Во тек е истрага на кипарските власти за пронаоѓање на 56-годишниот руски тајкун Владислав Баумгертнер, поранешен извршен директор на рускиот гигант за вештачки ѓубрива „Уралкали“, кој од средата се води за исчезнат од својот дом во близина на Лимасол, јави дописничката на МИА од Атина.

Кипарската полиција вчера издаде соопштение за неговото исчезнување, објавувајќи фотографија и лични податоци, и упати апел до јавноста за какви било информации што би можеле да помогнат во пронаоѓањето на Баумгертнер.

„Полицијата бара информации што би можеле да помогнат во пронаоѓањето на Владислав Баумгертнер, 56-годишен државјанин на Русија, кој од 7 јануари 2026 година се води како исчезнат од своето место на живеење во Лимасол“, се наведува во полициското соопштение.

Според кипарските медиуми, исчезнувањето го пријавила неговата вработена, која ги известила властите дека Баумгертнер не одговарал на нејзините телефонски повици. Во потрагата, која траела во саботата и вчера, учествувале полициски службеници, припадници на Одделот за истраги и спасување од Лимасол, волонтери, како и хеликоптер и дрон.

Во текот на вчерашниот ден, фокусот на потрагата бил насочен кон западниот дел на Лимасол и областа Писури, каде што бил регистриран последниот сигнал од мобилниот телефон на исчезнатиот бизнисмен.

Кипарските медиуми потсетуваат дека Баумгертнер во 2013 година бил уапсен на аеродромот во Минск и задржан во притвор. Според весникот „Филелефтерос“, неговото апсење било врв на конфликтот меѓу Москва и белоруската влада околу т.н. „картел“ за калиум, по одлуката на „Уралкали“ да ја прекине соработката со државната компанија „Беларускали“.

Баумгертнер тогаш бил обвинет за злоупотреба на службената положба, а во ноември 2013 година бил екстрадиран во Москва, каде што му бил определен домашен притвор и подоцна бил разрешен од функцијата во „Уралкали“. Иако обвиненијата против него биле целосно повлечени во 2015 година, случајот во тоа време бил оценет како политичко заложништво во односите меѓу Владимир Путин и Александар Лукашенко.

Според „Сајпрус тајмс“, Баумгертнер подоцна се вратил во бизнисот, го презел раководството на компанијата „Глобал портс“ и во последните години живеел на Кипар.

Во меѓувреме, кипарските медиуми известуваат и за уште еден случај поврзан со руски државјанин, кој не е поврзан со исчезнувањето на Баумгертнер. Во четвртокот, во просториите на руската амбасада во Република Кипар бил пронајден мртов еден од вработените.

Од руската амбасада денеска соопштија дека станува збор за нивниот колега А.В. Панов, кој починал на 8 јануари 2026 година.

„Неговата смрт е длабоко лична трагедија за неговото семејство и пријателите. На семејството му е пружена сета потребна помош и поддршка. Амбасадата, во соработка со кипарските власти, работи на обезбедување брза репатријација на телото во татковината“, се наведува во соопштението.

The post РУСКИ ТАЈКУН ИСЧЕЗНА НА КИПАР Полицијата трага по 56-годишниот Владислав Баумгертнер appeared first on plusinfo.mk.

Управата за финансиска полиција поднесе кривични пријави до Основното јавно обвинителство Скопје против поранешниот извршен директор на Секторот за воздухопловна техника во М-НАВ АД Скопје, В.К., и против Б.А., в.д. раководител на одделение за јавни набавки, поради сомнение за злоупотреба на службена положба и несовесно работење.

Според Финансиската полиција, првопријавениот В.К. во текот на 2022 година ги споил две целосно различни јавни набавки – за изработка на оперативно софтверско решение за управување со документи и за физичко и електронско архивирање – во една тендерска постапка, со што постапил спротивно на член 89 од Законот за јавни набавки.

„Во тендерската документација се вметнати дискриминирачки и несразмерни критериуми кои претежно се однесуваат на архивирање, а не на софтверско решение, што е спротивно на начелата на сразмерност и конкуренција“, велат од Управата за финансиска полиција.

Од таму појаснуваат дека ваквото постапување резултирало со ограничена конкуренција и доделување на договорот на конкретна фирма – „Контего ДОО Скопје“, со што буџетот на М-НАВ АД бил оштетен за 1.493.433 денари.

Второпријавената Б.А., како единствено овластено лице за водење постапки за јавни набавки, според полицијата, и покрај тоа што била свесна за незаконитоста на документацијата, дозволила нејзина објава и спроведување преку електронскиот систем за јавни набавки.

„Со пропуштање на должен надзор, таа несовесно ги извршувала своите овластувања и придонела кон реализацијата на тендерот којшто бил спротивен на законските прописи“, истакнуваат од Финансиската полиција.

The post ГО ОШТЕТИЛЕ М-НАВ ЗА 1,5 МИЛИОНИ ДЕНАРИ Кривични пријави за поранешен директор и раководителка appeared first on plusinfo.mk.

Од 19 февруари 2022 година до 17 март 2023 година кога бил директор на Фондот, пријавениот Д.Б. во име на Фондот склучил повеќе договори со 6 физички лица постапувајќи спротивно од Законот за спречување корупција и спротивно од одредбите во склучените договори.

Пријавениот знаел дека ангажираните лица не ги извршувале работните задачи предвидени во склучените договори и дека Фондот не водел евиденција за редовност, но сепак повеќепати им исплатил парични средства на трансакциските сметки во вкупен износ од 1.387.558 денари или 22.525 евра на штета на Фондот, односно на Буџетот на Македонија.

The post СКЛУЧУВАЛ НЕЗАКОНСКИ ДОГОВОРИ И ИМ ПЛАТИЛ ПОВЕЌЕ ОД МИЛИОН ДЕНАРИ Поранешен директор на Пензискиот фонд доби кривична пријава поради корупција appeared first on plusinfo.mk.