фондот за здравствено осигурување следната година ќе изнесуваат 867,8 милиони евра што е за 84,3 милиони евра повеќе во однос на годинава. Највисока ставка од 764,1 милион евра се „договорните услуги“ со кои се опфатени финансиските договори и обврски на ФЗО со јавни и приватни здравствени институции.

На приходната страна, од наплата на придонеси ФЗО очекува прилив од 799,6 милиони евра. Според прогнозите на власта, приходите од наплата на придонеси за здравствено осигурување, следната година во споредба на оваа, ќе се зголемат за 9%. Од Централниот Буџет, следната година пак, трансферот до овој фонд ќе изнесува 118,2 милиони евра што е за 3 милиони евра помалку во однос на годинава. Од вкупниот буџет на ФЗОМ во 2025-та 854,1 милион евра ќе бидат за „здравствена заштита“.

„Здравствената заштита е планирана на ниво од околу 52,5 милијарди денари, средства кои ќе се реализираат преку ФЗО, најголем дел од планираните средства се наменети за финансирање на здравствените услуги и исплата на обврски на јавните здравствени установи“, се наведува во Буџетот.

Фондот за пензиско осигурување на ниво на државата е институција со најголем буџет. Следната година ПИО ќе има историски највисоко ниво на расходи кои за прв пат надминаа 2 милијарди евра. Според новите буџетски проекции, во 2025 година во однос на оваа година, расходите на овој фонд се зголемени за 285 милиони евра.

Највисока расходна ставка од 1,7 милијарди евра се пензиите кои се опфатени во ставката „социјални бенефиции“ која тежи дури 2,17 милијарди евра и е за дури 284,3 милиони евра поголема во однос на годинава.

„За исплата на пензии планирани се 105,5 милијарди денари (1,7 милијарди евра), со вклучен ефект за линеарен пораст на пензијата за секој пензионер од 2.500 денари почнувајќи од март 2025 година, а со цел да се овозможи пристоен животен стандард на пензионерите“, наведува Министерството за финансии.

Сумата за исплата на пензии следната година во споредба со оваа е зголемена за дури 16,6%. Државниот ПИО следната година ќе има зголемени расходи по два основи, раст на пензиите и раст на бројот на пензионери. И за овој државен фонд власта предвидува раст на приходите, пред сè по основ на придонеси кои се клучен извор за буџетските приливи во фондовската каса. Конкретно преку ставката даночни приходи следната година се очекува прилив од 1,3 милијарди евра што е за 148,7 милиони евра во однос на годинава.

Фондот за пензиско осигурување следната година од Буџетот ќе доби 787 милиони евра што е за 130,7 милиони евра повеќе во однос на годинава.

ПИО и ФЗО се двата најважни државни фондови кои даваат услуги на сите категории на граѓани од сите возрасни групи – вработени, невработени, пензионери, пациенти. И двата фондови се „потпираат“ на државните трансфери.

Економистите со децении укажуваат на потребата од консолидација на фондовските финансии со цел да се обезбеди одржливост.

The post ПОВЕЌЕ ОД 3 МИЛИЈАРДИ ЕВРА ЌЕ СЕ СЛЕАТ ВО ДВАТА НАЈГОЛЕМИ ДРЖАВНИ ФОНДА На што ќе бидат потрошени парите? appeared first on plusinfo.mk.

Следната година пратите од унгарскиот кредит наменето за општините ќе се делат преку повеќе ресори, а највисоките износи ќе бидат проследени преку Министерството за транспорт и Министерството за финансии- функции на држава, пишува Порталб.мк. Капиталните расходи во новата буџетска 2025 година ќе изнесуваат околу 820 милиони евра.

Буџетот за капитални расходи на Министерството за транспорт следната година ќе изнесува  248,2 милиони евра, износ кој е историски највисок. Од оваа сума 130 милиони ќе бидат за патна инфраструктура, 45,3 милиони евра за инфраструктурни проекти во општините а 25,8 милиони евра за инвестиции во железничка инфраструктура.

Министерството за одбрана следната година за капитални инвестиции ќе има на располагање 140 милиони евра со намена за модернизација на одбраната, изградба и реконструкција на објекти и интеграција во НАТО.

Во 2025-та ставката за капитални расходи на Министерство за финансии – функции на држава ќе изнесува 93,6 милиони евра од кои 45,6 милиони евра е сума наменета за инфраструктурни проекти за општините.

За реформи во полицијата и за реконструкција и опремување на згради Министерството за внатрешни работи ќе добие скоро 33 милиони евра. Министерството за образование следната година за капитални инвестиции ќе има на располагање 25,9 милиони евра и најголем дел од оваа сума ќе биде наменета за изградба и реконструкција на училишта, спортски сали, училишни и студентски домови но 3,2 милиони евра ќе бидат наменети и за инфраструктурни проекти во општините како 7,4 милиони евра за „помош при транзиција“

Министерството за животна средина следната година за јавни инвестиции ќе добие 8 милиони евра а новото Министерство за спорт, за спортски објекти и за инфраструктурни проекти во општините, добива 6,2 милиони евра.

Развојниот буџет на Министерството за земјоделство следната година е проектиран на 5,1 милион евра, а парите се распределени за хидросистеми и програми за наводнување. Министерството за здравство преку развојниот дел од Буџетот следната година ќе добие 4,3 милиони евра од кои најголем дел се за реконструкција и доградба на објекти од здравството. За Општа болница Кичево предвидени се 244.000 евра а нов Клинички центар Скопје и Штип 366.000 евра.

Министерството за социјална политика и демографија кое вообичаено располага со голем буџет поради остварување на социјалните права на граѓаните, во 2025 година за капитални расходи ќе добие скоро 2,5 милиони евра, сума која главно е планирана за изградба, реконструкција и опремување на објекти за детска и социјална заштита и за домови за стари лица.

Новото Министерство за енергетика за капитални расходи добива 1,7 милиони евра и оваа сума целосно е наменета за гасификација со тенденција оваа сума да се зголемува во следните буџетски години.

Буџетот на Министерството за надворешни работи и надворешна трговија преку ставката капитални расходи ќе може да потроши 115.500 евра кои целосно се наменети за „Интеграција во НАТО“, а Министерството за економија и труд 402.000 евра, главно наменети за поддршка на малите и средни фирми. Износ од 290.000 евра за ставката „помош при транзиција“ ќе добие Министерството за европски прашања, а околу 200.000 евра добива и Министерството за правда.

The post 820 МИЛИОНИ ЕВРА ЗА КАПИТАЛНИ ИНВЕСТИЦИИ ВО 2025 ГОДИНА Кој ресор колку добива? appeared first on plusinfo.mk.

Според новите податоци од Министерството за финансии, највисок износ на потрошени средства за јавни инвестиции има МВР. Ова министерство за 9 месеци реализирало 16,7 милиони евра или 83,02% од предвидените капитални расходи.

Од другите ресорите кои располагаат со поголеми буџети, Министерството за економија и труд од предвидените скоро 347.000 евра потрошило 73,21%, а Министерството за одбрана од 96,2 милиони евра реализирало 70,2%. Министерството за земјоделство за девет месеци остварило 63,17% од годишниот буџет кој изнесува 5,9 милиони евра за капитални расходи. Сите останати ресори имаат реализација на капиталните расходи помала од 55%.

Министерството за финансии – функции на држава (преку кое се вршат исплатите по различни основи) заклучно со третиот квартал реализирало 50,46% од предвидените 173,1 милион евра за капитални расходи, а околу половина од планираните средства потрошиле и Министерството за образование кое од 33,9 милиони евра реализирало 50,97% и Министерството за здравство, кое од скоро 11,1 милион евра за капитални расходи, за 9 месеци потрошило 50,42%.

Повеќе ресори за девет месеци имаат реализација на капиталните расходи пониска од 30%. Конкретно, Министерството за надворешни работи и трговија од предвидените 317.600 евра за капитални расходи потрошило 16,91%, Министерството за финансии од расположливите 9,1 милион евра реализирало 22,95%. Министерството за транспорт кое располага со огромни 191,4 милиони евра за капитални расходи, на истекот од оваа година, заклучно со третиот квартал реализирало само 16,17% од предвидените средства. Уште еден ресор, Министерството за труд и социјална работа, кој располага со повисок износ од 7,1 милион евра за капитални расходи, заклучно со третиот квартал испорачало реализација од 25,02%.

Министерството за култура од расположливите 1 милион евра потрошило 38,57%, а незначителна реализација на капиталните расходи од 1,36% испорачало Министерството за локална самоуправа.

Дел од министерствата во оваа изборна година, заклучно со деветтиот месец испорачаа симболична реализација на расходите за јавни инвестиции. Така на пример, Министерството за политички систем иако има незначителен износ од околу 3.000 евра по овој основ, од овие средства не потрошило ниту денар.

Во групата ресори со 0 реализација на капиталните расходи се и новите, Министерството за енергетика за кое годинава по овој основ се планирани 4,3 милиони евра, Министерството за спорт кое располага со буџет од 6,5 милиони евра, како и Министерството за јавна администрација со буџет од 14.400 евра.

Податоците покажуваат дека институциите со „симболични“ износи за капитални расходи успеале да реализираат поголем дел од планот, па така на пример Комисијата за заштита на конкуренција од планираните 5.000 евра потрошила скоро 78%, Државната комисија за жалби по јавни набавки од 4.000 евра реализирала 86% а речиси целосно се потрошени средствата за капитални инвестиции во Државниот инспекторат за техничка инспекција, Агенцијата за странски инвестиции, Уставниот суд.

Заклучно со првиот квартал реализацијата на капиталните расходи изнесува 40,01% или потрошени се 281, 5 милиони евра.

The post НЕКОИ МИНИСТЕРСТВА РАБОТАТ ТУРБО, ДРУГИ УШТЕ ФАЌААТ ЗАЛЕТ Имаат пари за капитални инвестиции, ама дали и како ќе ги искористат? appeared first on plusinfo.mk.