Според него, мерката ја изразува претпазливоста на Народната банка за можното влијание на кризата врз работењето на банките и ќе влијае на одржување на стабилноста на банкарскиот систем во актуелната неизвесност за понатамошниот тек на кризата.

– Нема добри прогнози во однос на излез од кризата. Сѐ поизвесно е дека таа ќе потрае и очекуваното закрепнување на економијата нема да се оствари не само кај нас туку и во пошироки рамки. Земјите се затвораат поради борбата со пандемијата и новите видови на коронавирусот, а тоа се одразува на  економијата која и понатаму успорува. Сето она што се случува во економијата може да влијае и на работењето на банките, па затоа е претпазливоста на Народната банка во однос на одржувањето на стабилноста на банкарскиот систем во актуелната неизвесност и понатамошниот тек на кризата – вели Гошев.

Со ваквата реакција на централната банка, вели поранешниот гувернер на Народната банка, се одбегнува можноста од ширење на шпекулативни информации кои можат да му наштетат на банкарскиот систем.

Според него, акционерите во банките не треба да бидат загрижени околу нивната дивиденда.

– Парите наменети за дивиденда банките ќе ги акумулираат и во подобри услови ќе ги распределат на акционерите – вели Гошев.

Советот на Народната банка привремено ја ограничи распределбата и исплатата на дивиденда на акционерите на банките, но оцени дека банките, како и во изминатиот период, така и во последните месеци, успешно ја одржуваа својата стабилност, при што кредитите и натаму растат, а капиталните позиции на банките се стабилни.

Мерката е времена и е превентивна, со цел натамошно зголемување на отпорноста на банкарскиот систем и одржување на стабилноста, во услови на неизвесност околу понатамошниот тек на здравствената криза.

The post Гошев: Нема добри прогнози за излез од кризата, Народна банка е само претпазлива appeared first on plusinfo.mk.