Иранските власти на државната телевизија емитуваа соопштение за кое тврдат дека доаѓа од Моџтаба Хамнеи, новиот врховен водач на Иран. Во пораката се предупредува дека сите американски воени бази во регионот мора да бидат затворени, во спротивно „ќе бидат нападнати“.

Хамнеи, како што пренесува Би-Би-Си, порача дека Иран нема да се двоуми да „ја одмазди крвта на Иранците“ убиени во војната, нагласувајќи дека одговорност ќе се бара за секоја жртва.

– Ве уверувам дека нема да се воздржиме од одмазда за крвта на нашите маченици. Секој Иранец убиен од непријателот претставува посебен случај во досието на одмаздата – се наведува во пораката.

Ормускиот Теснец ќе се користи како средство за притисок

Во соопштението се истакнува дека затворањето на Ормускиот Теснец, една од најважните светски поморски рути за транспорт на нафта, ќе продолжи да се користи како средство за притисок врз САД и Израел.

Хамнеи исто така порача дека Иран во нападите гаѓа исклучиво странски воени бази во соседните земји, нагласувајќи дека Техеран сака пријателски односи со државите во регионот.

Воедно ги повика земјите од Персискиот Залив да ги затворат американските бази на своја територија.

Соседите да ги затворат американските бази

– Тие држави мора јасно да се определат кон оние што ја нападнаа нашата татковина и го убија нашиот народ. Им препорачувам што поскоро да ги затворат тие бази, бидејќи досега веќе требаше да сфатат дека американските ветувања за безбедност и мир беа ништо повеќе од лаги – порача тој.

Во обраќањето се заблагодари на „народот на Иран од сите слоеви на општеството кој застана против непријателот“, како и на иранските војници кои, како што рече, „со силни удари му го блокираа патот на непријателот“.

Тој исто така изрази сочувство до семејствата кои ги загубиле своите најблиски во војната и порача дека штетата ќе биде надоместена.

– Злосторствата против човештвото, особено оние извршени врз деца, нема да бидат игнорирани – се наведува во пораката.

Нападот врз училиште во Минаб го извршија САД

Хамнеи посебно го издвои случајот со градот Минаб, каде што во американски напад во близина на училиште загинале 168 лица, меѓу нив околу 110 деца.

Иран тврди дека училиштето било погодено од американска ракета, додека САД ја негираа одговорноста и соопштија дека истрагата е во тек. Сепак, првичните процени на американските воени истражители укажуваат дека нападот веројатно бил последица на американски удар заснован врз застарени разузнавачки податоци, додека конечниот заклучок сè уште не е објавен.

Не е познато во каква состојба се наоѓа

Хамнеи не се појави пред камерите, туку пораката ја прочита водител на државната телевизија. Израелските разузнавачки служби претходно проценија дека тој веројатно е ранет во првите напади на почетокот на војната, па засега не е познато во каква здравствена состојба се наоѓа.

Иранските власти не соопштија детали за евентуалните повреди ниту каде се наоѓа Хамнеи во моментов.

Објавена е и негова нова фотографија

Во меѓувреме, на официјалниот Телеграм канал на новиот врховен водач беше објавена и фотографија која, според иранските државни медиуми, го прикажува неговиот ракопис.

На фотографијата се гледа список со имињата на врховните водачи на Иран: Мојтаба Хамнеи, неговиот татко Али Хамнеи, како и првиот врховен водач на Исламската Република, Рухолах Хомеини.

Под списокот се наоѓа кратка рачно напишана порака: „Во името на Бога, Милостивиот, Семилосниот.“

The post СЕ ОГЛАСИ НОВИОТ ИРАНСКИ ВОДАЧ МОЏТАБА ХАМНЕИ Државната телевизија прочита негово соопштение, еве што порача appeared first on plusinfo.mk.

Израелскиот премиер Бенјамин Нетанјаху во видео порака изјави дека војната против Иран ќе продолжи „без прекин и без компромис“.

Тој изјави дека Израел има „организиран план со многу изненадувања“ за следната фаза од конфликтот, со цел, како што рече, дестабилизација на режимот и иницирање промени.

Обраќајќи се на членовите на Иранската револуционерна гарда, Нетанјаху рече:

– Вие сте исто така на нишан. Кој ќе го положи оружјето, ништо нема да му се случи. Кој не го стори тоа, ќе ги сноси последиците.

Тој му порача на иранскиот народ дека „моментот на вистината се ближи“.

– Ние не се обидуваме да го поделиме Иран. Ние се обидуваме да го ослободиме. На крајот, од вас ќе зависи дали Иран ќе биде ослободен – рече Нетанјаху.

Тој рече дека таквото „ослободување на Иран“ може да донесе мир меѓу Израел и Иран.

Тој истакна дека американскиот претседател Доналд Трамп му рекол за време на нивниот состанок во декември дека на Иран мора да му се спречи да добие нуклеарно оружје.

Тој му се заблагодари на Трамп за она што го нарече „историско лидерство“ и рече дека американско-израелскиот сојуз денес е посилен од кога било.

The post НЕТАНЈАХУ ИМ ПОРАЧА НА ИРАНЦИТЕ ДЕКА СЕ БЛИЖИ МОМЕНТОТ НА ВИСТИНАТА Од вас зависи дали Иран ќе биде ослободен appeared first on plusinfo.mk.

Полскиот министер за надворешни работи Радослав Сикорски изјави пред Советот за безбедност на Обединетите нации дека Западот нема да дозволи да биде заплашен и дека НАТО ќе ги соборува сите руски авиони и ракети што ќе го повредат воздушниот простор на Алијансата.

– Ако ракета или авион без дозвола, намерно или случајно, навлезе во нашиот воздушен простор и биде соборен, а остатоците паднат на територија на НАТО, ве молам, не доаѓајте тука да се жалите за тоа. Уште еднаш сте предупредени – рече Сикорски.

Тој ја наведе оваа опасност најавувајќи дека земјите на НАТО „во минатото ѝ дозволувале на Русија карт-бланш“ во такви ситуации, но наместо извинување, како што вели, Москва само лажела.

Според него, повредата на воздушниот простор на земјите-членки на Алијансата е дел од „хибридната војна“ што Русија ја води против Западот веќе со годинии и вклучува ликвидации на политичари, новинари, активисти и бегалци, сајбер-напади на болници и финансиски институции, подметнување пожари во земји како Полска, Велика Британија и Литванија, испраќање запаливи направи низ Европа, вклучувајќи ја Германија, и напади врз украински амбасади.

Сикорски подвлече дека Русија мора да добие јасен сигнал дека таквите провокации нема да бидат толерирани. Обраќајќи се директно до руските претставници, тој рече дека Москва го игнорира меѓународното право.

Неколку недели претходно, дронови беа соборени над Полсква. Москва тврдеше дека не сакала да удри врз полска територија. Полските власти од тогаш нагласуваат дека нападот не бил случаен.

The post „НЕ ДОАЃАЈТЕ ДА СЕ ЖАЛИТЕ АКО ВИ ГИ СОБОРИМЕ ДРОНОВИТЕ“ Полскиот министер изненади со пораката до Москва appeared first on plusinfo.mk.

Русија ги поддржува иницијативите на кинескиот претседател Си Џинпинг за глобално управување и е заинтересирана да започне конкретно разгледување на кинеските предлози, изјави денеска рускиот претседател Владимир Путин на самитот на Шангајската организација за соработка (ШОС) во северниот кинески град Тјенџин.

– Сè повеќе земји се обидуваат да соработуваат со ШОС, а искрениот интерес и вниманието на светската заедница кон оваа организација расте. Здружувањето би можело да стане најважниот фактор во формирањето на пофер систем на глобално управување – рече Путин и повика на враќање на традиционалните вредности на меѓународната агенда.

Претходно, кинескиот претседател Си Џинпинг повика на единство меѓу членовите во која членуваат Русија, Индија, Иран и други земји, кои не се членки на НАТО. Во неговото обраќање во кое го осуди менталтитетот на Студената војна, Џинпинг ниту еднаш директно не ги спомна САД.

– Треба да се спротивставиме на менталитетот на Студената војна и на конфронтацијата на блоковите, како и на актите на заплашување – изјави Џинпинг.

Самитот во Тјенџин ѝ претходи на големата парада за Денот на победата кој се слави во Кина на 3 септември.

Според Џинпинг, земјите во ШОС заедно генерираат годишен економски производ од речиси 30 милијарди долари.

Руските медиуми пишуваат дека вкупниот БДП на земјите од ШОС расте побрзо од светскиот просек и покрај тешкотиите во глобалната економија. Во ШОС се и економиите на Иран и на Индија.

Меѓу земјите кои учествуваат на самитот на ШОС се и Азербејџан, Египет, Индонезија, Турција, како и АСЕАН, Евроазиската економска унија, ОДКБ и ЗНД.

The post КИНА ПРЕДЛОЖИ НОВ СВЕТСКИ ПОРЕДОК, РУСИЈА Е „ЗА“ Организацијата ШОС генерира 30 милијарди долари годишно appeared first on plusinfo.mk.

Портпаролката на руското Министерство за надворешни работи Марија Захарова изјави дека европските политички елити имаат потреба од „непријател“ врз кого ќе ја префрлат вината за своите проблеми и неуспеси.

Таа оцени дека против Русија се води кампања на клевети, поттикната од постојани провокации, фалсификати и отворени лаги, со цел да се оправда агресијата и да се канализира негативноста во општеството.

– Во услови на акутна социо-економска криза, современите евроелити имаат витална потреба од непријател врз кого ќе ги префрлат сите проблеми и ќе ги прикријат сопствените неуспеси. Обидите за наметнување антируска, русофобична матрица на свеста продолжуваат, а важно е да се разбере дека нејзината изградба и промоција траат со векови – изјави Захарова во интервју за рускиот портал Експерт.

Таа додаде дека евроатлантските центри и понатаму сонуваат за нанесување стратешки пораз на Русија и се подготвени на сè за да ја остварат таа цел.

– Рацете на Западот го создадоа и негуваа неонацистичкиот режим во Киев, фокусиран на уништување на сè што е руско. Блицкригот против нашата земја пропадна, санкциите пропаднаа, а вооружувањето на киевските насилници не може да ја промени ситуацијата на фронтот – рече Захарова.

Таа оцени дека Русија, по распадот на СССР и турбулентните 90-ти, повторно зајакнала и го пронашла својот глас на меѓународната сцена, но, без причина, била ставена во редот на „оската на злото“.

– Само затоа што се осмеливме да имаме свое мислење, да го браниме суверенитетот и да ја кажеме вистината за убиствените авантури на Западот во Југославија, Ирак, Либија, Сирија, Украина итн. Милиони луѓе станаа жртви на тие злосторства – тоа е факт. Но, ако ги слушате западните политичари, чии раце се до лактите во крв, и контролираниот печат, ќе помислите дека ништо не се случило – вели Захарова.

The post „ВИ ТРЕБА НЕПРИЈАТЕЛ ДА ГИ СКРИЕТЕ НЕУСПЕСИТЕ“ Захарова ѝ порача на ЕУ дека нема да молчат appeared first on plusinfo.mk.

Кинескиот претседател Си Џинпинг повика на деескалација на конфликтот меѓу Иран и Израел, а со тоа, во разговор со рускиот претседател Владимир Путин, испрати речиси отворена порака до американскиот претседател Доналд Трамп, кој моментално размислува за вклучување на САД во војната, објави Си-Ен-Ен.

Според кинеското Министерство за надворешни работи, Си рекол дека „меѓународната заедница, особено големите сили кои имаат посебно влијание врз страните во конфликтот, треба да работат на смирување на ситуацијата, а не обратно“.

Иако не ги спомена експлицитно САД, пораката беше јасно упатена до Вашингтон. За време на разговорот, Си повика на итно прекин на огнот, апелирајќи до двете страни да ги запрат нападите, но „особено до Израел“.

Порака за Трамп да не влегува во војна со Иран стигна и од дворецот Кремљ во Москва.

Портпаролот на Кремљ, Дмитриј Песков, изјави дека интервенцијата на САД во конфликтот би означила „страшна спирала на ескалација“, објави Интерфакс.

Техеран исто така ги предупреди САД да не интервенираат во војната.

„Доколку САД сакаат активно да интервенираат во поддршка на ционистичкиот режим, Иран ќе мора да ги користи своите алатки за да им одржи лекција на агресорите и да ја брани својата национална безбедност и интереси“, изјави заменик-министерот за надворешни работи Казем Гарибабади, според државната телевизија на Иран.

The post ПОРАКА ОД МОСКВА И ПЕКИНГ ЗА ТРАМП Американски напад врз Иран ќе значи опасна ескалација appeared first on plusinfo.mk.

„До претседателот на САД, Доналд Трамп. Играме за мир“.

Вака напиша светската фудбалска легенда Кристијано Роналдо на дресот што му беше даден на претседателот на САД, Доналд Трамп. Дали Роналдо сакаше да му испрати порака на Трамп во време кога војуваат Израел и Иран?

Дресот на Трамп му беше врачен од шефот на Европскиот совет Антонио Кошта за време на самитот на земјите Г7 во Канада. Трамп на самитот одби да ја потпише заедничката изјава на земјите за конфликтот во Иран и го напушти настанот предвреме.

Денеска, 18 јуни, западните медиуми пишуваат дека Трамп размислува да се вклучи во војната на страната на Израел и дека имал 90-минутен состанок со својот тим во врска со ова прашање.

Cristiano Ronaldo has personally sent a signed shirt for United States president Donald Trump.

“To President Donald J. Trump, playing for peace” pic.twitter.com/XxrrqqoCzq

— The Touchline | Football Coverage (@TouchlineX) June 17, 2025

The post 📷 РОНАЛДО ПРЕКУ ДРЕС МУ КАЖА ШТО МИСЛИ НА ТРАМП Мировна порака во време на војна appeared first on plusinfo.mk.

Министерот за дигитална трансформација, Стефан Андоновски, преку објава на својот Фејсбук профил информираше дека се забрануваат дури 173 нови нелегални приредувачи на онлајн игри на среќа.

Со оваа мерка, како што истакна министерот, се зајакнува дигиталната безбедност и се испраќа јасна порака до сите нелегални оператори дека државата нема да дозволи активности што ја загрозуваат безбедноста и довербата на граѓаните.

„Апелирам до досегашните играчи, во најбрз можен рок да ги повлечат сите депонирани средства и да не се подведуваат на лажните и манипулативни е-маил пораки кои ги наведуваат да ги користат овие нелегални страници на несигурен и небезбеден начин. Никој не може да нè заштити ако не се заштитиме сами!“, напиша министерот Андоновски.

Со зголемениот број на нелегални страници што нудат игри на среќа, Министерството предупредува дека е потребна исклучителна внимателност, особено кај младите корисници кои можат да станат жртви на измами, губење средства и злоупотреба на лични податоци.

Министерот најави и натамошна координација со институциите за целосно искоренување на нелегалните онлајн оператори, како и за развој на сигурен и регулиран дигитален простор во Македонија.

The post ЗАТВОРЕНИ 173 НЕЛЕГАЛНИ СТРАНИЦИ ЗА КЛАДЕЊЕ Андоновски предупредува, граѓаните веднаш да ги повлечат парите appeared first on plusinfo.mk.

Украина треба да прифати дека нема да ги врати своите граници од времето на Советскиот Сојуз или од почетокот на руската инвазија во 2022 – порача Валери Залужни, поранешниот врховен командант и сегашен амбасадор во Лондон.

– Се надевам дека овде нема луѓе што уште веруваат во чудо. Ни 1991, ни 2022 нема да се вратат. Нема да има магична среќа – рече Залужни на форум во Киев, пренесе РБК Украина.

Неговата изјава доаѓа во време кога Киев сè повеќе зборува за примирје, а сè помалку за враќање на целата територија, иако Зеленски и натаму официјално бара враќање на Крим и сите други области под руска контрола.

Залужни беше сменет во февруари 2024 по несогласувања со Зеленски. Но и покрај тоа, остана еден од најпопуларните украински политичари. Во истиот период, рејтингот на Зеленски порасна по остриот судир со Доналд Трамп во Белата куќа.

– Непријателот сè уште има ресурси и може да продолжи со напади – додаде Залужни.

Анкетите покажуваат дека Залужни е еден од најпопуларните украински политичари. Анкетите, исто така, покажуваат дека рејтингот на Зеленски е зголемен по судирот со американскиот претседател Доналд Трамп на состанокот во Белата куќа во февруари.

Залужни беше разрешен од должноста во февруари 2024 година, во време кога неговата популарност ја надминуваше онаа на претседателот Володимир Зеленски. Несогласувањата меѓу двајцата се продлабочија по неуспешната украинска контраофанзива во 2023 година и по изјавите на Залужни дека војната влегла во фаза на исцрпување, што беше во спротивност со оптимистичките пораки на претседателот.

Откако беше разрешен, Залужни во март 2024 година беше назначен за украински амбасадор во Велика Британија.

The post НЕМА ДА СЕ ВРАТИ УКРАИНА ОД 2022, НИТУ ОД 1991 ГОДИНА Ривалот на Зеленски испрати брутално искрена порака appeared first on plusinfo.mk.

Поранешниот американски претседател Џозеф Бајден се огласи на социјалните мрежи откако јавноста беше информирана дека му е дијагностициран агресивен рак на простата, кој веќе се проширил на неговите коски.

„Како и многумина од вас, и јас и Џил откривме дека сме најсилни во најтешките моменти. Ви благодариме што нè бодрите со вашата љубов и поддршка“, напиша Бајден на својот официјален профил, со што испрати силна лична порака до сите кои изразија грижа и поддршка.

Веста ја потврди и неговиот кабинет, соопштувајќи дека ракот е во напредна фаза. Медицинскиот тим ја следи состојбата и се подготвува понатамошен план за лекување.

БАЈДЕН ИМА РАК НА ПРОСТАТА Болеста му се проширила на коските

The post „ВИ БЛАГОДАРИМЕ ШТО НЀ БОДРИТЕ СО ЉУБОВ И ПОДДРШКА“ Бајден со емоционална порака до нацијата appeared first on plusinfo.mk.