Лони Вилисон (43) некогаш се појавуваше во списанија како фитнес-манекенка, а нејзиниот живот беше поврзан со светот на шоу-бизнисот. Денес, нејзиното име повторно се споменува во медиумите поради фотографиите од улиците на Лос Анџелес, каде што со години живее без постојан дом. Во април 2025 година беше фотографирана како турка количка со личните работи, а во август истата година папараците ја снимија и на Беверли Хилс. Во април 2026 година повторно се појавија фотографии од неа во Лос Анџелес.

Вилисон, која има работено и како актерка, беше во брак со Џереми Џексон, познат по улогата на Хоби Бјукенон во серијата „Чувари на плажата“. Двајцата се венчаа во 2012 година, а се разделија во 2014. Нивниот брак заврши по сериозни проблеми во врската. Лони Вилисон тврдеше дека нејзиниот брак со актерот Џереми Џексон, познат по серијата „Чувари на плажата“, завршил поради неговото насилно однесување. По жестока расправија во 2014 година, кога интервенирала и полицијата, таа изјавила дека сопругот ја удирал, ја давел и ѝ скршил две ребра, поради што ѝ биле потребни повеќе од два месеца за да закрепне. Подоцна признала дека не го пријавила затоа што се плашела и била во лоша емоционална состојба и не сакала тој да заврши во затвор. По разделбата, Вилисон јавно го обвинила поранешниот сопруг дека нејзиниот живот тргнал надолу по бракот со него, додека Џексон подоцна ги оспорувал нејзините обвинувања и ја опишувал нивната врска од своја перспектива.

По разделбата, Вилисон останала без работа и западнала во финансиски проблеми. Во 2016 година почнала да живее на улица, а нејзината ситуација стана пошироко позната во 2018 година, кога медиумите објавија фотографии на кои пребарува контејнери за отпад. Оттогаш, нејзината приказна периодично се враќа во јавноста, најчесто кога папараците повторно ќе ја фотографираат додека се движи низ градот со своите работи.

Во интервју за британскиот „Сан“ во 2021 година, Вилисон зборуваше за тоа како се снаоѓа на улица и рече дека не сака другите да се чувствуваат одговорни за нејзината ситуација. Во други изјави, таа го поврзуваше својот животен пад со бракот и поранешниот сопруг. Во меѓувреме, пријатели се обидувале да ѝ помогнат, вклучително и со сместување и понуда за лекување, но според медиумските извештаи, таа не ја прифатила секоја понудена помош.

Во декември 2024 година, „Саут Чајна морнинг пост“ објави дека Џексон зборувал за тагата што ја чувствувал гледајќи ја поранешната сопруга како се соочува со сериозни проблеми. Тој тврдел дека се обидувал да ѝ помогне во текот на нивниот брак, додека таа во претходни интервјуа го обвинуваше за своите тешкотии. Двајцата веќе подолго време не се во контакт, а нивните спротивставени тврдења не даваат целосна слика за сè што се случувало зад затворени врати.

The post 📽️ НЕКОГАШ ПОЗИРАЛА ЗА МОДНИ СПИСАНИЈА, ДЕНЕС ЖИВЕЕ НА УЛИЦА Поранешната манекенка Лони Вилисон со години е бездомничка, а нејзината приказна ја потресе јавноста appeared first on plusinfo.mk.